Tirhkoh Paula chuan Jehova * chu, ‘thlamuanna zawng zawng Pathian, . . . kan hrehawmna zawng zawnga min thlamuan ṭhîntu,’ niin a sawi a. (2 Korinth 1:3, 4) Chutiang chuan, Pathian ṭanpui theih loh tumah an awm lo va, kan Pa vâna mi thlamuan theih loh khawpa nasa harsatna lah a awm hek lo tih Bibile chuan min hrilh a ni.

Pathian thlamuanna dawn kan duh chuan thil engemaw kan tih a ngai ngei mai. Doctor hmu tûra ruahmanna kan siam loh chuan engtin nge min ṭanpui theih ang? Zâwlnei Amosa chuan: “An inrem chauh loh chuan mi pahnih an kal dûn ang em ni?” tiin a zâwt a. (Amosa 3:3) Chuvângin, Bible chuan: “Pathian hnaih rawh u, tichuan anin a hnaih ang che u,” tiin min fuih a ni.—Jakoba 4:8.

Pathianin min hnaih dâwn tih engtin nge kan chian theih? A hmasa berah chuan, min ṭanpui a  duh tih min hrilh nawn fo vâng a ni. ( Bâwm en rawh.) A pahnihnaah chuan, hmân lai leh tûn laia Pathian thlamuanna dawngtute thiltawn rin tlâk tak kan neih vâng a ni.

Tûn laia Pathian ṭanpuina zawngtu mi tam tak ang bawkin, Lal Davida pawhin harsatna tam tak a tawng a. “Khawngaih ka dîlna awte hi ngaithla ang che,” tiin Jehova hnênah a ngên a ni. Pathianin a chhâng em? Chhâng e. Davida chuan: “Puihin ka awm a; chuvângin ka thinlung hi nasa takin a hlim,” tiin a sawi belh a ni.—Sâm 28:2, 7.

Isua’n mite thlamuan tûra chanvo pawimawh tak a neih hi Pathian ruahman a ni a. Pathianin Isua hnêna a pêk chanvo tam tak zîngah chuan, ‘thinlung lungchhiate tuam’ leh “lungngai zawng zawng thlamuan” a tel a ni. (Isaia 61:1, 2) Sawi lâwk angin, Isua chuan “thawk rim leh phurrit phur zawng zawngte” chu a ngaihsak tak zet a ni.—Matthaia 11:28-30.

Isua chuan mite chu thurâwn fing tak pein, ngilnei taka cheibâwlin, leh dinhmun ṭhenkhatah chuan an natnate tih damsakin a thlamuan a. Ni khat chu phâr pakhatin Isua hnênah: “I duh chuan mi tithianghlim thei e,” tiin a ngên a. Isua’n a khawngaih êm avângin: “Ka duh e, lo thianghlim tawh ang che,” tiin a chhâng a. (Marka 1:40, 41) Tichuan, a phâr chu a lo dam ta a ni.

Tûn laiah, Pathian Fapa chu a mi mal taka min thlamuan tûrin leiah a awm lo va. Mahse, a Pa, “thlamuanna zawng zawng Pathian” Jehova chuan ṭanpui ngaite chu a ṭanpui zawm zêl a ni. (2 Korinth 1:3) Pathianin mite thlamuan nâna a hman thil palite chu ngaihtuah rawh.

• Bible. “Pathian Lehkha Thua chhelna leh thlamuanna hmua beiseina kan neih theihna tûrin, hmân laia ziak apiangte chu keimahni min zirtîrna tûrin ziak a ni si a.”—Rom 15:4.

• Pathian Thlarau Thianhlim. Isua thih hnu lawk khân, Kristian kohhrante chu muang takin an awm ta a. Engvângin nge? “Lalpa ṭih dêkin, thlarau thianghlim thlamuanin an awm,” vâng a ni. (Tirhkohte 9:31) Thlarau thianghlim, Pathian chakna chevêl reng chu thiltithei tak a ni a. Pathianin chu chu eng dinhmun hnuaiah pawh mite thlamuan nân a hmang thei a ni.

• Ṭawngṭaina. Bible-in: “Engah mah mangang suh u,” tiin thurâwn min pe a. “In duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu . . . a vênsak ang che u,” tiin a sawi a ni.—Philippi 4:6, 7.

• Kristian Unaute chuan ṭhian dik takte hnênah thlamuanna an pe thei a. Tirhkoh Paula chuan a ṭhiante chu “manganna leh hrehawmna” a tawh huna “thlamuantute,” niin a sawi.—Kolossa 4:11; 1 Thessalonika 3:7.

Mahse, hêng zawng zawngte hi a tak tak a nih leh nih loh i ngaihtuah mai thei. A tîra kan sawi tâk harsatna tâwktute thiltawn chu i lo bih chiang ang u. Anmahni ang bawkin, Pathianin he thutiam phûrawm tak: “Mi, a nuin a thlamuan angin ka thlamuan ang che u,” tih hi a la thlen famkimtîr reng tih i hmu thei ang.—Isaia 66:13. (wp16.05-E)