1-2. Engvângin nge Isua chu a lungngaih êm êm?

ISUA chu mihring anga a nun tâwp nîah a rilru a mangang hle a. Rei lo têah, mi suaksualte kutah râwng taka tihhlum a ni dâwn a ni. Mahse, Isua chu thi mai tawh tûr a nih avâng chauhva mangang a ni lo. Ani chuan a Pa chu a hmangaih tak zet a, tihlâwm a duh a ni. Fiahna khirh tak hnuaia a rinawm tlat chuan, Jehova hming thiam chantîr a ni ang tih a hria a. Ani chuan mihringte a hmangaih a, thih thlenga Jehova chunga a rinawm chauhvin chatuan nun beiseina kan nei thei dâwn tih pawh a hre bawk.

² Isua chuan lungngaihna nasa tak a nei chung pawhin, thlamuanna a nei a. A tirhkohte hnênah: “Keima thlamuanna ka pe a che u,” tiin a hrilh a ni. (Joh. 14:27) Jehova nêna inlaichînna hlu tak neihna aṭanga lo awm rilrua thlamuanna, “Pathian thlamuanna,” chu a nei a. Chu thlamuanna chuan Isua chu rilru leh thinlungah lungkhamna nei lo tûrin a ṭanpui a ni.—Phil. 4:6, 7.

3. He thuziakah hian eng nge kan sawiho vang?

³ Kan zînga tumahin Isua tawrh ang lungngaihna chu kan tuar ngai lova; mahse, Isua hnungzuitu zawng zawng chuan fiahna an tâwk ang a. (Mt. 16:24, 25; Joh. 15:20) Isua anga lungngaih châng kan nei ngei ang. Lungngai lutuk lo tûr leh thlamuanna hloh lo tûrin eng nge kan tih theih? Leia a rawngbâwl chhûnga Isua thiltih pathumte kan sawiho vang a, fiahna kan tawh huna amah kan entawn theih dân kan hmu bawk ang.

4. Thessalonika thawn khat 5:17 chu rilruah dahin, Isua chu leia a nun tâwp ber niah a ṭawngṭai zing hle tih târ langtu entîrna ṭhenkhat sawi rawh.

⁴ Thessalonika thawn khat 5:17 chhiar rawh. Isua chu leia a hun hnuhnûng ber a hman nîah chuan a ṭawngṭai zing hle a. A thih hriatrengna a hman ṭan khân, chhâng leh uain a sem hmain a ṭawngṭai a ni. (1 Kor. 11:23-25) Kalhlên Kût an hmanna hmun an chhuahsan hmain, a zirtîrte nên an ṭawngṭai a. (Joh. 17:1-26) Chu mi zâna a zirtîrte nêna Olive Tlâng an va thlen chuan a ṭawngṭai leh a ni. (Mt. 26:36-39, 42, 44) A thih hmaa Isua thusawi hnuhnûng berte chu ṭawngṭaia a sawite a ni a. (Lk. 23:46) Isua chuan ṭawngṭaina hmangin chu ni pawimawh bera thilthlengah Jehova chu a teltîr reng a ni.

5. Engvângin nge tirhkohte chu an huaisen tâwk loh?

⁵ Isua’n chhel taka fiahna a tawrh chhuah theih chhan pakhat chu ṭawngṭaia a Pa a rinchhan vâng a ni. A tirhkohte erawh chu, chumi zân chuan ṭhahnemngai takin an ṭawngṭai lo va. Chuvângin, fiahna a lo thlen chuan huaisenna an nei tâwk lo a ni. (Mt. 26:40, 41, 43, 45, 56) Fiahnate kan tawh hunah, Isua entawn tûr siam kan zui a, ‘bâng lova kan ṭawngṭai’ chauhvin rinawmna kan vawng reng thei ang. Eng atân nge kan ṭawngṭai ang?

6. Engtin nge rinna chuan thlamuanna nei reng tûra min ṭanpui ang?

⁶ “Kan rin tiphui deuh” tûrin Jehova hnênah kan ṭawngṭai thei a. (Lk. 17:5; Joh. 14:1) Setana chuan Isua hnungzuitu zawng zawngte chu a fiah dâwn avângin rinna kan mamawh a ni. (Lk. 22:31) Harsatna kan hmachhawn fo hunah pawh engtin nge rinnain thlamuanna nei reng tûra min ṭanpui ang? Fiahna hmachhawn thei tûra kan tih theihte kan tih  hnuah, Jehova rinchhan tlat tûrin rinna chuan min chêttîr ang. Ani chuan dinhmunte chu kan tih theih aia ṭha zâwkin a chingfel thei tih kan rin avângin, rilru leh thinlungah thlamuanna kan nei a ni.—1 Pet. 5:6, 7.

7. Robert-a thusawi aṭangin eng nge kan zir theih?

⁷ Eng fiahna pawh tâwk mah ila, ṭawngṭaina chuan chhûngrila thlamuanna nei reng tûrin min ṭanpui a. Kum 80 aia tam, kohhran upa rinawm tak Robert-a entawn tûr siam hi han ngahtuah teh. Ani chuan: “Philippi 4:6, 7-a fuihna thu hian ka nunah fiahna tam tak hmachhawn thei tûrin min ṭanpui a. Sum lamah harsatna ka nei a. Kohhran upa nia rawngbâwl theihna chanvo hlu chu rei lote chhûng ka hloh a ni,” tiin a sawi. Chhûngrila thlamuanna nei reng tûrin Robert-a chu engin nge ṭanpui? “Lungkhamna ka neih veleh ka ṭawngṭai nghâl a, tih tak zeta ka ṭawngṭai ngun poh leh rilrua thlamuanna ka nei lehzual ni hian ka hria,” tiin a sawi bawk.

8. Johana 8:29-a târ lan angin, Isua’n chhûngrila thlamuanna a neih chhan dang chu eng nge ni?

⁸ Johana 8:29 chhiar rawh. Isua chuan a Pa a tilâwm tih a hriat avângin, tihduhdah a nih lai pawhin chhûngrila thlamuanna a nei a. Thuâwih a harsat hunah pawh, a Pa thu a âwih tlat a ni. A Pa, Jehova a hmangaih avângin a nunah rawngbâwlna a dah pawimawh ber a. Leia a lo kal hmain, Pathian tân “mi themthiam” a ni a. (Thuf. 8:30) Leia a awm lai pawhin, mi dangte hnênah ṭhahnemngai takin a Pa chungchâng a zirtîr a. (Mt. 6:9; Joh. 5:17) Chu hna chuan Isua chu hlimna nasa tak a pe a ni.—Joh. 4:34-36.

9. Rawngbâwlnaa kan telna hian engtin nge chhûngrila thlamuanna nei reng tûra min ṭanpui?

 ⁹ Jehova thu âwihin leh “Lalpa hna ṭhahnemngai taka thawk fovin” Isua kan entawn thei a. (1 Kor. 15:58) Thu hrilh rawngbâwlnaa kan “inpumpêk” hian, kan buainate chu a ṭha zâwngin kan thlîr lehzual ang. (Tirh. 18:5 C.L. Re-edited) Entîr nân, rawngbâwlnaa kan mi tawhte chuan kan buaina aia nasa zâwk buaina an hmachhawn a. Mahse, Jehova hmangaih dân an zir a, a fuihnate an nunpui chuan an nunin awmzia a neiin, an hlim lehzual a ni. Chutianga thilthleng kan hmuh apiangin, Jehova’n min ngaihsak ang tih kan ring nghet lehzual a. Chu chuan chhûngrila thlamuanna nei reng tûrin min ṭanpui a ni. Hlutna nei lo nia inhriatna leh rilru beidawnna nasa tak nei unaunu pakhat chuan he thu dikzia hi a hmu a. Ani chuan: “Rawngbâwlnaa ka buai hian, ka rilru ka thunun theiin, ka hlim lehzual niin ka hria a. Thlawhhma rawngbâwlnaa ka tel hian Jehova ka hnaih lehzual niin ka hria,” tiin a sawi.

10. Brenda-i thusawi aṭangin nge nge kan zir theih?

¹⁰ Unaunu Brenda-i entawn tûr siam hi han ngaihtuah teh. Amah leh a fanu chuan thazâm natna khirh tak an nei a. Brenda-i chuan a kal theih loh avângin wheelchair a hmang a. A theih chângin, in tinah kalin thu a hril a; mahse, a tlângpui thuin, lehkha thawn ziakin thu a hril a ni. Ani chuan: “He khawvêlah hian ka natna chu tihdam a ni dâwn lo tih ka hriat avângin, rawngbâwlnaah ka rilru ka pe pumhlum thei a. Dik tak chuan, rawngbâwlnaa ka tel hian ka lungkhamnate ka ngaihtuah lo va. Chu aiin, kan kohhran bial chhûnga ka mi biakpawhte ṭanpui dân tûr ka ngaihtuah zâwk a ni. Chu chuan nakin hun beiseina chu min hriatnawntîr ṭhîn,” tiin a sawi.

11-13. (a) Tirhkohte leh mi dangte chuan Isua tân ṭhian ṭha an nihzia engtin nge an lantîr? (b) Isua ṭhiante chuan a chungah eng nghawng nge an neih?

¹¹ Isua’n rawngbâwlnaa harsatna a tawh chhûngin, a tirhkoh rinawmte chuan a tân ṭhian ṭha an nihzia an târ lang a. Anni chu Bible-in: “Unau aia nghet zâwk ṭhian an awm ṭhîn,” tia a sawite ang an ni. (Thuf. 18:24) Isua chuan, chutiang ṭhian chu a ngaihlu a. A rawngbâwl hun chhûngin, a pianpui unaute chuan ani chu an ring lo va. (Joh. 7:3-5) Ṭum khat chu, a chhûngte ngeiin a â niin an sawi a. (Mk. 3:21) Chu mi nêna inkalh takin, Isua chuan a thih hma zânah a tirhkoh rinawmte chu: “Thlêmna ka tawh chhûng zawng nangni mi awmpuitu in ni,” tiin a sawi thei a ni.—Lk. 22:28.

¹² Isua tirhkohte chuan ani chu tihlungnih loh châng an nei a; mahse, an ṭhat lohna lai en lovin, a chungah rinna an nei tih a hmu a ni. (Mt. 26:40; Mk. 10:13, 14; Joh. 6:66-69) Tihhlum a nih hma, hêng mi rinawmte nêna zân an hman hnuhnûn ber ṭumah, Isua chuan an hnênah: “Ṭhiante ka ti tawh zâwk ang che u; Pa hnêna thil ka hriat zawng zawng in hnênah ka puang tawh si a,” tiin a sawi a ni. (Joh. 15:15) Isua chu a ṭhiante’n nasa takin an tichak tih rinhlelh rual a ni lo. A rawngbâwlnaa a ṭhiante ṭanpuina chuan Isua chu hlimna nasa tak nei tûrin a ṭanpui a ni.—Lk. 10:17, 21.

¹³ Isua chuan a tirhkohte bâkah, a thu hrilh rawngbâwlnaah leh kawng dang tam taka ṭanpuitu ṭhian dang a hmei apate pawh a nei a. Ṭhenkhat chuan an ina chaw ei tûrin an sâwm a. (Lk. 10:38-42; Joh. 12:1, 2) Mi dangte chuan a zinnaah zuiin, an thilneihte an pe a. (Lk. 8:3) Isua chu an tân ṭhian ṭha a nih avângin anni pawh Isua tân ṭhian ṭha an ni. A ṭhiante  tân thil ṭha a tihsak a; mahse, ani chuan an tihtheih aia tam a beisei lo. Isua chu mi ṭha famkim ni mah se, ani chuan ṭha famkim lo a ṭhiante ṭanpuina chu a ngaihlu a. Chu chuan chhûngrila thlamuanna nei reng tûrin a ṭanpui ngei ang.

14-15. Engtin nge ṭhian ṭha kan siam theih a, anni chuan engtin nge min ṭanpui theih?

¹⁴ Ṭhian ṭhate chuan Jehova chunga rinawm reng tûrin min ṭanpui ang. Ṭhian ṭha siam theih dân kawng ṭha ber chu mahni ngei ṭhian ṭha nih hi a ni. (Mt. 7:12) Entîr nân, Bible chuan kan hun leh tha chu mi dangte, a bîk takin, ‘tlachhamte’ tâna hmang tûrin min fuih a. (Eph. 4:28) In kohhrana i ṭanpui theih tûr tuemaw chu i hre chhuak thei em? Kum upatna emaw, dam lohna emaw vânga kal chhuak thei lo tuemaw tân i bazar thei ang em? Sum leh pai lama harsatna nei chhûngkaw tân ei tûr i pe thei ang em? Kan website jw.org^® leh JW Library^® app hman dân i hriat chuan, chuta awm ro hlute lai chhuak tûrin inkohhrana mi dangte chu i ṭanpui thei ang em? Mi dangte ṭanpuinaa rilru kan pêk hian, kan hlim lehzual thei a ni.—Tirh. 20:35.

¹⁵ Kan ṭhian siamte chuan fiahna kan tawh hunah min ṭanpuiin, chhûngrila thlamuanna nei reng tûrin min ṭanpui ang. Joba’n fiahna a tawh chungchâng a hrilh laia Elihua’n a ngaihthlâk angin, kan ṭhiante chuan kan lungkhamna chungchâng kan sawite chu dawhthei taka ngaithlain min ṭanpui a ni. (Job. 32:4) Thu tlûkna min siamsak tûrin kan ṭhiante chu kan beisei tûr a ni lo; mahse, Bible-a thurâwnte kan ngaihthlâk chuan kan fing ang. (Thuf. 15:22) Lal Davida’n a ṭhiante ṭanpuina  inngaitlâwm taka a pawm angin, kan mamawh huna ṭhiante min ṭanpuina chu pawm duh lo khawpin kan chapo tûr a ni lo. (2 Sam. 17:27-29) Dik tak chuan, chutiang ṭhian ṭhate chu Jehova thilthlâwnpêkte an ni.—Jak. 1:17.

16. Philippi 4:6, 7-a kan hmuh angin, thlamuanna kan neih theih dân kawng awmchhun chu eng nge ni? Hrilhfiah rawh.

¹⁶ Philippi 4:6, 7 chhiar rawh. Engvângin nge Jehova’n “Krista Isuaah” thlamuanna kan hmu thei tia min hrilh? Isua’n chanvo a hlen chhuah dân kan hriatthiam a, kan rin chauhvin rilru leh thinlungah thlamuanna tluantling kan neih theih vâng a ni. Entîr nân, Isua tlanna inthawina hmangin kan sualte chu ngaihdam theih a ni a. (1 Joh. 2:12) Chu thu chuan min va thlamuan tak êm! Pathian Lalrama Lal a nih angin, Isua chuan Setana leh a khawvêl avânga kan hrehawm tawrhte chu a nuaibo vek ang. (Is. 65:17; 1 Joh. 3:8; Thup. 21:3, 4) Beiseina ropui a va ni tak êm! Isua chuan chanvo harsa tak min pe mah se, he hun hnuhnûngahte hian min awmpuiin, min ṭanpui reng a ni. (Mt. 28:19, 20) Chu chuan huaisenna min va pe tak êm! Rilrua thlamuanna nei tûra kan mamawh thil pawimawh tak pathum chu hlimna, beiseina, leh huaisenna hi a ni.

17. (a) Engtin nge Kristian chuan chhûngrila thlamuanna a neih reng theih? (b) Johana 16:33-a thutiam angin, eng nge kan tih theih?

¹⁷ Fiahna nasa tak avânga kan mangan hunah engtin nge rilrua thlamuanna kan neih reng theih? Isua thiltih dân entawnin kan nei thei a ni. Pakhatnaah, ṭawngṭai fan fanna a ni a. Pahnihnaah, thuâwih a harsat hunah pawh Jehova thu âwihin, ṭhahnemngai taka thu hrilh hi a ni a. Pathumnaah, fiahna kan tawh hunah ṭanpuina atân ṭhiante rinchhan hi a ni. Tichuan, Pathian thlamuanna chuan kan rilru leh thinlung min vênsak ang. Isua ang bawkin, eng fiahna pawh i hneh thei ang.—Johana 16:33 chhiar rawh.