KAN rawngbâwlna hi a pawimawhin, a hlu êm êm a. Mahse, kan thu hrilhna mi zawng zawng chuan chu chu an hre thiam lo. Mite’n Bible sawi chu ngaihven mah se, keimahni nêna Pathian Thu zir chu ṭûl an ti ṭhîn lo a ni.

Entîr nân, Gavin-a hi han ngaihtuah teh. Kingdom Hall-ah a inkhâwm ṭhîn a; mahse, Bible zir erawh a duh lo. A sawi dân chuan, Bible a hriat tlêmzia mi dangte hriat a duh loh vâng a ni. An sakhua zâwm tûra an sâwm a hlau va, bum nih a duh lo bawk. Eng nge i ngaih dân? Gavin-a chu ṭanpui theih a nih i ring em? Bible zirtîrnain mi chunga rah ṭha a chhuah theih dân hi ngaihtuah ang che. Jehova chuan Israelte hnênah: ‘Dai angin ka thusawi chu a far ang; hlobet no dep chunga ruah angin,’ tiin a sawi. (Deuteronomy 31:19, 30; 32:2) “Mi zawng zawng” ṭha taka kan ṭanpui theih nân, dai chanchin tlêm azâwng zirin, kan rawngbâwlna nên i lo khaikhin ang u.—1 Timothea 2:3, 4.

Dai chu a dam. Dai chu boruaka tuihu awm, zawi zawia tui far te tak tê têa chang ta hi a ni a. Engtin nge Jehova thute chu ‘dai anga a far’? A mite chu ngilnei tak, dam tak, leh lainatna nei takin a bia a. Mi dangte rinna chunga zahna kan lantîr hian amah kan entawn tihna a ni. Anni chu mahnia chhût tûr leh mahnia thu tlûknate siam tûrin kan fuih a. Chutiang mi mal ngaihsakna kan lantîr hian, mite tân kan thusawite pawm a awlsamin, kan rawngbâwlna a hlawhtling lehzual ang.

Dai chuan mi tiharh. Mite’n thutak an zir tam lehzual theih dân tûr kawng chi hrang hrangte kan ngaihtuah hian, kan rawngbâwlna chuan mite a tiharh thei ang. Gavin-a Bible zirpui tum hmasa bertu unau Chris-a chuan zir tûrin a tilui lo va. Chu ai chuan, Gavin-a’n Bible thu sawiho nuam a tih theih nân kawng chi hrang hrang a dap zâwk a ni. Chris-a chuan Gavin-a hnênah, Genesis aṭanga Thu Puan-ah hian thu pawimawh tak pakhat sawi a ni a, chu mi zirna chuan inkhâwma thusawite hre thiam lehzual tûrin a ṭanpui ang che tih a hrilh a. Tichuan, Bible a rin chhan chu Bible hrilh lâwknate vâng a ni tih a hrilhfiah a. Chuta ṭang chuan Bible hrilh lâwknate thlen famkim dân sawihona vawi tam tak an nei thei ta a. Chutiang tîtîna chuan Gavin-a chu a tiharh a, a tâwpah Bible zir a duh ta a ni.

Dai chu nunna atân a pawimawh hle. Israel rama nipui lai chuan khua a ro thei hle a, thla engemaw zât chhûng chu ruah sûr lovin a awm thei a ni. Dai a tlâk loh chuan, thlaite chu a rovin, a thi a. Jehova chuan kan hunah hian chutiang khawkhênna a awm ang tih a sawi lâwk a, chu chu ‘LALPA thu hriat’ duh avânga ṭâmna a ni. (Amosa 8:11) ‘Berâm dangte’ ṭanpuinaa hriak thihte’n Lalram chanchin ṭha an puan hian, anni chu “LALPA aṭanga dai tla ang” an ni ang tih Pathian Jehova chuan a tiam a. (Mika 5:7; Johana 10:16) Kan thu hrilh hi thutaka tuihâlte hnêna nunna pe tûra Jehova ruahmanna siam zînga mi a ni a. Chu chu i hlut em?

Dai chu Jehova hnên aṭanga malsâwmna a ni. (Deuteronomy 33:13) Kan rawngbâwlna chu chhâng lêttute tân malsâwmna emaw, thilpêk emaw a ni thei a. Bible zirna chuan Gavin-a chu a zawhna zawng zawng chhânna hmu tûra a ṭanpui avângin a tân chuan malsâwmna a ni. Hma a sâwn chak hle a, baptisma changin, tûnah chuan a nupui Joyce-i nên Lalram chanchin ṭha an puang a ni.

Kan thu hrilhna dai nêna khaikhinna chuan rawngbâwlnaa mi mala theih tâwp kan chhuahna chu a hlu tih hre thiam tûrin min ṭanpui bawk. Engtin nge? Dai far khat lek chu engmah tham ni lo mah se, maktaduai tam tak chuan tuallai chu a tihnâwng thei a ni. Chutiang bawkin, rawngbâwlnaa a mi mala kan thawh chu kan tân chuan a beitham hle pawh a ni thei. Mahse, Jehova chhiahhlawh maktaduai tam takte thawhhona avângin, “hnam zawng zawng” hnênah thu kan hril tawh a ni. (Matthaia 24:14) Kan rawngbâwlna chu mi dangte tân Jehova malsâwmna a ni ang em? Ni e, kan thu hrilh chu a damin, mi tiharh a, nunna atân a pawimawh hle a ni—dai ang maiin! (ws16.04-E)