1-2. Eng kawngin nge Isua chu a hniaka kan zui theih? Entîrna pe rawh.

VURIN a khuh tlângram hlauhawm taka kêa zinhote zînga tel angah han inmitthla teh. Thiltawn ngah tak hruaitu chuan hma a hruai a. A kalna apiangah chuan vûr chungah a hniakte a lang zêl a. Engemaw chen in kal hnu chuan hruaitu chu i hmu thei ta rêng rêng lo mai! Mahse, i chiai lo. Nang leh i kalpuite chuan in hmahruaitu hniak chu in zui tlat thei si a!

² Kristian dik kan nih angin, tlângram hlauhawm tak anga sawi theih khawvêl suaksual takah kan kal mêk a. Vânneihthlâk takin, Pathian Jehova chuan a fapa Isua Krista, a hniaka kan zui tlat theih tûr hruaitu ṭha famkim chu min pe a ni. (1 Pet. 2:21) Bible hrilhfiahna lehkhabu pakhat sawi dânin, Petera’n Isua chu hruaitu nên a khaikhin a. Hruaituin a kalna hnuhma a hnutchhiah angin, Isua chuan kan entawn theih tûrin a hnuhma, a nih loh leh a hniak chu min hnutchhiah a ni. A hniak zui chungchânga zawhna pathumte chu i lo sawiho vang u. Isua hniaka zui tih awmzia chu eng nge ni? Engvângin nge kan zui ang? Engtin nge kan zui theih?

3. Tuemaw a hniaka zui tih awmzia chu eng nge ni?

³ Tuemaw hniak hnung zui tih awmzia chu eng nge ni? Bible-ah chuan “lêng dûn,” tih leh “kê” tih hian mi tuemaw nun kawng kawh châng a nei a. (Gen. 6:9; Thuf. 4:26) Tuemawin entawn tûr a siam chu a hnutchhiah a hnuhma emaw, a hniak  emaw nêna khaikhin theih a ni a. Chuvângin, tuemaw a hniaka zui tih awmzia chu a entawn tûr siam kan zui tihna a ni.

4. Isua hniaka zui tih awmzia chu eng nge ni?

⁴ A nih leh, Isua hniaka zui tih awmzia chu eng nge ni? A awlsam zâwnga sawi chuan, a entawn tûr siamte zui tihna a ni a. Kan thuziak ṭanchhan Bible chângin a târ lan angin, tirhkoh Petera chuan Isua’n harsatnate chhel taka a tawrhna chungchânga entawn tûr ṭha a siamte chu a bîk takin a sawi a; mahse, Isua kan entawn theih dân kawng dang tam tak pawh a awm. (1 Pet. 2:18-25) Dik tak chuan, Isua nun kawng pumhlûm, a thusawi leh thiltih engkim chu kan tâna entawn tûr vek a ni.   

5. Mihring ṭha famkim lote hian Isua entawn tûr siam chu kan zui thei ang em? Hrilhfiah rawh.

⁵ Mihring ṭha famkim lote hian Isua entawn tûr siam chu kan zui thei ang em? Zui thei e. Petera’n Isua ṭha famkima zui tûr ni lovin, ‘a hniaka zui tlat tûrin’ min fuih zâwk tih hre reng ang che. Mihring ṭha famkim lo ni mah ila, fîmkhur tak leh theih tâwp chhuaha a hniaka kan zui chuan tirhkoh Johana’n: ‘Krista nun angin nung ve rawh u,’ tia a sawi hi kan nunpui a ni ang.—1 Joh. 2:6, C.L. Re-edited.

6-7. Engvângin nge Isua hniaka zuina chuan Jehova min hnaih lehzualtîr tia kan sawi theih?

⁶ Isua hniaka zuina chuan Jehova min hnaih lehzualtîr. Engvângin nge chutianga kan sawi theih? Pakhatna, Isua chuan Jehova tilâwm zâwnga nun dân chungchângah entawn tûr ṭha a siam a. (Joh. 8:29) Chuvângin, a hniaka kan zui chuan, Pathian Jehova kan tilâwm ang. Chu bâkah, kan Pa vâna mi chuan theih tâwp chhuaha a ṭhian nih tumtute chu a hnaih ang tih kan chiang thei a ni.—Jak. 4:8.

⁷ Pahnihna, Isua chuan a Pa chu ṭha famkimin a entawn a. Chuvângin, “Tu pawh mi  hmu chu Pa hmu a ni,” tiin a sawi thei a ni. (Joh. 14:9) Isua miziate leh mi dangte a cheibâwl dânte—entîr nân, phâr vei a khawngaih dân te, natna khirh tak tuar hmeichhe pakhat a lainat dân te, leh lusûn a tawrhpui dânte—kan entawn hian Pathian Jehova kan entawn a ni. (Mk. 1:40, 41; 5:25-34; Joh. 11:33-35) Jehova miziate kan entawn nasat poh leh amah kan hnaih lehzual ang.

8. Isua hniaka zuinain khawvêl “ngam” tûra min ṭanpui theih chhan hrilhfiah rawh.

⁸ Isua hniaka zuina chuan he khawvêl suaksual tak avânga kan rilru kal pêntîr lo tûrin min ṭanpui. Isua chuan a lei nun tâwp dâwn zânah: “Keiin khawvêl ka ngam ta,” tiin a sawi thei a. (Joh. 16:33) Chu chu khawvêl ngaihtuahna te, thiltum te, leh thiltihte thununin a awm lo a tihna a ni. Isua chuan leia a rawn kal chhan—Pathian Jehova hming tihthianghlimna chu a ngai pawimawh a. Kan chungchâng hi eng nge ni ve? He khawvêlah hian kan rilru la pêng thei thil tam tak a awm a. Mahse, Isua anga Jehova duh zâwng tih kan ngaih pawimawh chuan, keini pawhin khawvêl kan “ngam” ve ang.—1 Joh. 5:5.

9. Chatuana nunna kawnga kal reng tûrin eng nge kan tih ang?

⁹ Isua hniaka zuina chuan chatuana nunnaah min hruai. Tlangvâl hausa tak pakhatin Isua hnênah chatuan nunna a neih theih nâna a tih ngaite a zawh khân: “Lo kal la, mi zui ang che,” tiin a chhâng a. (Mt. 19:16-21) Krista a ni tih ring lotu Juda ṭhenkhat hnênah: “Ka berâmten . . . min zui ṭhîn; an hnênah chatuana nunna ka pe,” tiin a sawi a ni. (Joh. 10:24-29) Juda Rorêltuho zînga a zirtîrna ngaihventu Nikodema hnênah pawh ‘amah ringtute’ chuan ‘chatuana nunna an nei’ ang tih a sawi bawk. (Joh. 3:16) Isua kan rinna chu a zirtîrnate leh a thusawite zâwm a, a entawn tûr siamte zuina hmangin kan lantîr a ni. Chutianga kan tih chuan, chatuana nunna kawngah kan kal reng a ni ang.—Mt. 7:14.

10. Isua ‘hre chiang’ lehzual tûr chuan eng nge kan tih ngai? (Johana 17:3)

¹⁰ Isua hniaka kan zui tlat theih hmain, amah kan hriat hmasak a ngai a. (Johana 17:3 chhiar rawh.) Isua ‘hre’ tûr chuan thil tih zawm zêl ngai a awm a. A mizia te, a ngaihtuah dân te, leh a thil ngaihhlutte zir zawm zêlna hmangin amah kan hre chiang lehzual tûr a ni. Eng anga rei pawh thutakah lo awm tawh mah ila, Pathian Jehova leh a Fapa chanchin “hriat” belh zêl kan tum tûr a ni.

11. Chanchin Ṭha Ziak paliah eng thu nge chuang?

¹¹ Pathian Jehova chuan a Fapa kan hriat theih nân a Thu, Bible-ah Chanchin Ṭha Ziak palite chu a telh a. Chutah chuan Isua nun kawng leh a rawngbâwlna chanchinte a  chuang a. Chûng Chanchin Ṭha Ziakte chuan Isua thusawi te, a thiltih te, leh a thil ngaihtuah dânte min hrilh a ni. Chûng lehkhabu palite chuan Isua entawn tûr siamte “ngaihtuah” tûrin min ṭanpui a. (Heb. 12:3) Isua’n chûng lehkhabuahte chuan a hniak a hnutchhiah tia sawi theih a ni. Chuvângin, Chanchin Ṭha Ziakte zirna hmangin Isua kan hre chiang lehzual thei a. Chutiang chuan Isua chu a hniakah kan zui tlat thei a ni.

12. Engtin nge Chanchin Ṭha Ziakte chu kan hlâwkpui tak zet theih?

¹² Chanchin Ṭha Ziakte hlâwkpui tak zet tûr chuan chhiar mai aia tam kan tih a ngai a. Chûng thuziakte chu ngun taka zir nân leh chhût ngun nân hun kan pêk a ngai a ni. (Jos. 1:8) Chanchin Ṭha Ziakte chhût ngun tûr leh kan thu chhiarte nunpui tûra min ṭanpui thei rawtna pahnih i lo sawiho vang u.

13. Engtin nge Chanchin Ṭha Ziaka chuang thute chu i tihnun theih?

¹³ Pakhatna, Chanchin Ṭha Ziaka chuang thute chu tinung rawh. Thilthlengte chu hmu a, thâwmte hria a, a hmuna awm ang maiin inngaihruat rawh. Chutianga i tih theih nân Jehova inawpna pâwl tihchhuah inzirna hmanruate hmangin zir bingna nei la. I thu chhiara thilthlengte i hriat chian theih nân, a chung leh a hnuaia thu awmte chu bih chiang ang che. Thuziaka chuang mite leh thil thlenna hmunte pawh hriat tum la. Chûngte chu Chanchin Ṭha Ziak danga târ lan thute nên khaikhin ang che. A châng chuan Chanchin Ṭha Ziak pakhata chip chiar taka târ lan thute chu bu dangah târ lan a ni lo.

14-15. Engtin nge Chanchin Ṭha Ziaka thute chu kan nunpui theih?

¹⁴ Pahnihna, Chanchin Ṭha Ziakte chu nunpui rawh. (Joh. 13:17) Chanchin Ṭha Ziakte ngun taka i zir hnuah heti hian inzâwt ang che: ‘He thuziakah hian ka nunpui theih tûr a awm em? He thuziak hi tuemaw ṭanpui nân engtin nge ka hman theih ang?’ tiin. I ṭanpui theih tûr âwm chu ngaihtuah la; tichuan,  a remchân veleh, i thu zirte chu ngilnei tak leh remhre takin hrilh ang che.

¹⁵ Hêng rawtna pahnihte kan nunpui theih dân entîrna pakhat i lo ngaihtuahho vang u. Isua’n biak ina a hmuh hmeithai rethei tak chungchâng kan bih chiang ang.

16. Marka 12:41-a chhinchhiah thilthleng chu sawi rawh.

¹⁶ Thuziak chu tinung rawh. (Marka 12:41 chhiar rawh.) Thilthleng chu han mitthla teh. C.E. 33, Nisan 11 a ni a, Isua thih nân chawlhkâr khat pawh a awm tawh lo. Isua chuan nilêng deuh thawin biak inah mite a zirtîr a. Mahse, sakhaw hruatitute chuan an dodâl reng a. A hma pawhin, an zînga ṭhenkhat chuan a thuneihna chungchângah zawhna an lo zâwt tawh a. Mi dang lehte chuan zawhna khirh tak takte zâwtin, a thusawiah man an tum bawk. (Mk. 11:27-33; 12:13-34) Tûnah chuan, Isua chu biakin chhûng hmun dangah a insawn a. Chu chu Hmeichhe Chênna Kawtzâwl niin a lang, chuta ṭang chuan bang hrûla thawhlâwm bâwmte chu a hmu thei a. Ani chu a ṭhu a, mite’n thawhlâwm bâwma tangka an thlâkte chu a en reng a ni. Mi hausate’n tangka tam tak an thlâk chu a hmu a. Thawhlâwm bâwma tangka thlâk ri hriat theih khawpa hnaiah a ṭhu a ni mai thei.

17. Marka 12:42-a târ lan hmeithai rethei chuan eng nge a tih?

¹⁷ Marka 12:42 chhiar rawh. Chutih lai chuan, hmeichhe pakhat chuan Isua mit a la ta hle a. Ani chu “hmeithai rethei tê” a ni. (Lk. 21:2) A nun chu a harsa hlein, a mamawh zualpuite pawh a nei thei lo niin a lang. Chuti chung pawhin, thawhlâwm bâwm pakhat chu a pan a, a ri pawh hriat tham loh tangka dere pahnih tê chu a thlâk a. Isua chuan chutih hun laia tangka zînga hlutna nei tlêm ber, dâr tangka dere pahnih a thlâk tih a hria a. Chu chuan ei tûr atâna an zawrh sava tlâwm ber zînga mi chawngzawng pakhat pawh a lei thei lo a ni.

18. Marka 12:43, 44-a sawi angin, Isua’n hmeithai thawhlâwm chungchângah eng nge a sawi?

¹⁸ Marka 12:43, 44 chhiar rawh. Chu hmeithai thiltih chuan Isua rilru chu a khawih hle a. Chuvângin, a zirtîrte hnênah heti hian a sawi a ni: “Thawhlâwm bâwma thlâktu zawng zawng ai hian he hmeithai rethei tê hian a thlâk tam zâwk,” tiin. Chumi hnuah: “Hêng [mi hausate] zawng zawng hian an neih liama mi an thlâk a ni; ani erawh hi chuan a duh lai tak, a neih chhun tak, a intunnunna tûr zawng zawng chu a thlâk vek a ni,” tiin a hrilhfiah bawk. Chu hmeithai rinawm chuan chumi nîa a neih zawng zawng pein, Pathian Jehova kutah a nun a hlân a ni.—Sâm 26:3.

19. Isua sawi hmeithai rethei chungchâng aṭangin zir tûr pawimawh tak eng nge kan neih?

¹⁹ Thuziak chu nunpui rawh. ‘Isua sawi hmeithai rethei chungchâng aṭangin eng nge ka zir theih?’ tiin inzâwt ang che. Chu hmeithai chungchâng chu han ngaihtuah teh. Ani chuan Jehova hnênah chu aia tam chu pêk a duh ngei ang. Mahse, a tih theih tâwk a ti a; Jehova hnênah a neih ṭhat ber a pe a ni. Isua chuan a thawhlâwm thlâk chu Jehova mit hmuhah a hlu hle tih a hria a ni. Pathian Jehova chu thinlung leh rilru zawng zawnga a rawng kan bâwl a, a hnêna kan neih ṭhat ber kan pêk hian a lâwm a. (Mt. 22:37; Kol. 3:23) Theih tâwp kan chhuah tih a hmuh hian a hlim bawk a ni. Chu thu bul chu rawngbâwlna leh inkhâwmnate pawh tiamin, biakna atâna kan hman hun leh thate nên pawh a inkûngkaih a ni.

20. Engtin nge hmeithai rethei chungchânga i thu zirte chu i nunpui theih? Entîrna pe rawh.

²⁰ Chu hmeithai chungchâng thuziaka zir  tûr chu engtin nge i nunpui theih? An thawhrimnain Pathian Jehova a tilâwm tih hriatnawntîr ngai unaute chu hriat chhuah tum rawh. Entîr nân, a hrisêlna a ṭhat tawh lohnain tûn hma anga rawngbâwlnaa a inhman tamtîr theih loh avânga inthiam lohna nei kum upa unaunu tuemaw hriat i nei em? A nih loh leh, Kingdom Hall-a inkhâwm zawng zawnga a tel kim theih tawh loh avânga lunghnual, natna khirh tak tuar unaupa tuemaw i hre chhuak thei em? Chutiang mite chu min siam ṭha thei ‘thu ṭhate’ sawiin ṭanpui la. (Eph. 4:29) Hmeithai rethei chungchâng aṭanga kan hriat zir tûr ṭha takte chu hrilh ang che. I fuihnate chuan Pathian Jehova chu kan neih ṭhat ber kan pêk hian a lâwm tih anni chu a rin nghehtîr thei a ni. (Thuf. 15:23; 1 Thes. 5:11) Tlêm tê angin lang mah se, Pathian Jehova hnênah an neih ṭhat ber an pêk avânga mi dangte kan fak hian Isua hniak hnung kan zui a ni.

21. Eng nge tih kan tum tlat ang?

²¹ Chanchin Ṭha Ziak hian Isua nun kawng chanchin te, chumi kan entawn theih dân te, leh a hniaka kan zui theih dânte chipchiar taka a târ lan avângin kan va lâwm tak êm! Engvângin nge mi mala Bible zirnaah emaw, chhûngkuaa Pathian Biaknaah emaw Chanchin Ṭha Ziakte chu in zir chian loh vang? Kan thu zirte hlâwkpui tak zet tûr chuan, thuziakte kan tihnun a, kan nunpui a ngai tih i hre reng ang u. Isua thiltihte kan entawn bâkah, a thusawite pawh kan ngaihthlâk a ngai a ni. A dawta thuziakah chuan, a thih hmaa a thusawi hnuhnûng berte aṭanga kan zir theihte sawiho a ni ang.