Seth-a * chuan: “Ka nupui nên chuan a rualin hna kan chân a. Kum hnih chhûng chu sawrkâr pêk chhûngkaw tâna chhawmdâwlna kan rinchhan a ngai a, a remchâng apiang kan thawk bawk. A tâwpah chuan, ka nupui Priscilla-i chu a lunghnual ta hle a, hlutna rêng nei lo ni hian ka inhria a ni.

“Kan harsatnate chu engtin nge kan chinfel? Ka nupui Priscilla-i chuan Matthaia 6:34-a Isua thusawi chu a inhriatnawntîr ṭhîn a. Nî tin hian lungkham tûr a awm avângin, a tûk atân kan lungkham tûr a ni lo tih Isua’n a sawi a ni. Tih tak zeta ṭawngṭaina chuan ka nupui chu harsatnate hmachhawn zawm zêl tûrin chakna a pe a. Ka tân chuan Sâm 55:22 thu hi min thlamuantu a ni. Fakna hla phuahtu angin, ka phurritte chu Jehova chungah ka nghat a, ani chuan min tichak a. Tûnah hna hmu tawh mah ila, Matthaia 6:20-22-a Isua thurâwn pêk nêna inmilin kan nun chu kan tisamkhai a ni. Eng dang zawng aiin, Pathian nên kan inhnaih a, kan nupa pawh kan inhnaih lehzual bawk,” tiin a sawi.

Jonathan-a chuan: “Kan chhûngkaw sumdâwnna a tlâk chhiat tâkah chuan hma lam hun tûr chu ka lungkham hle a. Chutianga sumdâwnna tlâk chhiatna avâng chuan kum 20 chhûnga kan thawhrimna chu engmah lo mai a ni.Kan nupain pawisa chungchângah kan inhnial ṭan ta a. Credit card company chuan kan thil leite an pawm loh hlauhvin credit card pawh kan hmang thei tawh lo.

“Pathian Thu leh a thlarau thianghlim chuan thu tlûkna ṭha siam tûrin min ṭanpui a. Eng hna pawh thawh a ngai tih ka hria a, thil ṭûl lova pawisa hmante kan bânsan a ni. Jehova Thuhretute kan nih angin, kan unaute hnên aṭangin ṭanpuinate kan dawng bawk. Anni chuan a âwm tâwka mahni inzahna nei tûra min ṭanpui bâkah, hun khirh tak kan tawn hunahte pawh min ṭanpui ṭhîn a ni,” tiin a sawi.

Raquel-i chuan: “Ka pasalin min chhuahsan thut chuan, nâ ka tiin ka thin a rim hle a. Ka lung a chhe tak zet a ni. Mahse, Pathian ka hnaih a, ani chuan min thlamuan a. Nî tin ṭawngṭaia a lam ka hawi chuan Pathian thlamuannain ka thinlung a vênghim a. Ka rilru natna chu min tihdamsak niin ka hria.

“A Thu, Bible min pêk avângin ka lâwm tak zet a, ka thinrimna leh rilru natna chu ka hneh thei a ni. Rom 12:21-a tirhkoh Paula thusawi: ‘Sual ngam chein awm suh la, ṭhatnain sual chu ngam zâwk rawh,’ tih hi ka thinlungah ka vawng reng a ni.”

“Thurâwn petu fing tak pakhat chuan theih tâwp chhuah zawm zêl a ṭûlzia hre tûrin min ṭanpui a. Thuhriltu 3:6 chu min kawhhmuhin, thil ‘tihbo hun’ kan neih châng pawh a awm tih ngilnei takin min hrilh a. Pawm harsa tak thurâwn ni mah se, ka mamawh tak a ni. Tûnah chuan nunah thiltum ka nei ta,” tiin a sawi.

Elizabeth-i chuan: “Nupa inṭhente chuan ṭanpuina an mamawh a. Nî tin hian chutianga min ṭanpuitu ṭhian ṭha tak ka nei a ni. Ani chuan min ṭahpui a, min thlamuan a, hnâwl nia inhriatna nei lovin, hmangaihna dawng nia inhriatna min neihtîr zâwk a. Ka rilru hliam tidam tûrin Jehova’n a hmang tih ka hre chiang a ni,” tiin a sawi.

Thuziak inzawma kan târ lan tâk Luis-a chuan lung natna a nei a, ṭum hnih chu a thi ṭhelh a ni. Tûnah phei chuan ni khatah dârkâr 16 lai oxygen pêk a ngai a. Ani chuan, “Jehova hnênah ka ṭawngṭai reng a. A hnêna ka ṭawngṭai hnu chuan a thlarauvin min tichak tih ka hria. Amah rinna ka nei a, min ngaihsak tih ka hriat avângin ṭawngṭaina chuan chhel taka tuar zawm zêl tûrin huaisenna min pe a ni,” tiin a sawi.

Kum 80 pêl tawh Petra-i chuan: “Thil tam tak tih  ka duh a; mahse, ka ti thei lo. Ka chak lo telh telh tih han hriat chu thil hrehawm tak a ni. Ka chauh theih êm avângin damdawi ka ei reng a ngai a. Isua’n a theih chuan thil harsa tak pumpelh tûra a Pa hnêna ṭanpuina a dîl kha ka hre chhuak ṭhîn a ni. Mahse, Jehova’n Isua a tichak ang bawkin keipawh min tichak a. Ṭawngṭaina chu nî tina ka inenkawlna a ni. Pathian hnêna ka ṭawngṭai hnu chuan ka ṭha sawt ṭhîn,” tiin a sawi.—Matthaia 26:39.

Kum 30 dâwn lai thazâm natna khirh tak vei Julian-a pawh chutiang bawkin a awm a. Ani chuan: “Mi lian ṭhutthlêng chu ramtuileilo ṭhutthlêngin ka thlâk a ngai ta a. Mahse, mi dangte tâna rawngbâwl tûra inpe tawh ka nih avângin ka nun chuan awmzia a nei a ni. Pêkna hian hrehawm tawrhte a tinêp thei a, a ṭûl hunah min tichak dâwn tia a thutiam chu Jehova’n a hlen a ni. Tirhkoh Paula ang bawkin: ‘Mi tichaktuah chuan engkim ka ti thei,’ tih dik takin ka sawi thei,” tiin a sawi.—Philippi 4:13.

Atonio-a chuan: “Ka pa chu motor accident-in a boral a, a tîr chuan ka ring thei lo. A fair lo khawp mai—mi pawisawi lo kawnga kal mai a ni si a. Mahse, tih theih engmah ka nei si lo. Nikhaw hre lova ni nga a awm hnu chuan a boral ta a ni. Ka nu hmaah chuan ṭap lo tûrin ka insûm hrâm hrâm a; mahse, keimaha ka awm chuan ka ṭap chhuak ṭhîn. ‘Engvâng nge? Engvâng nge?’ tiin ka inzâwt fo ṭhîn.

“Chûng lungchhiatthlâk tak nîahte chuan, tuar thiam tûr leh thlamuanna min pe tûrin Jehova hnênah ṭanpuina ka dîl reng a. Zawi zawiin ka thla a muang a. “Beisei loh thil” hi tu chungah pawh a thleng thei tih Bible sawi chu ka hre chhuak a. Pathian chu dawthei lo a nih avângin, ka pa chu thawh lehnaah ka hmu leh dâwn tih ka ring tlat a ni,” tiin a sawi.—Thuhriltu 9:11 New World Translation; Johana 11:25; Tita 1:2.

Thuziak hmasa bera kan sawi tâk Robert-a pawhin chutiang ngaih dân chu a nei a. Ani chuan: “Ka nupui Maribel-i nên Jehova hnêna kan ṭawngṭai chuan, Philippi 4:6, 7-a sawi rilru thlamuanna kan nei a ni. He chhûngrila thlamuanna hian chanchinbu mite hnênah kan beisei thawh lehna chungchâng min sawitîr thei a. Kan fapa chu thlawhna chhiatnaah boral mah se, kan nupa hian hriat reng tûr hun hlimawm tam tak kan la nei reng thei a. Chûngah chuan kan rilru dah kan tum tlat a ni.

“Kan rinna chungchâng dam taka kan sawi lai TV-a min hmuh thu unaute’n min hrilh chuan, chu chu mi tam takin kan tâna min ṭawngṭaisak vâng a ni tih rinhlelh rual a nih loh thu kan hrilh a. An thlamuanna thute hmangin Jehova’n min ṭanpui a ni tih ka ring nghet tlat a ni,” tiin a sawi.

Entîrna kan hmuh tâkte khân, Pathian chuan harsatna leh buaina chi hrang hrang hmachhawnte chu a thlamuan thei tih a târ lang a. I chungchâng eng nge ni ve? I nunah eng harsatna pawh tâwk mah la, chutiang hun harsaah chuan ṭanpuitu tûr thlamuanna i hmu theih a ni. * Chuti chu, engvângin nge Jehova hnênah ṭanpuina i dîl loh vang? Ani chu “thlamuanna zawng zawng Pathian,” a ni si a.—2 Korinth 1:3. ▪ (wp16.05-E)