I Nakin Hun Tûr Chu Engin Nge Hril?
Mi tam tak chuan an nakin hun chu hmuh theih loh chaknate’n a thunun niin an ring a. Chu an rinna ṭanchhan chuan, an nun tihmasâwn theitu nia an ngaih thilte chu an ti ta ṭhîn a ni.
MI TAM TAK RIN DAN
ARSI HMANGA AIENNA: Mi ṭhenkhat chuan an nakin hun tûr chu an pian laia arsite intlar dânah a innghat niin an ngai a. Chuvângin, an chunga thil lo la thleng tûrte hriat nân leh chhiatna lo thleng tûrte pumpelh a, hlawhtlinna an neih theih dân tûr hriat nân arsi hmanga aien thiamte leh horoscope-te chu an râwn ṭhîn a ni.
FENG SHUI: Mi dangte chuan hlawhtlinna bulpui chu hmuh theih loh chaknate nêna inrema kan chhehvêla thil awmte dah hi a nih an ring a. Hong Kong-a awm Lo Wing-a * chuan, “Feng shui puithiam pakhat chuan ka lehkhabu chhuara hmun pakhatah lunghlu ka dah a nih chuan sum tam zâwk ka thawh chhuah tûr thu min hrilh a ni,” tiin a sawi.
THLAHTUTE BIAKNA: Mi dang lehte chuan an thlahtu thi tawhte leh an pathian chi hrang hrangte hnên aṭanga vênhimna leh malsâwmna an dawn theih nân, anni chu an tihlâwm a ngai niin an ring a. Vietnam rama awm Van-i chuan, “Min thlahtu thi tawhte chunga zahna lantirna chuan, nun ṭha zâwk leh ka fate nêna nakin hun muanawm tak min neihtir theih ka ring a ni,” tiin a sawi.
PIANCHHAWNNA: Mi tam tak chuan nunna, thihna, leh pianchhâwnna hi tâwp nei lovin a kal kual reng niin an ring a. Anni chuan tûna an dawn thil ṭhate leh thil ṭha lote hi an nun hmasaa an thiltih rah chhuah a nih an ring a ni.
Mi tam tak erawh chuan chutiang ngaih dân chu puithuna angin an ngai a. Mahse, kutze en te, horoscope te, Ouija® boards an tih thlarau zâwlna nêna inkûngkaih infiamna te, tarot card-te, leh chutiang lam thiltihnaahte chuan an inhnamhnawih leh lawi si. Chûng thiltihte chuan an nakin hun tûr hre tûra a ṭanpui theih an ring a ni.
A RAH CHHUAHTE CHU ENG NGE NI?
Chutiang ngaih dân ringtute leh thiltihte ti ṭhîntute chuan nun nuam tak leh nakin hun muanawm tak chu an nei em?
Vietnam rama awm Hào-a thiltawn hi han ngaihtuah teh. Amah kaihruaitu atân arsi hmanga aien thiamte a râwn a, feng shui zirtîrna a rin bâkah, an thlahtute chu a be ṭhîn a ni. A hlawhtling em? Hào-a chuan, “Ka sumdâwnna a tlâkchhiat avângin leiba ka nei a, chhûngkuaah buaina kan neih bâkah, ka rilru a hah hle bawk,” tiin a sawi.
Taiwan-a awm Qiuming-a pawhin arsi hmanga aien te, pianchhâwnna te, ruat lâwkna te, feng shui te, leh thlahtute biaknate chu a ring a. Chûng thilte ngun taka a zir chian hnu chuan: “Chûng zirtîrnate leh thiltihte chu pakhat leh pakhat a inkalhin, hriatthiam a harsa hle tih ka hre ta a. Arsi hmanga hrilh lâwknate pawh a dik lo fo tih ka hre bawk. Pianchhâwnna chungchângah chuan, i nun hmasaa thilthlengte mah i hriat tawh loh chuan, engtin nge i pianchhâwn hunah inthlâkthlengna siama nun nuam tak i neih theih tehlul ang?” tiin a sawi a ni.
“Chûng zirtîrnate leh thiltihte chu pakhat leh pakhat a inkalhin, hriatthiam a harsa hle tih ka hre chhuak.”—QIUMING-A, TAIWAN
Hào-a, Qiuming-a, leh mi dang tam takte chuan kan nakin hun hi ruat lâwknaah te, arsi-ah te, thlahtu thi tawhah te, leh pianchhâwnnaahte a innghat lo tih an hre chhuak a ni. A nih leh, chu chu kan nakin hun tûr chungchângah tih theih eng mah kan nei lo tihna a ni em?
Mi tam tak chuan nakin hun ṭha zâwk neihtîr theitu chu zir sânna leh hausakna ûm hi niin an ngai a ni. Chutiang thilte ûmtu mi ṭhenkhat chungah eng thil nge thleng?
^ par. 5 He thuziak leh a dawta thuziaka târ lan hming ṭhenkhat chu thlâk a ni.
^ par. 16 Chumi chungchâng chu Bible-a Galatia 6:7-ah kan hmu a. Chu lai thu chu ṭanchhanin khawchhak thufing lâr takah chuan hmazil i tuh chuan hmazil vêk i thar ang a; bean i tuh chuan, bean vêk i thar bawk ang, tia sawi ṭhin a ni.
You May Also Like
VENNAINSANG
Arsi Hmanga Aienna leh Hma Lam Hun Sawi Lâwkna—Hma Lam Hun Hriat Theihna A Ni Em?
Chutiang sawi lâwkna ang chite chu i ring ngam ang em?
