“Vânah lalṭhutphah a lo inhûng a, chu mi ṭhutphahah chuan mi pakhat a lo ṭhu bawk a. Tin, a ṭhua chu jaspi leh sardion lung ang maiin a lang a; tin, lalṭhutphah vêlah chuan chhimbâl, ena smaragdin lung ang a zâm a.”—Thu Puan 4:2, 3.

“Ruah sûr nia chhûm chunga chhimbâl lan dân ang mai hi a vêla êng lan dân chu a ni a. Hei hi LALPA ropuina lan dân ang chu a ni.”—Ezekiela 1:27, 28.

Tirhkoh Johana leh zâwlnei Ezekiela te hmuh, hêng inlârnate hian Chungnungber Pathian Jehova ropuizia chu—lunghlu mawi takte, leh chhimbâl te, leh lal ṭhutphah ropui takte anga mitthla theih tûrin a târ lang a. Chûngte chuan Pathian Jehova lan dân chu mawi tak, duhawm tak leh dam tak a nihzia min hriattîr a ni.

Hêng Pathian lan dânte hi fakna hla phuahtuin: “LALPA chu a ropui a, nasa taka fak tûr a ni si a: Pathian zawng zawng aia ṭih tûr a ni. Mipuiho pathiante chu milemte an ni si a, LALPA erawh chuan vânte khi a siam a ni. Chawimawina leh ropuina a hmâah an awm a: Chakna leh mawina chu a hmun thianghlimah an awm,” tia a ziak nên a inmil a ni.—Sâm 96:4-6.

Pathian Jehova chu Chungnungber ni mah se, ṭawngṭaia amah pan tûrin min sâwm a, min ngaihthlâksak dâwn tih min tiam bawk a ni. (Sâm 65:2) Pathian chuan min hmangaih a, min ngaihsak êm avângin tirhkoh Johana chuan: “Pathian chu hmangaihna a ni,” tiin dik takin a sawi thei a ni.—1 Johana 4:8.

“[Kristian zirtîr Stephana] chu thlarau thianghlima khat a ni a, vân lam a en tlat a, Pathian ropuizia leh Pathian ding lama Isua ding a hmu a; ‘Ngaiteh u, vân inhawngte ka hmu a, Pathian ding lama Mihring Fapa ding pawh ka hmu,’ a ti a.”—Tirhkohte 7:55, 56.

Stephana’n he inlârna a hmuh hmain, Juda sakhaw hruaitu, tûna Setephena biakte fuih pawrhna avângin Isua chu tihhlum a ni a. Chu inlârna chuan Isua chu a nung leh a, kaihthawh leh chawimawiin a awm tih a nemnghet a ni. Hemi chungchângah tirhkoh Paula chuan: “[Jehova’n] mitthi zîng ata [Isua] a kaihthawh lai leh, lalna te, thuneihna te, thiltihtheihna te, rorêlna zawng zawng te, he mi khawvêlah chauh ni lova khawvêl lo la thleng tûr pawha hming sak tinrêngte chung daihah vân hmunahte a ding lama a ṭhuttîr laia Kristaa a thawha thahrui chakna thawhzia ang zêl khân keini ringtute lama a thiltihtheihna len nasatziate hi, eng ang nge a nih in hre thei ang,” tiin a ziak a ni.—Ephesi 1:19-21.

 Bible-in Isua dinhmun sâng tak a târ lan bâkah, Jehova ang bawkin mihringte a ngaihsak hle tih a târ lang bawk. Leia a rawngbâwl lai khân, dam lote leh bawrhsâwmte a ti dam a, mitthite pawh a kaitho a ni. Inthawina atâna Isua thihna chuan Pathian leh mihringte a hmangaihna nasa tak chu a târ lang a. (Ephesi 2:4, 5) Pathian ding lama ding Isua chuan nakin lawkah a thuneihna a hmang tawh dâwn a, hmun tina awm thu âwih mihringte chungah malsâwmna nasa tak a thlen ang.

“Lalṭhuttlêngte an han hûn chhuaha, mi pakhat, Hmâkhawsânga [Jehova] a ṭhut thlengin ka [zâwlnei Daniela] en reng a;  . . . a sângasângin rawng an bâwlsak a, a hmâah chuan sîng hmun sîng an ding a.”—Daniela 7:9, 10.

He vân inlârnah hian, Daniela chuan vântirhkoh pakhat chauh ni lovin, tam tak a hmu a. Inlârna ropui a va ni tak êm! Vântirhkohte chu thlarau mi ropui tak, fing tak leh chak tak an ni a. An zîngah hian seraf leh cherup te an tel a ni. Bible chuan vântirhkohte chu vawi 250 aia tam a târ lang a ni.

Vântirhkohte hi leilunga lo chêng tawh tûn hmaa mihringte an ni lo va. Pathianin anni chu mihring awm hma daihin a siam tawh a. Leilung a din lai khân, vântirhkohte chuan an lo thlîrin, kut an lo bêng a ni.—Joba 38:4-7.

Vântirhkoh rinawmte’n Pathian rawng an bâwl dân kawng khat chu tûn lai khawvêla thawh mêk hna ropui ber, Pathian Ram chanchin ṭha puanchhuahnaah an tel hi a ni. (Matthaia 24:14) He hnaa an telna hi tirhkoh Johana hmuh inlârnaah: “Leia awmte hnênah leh hnam tinrêng te, chi tinrêng te, ṭawng tinrêng te, mi tinrêng te hnêna tlângaupui tûra chatuan Chanchin Ṭha nei vântirhkoh dang vanlaizâwla thlâwk ka hmu a,” tia târ lan a ni a. (Thu Puan 14:6) Tûn hmaa an lo tih ṭhin angin, vântirhkohte chuan tûn laiah mite be tawh lo mah se, mi rilru ṭhate hnêna chanchin ṭha puangtute chu an kaihruai a ni.

“Vânah chuan indona a lo awm a; Mikaela [Isua Krista] leh a vântirhkohte chuan drakon chu an do va; drakon leh a tirhkohte  pawh chuan an do ve a; nimahsela an hneh ta lo va, an hmun chu vânah a awm ta bawk hek lo. Tin, drakon lian pui, rûlpui tar Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a.”—Thu Puan 12:7-9.

Vânah khian remna a awm reng lo va. Mihring chanchin tîr lamah, vântirhkoh zînga pakhat chu mite’n amah chibaibûk tûra a duh êm avângin Jehova lakah helin, “Dodâltu” tih awmze nei Setana a rawn ni ta a ni. A hnuah vântirhkoh dangte pawh chu helnaah chuan an tel ve a, ramhuaite tia hriat an rawn ni ta a ni. Chûng ramhuai suaksualte chuan Jehova chu nasa takin an do va, mi tam tak chu Jehova kaihhruaina duhawm tak ata an hruai pêng a ni.

Setana leh a ramhuaite chu sual tak leh râwng tak an ni a. Mihringte hmêlma an niin, leilunga hrehawm tawrhna tam tak hi anmahni vâng a ni. Entîr nân, Setana chuan mi rinawm Joba ran rualte leh a chhiahhlawhte chu a tih hlumsak a. Tichuan, Joba fa sâwmte awmna in chu ‘thlipuia’ nuaitîrin, a that fai vek a. Chumi hnuah, Setana chuan Joba chu: “A kephah hnuai aṭangin a lu thlengin pânchhia a veitîr,” bawk a ni.—Joba 1:7-19; 2:7.

Mahse, Setana chu rei lo têah tihboral a ni dâwn a. Leia paih thlâk a nih aṭang khân, “hun tlêm tê chauh a nei tih,” a inhria a ni. (Thu Puan 12:12) Setana chung a pik a, chu chu chanchin ṭha a va ni tak êm!

“Chi tina mi te, ṭawng tina mi te, mi tina mi te, hnam tina mi te Pathian tân . . . i [Isua] lei a, kan Pathian tân khua leh tuiah leh, puithiamahte i siam ta si a; tin, leiah chuan ro an rêl a.”—Thu Puan 5:9, 10.

Isua chu vân nunna chang tûra kaihthawh a nih ang bawkin, mi dangte pawh kaihthawh an ni ve ang. A tirhkoh rinawmte hnênah: “In tân hmun siamin ka kal dâwn hi. Tin, . . . ka lo kîr leh ang a, ka hnênah ka la ang che u; ka awmnaah nangni pawh in awm theih nân,” tiin a hrilh a ni.—Johana 14:2, 3.

Vâna kalte chu thawh tûr neia kal an ni a. Isua nên Lalram sawrkâr an din ang a, chu chuan leia chêngte chungah rorêlin malsâwmna a thlen dâwn a ni. Hei hi Isua’n: “Kan Pa vâna mi, I hming zahawm rawh se. I ram lo thleng rawh se. I duhzâwng vâna an tih angin leia mi’n ti rawh se,” tia a hnungzuitute hnêna ṭawngṭai dân tûr a zirtîr Lalram chu a ni.—Matthaia 6:9, 10.

“Lalṭhutphah aṭangin aw ring takin, “Ngai teh, Pathian bâwktê chu mihring zîngah a lo awm ta, . . . an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,’ a tih ka [tirhkoh Johana] hria.”—Thu Puan 21:3, 4.

Hrilh lâwkna nei he inlârna hian Isua leh lei ata tho lehte nêna siam Pathian Ramin Setana awpna a tih tâwp hun tûr leh leilung paradis-a a chantîr hun tûr a kâwk a ni. Mihringte tihrehawm a, tilungngai thei thilte chu a awm tawh lo vang. Thihna pawh a awm tawh lo vang.

A nih leh, thi tawh a, vân lam thawh lehna chang lo mi tlûklehdingâwn tam takte hi engtin nge ni ang? Nakin hunah, anni chu kaithawh leh niin, lei Paradis-a chatuan nun theihna hun remchâng an nei ang.—Luka 23:43. ▪ (wp16.06-E)