Mi tam tak chuan lehkha thiamte leh mi hausate hian nakin hun muanawm tak an nei niin an ngai a. Zir sânna chuan mi chu hnathawktu ṭha zâwk, chhûngkuaa mi ṭha zâwk, leh khua leh tui ṭha zâwk ni tûra a ṭanpui theih an ring a. Zirna ṭha chuan sum tam tak lâk luh theihna hna a hmuhtîr theiin, sum leh pai tam tak la lût theite chu an hlim an ring a ni.

China rama awm Zhang Chen-a sawi hi lo ngaihtuah teh. Ani chuan, “Retheihna khur ata chhuak tûr chuan university aṭanga degree ka lâk a ngai niin ka ring a, sum tam tak hmuh theihna hna chuan nun nuam tak leh lungawithlâk tak min neihtîr theih ka ring bawk,” tiin a sawi.

Mi tam tak chuan nun nuam zâwk an neih theih nân tiin, ram chhûng leh ram danga university hmingthang tak takahte an kal a. Chu chu COVID-19 hripui a lên hnu, ram danga khual zin a harsat hma zawng kha chuan a lâr hle a ni. Kum 2012-a Organisation for Economic Co-operation and Development chuan: “Ram danga lehkha zira awm zirlai zawng zawng zînga a zâtve aia tam chu Asia rama mite an ni,” tiin a târ lang a ni.

Nu leh pate chu an fate’n ram danga university an kal theih nân nasa takin an inpe a. Taiwan-a awm Qixiang-a chuan: “Ka nu leh pate chu mi hausa an ni hran lo; mahse, kan unau liin, United States ramah college min kaltîr vek,” tiin a sawi. An chhûngkua chuan chhûngkaw dang tam tak ang bawkin, chutiang zirna atân leiba tam tak an neih phah a ni.

Zir sânna chuan kawng ṭhenkhatah nun chu a tihmasâwn thei ngei mai; mahse, zirlaite beisei angin rah ṭha a chhuah reng lo a ni. Entîr nân, mi tam tak chuan kum eng emaw zât theih tâwp an chhuah hnuah leh leiba tam tak an neih hnuah pawh, an beisei ang hna an la hmu thei chuang lo. Singapore’s Business Times-a ziaktu Rachel Mui-i chuan: “Hnathawh tûr nei lo graduate an pung telh telh niin a lang,” tiin a sawi. Taiwan-a awm doctor zir chhuak Jianjie-a pawhin, “Mi tam tak chuan an degree lâk nêna inmil lo hna pawm mai loh chu duh thlan tûr dang an nei lo,” tiin a sawi bawk.

An degree lâk nêna inmil hna hmutute pawhin an nun chu an beisei ang a ni lo tih an hria a. Thailand rama awm Niran-a chuan United Kingdom-a university a zir zawha an rama a kîr leh chuan, a degree lâk nêna inmil hna a hmu a. “Ka beisei angin ka degree lâk chuan sum tam tak lâk luh theihna hna chu min hmuhtîr ngei mai. Mahse, hlawh a tam poh leh hnathawh tûr a tam lehzual a, chumi atân hun tam zâwk ka pêk a ngai a ni. A tâwpah, ka hnathawhna company chuan kei pawh telin, hnathawktu tam tak a bân a. Eng hna mah hian nakin hun muanawm tak a pe thei tak tak lo tih ka hre thiam ta a ni,” tiin a sawi.

Sum leh pai tam tak neite pawhin chhûngkaw buaina te, hrisêl lohna te, leh sum leh pai avânga lungkhamnate an la nei tho a ni. Japan rama awm Katsutoshi-a chuan, “Sum leh pai tam tak nei mah ila, mite’n min îtsîk avâng leh ṭha lo taka min cheibâwl avângin ka hlim chuang lo,” tiin a sawi. Vietnam rama awm Lam-i pawhin, “Mi tam tak chuan sumin himna a neihtîr theih an rin avângin, sum tam tak thawh chhuah tumin an bei a; mahse, a nihna takah chuan, chu chuan a hma zawng aia nasain lungkhamna te, hrisêl lohna te, leh rilru hahna nasa takte a thlen zâwk mah a ni,” tiin a sawi.

Franklin-a angin, mi tam tak chuan nunah hian zir sânna leh sum leh pai ûm mai aia tam tih tûr a awm tih an hria a. Mi ṭhenkhat chuan nakin hun muanawm tak an neih theih nân hausak tum aiin, mi ṭha tak nih leh mi dangte tâna thil ṭha tihsak chu an tum a ni. Chutiang nun kawng chuan nakin hun muanawm tak a neihtîr thei ang em? A dawta thuziakah chhân a ni ang.