1-2. (a) Eng kawngtein nge Setana’n mite a bum? (b) He thuziakah hian eng nge kan sawiho vang?

MIHRING chanchin inṭan phat aṭangin “dâwt pa,” Setana chuan mite chu a bum a. (Joh. 8:44) A dâwt sawi zîngah chuan thihna leh thih hnu ram chungchânga zirtîrna dik lote a tel a ni. Chûng zirtîrnate avângin hnam dân lâr tak takte, leh puithunate a lo awm a. Chuvângin, kan unau tam tak chuan chhûngkaw zînga tuemaw, a nih loh leh tualchhûnga tuemaw a borâl hunah ‘rinna atân ṭhahnem ngai taka an beih’ a ngai ta a ni.—Jud. 3.

² Chutiang fiahna i hmachhawn a nih chuan, thihna chungchânga Bible zirtîrnate vuan tlat turin engin nge ṭanpui thei che? (Eph. 6:11) Pathian tilâwm lo hnam dânte hmang tûra tihluiha awm kan Kristian unau tuemaw chu engtin nge i thlamuan a, i tihchak theih? He thuziakah hian Jehova min pêk kaihhruaina kan sawiho vang a. A hmasain, Bible-in thihna chungchâng a târ lante kan sawiho vang.

3. Dâwt thu hmasa ber chuan eng nge a rah chhuah?

³ Pathianin mihringte chu thi tûrin a siam lo va. Mahse, chatuana nung tûr chuan, Adama leh Evi’n Pathian Jehova thupêk: “A chhia leh a ṭha hriatna thing rah erawh hi chu i ei tûr a ni lo: i ei chuan i ei nî la lain i thi ngei tûr a ni,” tih chu an awih a ngai a ni. (Gen. 2:16, 17) Tichuan, Setana’n buaina a siam ta a. Ani chuan rûl hmangin Evi hnênah: “Thi teh suh e,” tiin a sawi a. Lungchhiatthlâk takin, Evi chuan chu dâwt thu chu âwihin thei rah chu a ei ta a ni. A hnuah, a pasal pawhin a ei ve a. (Gen. 3:4, 6) Chutiang chuan, sual leh thihna chu mihring chhûngkuaah a lo lût ta a ni.—Rom 5:12.

4-5. Engtin nge Setana’n mite chu a bum zawm zêl?

⁴ Pathian sawi ang ngeiin, Adama leh Evi chu an thi ta a. Mahse, Setana chuan thihna chungchânga dâwt thu chu a la sawi  zawm zêl a ni. A hnuah, dâwt thu dangte pawh a sawi ṭan a. Chûng zînga pakhat chu taksa chu thi mah se, taksa aṭanga dam khawchhuak a, thlarau rama nung zawm zêl a awm tih zirtîrna hi a ni. Chu dâwt thu chu chi hrang hranga sawi a ni a, vawiin ni thlengin mi chhiar sên lohte chu bumin an awm a ni.—1 Tim. 4:1-2.

⁵ Engvângin nge mi tam tak chu buma an awm? Setana chuan thih kan hlauhna chu min bum nân remchângah a hmang a. Chatuana nung tûra siam kan nih avângin, thih kan duh lo. (Thur. 3:11) Chuvângin, thihna chu hmêlma angin kan thlîr a ni.—1 Kor. 15:26.

6-7. (a) Setana chuan mitthite chungchânga thutak chu a thup bo thei em? Hrilhfiah rawh. (b) Engtin nge Bible thutak chuan ṭûl lo taka mitthite hlau lo tûra min ṭanpui?

⁶ Setana’n theih tâwp chhuah mah se, thihna chungchânga thutak chu khuh bovin a awm lo. Dik tak chuan, mitthite dinhmun chungchânga Bible zirtîrna leh mitthite tâna beiseina hretute chu tûn hma zawng aiin an pung telh telh a. (Thur. 9:5, 10; Tirh. 24:15) Chûng thutakte chuan min thlamuan a, thih hnua thilthleng chungchânga hlauhna leh rinhlelhna nei lo tûrin min ṭanpui a ni. Entîr nân, mitthite chu kan hlau lo va, an chungah thil engemaw a thlen pawh kan hlau hek lo. Anni chu an nung tawh lo va, tumah an tina thei hek lo tih kan hria a. Tui taka muhîl ang an ni. (Joh. 11:11-14) Chu bâkah, mitthite chuan hun kal zêl pawh an hre lo tih kan hria a. Chuvângin, kum zabi tam tak kal taa mitthite pawh an rawn thawhleh hunah chuan, hun kal tawhte chu rei lo tê angin an ngai ang.

⁷ Mitthite dinhmun chungchânga thutak chu a fiahin, hriat a awlsamin, thil nih dân tûr rêng a ni tih i pawm a ni lâwm ni? Setana dâwt sawi hriatthiam har tak lakah chuan a va danglam tak êm! Chûng dâwt thute chuan mite chu a bum mai ni lovin, min Siamtu pawh a sawichhia a ni. Setana thil tihchhiat nasatzia hre thiam lehzual tûrin, hêng zawhnate hi kan ngaihtuahho vang: Engtin nge Setana dâwt sawi chuan Jehova a sawichhiat? Engtin nge chu chuan Krista tlanna inthawinaa rinna chu a tihchhiat? Engtin nge chu chuan mihringte lungngaihna leh hrehawm tawrhna a belhchhah? tihte hi.

8. Jeremia 19:5-a târ lang angin, engtin nge mitthi chungchânga Setana dâwt thu chuan Pathian Jehova a sawichhiat?

⁸ Mitthi chungchânga Setana dâwt sawi chuan Jehova a sawichhia. Chûng dâwt thu-ah  chuan mitthite chu hremhmun meidîlah hrehawm an tuar tih zirtîrnate a tel a. Chu chuan Pathian a va sawichhe tak êm! Engtin nge? Chûng zirtîrnate chuan hmangaihna Pathian chu nunrâwng tak niin mite a rintîr a. (1 Joh. 4:8) Chu chuan engtin nge a awmtîr che? Chu aia pawimawh zâwk chu, chu chuan engtin nge Jehova a awmtîr? Dik tak chuan, ani chuan nunrâwnna tinrêng chu a haw si a.—Jeremia 19:5 chhiar rawh.

9. Engtin nge Setana dâwt sawi chuan Johana 3:16 leh 15:13-a târ lan Krista tlanna inthawinaa rinna chungah nghawng a neih?

⁹ Mitthi chungchânga Setana dâwt thu chuan Krista tlanna inthawinaa rinna chu a tichhia. (Mt. 20:28) Setana dâwt sawi dang leh chu mihringin thi thei lo thlarau kan nei tih hi a ni. Chu chu a dik a nih chuan, mi tinte chu chatuanin an nung a ni ang. Krista chuan chatuanna nun kan neih nân kan tân tlanna a pêk a ngai lo vang. Krista inthawina chu mihring chanchina hmangaihna sâng ber lantîrna a ni tih hre reng ang che. (Johana 3:16; 15:13 chhiar rawh.) Jehova leh Isua’n chu thilpêk hlu tak ngainêptu zirtîrnate an thlîr dân tûr chu han mitthla teh!

10. Engtin nge thihna chungchânga Setana dâwt thu chuan mihringte lungngaihna leh hrehawm tawrhna a belhchhah?

¹⁰ Setana dâwt sawi chuan mihringte manganna leh hrehawm tawrhna a belhchhah. Thihnaa fate chântu nu leh pate chu, Pathianin vânah vântirhkoh ni tûrin a la tia hrilh an ni a. Chu Setana dâwt thu chuan nu leh pate rilru natna chu a tiziaawm nge, a belhchhah zâwk? Hremhmun meidîl zirtîrna dik lo chu church zirtîrna dodâltute bana hâl pawh tiamin, nghaisakna chungchâng hrilhfiah nâna hman a ni a. Spanish rama sakhaw rorêlna (Spanish Inquisition) chungchânga lehkhabu pakhat chuan, chu hremnaa mawhphurtu ṭhenkhatin kalpêngte chu an thih hmaa inchhîr a, hremhmun mei ata chhandam an nih theih nân, anni chu “chatuan hremhmun awm dân an temchhintîrna” mai nia an ngaih thu a sawi. Ram tam takah chuan, mite chuan boral tawh an thlahtute tân ei tûr siamsak te, anmahni chawimawi te, leh an hnên aṭanga malsâwmna dawnte a ngai niin an inhria a. Mi dang lehte chuan an thlahtute hnên aṭanga hremna an pumpelh duh avângin anni chu tihlâwm an duh a ni. Lungchhiatthlâk tak chu, Setana dâwt thu ṭanchhan zirtîrnate chuan thlamuanna dik tak a thlen lo va. Chu aiin, ṭûl lo taka lungkhamna leh hlauhna a thlen zâwk hi a ni.

11. Engtin nge chhûngte leh ṭhiante’n Pathian Thu kalh zâwnga thil ti tûra min tihluih mai theih?

¹¹ Chhûngte leh ṭhiante’n thihna chungchânga Bible kalh zâwng thiltihnaa tel tûra min tihluih hunah pawh, Pathian leh a Thu hmangaihna chuan Jehova thu awih tûrin min ṭanpui ang. Anni chuan kan hmangaih thi tawhte chu hmangaih lo leh zah lo nia min puhin tihzah hial pawh min tum thei a. A nih loh leh, kan thiltih dân avângin mitthi chuan nung dama awmte chu kawng engemaw takin a tibuai ang tiin a sawi mai thei bawk. Chutiang hunah chuan, engtin nge Bible thutak chu kan vawn tlat theih? A hnuaia Bible thu bulte kan nunpui theih dân chu ngaihtuah ang che.

12. Thihna chungchângah eng hnam dânte hi nge Bible nêna inmil lo?

¹² Bible nên inmil lo thurinte leh hnam dânte lakah “a hrangin awm” tum tlat rawh. (2 Kor. 6:17) Caribbean ram pakhatah chuan mi tam takin mi a thih hnuah a “thlarau” chu a vâk vêl a, amah cheibâwl ṭha lotute chu a hrem an ring a. A “thlarau” chuan “khawtlângah buaina a thlen” hial a ni tiin lehkhabu pakhat chuan a sawi. Africa ram pakhatah chuan mitthi ina dârthlalangte, leh banga an milem târte chu an  khup vek ṭhîn a ni. Engvângin nge? Mi ṭhenkhat chuan mitthite’n anmahni an inhmuh loh nâna tih niin an sawi! Jehova chhiahhlawhte kan nih angin, Setana dâwt thu chawi lârtu thawnthute leh thiltih engpawh chu kan ring ngai lo vang!—1 Kor. 10:21, 22.

13. Jakoba 1:5-a târ lan angin, hnam dân ṭhenkhat chungchângah i chiang lo a nih chuan eng nge i tih ang?

¹³ Hnam dân ṭhenkhatte chu Bible nêna a inmil leh mil loh i chiang lo a nih chuan Pathian Jehova hnênah finna pe tûr chein rinna nên dîl ang che. (Jakoba 1:5 chhiar rawh.) Chumi hnuah, chûng thute chu kan thu leh hla chhuahah zawng la. A ṭûl chuan kohhran upate râwn ang che. I tih tûr chu an hrilh lo vang che; mahse, heta kan sawiho ang chi Bible thu bulte chu an kawhhmuh thei che a ni. Chutianga i tih chuan i “hriat theihnate” chu i sawizawi a ni ang a, chu chuan “a chhiah leh a ṭha fiah” tûrin a ṭanpui ang che.—Heb. 5:14.

14. Eng kawngin nge mite tih tlûk chu kan pumpelh theih?

¹⁴ “In tih apiangah pawh, Pathian ropuina tûr hlîrin ti rawh u. Tlûk phahna tûr rêng rêng engmah ti suh u.” (1 Kor. 10:31-33) Hnam dân ṭhenkhata kan tel dâwn leh dâwn loh chungchânga thu tlûkna kan siam hunah kan thu tlûkna siamin mi dang, a bîk takin kan Kristian unaute chhia leh ṭha hriatna a nghawng dân tûr pawh kan ngaihtuah tel bawk tûr a ni. Tuma tân tlûk phahna rêng rêng siam kan duh ngai lo vang! (Mk. 9:42) Chu bâkah, Thuhretu ni lote pawh ṭûl lo takin kan tithinrim duh lo bawk. Hmangaihna chuan anni chu zahthiam taka be tûrin min chêttîr ang a, chu chuan Jehova chawimawina a thlen ang. Mite nên kan inhnial lo vang a, an hnam dânte chu kan sawisêl lo vang. Hmangaihna chu thiltithei tak a ni tih hre reng rawh! Inâwm tak leh zah thiam taka hmangaihna kan lantîr chuan dodâltu thinlung pawh kan hmin hial thei a ni.

15-16. (a) Engvângin nge mi dangte hnêna kan rinna hriattîr chu a finthlâk? Entîrna pe rawh. (b) Rom 1:16-a chhinchhiah Paula thu chu engtin nge kan nunpui theih?

¹⁵ Jehova Thuhretute zînga mi i ni tih mite hriattîr rawh. (Is. 43:10) I chhûngte leh vêngte’n Pathian Jehova i bia tih an hriat chuan chhûngkaw zînga mi tuemaw a boral hunah, chu chuan dinhmunte chinfel a tiawlsam ngei ang. Mozambique rama awm Francisco-a chuan: “Ka nupui Carolina-i nêna thutak kan hriat hnu chuan mitthite kan biak tawh dâwn loh thu kan chhûngte kan hrilh a. Chu kan thu tlûkna siam chu Carolina-i laizâwnnu a thih  chuan fiah a ni ta a. Tualchhûng tih dânah chuan mitthi ruang chu hun serh neih laiin an bual ṭhîn a. Tichuan, chhûngkhat hnaite chu mitthi bualna tui an leihbuakna hmunah zan thum an riah a ngai a ni. Hêng an thiltihte hian mitthi thlarau chu a tilâwm niin an ngai a. Carolina-i chhûngte pawhin, ani chu an tih dân ṭhin anga mu ve tûrin an beisei a ni,” tiin a ziak.

¹⁶ Engtin nge Francisco-a leh a nupui chuan an chhân lêt? Francisco-a chuan: “Jehova kan hmangaih a, tihlâwm kan duh avângin an thiltihnaah chuan kan tel duh lo va. Chuvângin, Carolina-i chhûngte chu an thinur hle a ni. Mitthi zah lovah min puh a, min tlawh tawh lo va, min ṭanpui tawh loh tûr thu an sawi bawk. Kan thurinte chu tûn hmaa kan lo hriattîr tawh avângin an thinrim lai chuan engmah kan sawipui lo. A chhûngte zînga ṭhenkhat chuan kan dinhmunte kan lo hrilhfiah tawh thu sawiin min ṭan bawk. A hnuah chuan, Carolina-i chhûngte chu an thinrim a lo reh a, kan inrem leh thei ta a ni. Mi ṭhenkhat chu Bible thu leh hla chhuahte min dîl tûrin kan inah an lo kal hial,” tiin a sawi. Thihna chungchânga thutak humhim tûra rinawm tlat chu i zak ngai lo vang u.—Rom 1:16 chhiar rawh.

17. Kan Kristian lusûnte tân ṭhian ṭha ni tûrin engin nge min ṭanpui thei?

¹⁷ Kan Kristian unaute’n thihnaa hmangaih tak an chân hian, an “ṭhian . . . , mangan nî atâna unauva piang” nih kan tum tûr a ni. (Thuf. 17:17) A bîk takin, lusûn kan unau tuemaw chu Bible nêna inmil lo thiltiha tel tûra tihluih an nih hunah engtin nge a tân “ṭhian” kan nih theih? Lusûnte hnêm tûra min ṭanpui theitu Bible thu bul pahnih hi i lo ngaihtuah ang u.

18. Engvângin nge Isua a ṭah a, a entawn tûr siam aṭangin eng nge kan zir theih?

¹⁸ “Ṭapte chu ṭahpui rawh u.” (Rom 12:15) Lusûnna avânga lungchhe tak tuemaw thlamuan tûra thusawi chu harsa i ti mai thei. A châng chuan, kan ṭahpuina chuan kan thusawi aiin a thlamuan nasa zâwk thei a. Isua ṭhian Lazara a thih khân Mari te, Marthi te leh mi dangte chuan an unau duh tak leh an ṭhian chu an ṭah a. Ni li hnua Isua a va thlen chuan  Lazara a kai tho dâwn tih a hre chung pawhin “a ṭap ta a.” (Joh. 11:17, 33-35) Isua ṭahna chuan thihna chungchânga a Pa rilru put hmang a târ lang a ni. Isua’n an chhûngkua a hmangaihzia pawh an hria a, chu chuan Mari leh Marthi chu a thlamuan ngei ang. Chutiang bawkin, kan unaute’n kan hmangaihna leh kan ngaihsakna an hriat chuan mal nia inhriatna nei lovin, mite ngaihsaktu leh ṭanpui ṭhîntu ṭhiante hual vêla awm niin an inhria ang.

19. Kan Kristian unau lusûn tuemaw kan thlamuan hian eng kawngin nge Thuhriltu 3:7 chu kan nunpui theih?

¹⁹ “Ngawih hun a awm a, ṭawng hun a awm.” (Thur. 3:7) Lusûn Kristian unau tuemaw kan thlamuan theih dân kawng dang leh chu ngaithlatu ṭha nih hi a ni a. A thinlunga awmte sawi chhuahna hun remchâng kan pe ang a, “bung” taka thu sawiin kan tithinur lo vang. (Job. 6:2, 3) Ani chu Thuhretu ni lo a chhûngte nêksâwrna avângin a rilru a hah hle thei a. Chuvângin, ṭawngṭaisak ang che. Chakna leh rilru fîm tak nei tûrin “ṭawngṭaina ngaithlatu” hnênah ngensak rawh. (Sâm 65:2) I dinhmunin a zir chuan Bible chhiarpui la. A nih loh leh, min tichak thei tak nun kawng chanchin ang chi, a tâna ṭha tûr kan thu leh hla chhuaha thuziakte chu chhiarsak bawk ang che.

20. A dawta thuziakah eng nge kan sawiho vang?

²⁰ Thihna chungchânga thutak hriatna leh hriatrengna thlâna awmte thawhleh hun tûr hma lam hun lâwmawm tak kan nei chu a va lâwmawm tak êm! (Joh. 5:28, 29) Chuvângin, ṭawngkam leh thiltihin, Bible thutak chu huaisen taka vuan tlatin, hun remchâng kan neih apiangin chu thutak chu mi dangte i hrilh ang u. A dawta thuziakah chuan Setana’n thlarau lama thimna—dawithiamna—hmanga mite bum a tum dân kawng dangte sawiho a ni ang a. Setana thang nêna inkungkaihna nei thiltih leh intihhlimnate kan pumpelh a ngaih chhan kan sawiho bawk ang.