1. Pathian Jehova chuan a mite chu engtin nge a thlîr?

PATHIAN JEHOVA chu “a mite chungah a lâwm si ṭhîn a.” (Sâm 149:4) Thu thlamuanawm tak a va ni êm! Ani chuan kan mize ṭhate a hria a; kan theihnate a hmuin, a lamah min hîp a ni. A chunga kan rinawm tlat chuan chatuanin min hnaih reng ang!—Joh. 6:44.

2. Engvângin nge mi ṭhenkhatin Pathianin a hmangaih tih chu rin harsa an tih?

² Mi ṭhenkhat chuan, ‘Pathian chuan a mite chu a pâwl angin a hmangaih tih ka hria; mahse, engtin nge mi mal takin min hmangaih tih ka hriat theih ang?’ tiin an sawi mai thei. Engin nge mi chu chutiang zawhna neihtîr? A naupan laia thiltawn lungchhiatthlâk tak nei Unaunu Oksana-i * chuan: “Baptisma ka chan a, pioneer ka thawh chuan ka hlim hle a. Mahse, kum 15 vêl a liam hnu chuan tûn hmaa ka thiltawn chuan ka rilru a tibuai hle a. Pathian Jehova duhsakna hloh ta leh a hmangaihna dawng tlâk lo ni hian ka inhria,” tiin a sawi. A naupan laia harsatna tam tak neitu Unaunu Yua-i chuan: “Pathian Jehova tihlâwm ka duh avângin a hnênah ka inpumpêk a. Mahse, min hmangaih theih ka ring ngai lo,” tiin a sawi.

3. He thuziakah hian eng nge kan sawiho vang?

³ Kan sawi tâk Kristian mi rinawmte ang bawkin, Pathian Jehova chu hmangaih hle mah la, a hmangaih che tih rinhlelna i nei mai thei. Engvângin nge a ngaihsak tak zet che tih i rin tlat a ngaih? Engin nge a thim zâwnga i thlîrna chu hneh tûra ṭanpui thei che? Chûng zawhna chhânnate chu i lo sawiho vang u.

4. Engvângin nge Pathian min hmangaihna rinhlelh chu a hlauhawm?

⁴ Hmangaihna hi chêttîrtu thiltithei tak a ni a. Pathian Jehova hmangaihna leh ṭanpuina kan rin tlat chuan nunah harsatnate tâwk mah ila, thinlung zawng zawnga a rawngbâwl tûra chêttîrin kan awm ang. Kawng leh lamah chuan, Pathianin min ngaihsak tih kan rinhlelh chuan kan “chakna a bei tham” ang. (Thuf. 24:10) Chu bâkah, kan lunghnual a, Pathian hmangaihnaa rinna kan hloh chuan Setana min beihna chu kan do hneh lo vang.—Eph. 6:16.

5. Pathian min hmangaihna rinhlelhna chuan unau ṭhenkhat chungah eng nghawng nge a neih?

⁵ Kristian rinawm ṭhenkhat chu rinhlelhna an neih avângin thlarau lamah an chau va. Kohhran upa James-a chuan: “Bethel-ah rawngbâwlin, ṭawng dang hmang kohhrana rawngbâwl chu nuam ti hle mah ila, Pathian Jehova hian ka rawngbâwlna a pawm leh pawm loh ka ringhlel a. Ṭum khat phei chu Pathianin ka ṭawngṭainate a ngaihthlâk ka ringhlel hial a ni,” tiin a sawi. Hunbi kima rawngbâwl Unaunu Eva-i’n: “Pathian Jehova’n min hmangaih tih rinhlelhna chuan kawng engkima min tihlunghnual theih avângin, chu chu thil hlauhawm tak a ni. Chu chuan thlarau lam thiltiha kan phûrna a tikiam theiin, Jehova rawngbâwlnaa kan hlimna pawh a la bo thei a ni,” tiin a sawi. Kohhran upa leh regular pioneer ni kawp Unau Michael-a chuan: “Pathianin a ngaihsak che tih i rin loh chuan amah i hlat telh telh ang,” tiin a sawi.

6. Pathian min hmangaihna kan ringhlel ṭan a nih chuan eng nge kan tih ang?

⁶ Chûng thiltawnte chuan a thim zâwnga thlîrnain thlarau lama min tihchhiat theih dân a târ lang a ni. A nih leh, Pathianin min hmangaih tih kan ringhlel ṭan a nih chuan eng nge kan tih ang? Chutiang ngaihtuahna chu kan hnâwl vat tûr a ni! Min tibuaitu kan “ngaihtuahnate” chu ‘thinlung leh ngaihtuahnate min vênsaktu Pathian thlamuanna’ hmanga min thlâksak tûrin Jehova hnênah dîl ang che. (Sâm 139:23; Phil. 4:6, 7) Chu bâkah, chutianga a thîm zâwnga thlîrna nei chu nangmah chauh i ni lo tih hria ang che. Unau rinawm dangte pawhin a thim zâwnga mahni inthlîrna an nei a. Tûn hmaa Pathian chhiahhlawhte pawhin chutiang harsatnate chu an nei a ni. Tirhkoh Paula thiltawn aṭanga kan zir theihte chu i lo ngaihtuah ang u.

7. Paula’n eng harsatna nge a hmachhawn?

⁷ Ṭha taka i hlen chhuah theih loh mawhphurhna tam tak i neih avângin rilru hah châng i nei em? I nei a nih chuan, Paula chu i hre thiam ngei ang. Ani chuan mi pakhat tân chauh ni lovin, “kohhranho zawng zawng” tân lungkhamna a nei a ni. (2 Kor. 11:23-28) Natna benvawn i neih avângin hlimna hloh châng i nei em? Paula chuan hrisêl lohna ni thei ‘tisaa hlîng’ a tawrh reng a ngai a, chu chu paih bo a duh hle a ni. (2 Kor. 12:7-10) Mahni ṭhat famkim lohnate avângin i lunghnual em? Paula pawhin lunghnual châng a nei a. A ṭhat famkim lohna a do reng avângin “mi rethei” niin a insawi a ni.—Rom 7:21-24.

8. Engin nge Paula chu harsatnate hmachhawn chung pawha chhel tûra ṭanpui?

⁸ Paula chuan fiahna chi hrang hrang leh dinhmun harsa tak takte a hmachhawn chung pawhin Pathian Jehova rawng a bâwl zawm zêl a. Chutianga ti thei tûrin engtin nge chakna a neih? A ṭhat famkim lohna chu hre chiang hle mah se, tlanna chu a ring nghet tlat a. Isua thutiam, ‘Amah chu tu pawh a ring apiangin chatuana nunna an nei ang,’ tih chu a hria a ni. (Joh. 3:16; Rom 6:23) Paula chu tlanna ringtute zînga mi a ni tih a chiang hle. Pathian Jehova’n sual lian tak titute pawh an inchhîr phawt chuan a ngaidam duh reng tih a hria a ni.—Sâm 86:5.

9. Galatia 2:20-a chhinchhiah Paula thusawite aṭangin eng nge kan hriat?

⁹ Paula chuan Krista hmanga lantîr Pathian hmangaihnain thil a tihtheihzia chu a ring bawk. (Galatia 2:20 chhiar rawh.) Chu Bible châng tâwp lama mi tichak thei tak thute chu lo chhinchhiah ang che. Ani chuan: “Pathian Fapa, mi hmangaiha ka aia inpetu rinnaah chuan,” tiin a sawi a. ‘Pathianin ka unaute a hmangaih chhan chu ka hre thiam a; mahse, kei chu min hmangaih thei lo vang,’ tia sawiin, Pathian hmangaihna chu chin tâwk nei angin a sawi lo. Rom khuaa mite chu: “Mi sualte kan la nih laia Krista chu kan aia a thih avâng khân,” tiin a hriat nawntîr a ni. (Rom 5:8) Pathian min hmangaihna chuan chin tâwk a nei si lo va!

10. Rom 8:38, 39 aṭangin eng nge kan zir?

¹⁰ Rom 8:38, 39 chhiar rawh. Paula chuan Pathian hmangaihnain thil a tithei tih a ring tlat a. Eng mahin “Pathian hmangaihna ata chu mi ṭhen thei lo vang,” tiin a ziak a ni. Pathian Jehova’n Israel mite dawhthei taka a cheibâwl dân pawh a hria a. Ama chunga zahngaihna a lantîr dân pawh a hre bawk. Paula  ngaihtuah dân chu heti hian kan khaikhâwm thei ang, ‘Pathian Jehova’n ka tâna thi tûra ama Fapa ngei a rawn tirh si chuan, min hmangaihna rinhlelh chhan tûr a awm thei dâwn em ni?’ tiin.—Rom 8:32.

11. Paula chuan 1 Timothea 1:12-15-a târ lan thil sualte chu ti mah se, engvângin nge Pathianin a hmangaih tih a hriat chian?

¹¹ Timothea thawn khat 1:12-15 chhiar rawh. Paula chuan tûn hmaa a thiltihte avânga hrehawm tih châng a nei ngei ang. ‘Mi sual ber’ nia a insawi pawh hi a mak lo ve! Thutak a hriat hma chuan, khaw tinah kalin Kristiante a tiduhdah ṭhîn a, ṭhenkhat chu tân inah khungin, a dangte tihhlumna tûr pawh a pawmpui a ni. (Tirh. 26:10, 11) Paula tân Kristian ṭhalai tuemaw a hmuh a, a nu leh pa chu amah avânga tihhlum an ni tih a hriat huna a awm dân tûr chu i ngaihruat thei em? Tûn hmaa a thil sual tihte avângin inchhîr hle mah se, chûng chu a thlâk danglam thei tawh lo tih Paula chuan a hria a. Krista chu a tân a thi tih pawmin: “Pathian khawngaihna avângin ka nih nih ka ni ta,” tiin inrin tâwkna neiin a ziak a ni. (1 Kor. 15:3, 10) Kan zir tûr chu eng nge ni? Krista chu i tân a thi tih pawm ang che, chu chuan Pathian Jehova nêna mi mal inlaichînna duhawm tak a neihtîr thei che a ni. (Tirh. 3:19) Pathian Jehova ngaih pawimawh ber chu thil sual kan tih laiin a Thuhretute kan ni emaw, ni lo emaw pawh ni se, hun kal tawha kan thil sual tihte ni lovin, tûna kan thiltih mêkte leh nakina kan la tih tûrte hi a ni.—Is. 1:18.

12. Hlutna nei lo leh hmangaih tlâk loh nia kan inngaih chuan, engtin nge 1 Johana 3:19, 20-naa thute chuan min ṭanpui theih?

¹² I sualte khuh bo a nih theih nân Isua a thi tih i ngaihtuah hian, ‘chu thilpêk hlu tak chu dawng tlâk ka ni lo’ i ti mai thei. Engvângin nge chutianga i ngaih mai theih? Kan thinlung  ṭha famkim lo hian hlutna nei lo leh hmangaih tlâk lo nia inngaihna min neihtîr thei a. (1 Johana 3:19, 20 chhiar rawh.) Chutiang hunah chuan, “Pathian chu kan rilru aiin a ropui zâwk,” tih kan hriat reng a ngai a ni. Kan Pa vâna mi min hmangaihna leh ngaihdamna chu kan thinlunga a rûka awm a thim zâwnga mahni inthlîrna aiin a ropui zâwk a. Pathian Jehova’n min hmangaih tih kan rin tlat a ngai a ni. Chutiang rinna nei tûr chuan a Thu, Bible zir ziah a, ṭawngṭai fovin, a mi rinawmte chu kan kâwm ṭhîn tûr a ni. Engvângin nge chutianga tih chu thil pawimawh tak a nih?

13. Engtin nge Bible zirna chuan min ṭanpui theih? (“ Bible-in Anmahni A Ṭanpui Dân,” tih bâwm chu en bawk rawh.)

¹³ Bible chu nî tin zir rawh; tichuan, Pathian Jehova mize duhawm tak takte chu i hre chiang lehzual ang a. A hmangaihzia che pawh i hre thiam lehzual ang. Nî tina a Thu chhût ngunna chuan, ngaihtuahna ṭha lo leh châkna ṭha lote a siam ṭhat theih avângin i ngaihtuahna chu a fîm lehzual ang. (2 Tim. 3:16) Hlutna rêng nei lo nia inhria kohhran upa Kevin-a chuan: “Sâm 103-naa thute chhiarna leh chhût ngunna chuan ka ngaihtuahna siam ṭha tûr leh Jehova min thlîr dân hre thiam tûrin min ṭanpui a ni,” tiin a sawi. Kan sawi tâk Unaunu Eva-i chuan: “Pathian Jehova ngaihtuahnate chhûtin ka ni hman ka titâwp ṭhîn a. Chu chuan rilrua thlamuanna min neihtîrin, ka rinna a tichak a ni,” tiin a sawi.

14. Engtin nge ṭawngṭainain min ṭanpui theih?

¹⁴ Ṭawngṭai fo rawh. (1 Thes. 5:17) Inṭhianna nghet tak chu thinlung taka inbiak pawh fonaah a innghat a. Pathian Jehova nêna kan inṭhianna pawh chutiang bawk chu a ni. Kan rilru vei zâwng te, kan ngaihtuahna te, leh kan lungkhamnate chu ṭawngṭaia kan hrilh hian, ani chu kan rinchhan tak zetin, min hmangaih tih kan hriatzia kan târ lang a ni. (Sâm 94:17-19; 1 Joh. 5:14, 15) Kan sawi tâk Unaunu Yua-i chuan: “Ka ṭawngṭai hian, nî tina ka thiltihte hrilh mai aia tam tih ka tum a. Ka thinlung chhûnga awmte chu a hnênah phawrhin ka hrilh a ni. Chutianga ka tihna aṭangin Pathian Jehova chu thuneitu ang ni lovin, fate hmangaih tak zettu Pa angin ka hmu a ni,” tiin a sawi.—“ I Lo Chhiar Tawh Em?” tih bâwm chu en rawh.

15. Engtin nge Pathian Jehova’n kan chungah mi mal ngaihsakna a lantîr?

¹⁵ Ṭhian rinawmte kâwm rawh; anni chu Pathian hnên aṭanga kan dawn thilpêk an ni a. (Jak. 1:17) Kan Pa vâna mi chuan ‘englai pawha’ hmangaihna lantîrtu thlarau lam unaute min pein, kan chungah mi mal ngaihsakna a lantîr a. (Thuf. 17:17) Paula chuan Kolossa khuaa mite hnêna a lehkhathawnah  amah ṭanpuitu Kristian ṭhenkhat chu “mi thlamuantute,” tiin a ko a ni. (Kol. 4:10, 11) Isua Krista pawh a ṭhian vântirhkohte leh mihringte hnên aṭanga a mamawh ṭanpuina a dawn avângin a lâwm a ni.—Lk. 22:28, 43.

16. Engtin nge ṭhian rinawmte chuan Jehova hnaih tlat tûra min ṭanpui theih?

¹⁶ Pathian Jehova thilpêk ṭhian rinawmte chu i hlâwkpui tak zet em? Ṭhian puitling tak hnêna kan lungkhamnate hrilh chu chak lohna a ni lo va; min vênghimtu a ni zâwk. Kan târ lan tâk Unau James-a sawi hi han ngaihtuah teh, ani chuan: “Kristian mi puitling takte nêna inṭhianna chuan nasa takin min ṭanpui a. A thim zâwnga thlîrna ka neih hian chûng ka ṭhian hlu takte chuan ka thusawite chu dawhthei taka mi ngaihthlâksakin, min hmangaihzia min hriat nawntîr ṭhîn a. An hnên aṭangin Pathian Jehova min hmangaihzia leh ngaihsakzia ka hre thei a ni,” tiin a sawi. Thlarau lama kan unaute ṭhiana siam leh kan inṭhian ṭhatna vawn reng chu a va pawimawh tak êm!

17-18. Tu thusawi nge kan ngaihthlâk ang a, engvângin nge?

¹⁷ Setana chuan thil ṭha ti tûra kan beihnaah beidawng tûrin min duh a. Pathian Jehova’n min hmangaih lo va, a humhimna pawh kan phû lo tih kan rin a duh a. Mahse, kan hriat tawh angin, chu chu dâwt hulhual a ni.

¹⁸ Jehova chuan a hmangaih chein, a tân i hlu hle a. A thu i âwih chuan Isua angin kumkhuaa ‘a hmangaihin i awm reng ang.’ (Joh. 15:10) Chuvangin, Setana thusawi emaw, rilrua inthiam lohna i neih emaw chu ngaithla suh. Chu aiin, mi tinte ṭhatna lai hmutu Pathian Jehova thusawi chu ngaithla zâwk rawh. Ani chu nang pawh tiamin, “a mite chungah a lâwm si ṭhîn,” tih ring tlat ang che!