1, 2. Jehova chhiahhlawhte chuan engte nge an beih?

MI FEL Abela aṭanga tûn thlenga Pathian chiahhlawh rinawm zawng zawngte chuan nasa taka beihna an tâwk a. Tirhkoh Paula chuan Hebrai Kristiante chu Jehova pawm hlawh a, a malsâwmna dawn an tum laiin, “tuarna buai nasa tak” an tawng tih a hrilh a ni. (Hebrai 10:32-34) Paula chuan Kristiante beihna chu intlân siakna, inbuanna leh boxing ang chi Grik inelnaa telte nên a khaikhin a. (Hebrai 12:1, 4) Tûn lai hian, nunna intlânsiaknaah kan tlân mêk a, kan hlimna tihbo duhtu leh nakin huna kan lâwmman dawn tûrte hlohtîr min duhtu hmêlma tam tak kan nei a ni.

² Kan beih, a nih loh leh ‘buan’ ber chu Setana leh a khawvêl hi a ni a. (Ephesi 6:12) He khawvêl zirtîrna te, finna te, nungchang bawlhhlawhnaa inhmante, zial zûk te leh, zû emaw, damdawi emaw hman sualna ang chi chîn dân ṭha lote kan hnâwl hi  a pawimawh tak zet a. Lunghnualna leh kan chak lohnate pawh kan do zawm zêl tûr a ni.—2 Korinth 10:3-6; Kolossa 3:5-9.

3. Kan hmêlmate do tûrin Pathianin engtin nge min zirtîr?

³ Chutiang kan hmêlma chak takte chu kan do hneh thei ang em? Thei e; mahse, chu chu thil awlsam zawng a ni lo! Paula chuan: “Boruak mai hnek lovin mahni ka inhnek zâwk ṭhîn,” tia a sawi khân, boxer nên a inkhaikhin a. (1 Korinth 9:26) Boxer chuan a khingpui a bei ang bawkin, keini pawhin kan hmêlmate kan do a ngai a ni. Chutianga ti tûr chuan Jehova’n min ṭanpuiin, min zirtîr a. Ani chuan Bible hmangin min ṭanpui a ni. Bible ṭanchhan thu leh hla chhuahte, Kristian inkhâwm te, bial inkhâwmpui te, leh regional inkhâwmpuite hmangin min ṭanpui bawk. Chutiang kaihhruaina zawng zawng chu i hmang ṭangkai em? I hman ṭangkai loh chuan, boruak mai hnektu boxer ang maiin, i hmêlma chu i do tak tak lo a ni.

4. Engtin nge sual ngama kan awm loh vang?

⁴ Eng lai pawha kan harhvân reng a ngai a. Engvângin nge? Kan hmêlmate chuan kan beisei loh lai leh kan chak loh laia min beih theih vâng a ni. Bible chuan: “Sual ngam chein awm suh la, ṭhatnain sual chu ngam zâwk rawh,” tia min vaukhânin, min fuih bawk. (Rom 12:21) Sual chu kan do tlat chuan kan hneh thei a ni! Mahse, inthlahdah a, kan beih zawm zêl loh chuan kan chak lohnate leh Setana leh a khawvêl chuan min hneh thei a ni. Chuvângin, tlâwm ngai suh la, lunghnual lovin, i kut tizawi suh ang che!—1 Petera 5:9.

5. (a) Pathian pawmna leh a malsâwmna dawn kan duh chuan eng nge kan hriat reng ngai? (b) Bible-a tute chungchâng nge kan ngaihtuah ang?

⁵ Hnehna chang tûr chuan, kan beih chhan kan hriat reng a ngai a. Chu chu Pathian pawmna leh a malsâwmna dawn kan duh vâng a ni. Hebrai 11:6 chuan: “Pathian hnêna lo kal chuanin, ani chu a awm tih leh zawngtute [“tih tak zeta zawngtute,” Baptist Mid-Missons’ Translation] hnêna lâwmman pêk hmang a ni tih rin tûr a ni,” tiin a sawi a. Tih tak zeta Jehova zawng tih chu a pawm hlawh ni tûra kan thawhrim a ngai tihna a ni. (Tirhkohte 15:17) Bible-ah, chutianga ti entawn tûr ṭha a hmei a pa tam tak an awm a. Jakoba te, Rakili te, Josefa te, leh Paula te chuan rilru lam leh taksa lamah harsatna an tâwk ṭheuh va. Chuti chung pawhin an tuar chhuak thei a ni. An entawn tûr siamte’n kan thawhrim chuan Jehova malsâwmna kan dawng ve thei tih a târ lang chiang hle. A nih theih dân i lo en ang u.

6. Jakoba chu ṭhahnemngai taka bei tûrin engin nge ṭanpui a, engtin nge malsâwm a nih? (A thupui chunga milem en rawh.)

⁶ Mi rinawm Jakoba chuan Jehova a hmangaih avâng leh an inlaichînna a ngaihhlut avângin beidawng lovin a buan a. A thlahte malsâwm an ni ang tih Jehova thutiam chu a ring nghet tlat a ni. (Genesis 28:3, 4) Jakoba chu kum 100 a tlin dâwn khân, Pathian malsâwmna a dawn theih nân vântirhkoh pakhat nên an inbuan a. (Genesis 32:24-28 chhiar rawh.) Jakoba chu vântirhkoh chak tak buan tûrin a chak tâwk tak tak em? Chawk tâwk lo ve! Mahse, ani chu a tum ruh tlat a, malsâwmna dawn tumin theih tâwp a chhuah a ni! Jakoba’n ṭhahnemngai taka a beihna chu Jehova’n mal a sâwm a, Israela tih hming a pe a ni. Chu chu “Pathian buantu a nih loh leh ṭhahnemngai taka bei hrâm  hrâmtu,” tihna a ni. Jakoba chuan lâwmman a dawng a, keini pawhin Jehova pawm hlawh tûr leh a malsâwmna dawng tûra kan zawn chuan kan hmu ve dâwn a ni.

7. (a) Rakili chuan eng dinhmun hrehawm tak nge a tawn? (b) Rakili chuan nge eng a tih a, engtin nge malsâwm a nih?

⁷ Jakoba nupui duh tak Rakili chuan a pasal hnêna Jehova’n a thutiam a hlen dân hmuh chu a châk hle a. Mahse, harsatna pakhat a nei a. Ani chuan fa a nei thei lo va, chu chu Bible hun laia hmeichhiate tâna thil hrehawm tak a ni. Ani chuan dinhmun hrehawm taka a awm chung pawhin engtin nge a beih zawm zêl? A beiseina chu a thlahthlam ngai lo va. Chu ai chuan, Jehova hnênah ṭawngṭai nasa lehzualin a bei fan fan zâwk a ni. Pathian chuan tih tak zeta a ṭawngṭaina chu a ngaithla a, a tâwpa fate a neih chuan malsâwm niin a inhria a. “Pathian buanin . . . ka buan a, ka hneh ta,” tiin a sawi a ni.—Genesis 30:8, 20-24.

8. Josefa chuan eng harsatna nge a neih a, engtin nge ani chu kan tân entawn tûr ṭha a nih?

⁸ Rinawmna kawnga Jakoba leh Rakili entawn tûr siam chuan an fapa Josefa chungah nghawng a nei a, chu chuan harsatna a tawh hunah a ṭanpui a ni. Josefa chu kum 17 mi a nih khân, a nun a inthlâk danglam a. Amah thîktu a unaute chuan salah an hralh a. Thil  tihsual a nei lo chung pawhin, a hnuah Aigupta ramah kum tam tak tân ina khung a ni. (Genesis 37:23-28; 39:7-9, 20, 21) Josefa chu lunghnualin, a thinrim lo va, phuba lâk pawh a tum hek lo. Engvângin nge? Josefa chuan Jehova nêna an inlaichînna chu a ngaihlu a, chu chu a thinlung zawng zawnga a ngaihtuah tlat vâng a ni. (Leviticus 19:18; Rom 12:17-21) Josefa entawn tûr siam chuan min ṭanpui thei a. Naupan lai hun ṭha lo tak kan nei emaw, tûnah beiseina nei lo angin kan awm emaw a nih pawhin, kan beih fan fan a ngai a. Chutianga kan tih chuan, Jehova’n mal min sâwm ang tih kan chiang thei a ni.—Genesis 39:21-23 chhiar rawh.

9. Engtin nge Jakoba te, Rakili te, leh Josefa te chu kan entawn theih?

⁹ Tûn laiah pawh, harsatna kan hmachhawn a ngai mai thei a. Rorêlna dik lo te, inpâwng huatna te leh innuihsawhnate avângin, a nih loh leh tuemawin a thîk vâng chein hrehawm i tuar pawh a ni mai thei. Lunghnual mai lovin, hlim taka Jehova rawngbâwl zawm zêl thei tûra Jakoba te, Rakili te, leh Josefa te ṭanpuitu chu hre reng ang che. Pathian nêna an inlaichînna chu an ngaihhlut tak zet avângin Pathianin anni chu a tichakin mal a sâwm a. Anni chuan an bei fan fan a, an ṭawngṭaina milin thil an ti a ni. Ni hnuhnûnga kan awm avângin, nakin hun kan beiseina chu kan tihngheh tlat a pawimawh hle! Jehova duhsakna dawng tûrin buan—thawhrim—i inhuam em?

10, 11. (a) Engvângin nge Pathian malsâwmna dawng tûra kan buan a ngaih mai theih? (b) Engin nge duhthlanna dik siam tûra min ṭanpui ang?

¹⁰ Engvângin nge Pathian malsâwmna dawng tûra kan buan a ngaih mai theih? A pakhatnaah chuan ṭha famkim lo kan nih avângin, châkna dik lo ṭhenkhatte chu kan do a ngai mai thei a. Mi ṭhenkhat chuan rawngbâwlna chungchânga rilru put hmang dik tak nei tûrin an bei a, mi dangte chuan an hrisêl lohna avâng leh mal nia an inhriatna avângin an bei nasa hle bawk. Anmahni tinatu ngaihdam harsa ti mi ṭhenkhat an la awm bawk a. Eng anga rei pawh Jehova rawng lo bâwl tawh mah ila, mi rinawmte lâwmman petu Pathian rawngbâwlnaa harsatna min thlentu thilte chu kan do ṭheuh tûr a ni.

¹¹ Kristian pakhat nih leh duhthlanna dik siam chu a harsa hle thei a, châkna dik lo kan do hunah a harsa lehzual bîk a ni. (Jeremia 17:9) Chutianga i awm chuan, Jehova hnênah ṭawngṭaiin a thlarau thianghlim dîl ang che. Ṭawngṭaina leh thlarau thianghlim chuan thil dik ti tûrin chakna a pe thei che a, Pathian malsâwmna i dawng thei bawk ang. I ṭawngṭaina milin nun tum tlat ang che. Bible nî tin chhiar tum la, mahnia inzirna leh chhûngkuaa Pathian biakna atân hun insiam rawh.—Sâm 119:32 chhiar rawh.

12, 13. Kristian pahnihte chu an châkna dik lo thunun tûrin eng anga ṭanpui nge an nih?

¹² Pathian Thu, a thlarau, leh kan Kristian thu leh hla chhuahte’n kan unaute chu châkna dik lote do hneh thei tûra a ṭanpui dân entîrna tam tak a awm a. Tleirâwl pakhat chuan, Awake! December 8, 2003-a “Châkna Dik Lote Engtin Nge I Hneh Theih Ang?” tih thuziak chu a chhiar a. Engtin nge a chhân lêt? “Ka ngaihtuahna ṭha lo chu thunun theih ka tum a. ‘Mi tam tak tân pawh châkna dik lo hneh hi thil harsa tak a ni,’ tih ka chhiar chuan, unaute tawn ang tawng ve niin ka inhria a. Keimah chauh ka ni lo tih ka hria a ni.” He tleirâwl hian Awake!  October 8, 2003-a târ lan “Mahni Duh Dâna Nun—Pathianin A Pawm Em?” tih thuziak chu a hlâwkpui bawk a ni. Chu thuziakah chuan, chu beihna chu mi ṭhenkhat tân, ‘tîsaa hlîng’ ang maiin do reng a ngai tih a hria a. (2 Korinth 12:7) Nungchang thianghlim vawng reng tûra an beih zawm zêl avângin nakin hun beisei tûr ṭha tak an nei a ni. “Chuvângin, nîte a liam zêl rual hian ka rinawm reng thei tih ka hria. He khawvêl suaksual laka nî tina kan dam khawchhuah nâna Jehova’n a inawpna pâwl a hmang chu ka lâwm tak zet a ni,” tiin a sawi.

¹³ United States-a unaunu thiltawn pawh hi han ngaihtuah teh. Ani chuan: “Kan mamawh tak chu a hun taka min pêk ṭhin avângin lâwm thu sawi ka duh a. Hêng thuziakte hi ka tâna ziak niin ka ngai ṭhîn. Jehova huat zâwngte tihchâkna nasa tak ka neih chu kum tam tak chhûng ka do va. A châng chuan, ka beidawng ṭêp a, do tawh loh mai ka duh a ni. Jehova chu zahngai thei tak leh ngaihdam peih tak a ni tih ka hria; mahse, he châkna dik lo hi ka hnâwl hulhual theih loh avângin a ṭanpuina dawng tlâk lo niin ka inhria a ni. Chutianga ka hnâwl hulhual theih tâk lovah chuan ka nun kawng tin rêngah nghawng a nei a. . . . Vênnainsâng March 1, 2013-a “Jehova ‘Hriat Duhna Thinlung’ I Nei Em?” tih thuziak ka chhiar hnu chuan Jehova’n min ṭanpui duh tak zet niin ka inhria,” tiin a ziak a ni.

14. (a) Engtin nge Paula chuan a beihna chungchâng chu a ngaih? (b) Engtin nge kan chak lohnate kan do hneh theih?

¹⁴ Rom 7:21-25 chhiar rawh. Paula chuan châkna dik lo, leh chak lohnate do a harsat dân a hria a. Mahse, Jehova hnênah a ṭawngṭai a, a ṭanpuina rinchhanin, Isua inthawinaa rinna a lantîr chuan he beihna hi a hneh thei tih a hre chiang a ni. Eng nge kan an ve? Kan chak lohnate kan do hneh thei em? Paula entawnin Jehova kan rinchhan tlat a, mahni chakna rinchhan lo va, tlanna inthawinaa rinna kan neih chuan kan hneh thei a ni.

15. Engtin nge Jehova chuan rinawm reng tûr leh fiahnate tuar chhuak tûra min ṭanpui theih?

¹⁵ Pathianin thil pakhat chungchânga kan ngaihven tak zet dân lantîr theihna min pêk châng a awm a. Entîr nân, keimahni emaw, kan chhûngkuate emaw chuan natna khirh tak tuar ta ila, a nih loh leh dik lo taka rorêl sak ni ta ila, chu chu engtin nge kan chhân lêt ang? Jehova kan rinchhan tak zet chuan, a laka rinawm reng thei tûr te, hlimna nei reng tûr te, leh kan inlaichînna nghet reng thei tûra kan mamawh chakna min pe tûrtein a ṭanpuina kan dîl ang. (Philippi 4:13) Tûn hma leh tûn laia Kristian tam takte entawn tûr siam chuan ṭawngṭainain min tichak theiin, chhel taka tuar chhunzawm thei tûra kan mamawh huaisenna min pe thei tih a târ lang a ni.

16, 17. Eng nge tih i tum tlat?

¹⁶ Diabola chuan i lunghnual a, i beidawn a, i kut i tizawi hmuh chu a duh ngei ang. Chuvângin, “a ṭha apiang pawm tlat” ang che. (1 Thessalonika 5:21) Setana, a khawvêl suaksual, leh châkna dik lo engpawh chu i do hneh thei! Pathianin a tichak chein, a ṭanpui dâwn che tih i rin tlat chuan i hneh thei a ni.—2 Korinth 4:7-9; Galatia 6:9.

¹⁷ Chuvângin, do tlat la. Bei fan fan la. Buan reng la. Ṭhahnemngai takin bei ang che. Jehova’n ‘malsâwmna dawn sên loh khawp hial a vûr dâwn che,’ tih i ring tlat thei a ni.—Malakia 3:10. (ws16.09-E)