1, 2. (a) Tûn laia mi tam takin eng harsatnate nge an neih a, eng nge a rahchhuah? (b) Isaia 41:10, 13 chuan eng beiseina chiang tak nge a pêk?

KOHHRAN upa nupui, regular pioneer thawk mêk unaunu chuan: “Thlarau lam hun duan ṭha tak nei reng chungin, kum tam tak chhûng chu lungkham neiin ka awm a. Chu chuan min ti mu thei lova, ka hrisêlna a khawih pawiin mite ka cheibâwl dân a nghawng a ni, a châng phei chuan ka beidawng ṭêp a ni,” tiin a sawi.

² He unaunu tawrh dân hi i hre thiam em? Setana khawvêl suaksuala kan awm avânga nêksâwrna nasa tak kan tawng ṭheuh hi a lungchhiatthlâk hle. Thîrchakaiin lawng kalsawn thei lo tûra a siam ang hian, lungkhamna chuan manganna leh lunghnualna min neihtîr thei a ni. (Thufingte 12:25) Engvângin nge lungkhamna i neih mai theih? I hmangaih tak a thih vâng emaw, natna khirh tak leh tihduhdahna i tawrh vâng emaw a ni mai thei. A nih loh leh, sum leh pai lama harsatna nei chungin theih tâwp chhuahin i chhûngte i enkawl pawh a ni thei. Hunte a han liam zêl hian, rilru hahnain a tichau chein, i hlimna a ti bo hial pawh a ni thei bawk. Mahse, Pathian chu ṭanpui tûr chein a inpeih reng tih i ring tlat thei a ni.—Isaia 41:10, 13 chhiar rawh.

3, 4. (a) Engtin nge Bible chuan “kut” tih thu mal chu a hman? (b) Engin nge kan kut chu tizawi thei?

³ Bible chuan mihring taksa pêng chu mize hrang hrang, a nih  loh leh thiltihte sawi nân a hmang ṭhîn a. Entîr nân, kut tih thu mal hi a za têla târ lan a ni a. Tuemaw kut a tichak tia Bible-in a sawi hian, mi chu tihphûrin a awm a, a chak lehzual a, thilti tûrin a inpeih a tihna a ni thei. (1 Samuela 23:16, Ezra 1:6) Chu bâkah, thil a ṭha zâwnga thlîr mi leh nakin hun beiseina nei mi a sawina pawh a ni thei bawk.

⁴ Engemaw chângin, Bible chuan kut tizawitu chungchâng a târ lang a. Chu chu lunghnualte, a nih loh leh beisei bote sawina a ni. (2 Chronicles 15:7, Hebrai 12:12) I rilru hah hunah emaw, i chauh hunah emaw, a nih loh leh Jehova nêna in inlaichînna a chak lo nia i ngaih hunahte i beidawng mai thei a. Khawiah nge chakna i hmuh theih ang? Engin nge chhelna leh hlimna nei tûrin chêttîr che a, tichak thei che?

5. (a) Buaina kan neih hian engtin nge kan awm theih a; mahse, eng nge kan hriat reng ang? (b) Eng nge kan sawiho vang?

⁵ Zephania 3:16, 17 chhiar rawh. Buaina kan neih hunah kan hlauvin kan lunghnual tûr a ni lova, kan kut kan tizawi tûr a ni hek lo. Hmangaihna nei tak kan Pa Jehova chuan kan manganna zawng zawng a chunga nghat vek tûrin min sâwm a. (1 Petera 5:7) Jehova’n Israelte a ngaihsak ang bawkin keini pawh min ngaihsak a ni. An hnênah a kut chu “chhandam thei lo tûrin tihtawiin a awm lo,” tiin a hrilh a. A chhiahhlawh rinawmte chu chhandam tûrin a inpeih reng a ni. (Isaia 59:1) He thuziakah hian, Jehova’n a mite chu harsatna kârah pawh a duhzâwng ti tûrin tihchak a duh, tih leh a tichak thei tih târ langtu Bible entîrna langsâr tak pathum kan sawiho vang. Hêng entîrnate hian min tih chak theih dân i lo en ang u.

6, 7. Israel mite’n Amalek mite an hnehna aṭangin eng nge kan zir theih?

⁶ Israel mite Aigupta saltânna ata an chhuah hnu lawk khân, Amalek mite’n an rawn bei a. Mosia’n mi huaisen Josua chu indonaah Israel mite hma hruai tûrin a hrilh a. Arona leh Hura chu an bul hnaia tlângah a hruai a ni. Chuta ṭang chuan indona hmun chu an hmu thei a. Chûng mi pathumte chuan an hlauh avângin indona ata an tlân chhia em? Tlân chhe lo ve!

⁷ Israel mite’n Amalek mite an hneh theih nâna ruahmanna siam chu Mosia’n a zâwm a. Ani chuan, Pathian tiang chu kengin vân lamah a phar a. Chutianga a tih chuan, Jehova’n Israel mite chu Amalek mite a hnehtîr a ni. Mahse, Mosia kut a kham a, a dah thlâk chuan Amalek mite’n hnehna an chang ṭan a. Arona leh Hura chu Mosia ṭanpui tûrin hma an la vat a. “Lung an han la a, a bulah chuan an dah a, chutah chuan a ṭhu ta a; tin, Arona leh Hura chuan a kut chu an dawmsak ta a, pakhatin lehlam a dâwm a, pakhatin a lehlam a dawm a, chutichuan ni tlâk thlengin a kutte chu a awm ngaiin a awm ta tlat a.” Pathian kut chak tak avângin, Israel mite’n indonaah hnehna an chang ta a ni.—Exodus 17:8-13.

8. (a) Ethiopia mite’n Juda mite an beih khân Asa’n eng nge a tih? (b) Asa chu engtin nge kan entawn theih?

⁸ Lal Asa hun laiah pawh Jehova’n a mite ṭanpui tûrin a kut chak tak hman a inpeih reng a. Bible-a sipai rual tam tak târ lan zînga, sipai tam ber neitu chu Ethiopia mi Zera a ni a, indo thiam sipai rual 1,000,000 a nei a ni. Ethiopia sipai rual chu Asa sipai rual lêt hnih deuh thaw an ni a. Asa chuan lungkhamna te, hlauhna te, leh lunghnualnate a nei em? A kut a tizawi em? Tizawi lo ve! Jehova ṭanpuina a dîl nghâl a. Indona lam aṭanga thlîr chuan, Ethiopia mite hneh chu thil ni thei a ni lo. “Pathian nên erawh chuan engkim tih theih  a ni.” (Matthaia 19:26) Pathianin a thiltihtheihna hmangin ‘Asa hmaah chuan Ethiopia mite chu a bei a.’ “Asa thinlung chu a dam chhûng zawng LALPA lamah a ṭha famkim a ni.”—2 Chronicles 14:8-13; 1 Lalte 15:14.

9. (a) Nehemia’n Jerusalem kulh a sak ṭhat lehna chu engin nge titâwp lo? (b) Pathianin Nehemia ṭawngṭaina chu engtin nge a chhân?

⁹ Nehemia’n Jerusalema a kal khân, eng nge a hmuh? Juda mite’n Jerusalem kulh an sak lai tâwpsan tûra ram dang aṭanga lo kal hmêlmate’n an vau chu a hmu a ni. Khawpui chu vênhim a ni lo va, Juda mite lah an lunghnual hle bawk. Nehemia chu engtin nge a awm? Lunghnualin a kut a tizawi em? Zawi lo! Mosia, Asa leh Jehova chhiahhlawh rinawm dangte ang bawkin, Jehova a rinchhan reng a ni. He dinhmunah pawh hian, Nehemia chuan Jehova hnênah ṭanpuina a dîl a, a dîlna chu chhânsak a ni. Pathianin Judate tichak tûrin a “thiltihtheihna nasa tak” leh a ‘kut chak tak’ chu a hmang a. (Nehemia 1:10; 2:17-20; 6:9 chhiar rawh.) Jehova chuan tûn laia a chhiahhlawhte tichak tûrin a “thiltihtheihna nasa tak” leh ‘kut chak tak’ a hmang tih i ring em?

10, 11. (a) Setana chuan kan kut tizawi tûrin engtin nge min beih? (b) Jehova chuan min tichak tûrin eng nge a hman? (c) Jehova kaihhruainate chu engtin nge i hlâwkpui?

¹⁰ Diabola chuan a kut a tizawi ngai lo vang tih kan hre chiang a. Kan Kristian thiltihte bânsan tûrin min bei zawm zêl dâwn a ni. Ani chuan dâwtthute a hmang a, min vau nân sawrkâr te, sakhaw hruaitu te, leh kalpêngte a hmang bawk. A thiltum chu eng nge ni? Ani chuan Lalram chanchin ṭha hril tawh lo tûrin min duh a. Mahse, Jehova chuan min ṭanpui theiin, min ṭanpui a duh a, chuvângin min tichak tûrin a thlarau thianghlim min pe a ni. (1 Chronicles 29:12) Setana leh a khawvêl suaksual kan do theih nân Pathian thlarau thianghlim kan dîl a pawimawh tak zet a. (Sâm 18:39; 1 Korinth 10:13) Pathian Thu aṭanga kan hmuh ṭanpuina avângin kan lâwm hle bawk. Thla tina kan thu leh hla chhuah aṭanga kan zir zozaite pawh hi han ngaihtuah teh. Zakaria 8:9, 13-a (chhiar rawh) thute hi Jerusalema biak in sak ṭhat leh a nih laia sawi ni mah se, hêng thute hian tûn laiah pawh min ṭanpui thei a ni.

¹¹ Jehova chuan kan Kristian inkhâwm te, bial inkhâwmpui te, regional inkhâwmpui te, leh theocratic school aṭanga kan dawn kaihhruainate hmangin min tichak bawk a. Chûng kaihhruainate chuan rilru put hmang dik taka Pathian rawngbâwl tûr te, thiltum nei tûr te, leh kan Kristian mawhphurhna tam tak chelh tûrtein min ṭanpui thei a ni. (Sâm 119:32) Jehova kaihhruaina aṭanga neih theih chakna chu neih i duh em?

12. Chak taka awm reng tûrin eng nge kan tih ngai?

¹² Jehova chuan a mite chu Amalek mite leh Ethiopia mite hneh tûra a ṭanpui bâkah, Nehemia leh Judate chu Jerusalem kulhte sa zo tûrin chakna a pe a. Chutiang bawkin, Pathian chuan lungkhamna te, dodâlna te, leh mi dangte’n an ngaihven lo chung pawha thu hril zawm zêl tûrin chakna min pe ang. (1 Petera 5:10) Jehova chuan kan harsatnate chu mak takin min tih vensak lo va. Keimahni ngeiin kan tih ven a ngai zâwk a ni. Engtin nge? Nî tina Pathian Thu chhiar te, chawlhkâr tin inkhâwm atâna inbuatsaih leh inkhâwm te, mahnia inzirna leh chhûngkuaa Pathian biakna neih ziah te, leh Jehova rinchhana ṭawngṭainate kan nei ṭhîn tûr a ni. Jehova’n min tichak tûr leh min fuih tûra a ruahmanna siam aṭang hian engmah i inlâk pêntîr lo vang u. Hêng thilahte hian i kut a zawi nia i inhriat chuan Pathian ṭanpuina dîl ang che. Tichuan,  Pathian thlarauvin ‘tih tum tûr leh bei tûra nangmaha a thawh’ dân chu hmu ang che. (Philippi 2:13) A nih leh, mi dangte kut i tichak thei em?

13, 14. (a) Engtin nge unaupa pakhat chuan a nupuiin a boralsan hnuah chakna a neih theih? (b) Engtin nge mi dangte kan tihchak theih?

¹³ Jehova chuan min ngaihsaktu, leh min fuih theitu khawvêl pum huap unaute min pe a. Tirhkoh Paula chuan: “Kut uai thlate chu char rawh u, khûp zawite nên; . . . in kete tân kawng ngîlte siam rawh u,” tiin a sawi a ni. (Hebrai 12:12, 13) Kristian hmasate chuan, chutiang ṭanpuina chu an unaute hnên aṭangin an dawng a. Tûn laiah pawh chutiang bawk chu a ni. Entîrna pakhat hi han ngaihtuah teh. A nupuiin a boralsanna leh dinhmun harsa tak dang chhel taka a hmachhawn hnuah unaupa pakhat chuan: “Fiahna kan tawh tûrte hi a thlen hun tûr leh a thlen zin dân tûrah duh kan thlang thei lo tih ka hria. Ṭawngṭaina leh mahnia inzirna neih chu tuia pil lova min siamtu nunna kawr ang a ni. Thlarau lama unaute min ṭanpuina chuan thlamuanna nasa tak min pe bawk. Harsatna a lo chhuah hma hian Jehova nêna mi mal inlaichînna ṭha neih a pawimawhzia ka hre ta a ni,” tiin a sawi.

¹⁴ Israel mite’n Amalek mite an do chhûng chuan Arona leh Hura’n Mosia kut chu tichak tûrin an ṭanpui a. Tûn laiah pawh, mi dangte ṭanpui dân kan zawng thei a ni. Kan unau ṭhenkhatte chuan kum upatna te, hrisêl lohna te, chhûngte tihduhdahna te, mal nia inhriatna te, leh hmangaih tak chânna te avângin  hrehawm an tuar a. Thil dik lo ti tûr leh he khawvêla hlawhtlinna zawng tûra nêksâwrna tawng ṭhîntu ṭhalaite chu kan tichak thei a ni. (1 Thessalonika 3:1-3; 5:11, 14) Chuvângin, Kingdom Hall-ah te, rawngbâwlnaah te, chaw ei honaah te, a nih loh leh phone-a mi i biak hunahte hian mi dangte ngaihsakna dik tak i lantîr theih dân kawngte zawng ang che.

15. Thu ṭha tak sawina chuan kan unaute chungah eng nghawng nge a neih theih?

¹⁵ Asa’n Ethiopia sipai rual tam tak chungah hnehna ropui tak a lâk hnuin amah leh a mite hnênah zâwlnei Azaria chuan: “Nimahsela nangni zawng chak takin awm ula, inthlahdah suh u, in thiltih man chu in hmu dâwn a ni,” tiin a fuih a. (2 Chronicles 15:7) Chu thu chuan Asa chu biakna thianghlim din ṭha leh tûra inthlâk danglamna nasa tak nei tûrin a chêttîr a ni. Chutiang bawkin, thu ṭha tak i sawina chuan mi dangte a fuih theiin, Jehova rawngbâwl chhunzawm zêl tûrin a ṭanpui thei bawk. (Thufingte 15:23) Inkhâwmnaa chhânnate i pêk hian i unaute i tichak a ni tih theihnghilh ngai suh ang che.

16. Engtin nge upate chuan Nehemia chu an entawn theih? Unaute’n a mi mal taka an ṭanpui dân che entîrna pe rawh.

¹⁶ Jehova ṭanpuina avângin Nehemia leh Judate chuan an kut an tichak a. Ni 52 chhûng lekin Jerusalem kulh chu an sa zo thei zu nia! (Nehemia 2:18, 6:15, 16) Nehemia chuan mi dangte hna thawk chu a thlîr mai mai lo va. Amah ngeiin Jerusalem kulh sak ṭhatnaah a ṭanpui a ni. (Nehemia 5:16) Chutiang bawkin, kohhran upate chuan Kingdom Hall saknaah te, Kingdom Hall tihthianghlimnaah te, leh enkawlnaahte an ṭanpui hian Nehemia an entawn a ni. Hmangaihna nei tak hêng upate hian “thinlung dâwihte” unaute chu tlawhin, leh rawngbâwlnaah thawhpuiin an tichak bawk.—Isaia 35:3, 4 chhiar rawh.

17, 18. Buaina leh lungkhamna kan neih hunah eng nge kan rin tlat theih?

¹⁷ Unaute nêna hna kan thawh tlânna chuan kan inlungrualna a tinghet a. Chu chuan inṭhianna nghet tak min neihtîrin Pathian Ramin malsâwmna a rawn thlen mai tûr chu rinnghehna min neih lehzualtîr a ni. Mi dangte kut kan tihchak hian, dinhmun khirh tak chu chhel taka tuar chhuak tûr leh nakin hun beiseina ṭha tak nei tûrin kan ṭanpui a. Chu bâkah, mi dangte kan ṭanpui hian, chu chuan kan kut a tichakin nakin hun thlîr tûrin min ṭanpui a ni.

¹⁸ Jehova’n tûn hmaa a chhiahhlawh rinawmte a ṭanpui dân leh a vênhim dânte kan ngaihtuah hian, amah kan rinna a nghet lehzual a. Chuvângin, buaina leh lungkhamna i neih hunah, “i kut pawh zawi suh se.” Ṭawngṭaia Jehova ṭanpuina i dîl chuan, a kut chak tak chuan a ṭanpui dâwn che tih leh, lo thleng mai tûr Lalram malsâwmnaah a hruai lût ang che tih i ring tlat thei a ni.—Sâm 73:23, 24. (ws16.09-E)