A TLANGPUI thuin, Paula hun lai chuan mihring phur lawngte chu a awm lo va. Lawnga zin tûr chuan, khualzin mite chuan an tum ram pan tûr leh mihring phur duh sumdâwng (bungraw phur) lawng a awm leh awm loh an zawh a ngai ṭhîn a. (Tirh. 21: 2, 3) Lawng chuan a kal duhna thlenpui dâwn lo mah se, khualzin mi chuan a thlen chin aṭangin a tum ram hnaih ber thlentu tûr lawng dang a zawng leh thei ṭhîn a ni.—Tirh. 27:1-6.

Tuifinriata khualzinna chuan zin hun bîk a nei tlângpui a, lawngte chu a hun duan angin a chhuak ṭhîn lo bawk. Khaw ṭhat loh avâng leh puithuna nei lawng mite chuan vânduaina lo thleng tûr hriltu anga an ngaih puanzar ngul aṭanga choâk hrâm te, vaukama lawng kehchhia an hmuh hunahte chuan an chhuak duh mai ṭhîn lo a ni. Lawng mite chuan an duh dân lama thli a lo tleh chuan, chu chu remchânga lain, an chhuak nghâl ṭhîn bawk. Khualzin miin a chuanna tûr lawng a hmuh hunah, a bungruate kengin, lawng chawlhna hmunah a kal a, lawng chhuah hun tûr an puan chu a nghâk ṭhîn a ni.

Chanchin ziaktu Lionel Casson-a chuan: “Rom khawpuiah chuan lawng chhuak tûr awlsam taka hriat theih dân a awm avângin, zin duhte tân lawng chawlh hmuna va zawn buai a ngai lo. Lawng chawlhna hmun chu Tiber Luipui kamah a awm a. A bul hnaia awm Ostia khawpuia tual zâwl lian tak chu office tam takin a hual vêl a. Chuta office tam tak chu lawng chawlhna hmun hrang hranga lawng mite office a ni a: Narbonne [tûn laia France] sumdâwng lawng neitute’n pakhat an nei a, Carthage [tûn laia Tunisia] sumdâwng lawng neitute’n a dang pakhat an nei a, . . . chutiang zêl chuan an nei thliah a ni. Lawnga khualzin duhtu chuan a zin duhna khawpuia kal tûr lawngte chu chûng office-ahte chuan a va zâwt mai ṭhîn a ni,” tiin a sawi.

Tuifinriata zin chu a rang a; mahse, a hlauhawm thung. Paula phei chuan a missionary rawngbâwlnaah lawng kehchhiatna vawi tam tak a tâwk a ni.—2 Kor. 11:25.