1, 2. (a) Gideona leh a mi 300-te chhelna aṭangin eng nge kan zir theih? (A thupui chunga milem en rawh.) (b) Luka 21:19 thute aṭangin, engvângin nge chhelna chu thil pawimawh tak a nih?

RORELTU Gideona kaihhruai Israel sipaite leh an hmêlmate inkâra thleng indona harsa tak leh hahthlâk tak chu mitthla han tum chhin teh. Gideona leh a mite chuan Midian-ho leh an ṭanrualpuite chu zan khuain kilometer 32 (mêl 20) vêla hla an ûm a! Bible chuan a dawta thilthleng chu heti hian min hrilh a ni: ‘Gideona leh a hnêna mi zathum awmte chuan Jordan lui chu an zuk thleng a, an kân a, an chau hle a,’ tiin. Mahse, hnehna an la chang lo va, sipai 15,000 lai chu an do a la ngai a ni. Hêng hmêlmate hian kum tam tak chhûng an lo hnehchhiah tawh a, chuvângin Israel mite chu beidawng thei an ni lo. Gideona leh a mite chuan an hmêlmate chu an ûm zêl a, a tâwpah chuan an hneh ta vek a ni.—Rorêltute 7:22; 8:4, 10, 28.

² Keini pawhin indona harsa tak leh hahthlâk tak chu kan nei a. Kan hmêlmate chu Setana, a khawvêl, leh kan ṭhat famkim lohnate hi an ni. Kan zînga ṭhenkhat chuan hêng hmêlmate hi kum tam tak chhûng kan lo do tawh a. Jehova ṭanpuinain  indona tam takah hnehna kan chang tawh a ni. Mahse, kan indona chu a la tâwp lo. A châng chuan do kan peih tawh lo pawh a ni thei a. A nih loh leh, he khawvêl suaksual tâwpna nghah chu kan peih tawh lo pawh a ni thei bawk. Isua chuan hêng ni hnuhnûng chhûng hian fiahna nasa tak leh tihduhdahna râwng tak kan tuar ang tih sawiin min vaukhân a. Mahse, chhel taka kan tuar chuan kan hneh thei tih a sawi bawk. (Luka 21:19 chhiar rawh.) Chhelna chu eng nge ni? Chhel tûrin engin nge min ṭanpui ang? Chhel taka tuartute hnên aṭangin eng nge kan zir theih? Engtin nge ‘chhelna chu kan thawh famkimtîr theih’?—Jakoba 1:4.

3. Chhelna chu eng nge ni?

³ Bible-a chhelna tih hian dinhmun khirh tak tawrhna emaw, dawhna emaw mai aia tam a kâwk a. Chutah chuan fiahna kan tawh chungchânga kan ngaihtuah dân leh vei dân a tel a ni. Chhelna chuan huaisen tûr te, rinawm tûr te, leh dawhthei tûrtein min ṭanpui a ni. Lehkhabu pakhat chuan, chhelna chu fiahna kan tawh laia beiseina nghet tak nei tûr leh beidawng lo tûra min ṭanpuitu mizia a ni tih a sawi. Chu chuan fiahna khirh ber kan tawh hun pawha nghet tak leh tihchêt rual lohva awm tûrin min ṭanpui a ni. Chu bâkah, fiahnate chu hnehnaa chantîr tûr leh kan hrehawm tawrhte ngaihtuah lova, kan thiltumte ngaihtuah tlat zâwk tûrin min ṭanpui bawk.

4. Chhelna chu hmangaihnain a chêttîr vâng a ni tih engvângin nge kan sawi theih?

⁴ Hmangaihna chuan chhel tûrin min chêttîr a. (1 Korinth 13:4, 7 chhiar rawh.) Eng thilahte nge? Jehova hmangaihna chuan kan tawrh atâna a remtih engpawh chhel taka tuar chhuak tûrin min chêttîr a ni. (Luka 22:41, 42) Unaute kan hmangaihna chuan an ṭhat famkim lohnate chhel taka dawh tûrin min ṭanpui a. (1 Petera 4:8) Kan kawppuite hmangaihna chuan, nupa hlim takte pawhin an neih ‘hrehawmna’ chu chhel taka tuar chhuak tûr leh kan inneihna tinghet tûrin min ṭanpui bawk a ni.—1 Korinth 7:28.

5. Engvângin nge Jehova chu chhelna nei tûra min ṭanpui theitu ber a nih?

⁵ Jehova hnênah chakna dîl rawh. Jehova chu “chhelna leh thlamuanna [petu] Pathian” a ni a. (Rom 15:5) Amah chauh chu kan dinhmun, kan rilru veizâwng, leh kan ṭobulte hre chiangtu awmchhun a ni. Chuvângin, chhel tûra kan mamawhte chu a hria a. Bible chuan: “Amah ṭihtute duh chu a hlawhtlintîr ang a; an au thâwm a hria ang a, anni chu a chhandam ang,” tiin a sawi. (Sâm 145:19) Mahse, chhel nâna kan mamawh chakna kan dîlna chu Pathianin engtin nge min chhân ang?

6. Bible-a tiam a nih angin, engtin nge Jehova’n fiahna kan tawh hunah “tlân chhuahna kawng” min siamsak theih?

⁶ Jehova hnêna chhelna nei tûra ṭanpuina kan dîl hian, ani chuan “tlân chhuahna kawng” siamsak min tiam a. (1 Korinth 10:13 chhiar rawh.) Chu chu engtin nge a tih? A châng chuan, fiahnate chu a la bo  thei a. Mahse, a tam zâwkah chuan, “hlim taka chhelna leh dawhtheihna tinrêng nei” tûrin chakna min pe a ni. (Kolossa 1:10-12) Jehova chuan kan taksa, kan rilru, leh kan ngaihtuahnate phâk tâwk chu a hriat chian êm avângin, rinawm reng thei lo tûr khawpa harsatna kan tawh chu a phal ngai lo vang.

7. Chhelna nei tûra thlarau lam chaw kan mamawh chhan entîrna pein sawifiah rawh.

⁷ Thlarau lam chaw chuan i rinna tinghet rawh se. Engvângin nge thlarau lam chaw chu a pawimawh? Entîr nân: Everest tlânga lâwn tûr chuan, miin ni khatah kan thil eia tel chaknaa kal tûr calory 6,000 vêl a mamawh a. Chu chu mi pângngaite mamawh aiin a tam zâwk a ni. Tlâng lâwn mi chuan chhelna nei a, a tum ram thleng tûrin chakna pai tam thilte a ei ṭeuh a ngai a ni. Chutiang bawkin, chhelna nei tûr leh kan tum ram thleng tûrin thlarau lam chaw ṭhahnem tâwk tak kan mamawh a. Mahnia inzirna leh inkhâwmna atâna hun hman chu kan tum tûr a ni. Hêngte hian rinna nghet tak nei reng tûra kan mamawhte chu min pe ang.—Johana 6:27.

8, 9. (a) Joba 2:4, 5 sawi angin, fiahnate kan tawh hunah eng thilte nge inkaihhnawih tel? (b) Fiahna i tawh hunah hmuh theih loh eng thilte nge i mitthla theih?

⁸ Pathian chunga i rinawmna chu hre reng rawh. Fiahna kan tawh hian, kan hrehawm tawrh mai aia tam a tel a. Pathian chunga kan rinawmna chu fiah a ni. Fiahnate kan chhân lêt dân chuan, Jehova chu lei leh vâna Rorêltu dik tak anga kan thlîr leh thlîr loh a târ lang ṭhîn. Chu chu engtin nge a nih theih? Pathian rorêlna dodâltu, hmêlma Setana chuan mihringte’n mahni hmasialna avânga Pathian rawng an bâwl anga sawiin, Pathian Jehova chu a diriam a. “Miin a neih zawng zawng a nunna atân a pe phal ang chu!” tiin a sawi. Chutah, Joba chungchângah: “Tûnah i kut thawh la, a ruh leh a tisa ngei khawihsak teh, i hmaichhan ngeiah a sawichhe mai ang che,” tiin a sawi bawk. (Joba 2:4, 5) Chutiang puhna a sawi aṭang chuan Setana chuan a ṭanhmun a thlâk em? Thlâk lo ve! Kum tam tak hnua vân aṭanga paihthlâk a nih khân, Pathian chhiahhlawh rinawmte chu a la sawi chhe reng a ni. (Thu Puan 12:10) Tûn laiah pawh, Setana chuan mihringte’n mahni hmasialna avânga Pathian biaah a la puh reng a. Rorêl tûra Pathian dikna neih chu hnâwl a, a rawngbâwlna kan bânsan hmuh chu a châk hle a ni.

⁹ Fiahna hmachhawna hrehawm i tawrh lai hian, he hmuh theih loh thilthleng hi mitthla tum ang che. Setana leh a ramhuaite chu an ṭang rual a. I thiltih tûrte an thlîr rengin, i tlâwm dâwn an ti tlat a ni. A leh lamah chuan, Pathian Jehova, kan Lal Isua Krista, tho leh hriak thihte, leh vântirhkoh sâng tam takte an awm a. Anni pawhin theih tâwp chhuahin i ṭang tih an hmu chein, aw râwl chhuahin an ṭan a che! Chhel taka awm a, Jehova chungah i rinawm reng tih an hmuh hian an hlim hle a. Tichuan, Pathian Jehova’n: “Ka fapa, fing la ka thinlung tilâwm rawh; mi sawi chhetute ka chhân theih nân,” tia a hrilh lai chu bengin i hria a ni.—Thufingte 27:11.

10. Chhelna lâwmman ngaihtuah tlatna kawngah engtin nge Isua i entawn theih?

 ¹⁰ Malsâwmnate chu ngaihtuah tlat rawh. Khawi emaw lam pana zin chhuak angin han inchan teh. Kawngah chuan, tlâng verh tlanga siam lei hnuai kawng thui tak i kal tlang a ngai a ni. Chu kawnga i tlân lai chuan i hawina lam apiang chu a thim vek a. Mahse, i kal zawm zêl chuan a tâwp i thleng ang a, khaw êng i hmu leh dâwn tih i hria a ni. Nun chu, chutiang kawnga zin ang a ni a. Hun harsa tak takte i pal tlangin, i buainate chuan a chîmbuai che niin i inhre mai thei a. Isua ngei pawh chutiang niin a inhre mai thei a ni. Nghaisakna bana tihhlum a nih khân, ani chu tihmualphova awmin, nasa takin a tuar a. Hei hi a nuna hun harsa ber a ni ngei ang! Chhel tûrin engin nge ṭanpui? Bible chuan, “a hmaa hlimna awm” chu a en tih a sawi a ni. (Hebrai 12:1-3) Isua chuan a chhelna avânga a lâwmman hmuh tûr leh chu aia pawimawh zâwk, Pathian hming tihthianghlimna leh rorêl tûra dikna a neih thlâwpnaa a chanvo neih chu a ngaihtuah tlat a ni. Fiahna chu rei lo tê chhûng atân mai a niin, vâna a lâwmman dawn tûr chuan chatuan a daih ang tih a hria a ni. Tûn laiah pawh i fiahna tawh chuan nasa taka chîmbuai chein, tawrh a hrehawm hle pawh a ni thei; mahse, chûng chu rei lo te atân mai a ni tih hre reng ang che.

11. Engvângin nge ‘chhel taka tuartute’ thiltawn chu kan ngaihtuah ang?

¹¹ Chhel ngai chu keimahni chauh kan ni lo. Kristiante chu Setana fiahna tam tak tuar chhuak thei tûra fuih nân, tirhkoh Petera chuan heti hian a ziak a ni: “In unau khawvêla awmhote chungah chuan chutiang tuarna chu a thleng ve a ni tih hriain, ring nghet taka awmin amah chu do rawh u,” tiin. (1 Petera 5:9) ‘Chhel taka tuartute’ thiltawn chuan rinawm reng theih dân min zirtîr a, kan hlawhtling thei tih min hriattîr bâkah, rinawmna lâwmman kan la dawng ang tih min hriatnawntîr a ni. (Jakoba 5:11) Entîrna ṭhenkhat i lo ngaihtuah ang u. ^[1]—Endnote en rawh.

12. Eden huana cherub awmte entawn tûr siam aṭangin eng nge kan zir?

¹² Cherubte chu vântirhkoh nihna sâng tak chelhte an ni a. Adama leh Evi’n thil sual an tih hnuah, Jehova chuan cherub ṭhenkhat hnênah leia hnathawh tûr thar a pe a ni. Chu chu vâna an hnathawh nên chuan a inang lo hle. An entawn tûr siam chuan hna harsa tak thawh tûr kan dawn hunah chhelna neih theih dân min zirtîr a ni. Jehova chuan, “nunna thing kawng chu vêng tûrin Eden huan chhak lampangah chuan Cherub-te leh mei khandaih vir tawn zawk zawk  chu a awmtîr ta bawk a,” tiin Bible chuan a sawi. ^[2] (Endnote en rawh.) (Genesis 3:24) Bible chuan, cherub-te sawisêlna thu emaw, an hnathawh a hniam lutuk anga an ngaih thu emaw a târ lang lo. An hnathawh an ning lo va, an bânsan hek lo bawk. Chu ai chuan, a hnu kum 1,600 vêla thleng nia lang Tuilêt thlengin an hna chu rinawm takin an thawk ṭâng ṭâng zâwk a nih chu!

13. Engtin nge Joba chuan fiahna a tawrh chhuah theih?

¹³ Mi rinawm Joba. A châng chuan i ṭhiante emaw, i chhûngte emaw thusawi ṭha lote avângin, i rilru a nâ pawh a ni thei a. A nih loh leh, i dam lo nasa hle emaw, i hmangaih tak tuemaw a thih avângin i tuar hle emaw pawh a ni thei bawk. Mahse, eng thil pawh thleng se, Joba entawn tûr siam aṭangin thlamuanna i hmu thei a ni. (Joba 1:18, 19; 2:7, 9; 19:1-3) Joba chuan vawi leh khata fiahna tam tak a tawrh chhan chu hre lo mah se, a tlâwm ngai lo a ni. Engin nge chhel tûra ṭanpui? A hmasa berin, Jehova a hmangaih a, amah tihlâwm loh chu a hlau va. (Joba 1:1) Hun ṭha leh ṭha lovah pawh Pathian tihlâwm a duh reng a ni. Chu bâkah, Jehova chuan Joba hnênah a thil siam ropui tak ṭhenkhatte chungchâng hrilhin, a thiltihtheihna hre tûrin a ṭanpui a ni. Chu chuan a fiahna tawhte chu a hun takah Jehova’n a tih tâwpsak ang tih a rin nghehtîr lehzual a ni. (Joba 42:1, 2) Chutiang chiah chuan a thleng ta a. “LALPAN Joba chan chu a tiṭha leh ta a; LALPA chuan Joba chu a hmaa a neih lêt hnih a pe leh ta a.” Joba chu “tar tak, khûp bihin” a dam a ni.—Joba 42:10, 17.

14. Korinth thawn hnih 1:6 sawi angin, engtin nge Paula chhelna chuan mi dangte a ṭanpui?

¹⁴ Tirhkoh Paula. Dodâlna nasa tak emaw, tihduhdahna emaw i tuar em? Mawhphurhna tam takin chîmbuai nia inhriatna nei kohhran upa emaw, bial kantu emaw i ni em? I nih chuan, Paula entawn tûr siam  chuan a ṭanpui thei che a ni. Paula chuan tihduhdahna râpthlâk takte a tuar a, kohhrana unaute chungchângah a mangang hle ṭhîn a ni. (2 Korinth 11:23-29) Mahse, a beidawng ngai lo va, a entawn tûr siam chuan mi dangte a tichak a ni. (2 Korinth 1:6 chhiar rawh.) Chutiang bawkin, i chhelna hian mi dangte pawh chhel tûrin a tichak thei a ni.

15, 16. (a) Chhelna chuan eng hna nge a “thawh” famkim a ngaih? (b) ‘Chhelna kan thawh famkimtîr’ theih dân entîrna pe rawh.

¹⁵ Zirtîr Jakoba chu: “Engmah tlachham lova in famkim a, in puma in him theih nân chhelna chuan thawk famkim rawh se,” tih ziak tûra thâwk khum a ni a. (Jakoba 1:4) Engtin nge chhelna chuan keimahniah a ‘thawh’ famkim theih? Fiahna kan tawh hian dawhtheihna, lâwm nachâng hriatna, a nih loh leh hmangaihna kan neih lehzual a ngai tih kan hre mai thei a. Chhel taka fiahna kan tawrh hian hêng miziate târ lan lehzual dân kan zir ang a, chutiang chuan Kristian miziate kan nei chho lehzual thei ang.

¹⁶ Chhelna chuan Kristian ṭha lehzual min nihtîr theih avângin, fiahna kan tawhte tihtâwp nâna Jehova dân bawhchhiat chu kan duh lo vang. Entîr nân, nungchang bawlhhlawh ngaihtuahna lama buaina i nei a nih chuan, chu thlêmna lakah chuan tlâwm mai suh! Ngaihtuahna ṭha lote hnâwl tûrin Jehova ṭanpuina dîl ang che. Nangmah dodâltu chhûngte i nei em? Beidawng mai suh! Jehova rawngbâwl zawm zêl chu tum ang che. Chu chuan, Jehova i rinna a tinghet ang. Pathian pawm tlâk ni tûr chuan kan chhel a ngai tih hi hre reng ang che.—Rom 5:3-5; Jakoba 1:12.

17, 18. (a) A tâwp thlenga chhel a pawimawhzia entîrna pe rawh. (b) Tâwpna kan hnaih rual hian, eng nge kan rin tlat theih?

¹⁷ Hun engemawti chhûng chauh ni lovin, a tâwp thlengin kan chhel tûr a ni. Lawng pakhat pil mêk chu han mitthla teh. Dam chhuak tûr chuan passenger-te tân lui kam thlenga an hleuh kai a ngai a. A tui hleuh ṭan laia tlâwm maitu chu a tla hlum ngei ang. Chutiang bawkin, lui kam a thlen hma lawka tlâwmtu pawh a tla hlum bawk ang. Khawvêl thara nun kan duh chuan, kan chhel reng a ngai a ni. “Kan dawl lo,” titu tirhkoh Paula rilru put hmang ang hi neih i tum ṭheuh vang u.—2 Korinth 4:1, 16.

¹⁸ Paula angin, a tâwp thlenga chhel tûrin Jehova’n min ṭanpui ngei ang tih kan ring nghet tlat a. Ani chuan: “Min hmangaihtu avâng chuan, ropui taka ngamtu kan ni. Thihna te, nunna te, vântirhkoh te, lalna te, thil awm sa te, thil lo la awm tûr te, thiltihtheihna te, sânna te, thûkna te, thilsiam dang rêng rêngte pawhin, kan Lalpa Krista Isuaa awm Pathian hmangaihna ata chu mi ṭhen thei lovang tih dik takin ka hre si a,” tiin a ziak a ni. (Rom 8:37-39) Chauh châng kan nei ang tih chu a dik ngei mai. Mahse, Gideona leh a mite chu i entawn ang u. Chau hle mah se, an tlâwm mai lo va. “An ûm zêl” zâwk si a!—Rorêltute 8:4. (ws16.04-E)