1. Jerusalem tihchhiat a nih laiin eng thil nge thleng?

KRISTA pian hma kum 607-ah khân, Lal Nebukadnezzara  II-na chuan a sipai tam takte nên Jerusalem khawpui an bei a. Lal chuan tlangvâlte chu khandaihin a that tih Bible chuan a sawi. “Nula leh tlangvâl pawh, tar pawh, tarchhia pawh lainatna rêng rêng a nei lo va.” A tâwpah: “Pathian in te an hâl a, Jerusalem kulh te an tichim a, chuta in ropui zawng zawngte chu an hâl a, chuta bungbêl ṭha mi zawng zawngte chu an tichhe vek,” a ni.—2 Chronicles 36:17, 19.

2. Jehova’n eng vaukhânna nge a pêk a, Juda mite chungah eng thil nge thleng?

² Juda mite chuan Jerusalem tihchhiat a ni chu mak an ti lo vang. Pathianin a mite hnênah kum tam tak chhûng a zâwlneite tîrin thu an âwih loh zawm zêl chuan Babulon mite’n an bei ang tih a vaukhân a ni. Juda mi tam tak chu khandaiha thah an ni ang a, an thah bângte chu Babulon sala hruai an ni ang. (Jeremia 15:2) Sal tâng nun chu eng ang nge ni? Babulon sal tânna ang chu Kristiante chungah a thleng ngai em? A thleng ngai a nih chuan, eng hunah nge?

3. Babulon sal tânna chu Aigupta sal tânna lakah engtin nge a danglam?

³ Jehova chuan Juda mite chu sala hruai an nih chuan an dinhmun  thar chu pawm a, a ṭha thei ang bera nung tûrin a hrilh a. Ani chuan Jeremia kal tlangin: “Inte sa ula, chutah chuan chêng ula, huante siam ula, a rahte ei ula. Sala ka tântîrna che u khawpui ṭhatna tûr zawng ula, LALPA hnênah dîlsak rawh u: ama ṭhatnaah chuan nangni pawhin ṭhatna in hmu dâwn si a,” tiin a hrilh a ni. (Jeremia 29:5, 7) Jehova kaihhruaina zuitu Judate chuan an sal tânnaah nun pângngai takin an nung a. Babulon mite chuan Juda mite chu mahnia intodelh tûr leh ram chhûnga zalên taka zinvah theihna an pe a ni. Chutih hun lai chuan Babulon chu sumdâwnna hmunpui a ni a. Hmân lai lehkha pawimawhahte chuan, Juda mite sala an tân lai khân thil lei dân leh thil hralh dân te, leh kut themthiam tak nih te an zir tih a târ lang a. Juda ṭhenkhat chu an hausa hle a ni. An sal tânna nun chu tûn hmâ kum za tam taka Aigupta rama sal lo tâng tawh Israel mite ang chuan a hrehawm lutuk lo a ni.—Exodus 2:23-25 chhiar rawh.

4. Juda mi rinawm lote rualin, tute’n nge hrehawm tuar a, engvângin nge Dânin a phût zawng zawng chu an tih vek theih loh?

⁴ Juda sal tâng ṭhenkhat chu Pathian chhiahhlawh rinawm an ni a. Anni chuan thil sual ti lo mah se, an hnampuite rualin hrehawm an tawrh ve a ngai a ni. Juda mite chuan an mamawh thilte chu nei mah se, engtin nge Jehova an biak theih ang? Biak in leh maichâmte chu tihchhiat a ni tawh a, puithiamte pawhin fel takin hna an thawk thei lo a ni. Mahse, Juda rinawmte chuan an theih ang tâwkin Pathian Dân chu an zui a. Entîr nân, Daniela, Sadraka, Mesaka, leh Abednego te chuan Juda mite tâna ei thian loh chaw chu an ei duh lo va. Bible chuan Daniela chu Pathian hnênah a ṭawngṭai ziah tih a sawi. (Daniela 1:8; 6:10) Milem bia hnamte rorêlna hnuaia awm an nih avângin, Juda mi rinawmte tân Dânin a phût zawng zawngte tih chu thil theih a ni lo.

5. Jehova chuan a mite chu eng beiseina nge a pêk a, engvângin nge he thutiam hi chhinchhiah tlâk tak a nih?

⁵ Israel mite chuan pawm tlâk takin Pathian an be leh thei ngai ang em? Chutih hun lai chuan Babulonin a salte chu a chhuah ngai loh avângin thil theih niin a lang lo va. Mahse, Pathian Jehova chuan a mite chu chhuah an ni ang tih a tiam a, a tâwpah chuan an chhuak ta a ni. Pathian thutiamte chu a thleng dik reng ṭhîn!—Isaia 55:11.

6, 7. Engvângin nge kan hriatthiamna siamrem a ngaih?

⁶ Kristiante chuan Babulon sal tânna ang chu an tawng tawh ngai em? Kum tam tak chhûng chu Vênnainsâng chuan Kristian rinawmte chu kum 1918-ah Babulon salah an tân a, kum 1919-ah Babulon sal aṭanga chhuah an ni tih a sawi a. Mahse, he thuziakah leh a dawta thuziakah kan hriatthiamna siamrem a ngaih chhan kan hria ang.

⁷ Hei hi han ngaihtuah teh: Babulon Khaw Ropui chu khawvêl sakhaw dik lo lalram a ni a. Pathian mite chu kum 1918-ah sakhaw dik lo salah an tâng lo va. Chutih hun lai chuan hriak thihte chu tihduhdah an ni tih chu a dik ngei mai. Mahse, tihduhdahna tam zâwk an tawrh chu sakhaw dik lote hnên aṭang ni lovin, sawrkârte hnên aṭang a ni a. Indopui I-na hma daih aṭangin Pathian chhiahhlawh hriak thihte chu sakhaw dik lo lakah an inla hrang tawh a. Chuvângin, Jehova mite chu kum 1918-ah Babulon Khaw Ropui salah an tâng niin a lang lo.

8. Tirhkohte an thih hnuah eng thil nge thleng? (A thupui chunga milem en rawh.)

⁸ C.E. 33 Penticost nîah, Kristian ni thar a sâng têlte chu thlarau thianghlima hriak thih an ni a. Anni chu “chi thlan, lal puithiamho, hnam thianghlim, Pathian mite ngei,” an rawn ni a. (1 Petera 2:9, 10 chhiar rawh.) Tirhkohte chuan an dam chhûngin kohhrante chu an enkawl ṭha hle a. Mahse, a bîk takin tirhkohte thih hnuah, kohhrana mi ṭhenkhat chuan ngaih dân dik lo an zirtîr ṭan a, zirtîrte chu thutak ata hruai bo an duh a ni. Hêng mite hian Aristotle-a leh Plato-a te zirtîrna chu an ngaina a, chuvângin, Pathian Thu aṭanga thutak zirtîr ai chuan anmahni ngaihdân an zirtîr ṭan a. (Tirhkohte 20:30; 2 Thessalonika 2:6-8) An zînga tam tak chu mi challang leh kohhrana hotute an ni. Isua’n a hnungzuite hnênah: “Nangni zawng zawng chu unau in ni,” tia a hrilh chung pawhin, sakhaw hruaitu pâwlho chu anrawn ding chhuak tho a ni.—Matthaia 23:8.

9. Kristian kalpêngte chu Rom sawrkâr nêna hna an thawh ṭan dân sawi rawh. Eng nge a rah chhuah?

⁹ Krista thih hnu kum 313-ah, Emperor Constantine-a chuan milem bia Rom Lalram chu a awp a, tichuan, he Kristianna kalpêng hi dân anga din sakhuaah a siam a ni. Chumi hnuah, chu Kristian kalpêng chuan Rom sawrkâr nên hna an thawk tlâng ṭan a. Entîr nân, Constantine-a chuan sakhaw hruaitute nên inhmuhkhâwmna a siam a, chu chu Council of Nicaea tia hriat a ni. Chu inhmuh khâwmna an neih hnuin, Constatine-a chuan puithiam Arius-a chu Isua hi Pathian a ni tih a rin duh loh avângin salah a tântîr a. A hnuah, Theodosius-a chu Rom lal a rawn ni a, Catholic kohhran chu Rom Lalram sakhua a rawn ni ta a ni. Chanchin zir mite chuan Lal Theodosius-a hun laiin milem bia Rom sakhua hi “Kristian” an rawn ni tiin an sawi a. Mahse, thu dik chu, chutih hun laiin Kristian kalpêngte chuan milem biate zirtîrna chu an lo pawm tawh avângin Babulon Khaw Ropui pêng pakhat an lo ni tawh a ni. Mahse, hriak thih Kristian rinawm ṭhenkhat chu a la awm reng a. Anni chu Isua sawi buh tak ang an ni. Hêng mi rinawmte hian theih tâwp chhuahin Pathian an bia a; mahse, an thusawi ngaithlatu an awm mang meuh lo. (Matthaia 13:24, 25, 37-39 chhiar rawh.) Babulon salah an tâng tih a chiang hle!

10. Engvângin nge mite chuan kohhran chu an rin hlelh ṭan?

¹⁰ Krista thih hnu kum zabi hmasa lamah chuan, mi tam takin Bible chu Grik ṭawng emaw, Latin ṭawng emawin an la chhiar thei a. Pathian Thu zirtîrna chu kohhran zirtîrna nên an khaikhin thei a ni. Mi ṭhenkhat chuan kohhran zirtîrnate chu a dik lo tih an hriat chuan an hnâwl a. Mahse, mi dangte hnêna an ngaih dân hrilh chu thil hlauhawm tak a ni a, chutiang an tih chuan tihhlum theih an ni.

11. Engtin nge kohhran chuan Bible a thunun theih?

¹¹ Hunte a liam zêl rualin Grik ṭawng leh Latin ṭawng hmangte chu an tlêm hle a. Kohhran hruaitute chuan Pathian Thu chu mi tam tak hriat ṭawnga lehlin an phal lo va. Chuvângin, sakhaw hruaitute leh lehkha thiam ṭhenkhat chauhvin Bible an chhiar thei a, sakhaw hruaitu ṭhenkhatte pawhin ṭha taka ziak leh chhiar an thiam lo a ni. Kohhran zirtîrna pawm lo tupawh chu na taka hrem an ni a. Hriak thih Kristian rinawmte chu a rûkin an inhmukhâwm a, ṭhenkhat chu an tel thei lo a ni. Juda mite Babulon sala an tâng ang bawkin, hriak thih “lal puithiamho” chuan ruahmanna fel tak neiin Pathian an be thei lo a ni. Babulon Khaw Ropui chuan mite chu a va thunun nasa tak êm!

12, 13. Kristian dikte chuan eng chhan pahnih vângin nge zalên tûra beiseina an neih? Hrilhfiah rawh.

¹² Kristian dikte chuan Pathian chu zalên tak leh pawm tlâkin an be thei ngai ang em? Thei e! Chhan pahnih avângin beisei tûr ṭhenkhat a awm a. Pakhatnaah chuan khâwlhâ rem theih lehkha chhutna siam chhuah a ni a. Chu khâwl siam chhuah a nih hma kum 1450 vêl khân, Bible chu kuta ziah chhâwn a ngai a, chu chu thil awlsam a ni lo. Mi thiam tak tân pawh Bible pakhat ziak chhuak tûrin thla sâwm a ngai a ni! Bible ziak chhâwntute chuan suvunah leh savuna siam lehkhaahte an ziak bawk. Chuvângin, Bible copy-te chu a awm mang meuh lo va, a to hle bawk. Mahse, mi thiam pakhat chuan lehkha chhutna khâwl hmangin, nî tin phêk 1,300 aia tam a chhu chhuak thei a ni!

¹³ A chhan pahnihna chu Bible lehlinna a ni a. Kum 1500 vêl khân, mi huaisen tlêm tê chuan Bible chu mi nâwlpuite ṭawng hmanin an let a. Tihhlum an ni thei tih hre chungin he hna hi an thawk a ni. Sakhaw hruaitute chuan an hlau hle a. Engvângin nge? An hlau chhan chu mi dik tak a hmei a pa te’n anmahni ṭawnga Bible an chhiar chuan: ‘Bible-ah sual kanfaina hremhmun tênau (purgatory) zirtîrna a awm em? Mi chuan mitthi tâna thiltihsak tûrin puithiam hnênah thil a pêk a ngai tih chu Bible-a khawi lai hmunah nge a awm? Khawiah nge Bible-in pope te leh cardinal  (Catholic kohhrana nihna sâng tak chelhtu) te chungchâng a sawi?’ tih zawhna ang chite hi an zâwt thei a ni. Kohhran zirtîrna dik lo tam tak chuan Krista piang hma kum za tam taka mi Aristotle-a leh Plato-a te zirtîrna a ṭanchhan a ni. Mite’n zawhnate an zawh hian sakhaw hruaitute chu an thinur hle a. An thu zirtîr pawm duh lo a hmei a pate chu tihhlum an ni ṭhîn. Sakhaw hruaitute chuan mite Bible chhiar leh zawhnate an zawh chu tih tâwp an duh a, chu chu dihmun tam takah a thleng fo ṭhîn. Mahse, mi tlêm tê chuan Babulon Khaw Ropui thununa awm chu an hnâwl a. Bible aṭangin thutak an hmu a, hriat belh an duh bawk! Sakhaw dik lo aṭanga zalênna chu a hnai tawlh tawlh a ni.

14. (a) Bible zir duhte chuan eng nge an tih? (b)Unau Russell-a’n thutak a zawn dân sawi rawh.

¹⁴ Mi tam tak chuan Bible chhiar leh zir an duh a, an thu hriatte chu mite an hrilh leh a ni. Sakhaw hruaitute’n an rin tûr an hrilh chu an duh lo. Chuvângin, zalên taka Bible an zir theihna tûr ramahte chuan an insawn a. Chûng zînga ram pakhat chu United States a ni a. Kum 1870 vêlah Charles Taze Russell-a leh mi dang tlêmtê te chuan Bible chu ngun takin an zir ṭan a. Atîrah, Unau Russell-a chuan eng sakhuain nge thutak zirtîr tih hmuh chhuah a tum a ni. Kristian inti sakhua tam takte leh Kristian ni lo sakhuate zirtîrna chu Bible sawi nên ngun takin a khaikhin a. Chûng sakhuate zînga pakhat mahin Pathian Thu an zâwm lo tih a hre ta thuai a ni. Ṭum khat chu, tualchhûnga sakhaw hrang hranga hruaitute a bia a. Unau Russell-a chuan a hote nêna Bible thutak an hmuh chhuah chu sakhaw hruaitute’n an lo pawm a, kohhrana an zirtîr a beisei a ni. Mahse, sakhaw hruaitute chuan an ngaihven lo. Bible Zirlaite chuan sakhaw dik lo betute nên Pathian an be tlâng thei lo tih an hre ta thuai a ni.—2 Korinth 6:14 chhiar rawh.

15. (a) Engtik khân nge Kristian dikte chu Babulon sala an tân? (b) Eng zawhnate nge a dawta thuziakah chhân a nih ang?

¹⁵ He thuziakah hian, Kristian dikte chu tirhkohte thih hnu lawkah Babulon salah an tâng tih kan hre tawh a. Mahse, hêng zawhnate chhânna hi kan hriat a la ngai a ni: Hriak thihte chu kum 1914 hma kumahte khân Babulon Khaw Ropui lakah an zalên ngei engtin nge tih kan hriat? Indopui I-naa an rawngbâwlna tihṭhuanawp a nih avângin Jehova chu a chhiahhlawhte chungah a lâwm lo tih chu a dik em? Kan unau ṭhenkhat chuan chutih lai chuan Kristian tualdawihna hlohvin, Jehova duhsakna an chân em? A tâwpah, Kristiante chu tirhkohte thih hnuah sakhaw dik lo sala an tân chuan eng hunah nge chhuah zalên an nih? Hêng zawhna ṭha tak takte hi a dawta thuziakah chhân a ni ang. (ws16.11-E)