Lungchhiatthlâk takin, ka tleirâwl chhoh chuan Pathian Jehova nêna kan inlaichînna duhawm tak chu a chhe ṭan a. Ka school kalpuite chu an zalên hle niin an lang a, chutiang zalênna chu neih ve ka duh a ni. Ka nu leh pate dân siam leh Kristian tehnate chu khirh ka ti ṭanin, thlarau lam thiltihte chu harsa ka ti ṭan a. Pathian Jehova a awm tih hre chiang mah ila, thlarau lamah erawh ka chau hle.

Rawngbâwlnaa tel chu bânsan tawp lo mah ila, ka tel khât ta hle a. Thu hrilhnaa ka tel hunah pawh ka inbuatsaih lâwk ngai loh avângin thusawi ṭan dân tûr leh sawi zawm dân tûr pawh ka hre lo. Chuvângin, rawngbâwlnaah tlawhkîr leh Bible zirpui ka nei lo va, chu chuan rawngbâwlnaa tel min tichâk lo lehzual a ni. ‘Engtin nge mi dangte hi chawlhkâr tin leh thla tina rawngbâwlnaa an tel reng theih le?’ tiin ka inzâwt ta hial a.

Kum 17 mi ka nih chuan, mahnia awm hran chu ka châk ta hle a. Chuvângin, bag-ah ka thawmhnawte khungin, in ka chhuahsan a, Australia ramah ka kal ta a ni. In ka chhuahsan chuan ka nu leh pate chu an lungngai lutuk a. Min ngaihtuah  viau mah se, rawngbâwlnaa ka tel zawm zêl chu an ring tho a ni.

Australia ram ka thlen chuan thlarau lamah ka chak lo lehzual a. Inkhâwmte chu ka pelh ṭan a. Keimah ang bawka zân khat inkhâwm a, zan danga zu in tûr leh nightclub-a lâm tûra kal nuam titu ka rualpuite chu ṭhianah ka siam a. Ka’n thlîr lêt hian, nun kawng chi hnihin ka nung tih leh a khawi zâwkah mah ka tlatlum tak tak lo tih ka inhria a ni.

Kum hnih vêl a liam hnu chuan ka nun kawng zawhte inenfiah tûra a hriat miah lohva min ṭanpuitu unaunu pakhat nên kan inkâwm a. Unaunu panga in khatah kan chênho lai a ni a, bial kantu leh a nupui Tamara-i chu chawlhkâr khat chhûng kan ina thleng tûrin kan sâwm a. Kohhran thil buaipuia a pasal a chhuah hlânin, Unaunu Tamara-i chu kan bulah a awm a, fiamthute sawiin kan nuiho ṭhîn a. Chutianga inkawmho chu nuam ka ti hle. Ani chu hriatthiamna nei tak leh kawm nuam tak a ni a. Thlarau lama inhmang takte pawh chuti taka an hlim thei tih kan hmuh chuan mak ka hle a ni.

Unaunu Tamara-i chu mi thatho tak a ni a. Thutak leh rawngbâwlna a ngainatna chuan min hneh hle a. Thinlung zawng zawnga Pathian rawng a bâwl avânga a hlim êm êm laiin, kei erawh chuan rawngbâwlnaa ka tel khât êm avângin hrehawm ka ti hle. A rilru put hmang ṭha tak leh mi hlim thei tak a nihnate chuan ka nunah nasa takin nghawng a nei a. A entawn tûr siam chuan he thu dik pawimawh tak hi min ngaihtuahtîr a ni: Jehova chuan kan zavai hian ‘lâwm chung’ leh ‘hlasa chunga’ a rawng bâwl tûrin min duh, tih hi.—Sâm 100:2.

Unaunu Tamara-i hlimna neih ang chu neih ve ka duh a; mahse, chutiang hlimna nei tûr chuan inthlâkthlengna lian tak ka siam a ngai a ni. Hun duh deuh mah se, zawi zawiin hma ka la ṭan a. Rawngbâwlna atân ka inbuatsaih ṭan a, a khât tâwkin auxiliary pioneer ka thawk bawk a. Chu chuan ka zahzumnate hneh tûr leh inrintâwkna nei lehzual tûrin min ṭanpui a. Rawngbâwlnaa Bible ka hman tam poh leh rawngbâwlnaa tel chu  nuam ka ti lehzual a. A hnuah chuan thla tin auxiliary pioneer ka thawk ta a ni.

Thutak atâna ding nghet tlat a, Pathian Jehova rawngbâwl ngainatu a pui a pangte chu ṭhianah ka siam ṭan a. An entawn tûr ṭha takte chuan ka thil ngaih pawimawhte chhût chiang tûr leh thlarau lam hun duan ṭha nei tûrin min ṭanpui a ni. Rawngbâwlnaa tel chu nuam ka ti lehzual ṭan a, a tâwpah, regular pioneer ka thawk ta a. Kum tam tak hnua a vawi khatna atân kohhran chhûnga awm chu nuam ka tiin, ka hlim hle a ni.

Regular pioneer ka thawh aṭanga kum khat hnuah, Jehova leh rawngbâwlna ngaina êm êmtu ngilneihna leh hmangaihna ngah tak Unau Alex-a nên kan intawng a. Ani chu kohhranho rawngbâwltu niin, kum ruk lai pioneer a lo thawk tawh a. Chu bâkah, mamawh zualna hmun Malawi ramah hun engemawti chhûng rawng a lo bâwl tawh bawk. Chutah chuan, missionary-te nên rawng an bâwlho va, anni chuan a tâna entawn tûr ṭha hnutchhiahin a nuna Lalram dah hmasa zêl tûrin an fuih a ni.

Kum 2003-ah Alex-a nên kan innei a, chuta ṭang chuan vawiin thlengin hunbi kima rawngbâwlnaah kan inhmang a. Zir tûr pawimawh tak takte kan zir a, Pathian Jehova’n kawng tam takin mal min sâwm a ni.

Kum 2009-ah Indonesian thliarkâr hlâwmte zînga ram te tak tê, Timor-Leste-ah missionary nia rawngbâwl tûra sâwm kan ni a. Mak kan tiin kan phûr hle a, chutih rual chuan kan huphurh ru hle bawk. Tichuan, thla nga hnuah an khawpui Dili chu kan va thleng ta a ni.

Chuta kan insawnna chuan kan nunphungah nasa taka inthlâkthlengna a keng tel a. Hnam dân thar te, ṭawng te, ei leh in te, leh an nî tin nunphungte mila kan insiamrem a ngai a. Rawngbâwlnaah chuan lehkha thiam lote leh hnehchhiah tâwk te kan tâwk fo va. Chu bâkah, indona  leh tharum thawhna avânga tisa lam leh rilru lama harsatna nei mi tam tak pawh kan tawng bawk a ni. *

Rawngbâwlna chuan hma a sâwn hle! Entîr nân, thiltawn lungchhiatthlâk tak nei kum 13 mi Maria-i nên kan inhmu a. * Kan inhmuh hma lawkin a nuin a boralsan a, a pa bula a awm loh avângin a pa pawh a hmu khât hle a. A rualpui tam takte ang bawkin Maria-i chuan a nunah thiltum chiang tak a nei lo. Ṭap chunga a rilru vei zâwngte min hrilh ṭum chu ka la hre reng. Mahse, an ṭawng ka la thiam nâl loh avângin a sawite chu ka hre thiam vek lo va. Amah fuih a, ka ṭanpui theih nân Pathian Jehova hnênah ka ṭawngṭai a; tichuan, mi tichak thei tak Bible chângte chu ka chhiarpui ta a ni. A hnu kum rei lo têah, thutakin Maria-i rilru put hmang, a lan dân, leh a nun a thlâk danglam dân chu ka hmu a. Tûnah chuan, baptisma changin, Bible zirpuite a nei tawh a. Chu bâkah, thlarau lam chhûngkaw hung tak neiin, hmangaihna a dawng tawh bawk a ni.

Jehova chuan Timor-Leste-a rawngbâwlna chu mal a sâwm a. Thuchhuahtu a tam zâwk chu kum sâwm kal ta chhûnga baptisma chang chauh ni hlawm mah se, mi tam tak chuan pioneer te, kohhranho rawngbâwltu te, leh kohhran upate niin rawng an bâwl a ni. Mi dangte chuan RTO-ah leh tualchhûng ṭawnga thlarau lam chaw buatsaihnaah an ṭanpui a. Inkhâwma an zai lai te, an hlim hmêl te, leh thlarau lama an ṭhang chhote ka hmuhna hian min tihlim tak zet a ni.

Kan chavo dawnna Timor-Leste-a nunphung leh Australia rama nunphung chu a inang lo hle a; mahse, hei aia nun hlimawm zâwk a awm thei lo vang. Rawngbâwl tûra kan chhuah hian, a châng chuan bazâr aṭanga an lâk sangha rote leh thlai phur motor tê pakhatah kan inhnawh ṭhîn a. Ni dangah chuan, lei chhuat nei in tê, a chhûnga âr tlat ṭhinna in lum takahte chuan Bible zirna kan kaihruai ṭhîn. Harsatnate a awm chung pawhin, ‘Ka nun hi a ropui lutuk!’ tiin ka ngaihtuah fo ṭhîn.

Ka’n thlîr lêt hian, ka nu leh pate’n theih tâwp chhuaha Pathian Jehova kawng min zirtîr avâng leh ka tleirâwl chhoh thunun ka harsat lai pawha min ṭanpuinate avângin an chungah ka lâwm hle a. Thufingte 22:6-na hi ka nunah a thleng dik tak zet a ni. Ka nu leh pate chuan ka pasal Alex-a nên chuan min chhuangin, Jehova’n min hmang tih an hmuh hian an hlim hle a. Kum 2016 aṭangin Australasia branch kaihhruaina hnuaia rawngbâwlna bialahte chuan bial kantu niin rawng kan bâwl a ni.

Tûn hmaa rawngbâwlnaa tel nuam ka lo tih lo kha a mak ka ti. Tûnah chuan rawngbâwlna chu kan ngaina tawh hle! Nunah eng thil pawh thleng se, hlimna dik tak chu thinlung zawng zawnga Pathian rawngbâwlna aṭang chauhva neih theih a ni tih ka hre ta. Ni e, Alex-a nên hian kum 18 chhûng Jehova rawng kan bâwl dun tawh a, chu chu ka nuna ka hlim lai ber a ni. Tûnah chuan fakna hla phuahtu Davida’n Pathian Jehova hnêna: “Nangmah bêltute erawh chu an hlim ang a, lâwmin an au kumkhua dâwn si, . . . i hming ngainatute chuan an chhuang ang che,” tia a sawi hi a dikzia ka hre ta.—Sâm 5:11, C.L. Re-edited.