Mihringte siam an nih aṭang khân, Siamtu chuan vântirhkohte leh zâwlneite hmangin mihringte chu a be ṭhîn a. Chu bâkah, a thuchah leh a thutiam malsâwmnate chu lehkhabuah ziakin a dah ṭha a. Chûng Pathian thutiamte chu nakin huna kan hlimna tûr a ni. A nih leh, tûn laiah Pathian thutiamte chu khawiah nge i hmuh theih?

Kan tâna Pathian thuchah chu Bible-ah a chuang a. (2 Timothea 3:16) Pathianin a thuchah ziak tûrin zâwlneite chu engtin nge a hman? (2 Petera 1:21) Pathianin a ngaihtuahnate chu Bible ziaktute rilruah a dah a; tichuan, anni’n chûng thute chu an ziak a ni. Tûn laiah pawh chutiang bawk chu a ni a. Company neituin a lehkha thawn ziak tûrin a secretary chu hmang mah se, chu lehkha thawn chu company neitu hnên aṭanga lo kal a ni tih kan pawm ngei ang. Chutiang bawkin, Pathianin mihringte chu a thuchah ziak tûrin hmang mah se, ani chu Pathian Lehkha Thu Thianghlim Ziaktu dik tak a ni.

Pathian thuchah chu a pawimawh êm avângin, ani chuan mi zawng zawng chu chhiar tûr leh hre thiam tûrin a duh a. Tûn laiah, Pathian hnên aṭanga lo kal “chatuana chanchin ṭha” chu “hnam tinrêng te, chi tinrêng te” hmuh theihin a awm a ni. (Thu Puan 14:6) Pathian malsâwmna avângin, A Thu Thianghlim chu a bu pumin emaw, a ṭhen lai emaw ṭawng 3,000 aia tama hmuh theih a ni a, chu chu khawvêla hmuh theih lehkha bu dangte aiin a tam zâwk daih a ni.