Winston, Pathian i zawn dân min hrilh ta che?

Australia, Queensland bial, thlawhhmaa khawsa, sakhaw vawn nei lo chhûngkuaa seilian ka ni a. Lova awm kan nih avângin, kan chhûngkaw hnaite tih loh chu, mi dang nên inzawmna ka nei vak lo. Kum 12 vêl ka nih aṭangin, Pathian ka zawng ṭan a. Pathian chanchin thutak hre tûrin a hnênah ṭawngṭaiin ka dîl a. A tâwpah, chu bial aṭangin ka kal chhuak a, South Australia, Adelaide bialah hna ka hmu ta a. Kum 21 mi ka nihin, Sydney khawpuia chawlh ka lâk laiin Pam-i nên kan intawng a, ani chuan British mite hi Israel hnam bo an tih hnam thlahte kan ni tia inchhâl British-Israel sakhaw mite chanchin min hrilh a. Chûng hnamte chuan B.C.E. kum zabi pariatnaa sala hruai tâk, hmâr lam ram hnam sâwmte kan ni tiin an insawi a. Adelaide-a ka kîr leh chuan, chu chanchin chu Jehova Thuhretute nêna Bible zir ṭan mêk ka hnathawhpui pakhat hnênah ka hrilh a. Dârkâr rei vak lo chhûng Thuhretute thurin deuh hlîr kan sawiho hnu chuan, ka naupan laia ka ṭawngṭaina chu chhân a ni tih ka hria. Mi Siamtu leh a Lalram chungchâng thutak chu ka zîr ta a! “Tuikeplung hlu tak chu” ka hmu ta a ni.—Mt. 13:45, 46.

Pam, nang pawh, i naupan lai aṭangin, chu tuikeplung chu i zawng a. Engtin nge i hmuh?

Kei chu New South Wales, Coffs Harbour khawpuia sakhaw ngaihven tak chhûngkuaa seilian ka ni a. Ka nu leh pate, leh ka pi leh pute chuan British-Israel zirtîrnate chu an pawm a. Kei leh ka nau mipa, ka u hmeichhia leh ka laichin unaute chuan British thlahte chu Pathian duhsak bîk hnam an ni tih zirtîrna kan dawng a. Mahse, chu thurin chu ka pawm thei lo va; Pathian  thuah tuihâl reng ni hian ka inhria. Kum 14 ka nihin, Anglican, Baptist, leh Seventh-day Adventist pawh tiamin, tualchhûng kohhran hrang hrangah ka inkhâwm a. Mahse, thlarau lama ka tuihâlna chu a reh chuang lo.

A hnuah, Sydney khawpuiah kan chhûngin kan insawn a, chutah chuan chawlh laa lo zin Winston-a nên kan intawng a. A sawi angin, sakhaw chungchâng kan sawihona chuan Thuhretute nêna Bible zir tûrin Winston-a chu a chêttîr ta a. Chumi hnuah, a lehkha min rawn thawnte chu Bible châng hlîr a ni mai! Zêp lova sawi chuan, a tîr lamah chuan, ka hlauthawng mai ni lovin, ka thinrim hial a. Mahse, zawi zawiin Pathian chungchânga thutak chu ka hre thiam ve ṭan ta a ni.

Kum 1962-ah, Winston-a nên kan inhnaih lehzual nân Adelaide-ah ka insawn a. Ani chuan Papua New Guinea rama missionary thawk mêk, Thuhretu nupa tuak khat Thomas leh Janice Sloman te hnêna awm tûrin ruahmanna min siamsak a. Anni chu ka chungah an ṭha hle a; kum 18 lek ka la ni a, thlarau lamah nasa takin min ṭanpui a ni. Chuvângin, kei pawh, Bible ka zir ṭan a, tichuan, thutak ka hmu tih ka hre ta thuai a. Winston-a nên kan inneih hnu chuan, Jehova rawngbâwlin malsâwmna nun kawng kan zawh ṭan ta nghâl a, harsatna awm ṭhîn mah se, tuikeplung hlu tak kan hmuh chu kan ngaihlu chho telh telh a ni.

Winston, Jehova rawng i bâwl ṭantirh lama i thiltawnte min hrilh ta che?

Pam-i nêna kan inneih hnu rei vak lovah, Jehova’n rawngbâwlna zauh tûra “kawngka zau” tam tak zînga a hmasa ber chu min hawnsak a. (1 Kor. 16:9) Chu kawngka hmasa ber min kawhhmuhtu chu, kan kohhran tê tak têa bial kantu nia rawngbâwl Unau Jack Porter-a a ni. (Ani chu tûnah Australasia Branch Committee member niin ka thawhpui a ni.) Jack-a leh a nupui Roslyn-i chuan regular pioneer thawk tûrin min fuih a, kum nga chhûng hlim takin kan thawk a ni. Kum 29 ka nih chuan, kei leh Pam-i chu Fiji branch enkawlna hnuaia awm, South Pacific Thliarkâra bial kan hna thawk tûra tih kan ni a. Chûng thliarkârte chu American Samoa, Samoa, Kiribati, Nauru, Niue, Tokelau, Tonga, Tuvalu, leh Vanuatu te a ni.

Chûng hun lai chuan, a hrang deuhva awm thliarkâr ṭhenkhata mite chuan Jehova Thuhretute chungah ringhlelhna an neih avângin keini pawh kan fîmkhur a, fing thiam taka kan awm a ngai a ni. (Mt. 10:16) Kohhrante chu a lian vak lo va, kohhran ṭhenkhat chuan kan awmna tûr pawh min ruahmansak thei lo. Chuvângin, tualchhûng mite hnêna thleng thei tûrin ṭanpuina kan dîl a, kan chungah an ṭha thei khawp mai.

Winston, translation hna hi i tuipui hle a. Engtin nge tuina i neih chhoh?

Chutih hun lai chuan, Tonga thliarkâra unaute chuan Tongan ṭawngin—Polynesian ṭawng—tract-te leh lehkhabu tête an nei mang lo va. Rawngbâwlnaah, zirtîrna atân Sâpṭawnga tihchhuah Kumkhaw Nunna A Hruaitu Thutak Chu tih lehkhabu chu an hmang a ni. Chuvângin, chawlhkâr li awh, kohhran upate school neih chhûngin, Sâpṭawng thiam vak lo tualchhûng kohhran upa pathum chu Thutak tih lehkhabu chu Tongan ṭawnga lehling turin an inpe a. Pam-i chuan an lehlinsa chu a type chhuak a, lehkhabua tichhuak tûrin United States branch-ah kan thawn a ni. Chu hna chuan chawlhkâr riat chhûng a awh a. Ṭawng lehlin chu duhthusâma ṭha ni lo mah se, chu lehkhabu chuan Tongan ṭawng hmang mi tam tak chu thutak hre tûrin a ṭanpui a ni. Pam-i leh kei chu ṭawng letlingtu kan ni lo va; mahse, kan thiltawn chuan he hna kan ngaihvenna a tizual a ni.

Pam, thliarkâra nun leh Australia-a nun chu eng nge a danglamna?

Danglam tak a ni! Kan awmna azirin thosi te, khaw lum tak leh boruak hnâwng te, sazu te, natnate kan hmachhawn a ngai a, ei tûr kham khawp kan neih loh châng pawh a awm. Kawng leh lamah chuan, tlai tin kan in—Polynesia mite  in chi khat a ni a, Samoa mite’n fale tia an koh, bang nei lo, di in—aṭanga thufinriat kan thlîr hian kan hahdam sawng sawng ṭhîn a ni. Thla ên zânahte chuan, narial kûngte hlimthla chu kan hmu thei a, thlapui hlimthla pawh tuifinriat chungah a hmuh theih bawk. Chûng hun hlu takte chuan chhût ngun leh ṭawngṭaina nei tûrin leh a thim zâwng ni lo va, a êng zâwnga thil thlîr tûrin min ṭanpui a ni.

Ram danga aṭanga lo kal mi ngote an hmuh huna mak ti ṭhîn naupang hlim thei takte chu kan ngaina hle a. Niue thliarkâr kan tlawh laiin, naupang pakhat hian Winston-a kut hmul chu a chûl a, tichuan, “I hmul hi sava hmul a ang ka ti, ka van duh ve e,” a ti a. Chutiang hmul chu a hmuh ngai loh bâkah, a sawi thiam loh vâng a ni!

Mi tam tak chu dinhmun chhe tak hnuaiah an awm tih kan hmuh hian rilru a nuam duh lo hle a. Hmun mawi tak hual vêlin awm mah se, an hrisêlna a ṭha tâwk lovin, in tûr tui pawh an nei mang lo. Chuti chung pawhin, kan unaute chu lungkhamna nei lo angin an lang. Chu chu an nun dân pângngai a ni a. Anni chuan chhûngkua an neih vâng te, inkhâwmna hmun an neih avâng te, leh Jehova an fak theih avângtein an hlim hle a. An entawn tûr siam chuan thil pawimawhte chu dah hmasa tûr leh nun tisamkhai tûrin min ṭanpui a ni.

Pam, hmun thara i awm avângin, a châng chuan, in tûr leh chaw chhumna tûr tui i neih a ngai a. Chûngte chu engtin nge i neih theih?

Ka pa chungah ka lâwm hle. Pâwna mei chhêm dân leh chaw chhum dân te, ei tûr tlêm tê nên pawha khawsak theih dânte ang chi thil ṭangkai tak takte chu min zirtîr a ni. Kiribati thliarkâr kan tlawh ṭum chuan, a chungkhuh di, coral chhuat leh dâp bang nei in tê pakhatah kan awm a. Ka chaw chhum dân chu, mei chhêm nân chhuatah lei ka lai khuar a, thing atân narial kâwrte ka hmang a ni. Tui ka chawi chuan, tualchhûng hmeichhiate nên tuichhunchhuah pakhatah kan intlâr ṭhîn a. Nghakuai ngul ang deuh, feet ruk vêla sei hmawlh hmâwrah hruiin an ṭâwn zawm a, chu chu tui chawi nân kan hmang ṭhîn a ni. Hrui hmâwrah chuan thil kawm dah lovin, bâlṭin hi an vuah a. A dawt tê têin kan khai a, an kut hian an han phih deuh zeuh va. Bâlṭin chu a let thak a, tui a khat ta nghâl mai ṭhîn. Ka khai ve hma chuan âwlsam tak a nih ka lo ring a. Bâlṭin chu tihpil ka han tum ṭhîn a; mahse, pil ahnêkin, a lâng ta reng mai! Min nuihzat hnua chuan, an zînga pakhatin min rawn ṭanpui a. Chûng tualchhûng mite chu an ṭhain, min ṭanpui an inpeih reng ṭhîn.

In pahnihin thliarkâra in rawngbâwlna hi in ngaina hle a. In theihnghilh theih loh thil ṭhenkhat min hrilh thei ang em?

Winston-a: An hnam dân ṭhenkhat chu kan hre thiam nghâl mai lo va. Entîr nân, unaute’n chaw eia min sâwm hian, an neih zawng zawng min chhawp ṭhîn a. A tîr chuan, an ei ve tûr tlêm azâwng kan ei bân a ngai tih kan hre lo va. Chuvângin, min chhawp apiang chu ka ei zo vek a! Ni e, an hnam dân kan hriatthiam tâkah chuan, ei bân nachâng kan hre ve ta a. Chutianga kan fîmkhur tâwk loh avânga kan tihsualah unaute chuan min hre thiam a ni. Thlaruk vêl hnua bial va kan leh hun tûr chu an nghâkhlel thei khawp mai. Tualchhûng unaute tih loh, Thuhretu dang an hmuh leh tûr awmchhun kan ni.

Kan va tlawh ṭhinna chuan khawtlângah thu hrilhna ṭha tak a thlen bawk. Khawchhûnga mi tam tak chuan kan unaute sakhua chu tual ṭo kohhran ve maiah an ngai a. Chuvângin, ram dang mi rawngbâwltu nupain unaute an va tlawh chuan, tualchhûng mite chuan mak an ti mai ni lovin, khawvêl pum huap pâwl pakhat a nihzia an hre thiam ta a ni.

Pam-i: Ka theihnghilh theih loh thiltawn tam tak zînga pakhat chu unau tlêm tê awmna Kiribati kohhrana thilthleng a ni a. Kohhran upa awm chhun Itinikai Matera-a’n a theih ang tâwka min ngaihsakna hi a ni. Ni khat chu bâwm chhûnga artui pakhat awm hi min hmuh a. “Hei hi in tân a ni,” a ti a. Chutih hun lai chuan, artui  kan dawng ngai lo. Thil tê tham ni mah se, a thil phalna chuan kan thinlung a khawih tak zet a ni.

Pam, a hnu kum engemaw zâtah, nau i chhiat a. Chhel taka tuar chhuak thei tûrin engin nge ṭanpui che?

Kum 1973-a South Pacific-a kan awm laiin nau ka pai a. Australia-a kan kîr leh hnu, a thla linaah nau ka chhiat a. Winston-a nên chuan kan tuar thiam lo hle a ni. Hunte a lo rei chuan ka tawrhnate chu a reh a; mahse, kum 2009, April 15 chhuak Vênnainsâng kan dawn hma kha chuan ka rilru a dam thei tak tak lo. “Chhiartute Zawhna,” thuziak chuan: “Nu pum chhûnga nautê thi tân thawhleh beiseina a awm em?” tiin a zâwt a. Chu thuziak chuan, chu mi chungchâng chu englai pawha thil dik tiṭhîntu Jehova chungah a innghat tih min rinnghehtîr a ni. Ani chuan a Fapa chu ‘Diabola hnathawhte tiboral’ tûra hmangaihna nei taka a hrilh hunah he khawvêl suaksualin kan nuna hrehawm tam tak a thlentîrte chu min tihbosak tawh ang. (1 Joh. 3:8) Chu thuziak chuan Jehova mite kan nih avânga kan neih “tuikeplung” hlu tak chu hlut lehzual tûrin min ṭanpui bawk! Lalram beiseina nei lo ta ila chuan khawiah nge kan awm tâk ang?

Kan fa kan chân hnu chuan, hunbi kima rawngbâwlnaah kan tel leh a. Australia Bethel-ah thla engemaw zât rawng kan bâwl a, a hnuah, bial kan hna kan thawk leh a ni. New South Wales-a thingtlângahte leh Sydney-a kum li kan thawh hnu Kum 1981-ah, Australia branch-ah rawngbâwl tûra sâwm kan ni a, tûn thlengin kan la awm reng a ni.

Winston, South Pacific Thliarkâr-a i thiltawnte chuan Australasia Branch Committee member nia i rawngbâwlnaah a ṭanpui che em?

Kawng tam takin min ṭanpui a ni. A hmasain, Australia Branch chu American Samoa leh Samoa te enkawl tûra tih a ni a. Tichuan, New Zealand branch chu Australia Branch nên an infin ta a. Tûnah chuan, Australasia branch enkawlna hnuaiah Australia, American Samoa and Samoa, the Cook Islands, New Zealand, Niue, Timor-Leste, Tokelau, leh Tonga-te a tel a—chûng zînga hmun tam takah chuan branch aiawhin ka kal ṭhîn a. Chûng thliarkâra unau rinawm tak takte nêna thawhhona chuan tûna branch office-a ka rawngbâwlnaah hian nasa takin min ṭanpui a ni.

A tâwpna atâna ka sawi duh chu puitlingte chauh hian Pathian an zawng lo tih hi Pam-i nêna kan thiltawn aṭangin kan hria a ni. Keimahni ang bawkin, an chhûngte’n thutak an ngaihven lo chung pawhin, ṭhalai tam tak chuan “tuikeplung hlu tak” chu an duh a ni. (2 Lal. 5:2, 3; 2 Chro. 34:1-3) Pathian Jehova chu mi zawng zawngin nunna nei se, tia duhtu hmangaihna Pathian a ni si a!

Kum 50 kal taa Pam-i nêna Pathian kan zawn ṭan lai khân, chutianga kan zawnna chuan khawi lamah nge min hruai dâwn tih kan hre lo va. Lalram thutak chu khaikhin rual lohva hlu, tuikeplung a va ni tak êm! Chu tuikeplung hlu tak chu kan theihna zawng zawnga vawn ngheh tlat kan tum a ni.