1. Ephesi 6:10-13-a sawi angin, Jehova’n min ngaihsakzia a lantîr dân ṭha ber zînga pakhat chu eng nge ni? Hrilhfiah rawh.

JEHOVA’N a chhiahhlawhte a ngaihsakzia a lantîr dân ṭha ber zînga pakhat chu kan hmêlmate do thei tûra min ṭanpui hi a ni. Kan hmêlma berte chu Setana leh a ramhuaite an ni a. Jehova chuan chûng hmêlmate chungchângah min vaukhân a, anmahni do thei tûrin kan mamawhte pawh min pe a ni. (Ephesi 6:10-13 chhiar rawh.) Jehova ṭanpuina kan pawm a, amah kan rinchhan pumhlum chuan, Diabola kan donaah kan hlawhtling thei ang. Tirhkoh Paula neih ang inrintâwkna chu kan nei ve thei a. Ani chuan: “Pathian kan lama a ṭan chuan tuin nge min do thei ang?” tiin a ziak a ni.—Rom 8:31.

2. He thuziakah hian eng nge kan sawiho vang?

² Kristiante kan nih angin, Setana leh a ramhuaite chu kan ngaihven ber an ni lo. Kan ngaihven ber zâwk chu Jehova chanchin zir leh a rawngbâwl hi a ni. (Sâm 25:5) Mahse, Setana thiltih dân bulpuite chu kan hriat a ngai a. Engvângin nge? A buma kan awm lohna tûrin a ni. (2 Kor. 2:11) He thuziakah hian Setana leh a ramhuaite’n mite an bum dân langsâr zualte kan sawiho vang a. Hlawhtling taka kan do theih dân pawh kan sawiho bawk ang.

3-4. (a) Dawithiamna chu eng nge ni? (b) Dawithiamnaa rinna neih chu engtiang khawpa hluar nge a nih?

³ Setana leh a ramhuaite’n mite an bum dân langsâr ber chu dawithiamna hi a ni a. Dawithiamte chu mite hriat theih loh leh thunun theih loh thilte hre thei leh thunun thei niin an inchhâl a. Entîr nân, ṭhenkhat chuan aien thiamna leh arsi  hmanga aienna hmangin, hma lam hun tûr hre thei niin an insawi. Mi dangte chuan mitthite be thei niin an insawi bawk. A ṭhen chuan dawi leh chumi nêna inkungkaih thilte hmangin mi dangte chungah thil ṭha lo thlentîr an tum mai thei a ni. *

⁴ Dawithiamnaa rinna neih chu engtiang khawpa hluar nge a nih? Latin America leh Caribbean-a ram 18-a ngaih dân lâk khâwmna chuan mi pathum zêla pakhatin dawi leh ramhuaite nêna inkungkaih thiltihte an ring a, chutiang zât deuh thaw chuan thlaraute nêna inbiakpawh chu thil theih a ni tih an rin thu hmuhchhuah a ni. Ngaih dân lâk khâwmna dang chu Africa khawmuala ram 18-a neih a ni a. Chutah chuan, chawhrualin, an mi zawh a zâtve aia tamin dawi hmanga thiltihte an rinzia an sawi a ni. Ni e, khawiah pawh awm ila, dawithiamna laka kan invên a ngai a. Engpawh ni se, Setana chuan “khawvêl zawng zawng” chu bum a tum a ni.—Thup. 12:9.

5. Jehova’n dawithiamna chu engtin nge a ngaih?

⁵ Jehova chu “thutak Pathian,” a ni a. (Sâm 31:5) Chuvângin, ani chuan dawithiamna chu engtin nge a ngaih? A hua a ni! Jehova chuan Israel mite hnênah: “A fapa emaw, a fanu emaw meia kal tlangtîr te, aien chîng te, ṭhumvâwr chîng te emaw, mitlâkdawi hmang emaw te, dawithiam te, dawi ât te, ramhuai zâwl rawih te, dawithiam te, mitthi biak chîng mite in zîngah an awm tûr a ni lo. Hêng thil ti mi apiangte hi LALPA ngaihin mi tenawm an ni si a: tin, hêng thil tenawm avâng hian a ni, LALPA in Pathianin a hnawhchhuahsak che u ni,” tiin a sawi a. (Deut. 18:10-12) Kristiante chu Jehova’n Israel mite hnêna a pêk Dân hnuaiah kan awm tawh lo va. Mahse, dawithiamna chungchânga Pathian ngaih dân chu a la inthlâk danglam lo tih kan hria a ni.—Mal. 3:6.

6. (a) Engtin nge Setana’n mite tihchhiat nân dawithiamna a hman? (b) Thuhriltu 9:5-a târ lan angin, mitthite dinhmun dik tak chu eng nge ni?

⁶ Setana chuan mite tihchhiat nân dawithiamna a hman avângin Jehova’n chumi chungchângah min vaukhân a. Mitthite chu khawi hmunah emaw an la nung tih dâwt thu pawh tiamin, Setana chuan dâwt theh lâr nân dawithiamna chu a hmang a ni. (Thuhriltu 9:5 chhiar rawh.) Chu bâkah, mite tihṭhaih nân leh Jehova laka kal pêntîr nân a hmang bawk. A thiltum chu dawithiamna ringtute’n Jehova ni lovin, thlarau suaksualte an rinchhan hi a ni.

7. Jehova’n eng nge min hrilh?

⁷ A chunga kan hriat tawh angin, Jehova chuan Setana leh a ramhuaite buma kan awm loh nân kan hriat ngaite chu min hrilh a. Setana leh a ramhuaite kan donaa hma kan lâk theih dân ṭhenkhat chu ngaihtuah rawh.

8. (a) Thlarau suaksualte kan do dân bul ber chu eng nge ni? (b) Sâm 146:4 chuan thihna chungchânga Setana dâwt thu chu engtin nge a laih lang?

⁸ Pathian Thu chhiarin chhût ngun rawh. Hei hi thlarau suaksualte theh lâr dâwt thute kan hnâwl theih dân kawng ṭha ber a ni. Pathian Thu chu Setana theh lâr dâwt thute lai lang theitu ngûnhnâm hriam tak ang a ni a. (Eph. 6:17) Entîr nân, Pathian Thu chuan mitthite chu mi nung damte nên an inbepawh thei tih dâwt thu chu a lai lang a. (Sâm 146:4 chhiar rawh.) Chu bâkah, Pathian Jehova chauhvin  hma lam hun a sawi dik thei tih min hriatnawntîr bawk. (Is. 45:21; 46:10) Pathian Thu kan chhiar a, kan chhût ngun ṭhin chuan thlarau suaksualte’n min rintîr an duh dâwt thute hnâwl tûr leh haw tûrin kan inthuam tihna a ni ang.

9. Eng dawithiamna thiltihte nge kan pumpelh ang?

⁹ Dawithiamna nêna inkungkaih thil rêng rêng chu hnâwl rawh. Kristian dikte kan nih angin, eng dawithiamna nên mah kan inhnamhnawih lo vang. Entîr nân, mitthi thlûk thiamte chu kan râwn lo vang a, eng kawng mahin mitthite chu biakpawh kan tum hek lo vang. Thuziak hmasaa kan sawi tâk angin, mitthite chu khawi hmun emawah an la nung tih thurina innghat mitthi vui dânte chu kan pumpelh a. Chu bâkah, hma lam hun hriat tumin arsi hmanga aienna, a nih loh leh hma lam hun sawi lâwknate chu kan ring lo bawk. (Is. 8:19) Chûng tih dân zawng zawngte chu hlauhawm tak a ni tih leh, Setana leh a ramhuaite nên inzawmna min neihtîr thei tih kan hria a ni.

10-11. (a) Kum zabi khatnaa mi ṭhenkhatin thutak an hriat hnuah eng thil nge an tih? (b) Korinth thawn khat 10:21-a târ lang angin, engvângin nge Kristian hmasate chu kan entawn ang a, engtin nge kan entawn theih?

¹⁰ Dawithiamna hmanruate chu paih bo rawh. Kum zabi khatnaa Ephesi khuaa mi ṭhenkhat chu dawithiamna lamah an inhnamhnawih a. Thutak an hriat hnu chuan, chhinchhiah tlâk khawpin hma an la a ni. “Dawihmang a ṭhen tam tak pawhin an lehkhabute an rawn la khâwm a, mi zawng zawng mithmuhah an hâl ta a.” (Tirh. 19:19) Chûng mite chuan thlarau suaksualte do tûrin an tihtheih apiang an ti a ni. Dawi lam ziakna an lehkhabute chu a man a to hle a. Chûng an lehkhabute chu paih bo mai lovin, a nih loh leh mi dangte hnêna hralh mai lovin an hâlral vek zâwk a. Lehkhabu hlutna aiin Jehova tihlâwm chu an ngai pawimawh zâwk a ni.

¹¹ Kum zabi khatnaa Kristiante chu engtin nge kan entawn theih? Kan neih mai theih dawithiamna nêna inkungkaih thil rêng rêng  paih bo chu a finthlâk ngei ang. Chûngahte chuan aienna te, leh thlarau suaksualte laka invên nâna an hman awrh leh bun theih ang chi, thil chi hrang hrang a tel a ni.—1 Korinth 10:21 chhiar rawh.

12. Intihhlimna chungchângah eng zawhnate nge kan inzawh ang?

¹² Intihhlimnate chu fîmkhur takin thlang rawh. Heti hian inzâwt rawh: ‘Dawithiamna lam thuziakte chu lehkhabu-ah leh magazine-ahte chhiarin, Internet-ahte ka en em? Ka rimawi ngaihthlâk te, film leh TV en te, ka video games khelh ṭhinte hi eng nge ni? Intihhlimna ka thlanah hian dawithiamna lam a tel em? Thisen dâwt hmang te, tulûm (zombies) te, a nih loh leh thlarau zâwlna lamte a ni em? Dawi te, mitdawivaih te, dawi hla chhamte chu chhiatna min thlen thei lo tûr intihhlimna angin ka thlîr em?’ Suangtuahna leh thawnthu lam hawi intihhlimna zawng zawng chu dawithiamna lam nên a inkungkaih vek kher lo ngei mai. Intihhlimna i thlan hunah Jehova huat zâwngte pumpelh tûrin thu tlûkna siam ang che. Pathian hmaa “chhia leh ṭha hriatna thiang” neih chu kan duh a ni.—Tirh. 24:16, C.L. Re-edited. *

13. Eng tih nge pumpelh kan duh?

¹³ Ramhuai chanchin chu sawi suh. Hemi chungchângah hian, Isua entawn tûr hnutchhiah chu zui kan duh a. (1 Pet. 2:21) He leia a lo kal hma khân, Isua chu vânah a awm a, Setana leh ramhuaite chanchin tam tak a hria a ni. Mahse, chûng thlarau suaksualte thiltih chungchâng chu a sawi ngai lo. Isua chuan Setana chanchin sawi darhtu ni lovin, Jehova thuhretu pakhat nih chu a duh a ni. Keini pawh ramhuaite chanchin sawi darh lohvin  Isua kan entawn thei a. Chu aiin, thutak sawiin, kan “thinlung hi thil ṭhain a liam zawih zawih,” tih kan lantîr zâwk tûr a ni.—Sâm 45:1.

14-15. (a) Engvângin nge thlarau suaksualte chu kan hlauh loh vang? (b) Jehova’n tûn laia a mite chu a vênghim tih eng finfiahna nge awm?

¹⁴ Thlarau suaksualte chu hlau suh. He khawvêl ṭha famkim lovah hian, thil ṭha lote chu kan chungah a thleng thei a. Chêtsualna te, natna te, a nih loh leh thihnate chu hriat lâwk lohvin a lo thleng thut thei a ni. Mahse, hmuh theih loh thlarau suaksualte avânga thlengah kan ngai tûr a ni lo. Bible chuan “hun leh beisei loh thilthlengte” chu tu chungah pawh a thleng thei tih a sawi a. (Thur. 9:11, NW) Jehova chuan ramhuaite hnênah anni aiin nasa takin thil a tithei zâwk tih a lantîr tawh a. Entîr nân, Pathian chuan Setana’n Joba a tihhlum chu a phal lo. (Job. 2:6) Mosia hun lai khân, Jehova chuan Aigupta mitlâk dawithiamte aia thil a tihtheih zâwkzia a lantîr a. (Ex. 8:18; 9:11) Chawimawia awm tawh Isua chuan Jehova pêk thiltihtheihna hmangin, Setana leh a ramhuaite chu vân aṭanga leia paih thlain thil a tihtheih zâwkzia a târ lang a ni. Nakin lawkah, anni chu tumah an tihnat theih tawh lohna hmun leilâwtah paih an ni ang.—Thup. 12:9; 20:2, 3.

¹⁵ Jehova chuan tûn laiah a mite chu a vênghim tlat tih finfiahna tam tak kan hmu a. Hei hi han ngaihtuah teh: Khawvêl hmun hrang hrangah mite chu thutak kan hrilhin kan zirtîr a. (Mt. 28:19, 20) Chutiang chuan, Diabola thiltihte chu kan lai lang a ni. Dik tak chuan, Setana’n kan thiltih zawng zawng chu tihtâwp a duh a; mahse, a titâwp thei lo. Chuvângin, thlarau suaksualte chu kan hlauh a ngai lo a ni. “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn,” tih kan hria. (2 Chro. 16:9) Jehova chunga kan rinawm chuan, ramhuaite’n chatuana kan chhiatna tûrin engmah an ti thei lo vang.

16-17. Thlarau suaksualte do tûr chuan huaisenna neih a ngai tih entîrna pe rawh.

¹⁶ A bîk takin, kan ṭhian ṭha takte emaw, kan chhûngkhatte emawin min dodâl hunah  thlarau suaksualte do tûrin huaisenna kan neih a ngai a. Mahse, Jehova chuan chutiang huaisenna lantîrtute chu mal a sâwm a ni. Ghana rama awm unaunu Erica-i thiltawn hi han ngaihtuah teh. Erica-i’n Bible a zir ṭan chuan kum 21 mi a ni a. Ramhuai bia puithiam fanu a nih avângin a pa biak pathiante hnêna inthawina sate ei pawh tiamin, ramhuai nêna inkungkaihna thiltiha tel ve tûra beisei a ni a. Erica-i chu a tel duh tâk loh avângin, a chhûngte’n an biak pathiante zah lovah an puh a. A chhûngte chuan an pathiante’n rilru lam leh tisa lamah natna tawrhtîr a, an hrem an ring a ni.

¹⁷ A chhûngte’n Erica-i chu an hnam dân zui tûrin an nawr lui a; mahse, in aṭanga hnawhchhuah inhuamin, tih a tum chuang lo. Thuhretu ṭhenkhat chuan an inah an awmtîr a. Chutiang kawng chuan, Jehova chuan Erica-i chu thlarau lama a unaute—chhûngkaw thar nei tûrin mal a sâwm a ni. (Mk. 10:29, 30) A chhûngte’n ani chu an be duh tawh lo va, a thil neihte pawh an hâlsak a. Chuti chung pawhin, ani chu Jehova chungah a rinawm tlat a, baptisma a chang a, tûnah chuan regular pioneer a thawk a ni. Ani chuan ramhuaite chu a hlau lo. A chhûngte chungchângah, Erica-i chuan, “Ka chhûngte chuan Jehova an hriat avânga malsâwmna an dawn theih nân leh, hmangaihna Pathian rawngbâwlna aṭanga lo awm zalênna an neih theih nân nî tin an tân ka ṭawngṭaisak ṭhîn,” tiin a sawi.

18. Jehova kan rinchhan chuan eng malsâwmnate nge kan hmuh ang?

¹⁸ Chutianga rinnaa fiahna mak danglam tak chu kan tawng vek kher lo vang. Mahse, kan za hian thlarau suaksualte kan do va, Jehova kan rinchhan a ngai a. Chutianga kan tih chuan, malsâwmna tam tak kan dawng ang a, Setana dâwt thua bumin kan awm lo vang. Chu bâkah, ramhuaite hlauh avânga engmah ti thei lovin kan awm hek lo vang. Chu ai chuan, Jehova nêna kan inṭhian ṭhatna chu kan tinghet zâwk ang. Zirtîr Jakoba chuan: “Pathian thu thuin awm rawh u; amaherawhchu Diabola dodâl rawh u, tichuan a tlân bosan ang che u. Pathian hnaih rawh u, tichuan anin a hnaih ang che u,” tiin a ziak a ni.—Jak. 4:7, 8.