1-3. Euodii leh Suntuki te inkâra thil thleng chu eng nge ni thei? Engtin nge chutiang buainate chu pumpelh theih a nih? (A thupui chunga milem en rawh)

BIBLE hi Pathian Lehkhabu a ni tih kan hriat avângin kan ngai hlu hle a. Bible-ah chuan buainate pumpelh tûra min ṭanpui thei thurâwn a chuang a, chu chuan thil kan tihsual hunah min siam ṭha thei a ni. Chu thurâwn chu engtin nge kan chhân lêt? Kum zabi khatnaa hriak thih hmeichhe pahnih Euodii leh Suntuki chungchâng hi han ngaihtuah teh. Bible chuan an inhnial tih a sawi a; mahse, a chhan erawh min hrilh lo. Thil thleng theite chu i lo ngaihtuah ang u.

² Euodii chuan unau ṭhenkhat chu a ina chaw ei tûrin a sâwm a ni thei. Mahse, Suntuki chu a sâwm lo va. A hnuah mi dangin an chaw ei chungchâng an sawi Suntuki’n a hriat chuan a lungni lo hle a. Heti hian a ngaihtuah mai thei: ‘Euodii’n chaw eia min sâwm ve lo hi rin harsa ka va ti tak êm! Ṭhian ṭha tak kan ni emaw ka lo ti a,’ tiin. Suntuki chuan Euodii’n ngaina lo nia a inhriat chuan a kâwm tawh lo va. Euodii chaw ei sâwmte chu a sâwm ve leh a, Euodii erawh a sâwm lo a ni. He thil thleng hian kohhrana mi dangte  pawh a tilungni lo thei a. Paula’n unaunu pahnihte chu zilhin, inrem tûrin a fuih tih Bible chuan a târ lang a. Anni chuan a thu âwihin, hlim takin Jehova rawng an bâwl zawm a ni.—Philippi 4:2, 3.

³ Tûn laiah pawh kan kohhranah, unaupa emaw, unaunu emaw nên buaina neih châng kan nei mai thei a. Bible thurâwn ka zawm chuan chutiang buaina chu kan chingfel thei a ni. Dik takin, chûng buainate chu kan pumpelh thei a. Chu bâkah, Bible sawite kan zawm chuan Jehova Lehkhabu kan hlut tak zet tih kan târ lang a ni.—Sâm 27:11.

4, 5. Kan rilru thununna chungchângah Pathian Thu chuan eng thurâwn nge min pêk?

⁴ Kan rilru thunun chu a awlsam reng lo va. Tuemawin kan hnam dân te, kan vun rawng te, leh kan lan dânte avângin min hmuhsitna thu a sawi emaw, dik lo takin min cheibâwl emaw a nih chuan kan lunghnualin, kan thinur mai thei a. Chu bâkah, min hmusittu leh min cheibâwl ṭha lotu chu kan unaute an nih chuan kan rilru a na lehzual thei a ni. Pathian Thuah min ṭanpui thei eng thurâwn nge kan hmuh?

⁵ Jehova chuan mihringte’n an rilru an thunun loh huna thil thleng theite chu a hria a. Kan lungnih loh hun leh kan thinur hunte hian a hnua kan inchhîr lehna tûr thu kan sawiin, thil kan ti thei a. Bible-ah Jehova chuan kan rilru thunun tûra min zirtîrin: “I rilruah thinur hmanhmawh suh,” tiin min hrilh a ni. Chu thurâwn chu zâwm a, kan lunghnual mai loh huna buaina tam tak kan pumpelh dân chu han ngaihtuah lawk teh! (Thuhriltu 7:9; Thufingte 16:32 chhiar rawh.) Bible chuan mi dangte ngaidam tûrin min hrilh bawk a. A nihna takah chuan, mi dangte kan ngaihdam loh chuan Pathian Jehova’n min ngaidam lo vang tih Isua’n a sawi. (Matthia 6:14, 15) Dawhtheihna leh mi dangte ngaihdam duhna i neih lehzual a ngai em?

6. Kan rilru kan thunun loh chuan eng thil nge thleng thei?

⁶ Kan rilru kan thunun loh chuan thinurna kan pai rengin, tuemaw huatna kan nei ṭan thei a. A nih loh leh, kohhrana mi ṭhenkhat chu chutiang rilru nei ve tûrin kan thunun thei a ni. Kan thinrimna leh huatna thup kan tum a nih pawhin a tâwpah mi dangte’n kan rilru put hmang chu an hre chhuak ang. Tichuan, kan unaute chuan min kâwm duh tawh lo thei a ni. (Thufingte 26:24-26) Upate chuan Bible hmangin thinurna leh huatnate nuai bo tûr leh mi dangte ngaidam tûrin min ṭanpui ang. (Leviticus 19:17, 18; Rom 3:11-18) Chutianga an tih hunah Jehova Lehkhabu aṭanga kaihhruaina chu kan zui ang em?

7, 8. (a) Engtin nge Jehova’n a mite chu a kaihhruai? (b) Bible-a kan hmuh kaihhruaina ṭhenkhat chu eng nge ni a, engvângin nge chûngte chu kan zawm ang?

⁷ Jehova chuan tûn laiah lei lama a inawpna pâwlte chu kaihruaiin a zirtîr a. Engtin nge? Ani chuan Krista chu “kohhranho lû” ni tûrin a ruat a, Krista chuan “bawi rinawm fing tak” chu Pathian mite zirtîr a, kaihruai tûrin a ruat a ni. (Ephesi 5:23; Matthaia 24:45-47) Kum zabi khatnaa governing body angin, chu bâwih chuan Bible chu Pathian Thu a nih avângin a hlut tak zet a. (1 Thessalonika 2:13 chhiar rawh.) Bible-a kan hmuh kaihruaina ṭhenkhat chu eng nge ni?

⁸ Bible chuan inkhâwm ziah tûrin min zirtîr a. (Hebrai 10:24, 25) Chu chuan Bible zirtîrna thuhmun ring tûrin min fuih ṭheuh a ni. (1 Korinth 1:10) “A Ram . . . zawng hmasa,” tûrin min hrilh bawk. (Matthaia 6:33) Bible chuan in tinah te, vângtlâng hmunah te, leh mi kan hmuh theihna apiangahte thu hril tûrin  min zirtîr a. (Matthaia 28:19, 20; Tirhkohte 5:42; 17:17; 20:20) Upate chu kohhran vawng thianghlim tûrin a kaihruai a ni. (1 Korinth 5:1-5, 13; 1 Timothea 5:19-21) Chu bâkah, Bible chuan kan taksate vawng thianghlim a, Jehova huat zâwngte ngaihtuahnate leh chîn dânte pumpelh tûrin min zirtîr a ni.—2 Korinth 7:1.

9. Pathian Thu hre thiam tûra min ṭanpui tûrin Isua’n tute nge a ruat?

⁹ Mi ṭhenkhat chuan Bible thute hre tûra mi dangin an hrilhfiah a ṭûl lo niin an ngai mai thei a. Mahse, kum 1919 aṭang khân, Pathian mite’n Bible zirtîrnate an hriatthiam a, an zawm theih nân Isua chuan “bawi rinawm, fing tak” chu a hmang a ni. Bible zirtîrna kan zawm chuan kohhran thianghlimna, remna leh inlungrualna kan vawng ang. Heti hian in zâwt rawh: ‘Bâwih rinawm leh fing kaihhruaina zâwmin Isua chungah ka rinawm ang em? tiin.

10. Ezekiela lehkhabu hian Jehova vân lam inawpna pâwl chu engtin nge a târ lan?

¹⁰ Jehova vân lam chhiahhlawhte pawh fel takin an inruahman tih Bible aṭangin kan hria a. Entîr nân, Ezekiela chuan Jehova duhna lam apianga che sawn nghâl thei tawlailîr chunga chuang Jehova inlârna a hmu a ni. (Ezekiela 1:4-28) Tawlailîr chuan vân lama Pathian inawpna pâwl chu a entîr a, chu chuan a kaihhruaina a zui nghâl a ni. Chu bâkah, lei lama a inawpna pâwl pawh a thunun a. Kum sâwm kaltaa, Pathian inawpna pâwla inthlâkthlengna tam tak chu han ngaihtuah teh. Chûng inthlâkthlengna chu Jehova’n a kaihruai tih hre reng ang che. Reilo têah Krista leh vântirhkohte chuan he khawvêl suaksual tak hi an ti boral ang a. Jehova leh a hming sawichhetute leh a rorêlna sawisêltu tumah an awm tawh lo vang!

11, 12. Jehova inawpna pâwl chuan ni hnuhnûngah eng thilte nge a tih?

¹¹ Jehova inawpna pâwlin he ni hnuhnûnga a thiltihte hi han ngaihtuah teh. In sakna. Unau za têlte chu Warwick, New York, U.S.A-a Jehova Thuhretute headquarter thar saknaah an thawkrim hle a. Khawvêl pum huapa mahni duh thua inpe mi dang a sâng têlte’n Kingdom Hall leh branch offices-te an sa a ni. Chûng mahni duh thua inpete chu Worldwide Design/Construction Department chuan a kaihhruai a. Chûng in saknaa rim taka thawktu tam takte chungah chuan kan va lâwm tak êm! Chu bâkah, hmun tina Jehova chhiahhlawhte chuan hêng in sakna atân hian an theih ang angin ṭanpuina an pe thei a. Jehova chuan a mite’n inngaihtlâwmna leh rinawmna an lantîr avângin mal a sâwm a ni.—Luka 21:1-4.

¹² Zirna. Jehova chuan a mite zirtîr chu a duh a. (Isaia 2:2, 3) School chi hrang hrang kan neihte hi han ngaihtuah teh. Chu chu Pioneer Rawngbâwlna School te, Lalram Chanchin Ṭha Puangtute School te, Gilead School te, Bethel Entrant School te, Bial Kantute leh An Nupuite Tâna School te, Kohhran Upate Tâna School te, Lalram Rawngbâwlna School te, leh Branch Committee Member-te leh An Nupuite Tâna School te a ni a. Kan website jw.org-ah ṭawng za chuangin Bible leh thu leh hla chhuah dangte kan hmu thei a. Kan website-ah chuan thil chhuah tharte târ lanna bâkah, naupangte leh chhûngkua tân bîka tih chhuah a awm bawk. I rawngbâwlnaah leh chhûngkuaa Pathian biaknaah jw.org i hmang tawh em?

13. Jehova mite chuan eng mawhphurhna nge an neih?

¹³ Jehova inawpna pâwla awm leh a thil mi phûtte hriat chu chawimawina a va ni êm!  Pathian lâwm zâwngte kan hriat avângin a thu âwih tûr leh thil dik tak ti tûrin mawhphurna kan nei a. Mi tam takte’n thil sual tih an duh laiin, keini chuan Pathian Jehova angin, “sual” kan haw tûr a ni. (Sâm 97:10) “Thil ṭha lo chu thil ṭha tia, thil ṭha chu thil ṭha lo,” titu ang kan ni ngai lo vang. (Isaia 5:20) Jehova tihlawm kan duh avângin kawng tin rengah thianghlim kan tum tlat a ni. (1 Korinth 6:9-11) Jehova’n Bible-a min hrilhte chu kan tâna ṭha tûr a ni a. Ani chu kan hmangaih a, a chunga rinawm kan duh a ni. Chuvângin, inah te, kohhranah te, hnathawhnaah te, school-ah te, leh kan awmna hmun apiangah a kaihhruaina chu kan zui a. (Thufingte 15:3) Pathian chunga kan rinawm a ngaihna hmun ṭhenkhat chu ngaihtuah rawh.

14. Engtin nge nu leh pate chu Jehova chunga an rinawm theih?

¹⁴ Kan fate kan zirtîr dân. Jehova chuan nu leh pate chu an fate zirtîr dân tûr Bible hmangin kaihhruaina a pe a. Kristiante chu he khawvêla hluar tak ngaihtuah dânte thununa awm lo tûrin an fîmkhur tûr a ni. (Ephesi 2:2) Entîr nân, hmun ṭhenkhatah chuan pa berin: ‘Hetah hian, hmeichhiate’n alâwm fate zirtîr,’ tiin a ngaihtuah mai thei a. Mahse, Bible chuan pate chu Pathian Jehova chungchâng an fate an zirtîr tûr a ni tih chiang takin a sawi a. (Ephesi 6:4) Jehova hmangaihtu nu leh pate chuan an fate chu Samuela naupan laia neih ang Jehova nêna inṭhianna hnai tak nei tûrin an duh a ni.—1 Samuela 3:19.

15. Engtin nge thu tlûkna pawimawh tak kan siam hunah Jehova chunga kan rinawm theih?

¹⁵ Thu tlûkna kan siam dân. Nuna thu tlûkna pawimawh tak kan siam hmain Jehova chunga kan rinawm theih nân a ngaihtuah dânte hriat kan duh a. Bible leh a inawpna pâwl chuan min ṭanpui thei a ni. Entîr nân, tûn  laiah ram danga insawn nu leh pa ṭhenkhat chuan an fa sên chu an rama an chhûngte hnêna awm tûrin thu tlûkna an siam a. Chutiang chuan, ram dangah sum leh pai zawngin hna an thawk zawm thei a ni. Hei hi mi mal thu tlûkna siam tûr a nih rualin, nupate chuan: ‘Jehova’n kan thu tlûkna siam chu engtin nge a ngaih ang?’ tiin an inzâwt tûr a ni. (Rom 14:12 chhiar rawh.) Kan chhûngkua leh kan hnathawh chungchânga thu tlûkna pawimawh tak kan siam hmain Bible sawite ngaihtuah hmasak chu a finthlâk ang. Pheikhai hruai thei kan awm loh avângin kan Pa ṭanpuina kan mamawh a ni.—Jeremia 10:23.

16. Nu pakhatin fapa a neih khân eng thu tlûkna nge a siam ngai? Engin nge ani chu thu tlûkna dik siam tûra ṭanpui?

¹⁶ Nupa tuakkhat chu ram danga an insawn hnuah fapa an nei a, an fa chu an rama a pi leh pute hnêna thawnkîr leh an tum ta a. Chutih lai chuan, a nupui chu Jehova Thuhretu pakhat nên Bible an zir ṭan a ni. A fapa chu Jehova chungchâng zirtîr tûrin mawhphurhna a nei tih a hre ta a. (Sâm 127:3; Thufingte 22:6) Bible-in ti tûra min hrilh angin, Jehova hnênah a ṭawngṭai a, thil dik ti tûra ṭanpui tûrin a ngên ta a ni. (Sâm 62:7, 8) A harsatna chu amah Bible zirpuitu unaunu hnênah leh kohhrana mi dangte hnênah a hrilh bawk a. A chhûngte leh a ṭhiante’n a fapa chu a pi leh pu hnêna awmtîr tûrin hrilh ṭhin mah se, chu chu thil dik lo a ni tih a hria a ni. A pasal chuan a nupui leh an fapa chu unaute’n an ṭanpui nasatzia a hria a. A rilru a khawih êm avângin, Bible a zir ṭan a, a chhûngte rualin a inkhâwm ve ta a ni. Jehova’n a ṭawngṭaina a chhâng tih a hriat huna he naute nu lâwm dân tûr hi han ngaihtuah teh!

17. Tuemaw chu Bible kan zirpui hunah eng kaihhruaina nge kan zui ang?

¹⁷ Kaihruaina kan zui dân. Pathian chunga kan rinawm chuan, a inawpna pâwl aṭanga kan dawn kaihhruaina chu kan zui ang. Entîr nân, tuemaw nêna Bible Zirtîrna Dik Tak Chu Eng Nge Ni? tih lehkhabu kan zirpui ṭan hnu lawka kan tih ngaite chu han ngaihtuah teh. Zirpui chu Jehova inawpna pâwl hre chiang lehzual tûra ṭanpui nân zir zawh apiangin minute rei lotê chu hun i hmanpui thei a ni. Kingdom Hall-ah Eng Nge Thleng Ṭhîn? tih video leh Tute Nge Tûn Laia Jehova Duhzâwng Titute Chu? tih brochure chu kan hmang thei a ni. Bible Zirtîrna bu kan zirpui zawh hnu chuan baptisma chang tawh a nih pawhin “Pathian Hmangaihnaah Chuan Invawng Ṭha Rawh U,” (English) tih lehkhabu hmangin ‘a rinna tinghet’ lehzual tûrin kan ṭanpui thei a ni. (Kolossa 2:6-7) Jehova inawpna pâwl aṭanga he kaihhruaina hi i zui em?

18, 19. Jehova chunga kan lâwm chhan tûr ṭhenkhat chu eng nge ni?

¹⁸ Jehova chungah lâwmna chhan tûr kan va ngah tak em! A chhan pakhatah chuan, “Amah avângin kan nung, kan che, kan awm a ni si a.” (Tirhkohte 17:27, 28) A lehkhabu, Bible chu min pe a. Thessalonika khuaa Kristiante ang bawkin, he thil pêk hi a hnên aṭanga thuchah a nih avângin kan ngaihlu a ni.—1 Thessalonika 2:13.

¹⁹ Bible chuan Jehova hnaih tûrin min ṭanpui a, ani pawhin min hnaih a ni. (Jakoba 4:8) Kan Pa chuan a inawpna pâwla tel tûra min sâwm chu kan lâwm tak zet a ni! “Aw, LALPA hnênah lâwm thu hril rawh u; ani chu a ṭha si a: a ngilneihna pawh kumkhuain a awm dâwn si a,” tia ziaktu fakna hla phuahtu chu kan ṭâwmpui ve a ni. (Sâm 136:1) He Sâm ziaka châng tinah hian “a ngilneihna pawh kumkhuain a awm dâwn si a,” tih thute hi sawinawn a ni. Ni e, Jehova chunga kan rinawm a, a inawpna pâwl hmanga min pêk kaihhruaina kan zui chuan chatuan nunna min pe ang a, kan chungah a rinawm kumkhua bawk ang! (ws16.11-E)