Thuziak hmasaa kan hriat tâk ang khân, mite chuan nakin hun ṭha zâwk an neih theih nân ruat lâwkna te, zir sânna te, hausakna te, leh mi ṭha nihnaahte rinna an nghat a. Mahse, chûngte rinchhanna chu kan tum ram thleng tûra map dik lo hman ang a ni. A nih chuan, nakin hun muanawm tak nei tûrin kaihruaitu rin tlâk a awm lo tihna a ni em? Ni lo ve!

Thu tlûknate kan siam hian, kan aia upa zâwk leh fing zâwk tu emaw chu kan râwn tlângpui ṭhîn. Chutiang bawkin, kan nakin hun atâna kaihhruaina rinchhan tlâk tak chu kan aia a lêt tam taka upa zâwk leh fing zâwk Mi Pakhat hnên aṭangin kan hmu thei a ni. A hnên aṭanga fuihna kan dawnte chu kum 3,500 vêl kal ta aṭanga ziah ṭan lehkhabu thianghlimah hmuh theih a ni a. Chu lehkhabu thianghlim chu Bible hi a ni.

Engvângin nge Bible hi i rinchhan theih? A Ziaktu chu lei leh vâna upa ber leh fing ber a nih vâng a ni. Ani chu “chatuan ata chatuan thleng” pawha awm reng, “Hmâkhawsânga” tia sawi a ni a. (Daniela 7:9; Sâm 90:2) ‘Vân siamtu Pathian, leilung hi dina siamtu’ pawh a ni bawk. (Isaia 45:18) Ani chuan a hming bil chu Jehova a ni tih min hrilh a ni.—Sâm 83:18.

Bible hi mi zawng zawng Siamtu hnên aṭanga lo kal a nih avângin, a chhûng thu-ah hian hnam khat chu a dangte aia duhsak bîkna a chuang lo. A fuihna thute chu eng lai pawhin a hman tlâk reng a, hmun tina mite’n an hlâwkpui a ni. Bible chu lehkhabu dang zawng aia ṭawng chi hrang tam zâwka lehlin leh darh zau zâwka sem chhuah a ni a. * Chu chu mi zawng zawngin awlsam taka an hriatthiam theih bâkah, a kaihhruainate pawh an dawng thei tihna a ni. Chûngte chuan a hnuaia Bible châng sawi hi a thlâwp a ni:

“Pathianin mi duhsak bîk a nei lo tih dik takin ka hria e; nimahsela, hnam tin zîngah tu pawh amah ṭiha, fel taka ti apiang a lâwm zâwng mi an ni ṭhîn,” tih hi.—TIRHKOHTE 10:34, 35.

Ngaihsakna nei tak nu leh pate’n an fate tân kaihhruaina an pe ṭhîn angin, hmangaihna nei tak Pathian Jehova chuan a Thu, Bible hmangin ṭanpuinate min pe a. (2 Timothea 3:16) A Thu, Bible chu i rinchhan thei a ni; dik tak chuan, min siamtu a nih avângin, kan tâna nun kawng ṭha ber tûr chu a hria a ni.

Chutiang nakin hun duhawm tak nei tûr chuan, eng nge i tih ngai ta? A dawta thuziak hi chhiar zawm ang che.