Engvângin nge Isua’n a thih hma lawk khân Sâm 22:1-a Davida thute chu a sawi chhuah?

A thih hmaa Isua thusawi hnuhnûng berte zîngah chuan Matthaia 27:46-a chhinchhiah: “Ka Pathian, ka Pathian, engah nge mi kalsan?” tih thu hi a tel a. Isua chuan chu chu sawiin, Sâm 22:1-a chhinchhiah fakna hla phuahtu Davida thusawite chu a tithleng famkim a ni. (Mk. 15:34) A lunghnual vâng leh rinna a tlâk chham vânga chûng thute a sawi chhuak nia thu tâwp siam chu a dik lo vang. Ani chuan a thih a ngaih chhan chu chiang takin a hria a, chutianga thih chu a inhuam a ni. (Mt. 16:21; 20:28) Chu bâkah, a thih dâwnah Pathian Jehova chuan kil tinah a “hung vêl” dâwn lo tih pawh a hre bawk. (Job. 1:10) Chuvângin, Isua chuan a thihna chu eng ang khawpa hrehawm pawh ni se, a rinawm reng tih chiang taka a târ lan theih nân, Pathian Jehova chuan a vênghim lo a ni.—Mk. 14:35, 36.

A nih chuan, engvângin nge Isua’n Sâm bu-a he thu hi a sawi chhuah? Chiang fakin sawi thei lo mah ila, thil ni thei ṭhenkhat i lo ngaihtuah ang u. *

Isua chuan chûng thute a sawi chhan chu, Pathian Jehova’n thihna ata a hum lo vang tih a sawi duhna a ni thei. Isua chuan Pathian Jehova ṭanpuina tel lovin tlanna a pêk a ngai a. Ani chu mihring dik tak a ni a, “thihna chu mi tin a temsakna tûrin” a thih a ngai a ni.—Heb. 2:9.

Isua chuan chu fakna hla thu tlêm tê  chu sawi chhuakin, fakna hla pum pui chu min ngaihventîr a tum a ni thei. Chutih hun laia Juda mite chuan fakna hla thu tam tak chu an by-heart ṭhîn a. Fakna hla châng pakhat an hriat chhuah chuan, a châng dang zawng zawngte pawh an hre chhuak nghâl mai ṭhîn a ni. Chu chu Isua thiltum a nih chuan, a hnungzuitu Judate chu a thih laia thilthleng tûrte târ langtu chu fakna hlaa hrilh lâwkna tam tak chu a hriat chhuahtîr ngei ang. (Sâm 22:7, 8, 15, 16, 18, 24) Chu bâkah, fakna hla châng tâwp lamte chuan Pathian Jehova chu lei chung zawng zawnga Lalber a nih thu a sawi bawk a ni.—Sâm 22:27-31.

Isua chuan Davida thute chu a sawi chhuah chhan chu, thiam lohna a neih lohzia a târ lan duh vâng a ni thei. Isua chu a thih hmain dân lo anga a chungthu rêlsak a ni a, Pathian sawichhetu nia puh a ni. (Mt. 26:65, 66) Chu rorêlna chu zan laia neih a ni a, chutianga tih chu dân kalh a ni. (Mt. 26:59; Mk. 14:56-59) Isua chuan chûng Davida thute chu chhân ngai lo zawhna anga sawi chhuakin, mite chu chutianga hremna khawp thil sual eng mah a tih lohzia hriattîr a tum a ni thei.

Isua chuan chu fakna hla phuahtu Davida chu Pathian Jehova duhsakna a hloh avânga hrehawm tuar a ni lo tih mi dangte a hriattîr duh vâng a ni thei. Davida’n chu zawhna chu rinna a tlâkchham avânga zâwt a ni lo. Zawhna a siam hnuah, Pathian Jehova’n amah chhanhim tûra thiltihtheihna a nei tih a rinzia leh a malsâwmna a dawn chhun zawm zêl thute chu a sawi si a. (Sâm 22:23, 24, 27) Chutiang bawkin, “Davida Fapa” Isua pawhin nghaisakna banah hrehawm tuar mah se, chu chu Jehova duhsakna a hloh vâng a ni lo.—Mt. 21:9.

Isua chuan a rinawmna a lantîr pumhlûm theih nâna Pathian Jehova’n a vênhim loh avânga a lungngaihzia a târ lanna a ni thei. Isua hrehawm tuara a thih chu a tîra Pathian Jehova thiltum a ni lo va. Helna hmasa ber a chhuah hnuah chauh chutianga a thih chu a ngai a ni. Isua chuan thil sual eng mah ti lo mah se, Setana tihchhuah thu buai a chhân lêt theih nân leh mihringte hloh tâk thilte a pêk lêt leh theih nân, ani chu tlanna atân hrehawm tuara a thih a ngai a. (Mk. 8:31; 1 Pet. 2:21-24) Chutiang ni thei tûr chuan Pathian Jehova’n a ṭum khatna atâna Isua Krista a vênhimna chu a lâk bo a ngai a ni.

Isua chuan a hnungzuitute chu chutianga thi tûra Pathian Jehova’n a phal chhan ngaihtuah tûrin ṭanpui a tum a ni thei. * Isua chuan nghaisakna bana mi sual anga a thihna chu mi tam tak tân tlûk phahna a ni dâwn tih a hria a. (1 Kor. 1:23) A hnungzuitute chuan a thih chhan dik tak an ngaihtuah chuan a thihnain awmzia a neihte chu an hre thiam ang. (Gal. 3:13, 14) Tichuan, anni chuan mi sual ang ni lovin, chhandamtu angin an thlîr thei ang.

Isua’n Davida thute a sawi chhuah chhan chu eng pawh ni se, a thiltawn chu a tâna Pathian Jehova duh zâwnga tel a ni tih a hria a. Isua’n he fakna hla thute a sawi chhuah hnu lawkah: “A kin ta,” tiin a sawi! (Joh. 19:30; Lk. 22:37) Ni e, Pathian Jehova’n rei lo te chhûng a vênhimna a lâk bonachuan, Isua chu leia tirh a nih chhan zawng zawng hlen tûrin a ṭanpui a. Chu bâkah, chu chuan ‘Mosia Dânah te, Zâwlnei Lehkhabuah te, Fakna Hla Buahte’ a chanchin an ziah zawng zawng chu tifamkim tûrin a ṭanpui bawk a ni.—Lk. 24:44.