I naupan laia i tlûk kha i la hria em? I kut emaw, i khûp emaw i tipilh pawh a ni thei. I nu’n a thlamuan dân che i la hre chhuak thei em? I pem chu tifaiin a tuamsak che pawh a ni thei. I ṭap a; mahse, i nu’n a thlêm che a, duat taka a pawm che chuan i thla a muang ta hle a ni. Chutih lai chuan, i tân thlamuanna chu i bul hnaiaha awm a ni.

Mahse, kan rawn upat chhoh hian nun hi a harsa chho zêl a. Harsatnate chu a nasa tawlh tawlh a, thlamuanna hmuh pawh a harsa tawlh tawlh bawk a ni. Lungchhiatthlâk takin, puitlin hnua kan tawn harsatnate chu pem tuam ang emaw, nu pawmna ang emawa chinfel theih a ni tawh lo. Entîrna ṭhenkhat hi han ngaihtuah teh.

• Hna i chân avângin lungngaiin i awm tawh ṭhîn em? Julian-a chuan meia a intihkan chuan a rilru a chi-aiin a beidawng hle tih a sawi a. ‘Engtin nge ka chhûngte ka enkawl tâk ang? Kum tam tak chhûng theih tâwp ka chhuah hnuah pawh, engvângin nge company chuan hman tlâk loh anga mi ngaih?’ tiin a ngaihtuah a ni.

• In nupa inṭhenna chuan i nun a tichhe mai thei a. Raquel-i chuan, “Thla 18 liam ta a, ka pasalin min chhuahsan thut chuan lungngaihna nasa takin min tlâk buak a. Ka hrilhhaiin, nâ ka ti hle a. Taksa lamah leh rilru lamah ka tuar tak meuh a ni. Chu chuan min tithlabâr hle,” tiin a sawi.

• Ṭha chho thei tawh lo tûr anga lang natna khirh tak i vei pawh a ni thei a. Thlahtu Joba angin i tawrh châng pawh a awm ngei ang, ani chuan: “Ka ning hluah hluah, ka nung rei lo vang,” tiin a sawi a. (Joba 7:16) “Thih hun nghâk mai nia inhriat châng pawh ka nei a,” tia sawitu kum 80 mi Luis-a tawrh angin i tuar ve mai thei.

• I hmangaih tak a thih avângin thlamuan ngai niin i inhria pawh a ni thei a. “Thlawhna chêtsualnaa ka fapa a boral chuan, a tîrah ka ring thei lo va. A hnuah chuan, Bible-a sawi ngûnhnâma chhun tlang ang maiin nâ ka ti a ni,” tiin Robert-a chuan a sawi.—Luka 2:35.

Robert-a, Luis-a, Raquel-i, leh Julian-a te chuan dinhmun harsa hnuaiah pawh thlamuanna an hmu a. Anni chuan tu dang ni lovin, Mi ṭha ber, thlamuanna petu Pathian Engkimtitheia chu an hmu a ni. Ani chuan engtin nge thlamuanna a pêk? I mamawh thlamuanna a pe ve che ang em? (wp16.05-E)