A KAWM THU | VAN INLARNATE HRIATTHIAMNA
Vâna Awmte Chungchânga Zawhna Awmte
Vân ram leh chu mi hmuna awmte chungchâng chu i ngaihtuah ngai em? I ngaihtuah ngai a nih chuan nangmah chauh i ni lo. He thu hi kum sâng tam tak chhûng mite lo ngaihtuah tawh a ni. Mi ṭhenkhat chuan chu vân ram chu chawimawi tlâk thlahtute awmna hmun niin an ring a. Mi dangte chuan vântirhkohte leh mi ṭha thi tawhte khawsakna hmun hlimawm leh nuam tak niin an mitthla a. Mi dang lehte chuan vân chu pathian maktaduai za têlte chênna in niin an hre bawk.
Chu bâkah, vân ram chanchin min hrilh thei tûr mit ngeia hmutu an awm loh avângin, vân ram chungchâng hriat theih engmah kan nei lo titu tam tak an awm bawk a. Mahse, chutianga chhût chu a dik lo a ni. Isua Krista chu leia a rawn kal hmain, vânah a awm a. Ani chuan, kum zabi khatnaa sakhaw hruaitute hnênah: “Mahni duhzâwng ti tûrin vân aṭanga lo chhuk ka ni lo va, mi tîrtu duhzâwng ti tûra lo chhuk ka ni zâwk e,” tiin chiang takin a sawi a. Chuvângin, a tirhkohte hnênah: “Ka Pa inah awmna tam tak a awm,” tih a hrilh khân vân ram chungchâng tlang takin a hrilh a ni.—Johana 6:38; 14:2.
Jehova tih hming pu, Isua Pa chu Pathian a ni a, Jehova ‘in’ chu vânah a awm a. (Sâm 83:18) Chuvângin, hmuh theih loh khawvêl chu Pathian Jehova leh Isua Krista aia târ lang thei tumah an awm lo a ni. Anni chuan mi rinawmte hnênah inlârna mak takte hmuhtîrin vân ram chungchâng tam tak an hriattîr a ni.
A dawta thuziakah chuan Bible-a târ lan mite hmuh inlârnate chu sawiho a ni ang a. Hêng inlârnate i ngaihtuah laiin, vân ram chu kan khawih theih leh hmuh theih tisa lam thil a ni lo tih hre reng ang che. Chuvângin, Pathianin vânna thil awm dânte chu kan hriatthiam theih loh tûr zâwnga hrilhfiah lovin, kan hriatthiam theih tûr zâwngin inlârnaah a lantîr zâwk a ni. Inlârnate chuan vâna “awmna tam tak” chu tute’n nge luah tih hre thiam tûrin a ṭanpui ang che. (wp16.06-E)
