1. Pathian chhiahhlawh zawng zawngte chuan eng tih nge an duh a, engvângin nge? (A kâwma milem en rawh.)

KRISTA ISUA chuan a hnungzuite chu “kal ula, hnam tina mi zirtîrahte siam ula,” tiin thu a pe a. (Mt. 28:19) Pathian chhiahhlawh rinawm zawng zawngte chuan chu rawngbâwlna an “hlen” chhuah theih dân hriat chu an duh a ni. (2 Tim. 4:5) Dik tak chuan, chu chu kan nuna thil dang zawng aia pawimawh zâwk, hlu zâwk, leh hmanhmawhthlâk zâwk a ni a. Mahse, rawngbâwlnaah kan duh anga tama hun pêk chu a harsa thei a ni.

2. Kan rawngbâwlna hlennaah eng harsatnate nge kan hmachhawn?

² Thil pawimawh dang tam tak tihnaah kan hun leh thate kan hmang ral thei a. Mahni leh chhûngte mamawh phuhrûk nân dâr kâr tam tak hna kan thawh a ngai mai thei. Chu bâkah, chhûngkaw mawhphurhna dang te, dam lohna te, rilru hahna te, leh kum upatna avânga harsatna chi hrang hrang kan tuar thei bawk. Chûng dinhmun harsa takte hmachhawn chung pawhin, engtin nge kan rawngbâwlna chu kan hlen theih?

3. Matthaia 13:23-a kan hmuh Isua thute aṭangin eng thu tâwp nge kan siam theih?

³ Kan dinhmunte avânga Jehova rawngbâwlnaah kan inhmang tam thei lo a nih pawhin, kan lunghnual tûr a ni lo. Isua chuan Lalram rah kan chhuah theih dân chu a inang dâwn lo tih a hria a. (Matthaia 13:23 chhiar rawh.) Jehova chuan rawngbâwlnaa theih tâwp chhuaha kan thiltih zawng zawng chu a hlut tak zet a ni. (Heb. 6:10-12) Kawng leh lamah chuan, kan dinhmunin tam leh zualin min thawhtîr thei niin kan ngai  mai thei a. He thuziakah hian kan nuna rawngbâwlna kan dah hmasak theih dân te, nun tihsamkhai theih dân te, leh thu hrilh leh zirtîrnaa thiamna kan tihhmasâwn theih dânte chu i lo en ang u. Kan rawngbâwlna hlen tih awmzia chu eng nge ni? tih hi i lo ngaihtuah hmasa ang u.

4. Kan rawngbâwlna hlen tih awmzia chu eng nge ni?

⁴ A awlsam zâwnga sawi chuan, kan rawngbâwlna hlen tûrin thu hrilh leh zirtîr siamnaah a tam thei ang berin kan tel tûr a ni. Mahse, rawngbâwlnaa hun hman mai aia tam kan tih a ngai a. Min chêttîrtu chu Jehova tân a pawimawh hle a ni. Jehova leh ṭhenawmte kan hmangaih avângin, kan Kristian rawngbâwlna chu thinlung zawng zawngin kan thawk a. * (Mk. 12:30, 31; Kol. 3:23-24) Thinlung zawng zawnga Pathian rawngbâwl tih chu theih tâwp chhuah a, kan tha leh zungte hmanga kan inpêkna hi a ni. Thu hrilh rawngbâwlna kan ngaihhlut chuan mi a tam thei ang berte hnênah chanchin ṭha hrilh kan tum ang.

5-6. Rawngbâwlnaa hun tlêmte chauh pe theituin rawngbâwlna a dah hmasak theih dân entîrna pe rawh.

⁵ Ṭingṭang perh nuam ti tak ṭhalai pakhat hi han mitthla teh. Rimawi a tum apiangin a hlim hle a. A tâwpah, chawlhkâr tâwp apiangin tualchhûng thingpui dâwra ṭingṭang tuma eizawnna hna a hmu a ni. Mahse, a sum lâk luh chuan a mamawh a phuhru zo lo va. Chuvângin, dâwr dangah Thawhṭan aṭanga Zirtâwp thlengin sum enkawltu (cashier) hna a thawk a ni. Chu dâwrah chuan a hun tam zâwk hmang mah se, a rilruah chuan rimawi tum ringawt a awm a. A thiamnate tihmasâwn a, hunbi kima rimawi tumtu nih a châk hle a ni. Chuvângin, hun rei lo tê pawh ni se, rimawi tum theihna hun remchâng a neih a piangin a tum ṭhîn a ni.

⁶ Chutiang bawkin, thu hrilh rawngbâwlnaah i duh anga tamin hun i pe thei lo pawh a ni mai thei. Mahse, thu hrilh rawngbâwlna chu i ngaina hle a. Mite thinlunga chanchin ṭha thleng thei khawpa i thiamna tihhmasâwn chu i tum a. Thil tam tak tih tûr i neih avângin, thu  hrilh rawngbâwlna i dah hmasak ber theih dân chu i ngaihtuah a ni.

7-8. Rawngbâwlna chungchângah Isua rilru put hmang chu engtin nge kan entawn theih?

⁷ Rawngbâwlna chungchângah Isua’n kan entawn tûr rilru put hmang ṭha a hnutchhiah a. A nunah Pathian Ram chanchin ṭha hrilh chu a dah pawimawh ber a ni. (Joh. 4:34, 35) Mi a tam thei ang berte hnêna thu a hrilh theih nân mêl za tam tak kein a kal a. Vântlâng hmunahte leh ina thu hrilh theihna hun remchâng a neih apiang chu a hmang ṭangkai a. Isua chuan a nunah rawngbâwlna a dah hmasa ber a ni.

⁸ A remchân hun leh hmun apianga chanchin ṭha sawi theihna hun remchângte zawngin, Krista chu kan entawn thei a. Chanchin ṭha hrilhnaa tel thei tûrin mi mal nawmsaknate chu chân kan inhuam a ni. (Mk. 6:31-34; 1 Pet. 2:21) Kohhrana unau ṭhenkhat chuan special te, regular te, leh auxiliary pioneer te niin rawng an bâwl thei a. Mi dangte chuan ṭawng dangte zirin, thu hriltu mamawh zualna bialah an insawn a ni. Mahse, chanchin ṭha hrilh hna a tam zâwk chu ṭhahnem ngai tak Lalram thuchhuahtute hmanga hlen a ni a. Engpawh ni se, Jehova chuan kan tih theih aia tam ti tûrin min phût lo va. “Pathian hlim chanchin ṭha ropui,” kan puan laia rawngbâwlnaa hlim taka kan tel ṭheuh chu a duh a ni.—1 Tim. 1:10, 11, New World Translation; Deut. 30:11.

9. (a) Paula chuan eizawnna hna a thawh ngai mah se, engtin nge thu hrilh rawngbâwlna chu a dah hmasak? (b) Tirhkohte 28:16, 29-31-na chuan a rawngbâwlna chungchânga Paula rilru put hmang eng nge a târ lan?

⁹ Tirhkoh Paula chuan a nunah rawngbâwlna dah pawimawh berin entawn tûr ṭha a siam a. Missionary nia a khualzin vawi hnihnaa Korinth khua a tlawh khân, sum a neih tlêm avângin puan in siam a, hun a pêk a ngai a. Mahse, Paula chuan chu puan in siam chu a ngai pawimawh ber lo. Korinth khuaa mite hnênah chanchin ṭha “athlâwn ngawta” a hrilh theih nân rawngbâwlnaa mahni inchâwm thei tûrin chu hna chu a thawk a. (2 Kor. 11:7) Paula chuan eizawnna hna ṭhenkhat a thawh ngai mah se, rawngbâwlna chu a dah hmasa tlat a, Chawlhni tinin thu a hril a ni. A dinhmunte a siamrem hnu chuan, Paula chuan thu hrilhna a ngaihven lehzual a ni. “Thu hril chauhvin a awm ta a, Isua kha Krista chu a ni tih Judate hnênah a hrilhfiah ṭhîn a.” (Tirh. 18:3-5; 2 Kor. 11:9) A hnuah, Rom khuaah kum hnih chhûng ama ina khuahkhirh a nih khân, a ina lo kalte hnênah thu a hrilh mai ni lovin, lehkha thawnte pawh a ziak bawk a ni. (Tirhkohte 28:16, 29-31 chhiar rawh.) Paula chuan a rawngbâwlna chu engmah tihkhaihlaktîr a phal lo. Ani chuan: “He rawngbâwlna hi kan neih avângin kan dawl lo va,” tiin a ziak a ni. (2 Kor. 4:1) Paula ang bawkin, keini pawh eizawnna hnaah hun pêk ngai mah se, Lalram rawngbâwlna chu kan nuna pawimawh ber kan nihtîr thei a ni.

10-11. Kan hrisêl lohna avânga kan duh anga kan tih theih loh hunah pawh engtin nge rawngbâwlna chu kan hlen theih?

¹⁰ Kum upatna avâng leh hrisêl lohna avânga in tina thu hrilhnaah kan tel tam thei lo a nih pawhin, kawng dangin thu kan hril thei tho va. Kum zabi khatnaa Kristiante chuan mite awmna apiangah chanchin ṭha an hril a. Anni chuan hun remchâng an neih apiangin, in tinah te, vântlâng hmunah te, leh tawnchawpa thu hrilhnaahte, mi ‘an hmuh apiangte’ chu thutak an hrilh a ni. (Tirh. 17:17; 20:20) Thui tak kan kal thei lo a nih chuan, mi veivâk tamna vântlâng hmunahte, ṭhuin thu kan hril thei a. A nih loh leh, tawnchawpin, lehkha ziakin, leh telephone hmangin thu kan hril thei bawk. Harsatna hrang hrang  avânga rawngbâwlnaa inhmang tam thei lote chuan chûng thu hrilh theih dân kawng dangte hmang chuan hlimna leh lungawina nasa tak an nei thei a ni.

¹¹ I hrisêlna ṭha vak lo mah se, i rawngbâwlna chu i hlen thei tho va. Tirhkoh Paula entawn tûr siam hi han ngaihtuah leh teh. Ani chuan: “Mi tichaktuah chuan engkim ka ti thei a ni,” tiin a sawi. (Phil. 4:13) Paula chuan missionary nia a zinnaa a dam loh khân, chu chakna chu a mamawh a. Galatia khuaa mite hnênah: “Chanchin Ṭha in hnêna ka hril hmasak ṭum kha ka tisa chak lohna avâng a ni tih in hre si a,” tiin a hrilhfiah a ni. (Gal. 4:13) Chutiang bawkin, i hrisêl lohna avângin doctor-te, nurse-te, leh nangmah enkawltute hnênah chanchin ṭha hrilh theihna hun remchâng i nei mai thei a. Thuchhuahtute’n in tina thu an hrilh laiin, chutiang mi a tam zâwkte chu an hnathawhna hmunah an awm tlângpui a ni.

12. Kan mit kan ‘tifîm’ tih awmzia chu eng nge ni?

¹² Isua chuan: “Taksa khâwnvâr chu mit hi a ni; chutichuan i mit a fîm chuan i taksa pumin a êng chhuak ang,” tiin a sawi. (Mt. 6:22) Eng a sawi duhna nge ni? Kan nun chu kan tisamkhai tûr a ni a, thiltum pakhat chauh kan ngaihvenin, chu mi aṭangin kan rilru a pêng tûr a ni lo a tihna a ni. Isua ngeiin a nunah rawngbâwlna dah hmasa tlatin entawn tûr a siam a, a hnungzuitute chu Jehova leh Lalram rawngbâwlna ngaihven tlat tûrin a zirtîr a ni. Kristian rawngbâwlna chu kan nunah dah pawimawh ber a, “a ram leh a felna chu zawng  hmasa” zâwkin Isua kan entawn a ni.—Mt. 6:33.

13. Kristian rawngbâwlna ngaihven tlat tûrin engin nge min ṭanpui thei?

¹³ Rawngbâwlna kan ngaihven theih dân kawng khat chu Jehova hre tûr leh hmangaih tûra mite ṭanpuinaah hun tam lehzual hmang thei tûra nun tihsamkhai hi a ni. * Entîr nân, chawlhkâr chhûnga rawngbâwlnaah hun tam lehzual kan hman theih nân kan eizawnnaah kan insiamrem thei ang em? Hun tam tak pêk ngai intihhlimna ṭhenkhatah hun kan pe tlêm deuh thei ang em?

14. Nupa tuak khat chuan rawngbâwlnaa hun tam zâwk an pêk theih nân eng insiamremna nge an neih?

¹⁴ Kohhran upa Elias-a leh a nupui chuan chutiang chuan an ti a. Elias-a chuan: “Chutih hun lai chuan pioneer chu thawk nghâl thei lo mah ila, thu hrilh rawngbâwlnaa hun tam zâwk pe tûrin thil kan tih a ngai a. Chuvângin, rawngbâwlnaa hun kan pêk tam lehzual theih nân zawi zawiin hma kan la chho va. Entîr nân, kan sum hmante leh intihhlimnaa kan hun hmante kan titlêm a, thil dang tihna atâna hun kan neih theih nân kan hnathawhna pute hnênah hna min siamremsak tûrin kan dîl bawk. Chuvângin, tlai lama thu hrilhnaahte kan tel thei a, Bible zirpui kan nei tam lehzual a, thla khatah vawi hnih chawlhkâr chhûng rawngbâwlnaah kan tel thei bawk a ni. A va hlimawm tak êm!” tiin a sawi.

15-16. Timothea thawnkhat 4:13, 15-a târ lan angin, engtin nge chanchin ṭha hriltute anga kan thiamna chu kan tihhmasâwn zêl theih? (“ Ka Rawngbâwlna Hlen Tûra Min Ṭanpuitu Thiltumte” tih bâwm chu en bawk rawh.)

¹⁵ Kan rawngbâwlna kan hlen lehzual theih dân kawng dang leh chu thu hrilh rawngbâwlnaa  kan thiamna tihhmasâwn hi a ni. Hna ṭhenkhat thawktute tân an hriatna leh thiamna tihmasâwn tûrin zir chhunzawn reng a ngai a. Lalram chanchin puangtute pawh chutiang chu an ni. Kan rawngbâwlnaah thiam lehzual tûr chuan kan zir zawm zêl a ngai a ni.—Thuf. 1:5; 1 Timothea 4:13, 15 chhiar rawh.

¹⁶ A nih leh, engtin nge kan rawngbâwlnaah hma kan sâwn zêl theih? Chawlhkâr tina kan neih Nun leh Rawngbâwlna Inkhâwma kan dawn kaihhruainate ngun taka ngaihsakna hmangin a ni. He inkhâwm hian thlawhhma rawngbâwlnaa kan thiamna tihmasâwn tûrin zirtîrna ṭangkai tak min pe a. Entîr nân, chairman-in chanvo nei unaute hnênah kan rawngbâwlnaa min tihmasâwn thei thurâwnte a pêk hunah kan lo chhinchhiah thei a ni. Chûng thurâwnte chu mi tuemaw hnêna chanchin ṭha kan hrilh leh hunah a taka hman kan tum thei a. Thlawhhma rawngbâwlna group overseer hnênah amah nên, a nih loh leh thiltawn ngah thuchhuahtu dang emaw, pioneer emaw, a nih loh leh bial kantu emaw nêna thawh duntîr tûrin ṭanpuina i dîl thei a ni. Zirtîrna Hmanraw Bâwma hmanraw tinte chu kan hman thiam poh leh, thu hrilh leh zirtîrnaah kan hlim lehzual ang.

17. Kan rawngbâwlna kan hlen chuan eng nge kan hmuh ang?

¹⁷ Jehova’n a “hnathawhpuite” nih min phalsak chu chanvo hlu a va ni êm! (1 Kor. 3:9) “Thil pawimawh zâwkte chu dah hmasa” tûra thil kan tih a, kan Kristian rawngbâwlna kan ngaihven tlat chuan “lâwm chungin LALPA rawng” kan bâwl ang. (Phil. 1:10, 11, NW; Sâm 100:2) Pathian rawngbâwltu kan nih angin, harsatna leh theih chin tâwk nei mah ila, rawngbâwlna hlen thei tûra kan mamawh chakna chu Pathianin min pe ang tih kan chiang thei a ni. (2 Kor. 4:1, 7; 6:4) Kan dinhmun avângin thu hrilh rawngbâwlnaah kan tel tam thei emaw, thei lo emaw pawh ni se, thinlung zawng zawnga kan tel a nih chuan “hlimna tûr chhan” kan nei thei ang. (Gal. 6:4, NW) Kan rawngbâwlna kan hlen chuan, Jehova leh mite chungah hmangaihna kan lantîr tihna a ni. “Chutiang tiin nangmah leh i thu ngaithlatute chu i chhandam dâwn zuk nia.”—1 Tim. 4:16.