1. Eng ang thlarau lam thiltumte nge kan insiam theih?

 KRISTIAN dikte kan nih angin, Jehova chu kan hmangaih tak zet a. A ṭha thei ang bera a rawngbâwl chu kan duh a ni. Mahse, kan theih ang tâwka rawngbâwl tûr chuan Kristian mizia neih te, thiamna ṭangkai tak zir te, leh mi dangte rawngbâwlsak theih dân kawng zawnte ang chi thlarau lam thiltumte kan insiam a ngai a ni. b

2. Engvângin nge thlarau lam thiltumte kan insiam ang a, chûngte chu hlen tûra kan thawhrim ang?

² Engvângin nge thlarau lama hmasâwn chu kan ngaihven ang? A bul berah chuan, kan hmangaih tak kan Pa vâna mi tihlâwm kan duh vâng a ni. Jehova chu a rawngbâwlnaa kan thiamna leh theihna zawng zawng kan hmang tih a hmuh hian a hlim a. Chu bâkah, kan unaute chu tam lehzuala kan ṭanpui theih nâna thlarau lama hmasâwn chu kan duh a ni. (1 Thes. 4:9, 10) Thutaka kan awmna chu engtiang khawpa rei pawh ni tawh mah se, kan za hian thlarau lamah hma kan sâwn thei a ni. Chutianga kan tih theih dân chu i lo en ang u.

3. Timothea thawn khat 4:12-16-a chhinchhiah angin, tirhkoh Paula’n Timothea chu eng ti tûrin nge a fuih?

³ Tirhkoh Paula’n Timothea hnêna a lehkhathawn pakhatna a ziah khân, chu ṭhalai fel tak chu tawn hriat ngah tak kohhran upa a ni reng tawh a. Mahse, Paula chuan thlarau lama hmasâwn chho zêl tûrin a fuih a ni. (1 Timothea 4:12-16 chhiar  rawh.) Paula fuihnate i chhiar chuan, Timothea chu kawng hniha hmasâwn tûrin a duh tih i hmu ang: hmangaihna, rinna, leh thianghlimna ang chi Kristian miziate neih chhoh leh vântlâng hmaa lehkha chhiar te, thu hrilh te, leh zirtîrna kawnga thiamna tihhmasâwnte chu. Timothea entawn tûr siam chu hre rengin, thiltum inâwm tâwk insiamnain thlarau lama hmasâwn tûra min ṭanpui theih dânte chu i lo bih chiang ang u. Kan rawngbâwlna zauh theih dân kawng ṭhenkhat pawh kan sawiho bawk ang.

4. Philippi 2:19-22-a sawi angin, engin nge Timothea chu Jehova chhiahhlawh ṭangkai tak nihtîr?

⁴ Engin nge Timothea chu Jehova chhiahhlawh ṭangkai tak nihtîr? A Kristian mize chhinchhiah tlâk takte hi a ni. (Philippi 2:19-22 chhiar rawh.) Paula’n Timothea chungchâng a sawina aṭangin ani chu mi inngaitlâwm, mi rinawm, mi taima, leh rinchhan tlâk a ni tih kan hre thei a. Hmangaihna nei tak a nih bâkah, a unaute chu a ngaihsak tak zet a ni. Chuvângin, Paula chuan Timothea chu a hmangaihin, mawhphurhna lian takte pawh pêk a hreh lo. (1 Kor. 4:17) Chutiang bawkin, keini pawh Jehova ngainat zâwng miziate kan neih chhoh zêl chuan min hmangaih ang a, kohhran tân kan ṭangkai lehzual ang.—Sâm 25:9; 138:6.

5. (a) Engtin nge Kristian miziate zînga hmasâwn i ngaihna laite chu i hriat theih? (b) Milema târ lan angin, engtin nge ṭhalai unaunu chuan mi dangte chunga khawngaihna lantîr lehzual tûra hma a lâk?

⁵ Thiltum bîk insiam rawh. I miziaa hmasâwn i ngaihna laite chu ṭawngṭaiin ngaihtuah la. Chûng zînga pakhat chu thlang chhuak ang che. Entîr nân, khawngaihna nei lehzual tûr leh Kristian unaute ṭanpui duhna nei lehzual tûrin hma i la thei ang em? Tûn aia zaidam zâwk leh ngaihdam peih zâwk nih i tum thei ang em? I ṭhian rin tak pakhat hnênah i hmasâwn theih dân kawngte zawh chu a ṭangkai hle tih i hmu ang.—Thuf. 27:6.

6. Engtin nge neih atâna i duh mizia chu i neih chhoh theih?

⁶ I thiltum hlen tûrin thawkrim rawh. Engtin nge i tih theih? Kawng khat chu hmasâwn i duhna lai mizia ngun taka zir hi a ni. Nasa lehzuala mi dangte ngaihdam i duh angah han inchan teh. Thinlung taka mi dangte ngaidamtu leh ngaidam lotute chungchâng Bible-a entîrnate chhiar a, chhût ngunin hma i la ṭan thei a ni. Isua entawn tûr siam hi  han ngaihtuah teh. Ani chuan mi dangte chu thinlung takin a ngaidam a. (Lk. 7:47, 48) An thil lo tihsual tawhte ni lovin, hma an sâwn theih dân tûrte chu a ngaihven tlat a ni. Chumi nêna inkalh takin, Isua hun laia Pharisaite chuan ‘mi dang zawng zawng chu an hmusit ṭhîn a ni.’ (Lk. 18:9) Chûng entîrnate i ngaihtuah hnuah, heti hian inzâwt ang che: ‘Engtin nge mi dangte chu ka thlîr? An mize neih eng hi nge ka hmuhsak?’ tiin. Tu emaw ngaihdam harsa i tih chuan, a mize ṭha neih zawng zawng chu ziah chhuah vek tum la. Chumi hnuah, heti hian inzâwt ang che: ‘Engtin nge Isua’n ani hi a thlîr? A ngaidam ang em?’ tiin. Chutianga zirna neihna chuan kan ngaihtuah dân siam ṭha tûrin min ṭanpui thei a ni. A tîr chuan, min tilungni lotu ngaidam tûrin theih tâwp kan chhuah a ngai pawh a ni thei. Mahse, chutianga theih tâwp kan chhuah zawm zêl a nih chuan, mi dangte ngaihdam chu kan tân a awlsam lehzual ang.

7. Thufingte 22:29-na nêna inmilin, eng kawngtein nge Jehova’n tûn laiah themthiamna nei hnathawktute chu a hman?

⁷ Thiltum i insiam theih dang leh chu themthiamna ṭangkai tak zir hi a ni a. Bethel in te, Assembly Hall te, leh Kingdom Hall-te satu tûr mi tam tak mamawh a ni hi han ngaihtuah teh. Chûng hnathawktute zînga tam tak chuan in saknaa thiltawn nei unaute nêna thawkhovin themthiamnate an nei chho va. Milema târ lan angin, unaupate leh unaunute chuan Assembly Hall-te leh Kingdom Hall-te thuam ṭhat nâna mamawh themthiamnate chu an zir a ni. Chûngte leh kawng dangte hmangin, “Lalber, chatuana awm” Pathian Jehova leh “lalte Lal” Krista Isua chuan thiamna nei hnathawktute kal tlangin thil mak takte an hlen mêk a. (1 Tim. 1:17; 6:15; Thufingte 22:29 chhiar rawh.) Mahni inchawimawi nân ni lo va, Jehova chawimawi nâna taima taka hna thawh leh kan thiamnate hman chu kan duh a ni.—Joh. 8:54.

8. Eng ang thiamna nge zir tûra thiltum i insiam theih?

⁸ Thiltum bîk insiam rawh. Eng thiamna nge i zir theih? I zir theih tûr nia i ngaih thiamna chungchânga an ngaih dânte hre tûrin in kohhrana upate, a nih loh leh bial kantu chu zâwt rawh. Entîr nân, thusawi leh zirtîr thiamna kawnga hmasâwn i ngaih thu an hrilh che chuan, thusawi kawnga hmasâwn lehzual i ngaihna lai hre tûrin an ṭanpuina dîl la. Chumi hnuah, hmasâwn chho tûrin ṭan la ang che. Engtin nge chu chu i hlen theih?

9. Engtin nge thiamna zir chungchânga i thiltum chu i hlen theih?

⁹ I thiltum hlen tûrin thawkrim rawh. Zirtîrna kawnga i thiamna tihhmasâwn i duh angah han inchan teh. Chhiar leh Zirtîrna Kawngah Inhmang Rawh tih brochure chu ngun takin i zir thei a. Chawlhkâr chhûng inkhâwma chanvo i neih hunah, a taka i tih hmain i thusawi lo ngaithlaa hmasâwn i ngaihna laite hrilh tûr chein unaupa tling tak hnênah ṭanpuina i dîl thei a ni. I chanvo neihte chu ṭha takin inbuatsaih rawh; chutianga i tih chuan, unaute’n i thawhrimna an hmuin an rinchhan ang che.—Thuf. 21:5; 2 Kor. 8:22, 23.

10. Thiamna tihhmasâwn theih dân entîrna pe rawh.

¹⁰ A nih leh, i thiltum chu i tâna hlen harsa tak thiamna eng emaw ni ta se, eng nge i tih theih? Beidawng mai suh! Unau Garry-a chuan lehkha chhiar a harsat hle a. Kohhran inkhâwma chhiartu chanvo a thawh laia a zâmzia chu a la hre reng a ni. Mahse, hmasâwn tûrin theih tâwp a chhuah zawm zêl a. Zirtîrna a dawnte avângin, tûnah chuan Kingdom Hall-ah te, bial inkhâwmpuiah te, leh regionnal inkhâwmpuiahte thu a sawi thei tawh a ni.

11. Timothea angin, mawhphurhna tam lehzual chelh thei tûrin engin nge min ṭanpui ang?

 ¹¹ Timothea chu thusawi thiam tak leh zirtîrtu thiam tak a rawn ni em? Bible chuan eng mah a sawi lang lo. Mahse, Paula thurâwnte a zawm avângin a chanvote a hlennaah hma a sâwn chho zêl ang tih erawh rinhlelh rual a ni lo. (2 Tim. 3:10) Chutiang bawkin, kan thiamnate kan tihhmasâwn chhoh zêl chuan, mawhphurhna tam lehzual kan chelh thei ang.

12. Engtin nge min dangte rawngbâwlna chu i hlâwkpui tawh?

¹² Kan za hian mi dangte rawngbâwlna chu kan hlâwkpui ṭheuh va. Damdawi ina kan awm laia Hospital Liaison Committee, a nih loh leh Patient Visitation Groups-a rawngbâwl upate’n min rawn tlawh hian kan lâwm hle a. Dinhmun harsa tak kan hmachhawn laia ngaihsakna nei tak kohhran upain hun pea kan thusawite min ngaihthlâksak a, min thlamuan hian kan lâwm thei hle a ni. Bible zirpuinaa ṭanpuina kan mamawh huna thiltawn ngah tak pioneer unau pakhat a lo tel a, thurâwnte min pêk hian kan lâwm hle bawk. Chûng kan unaute chuan min ṭanpui chu nuam an ti a. Kan unaute rawngbâwlsak tûra kan inpêk chuan chutiang hlimna chu kan nei ve thei a ni. Isua chuan, “Englo lâk aiin pêkin lukhâwng a nei zâwk,” tiin a sawi. (Tirh. 20:35) Chûngte leh kawng dangtea i rawngbâwlna zauh i duh a nih chuan, i thiltumte hlen tûrin engin nge ṭanpui ang che?

13. Mi mala thiltum kan insiam hunah eng nge kan hriat reng ang?

¹³ Tum bîk nei lova thiltum insiamna lakah fîmkhur rawh. Entîr nân, ‘Kohhranah hei aia tama rawngbâwl ka duh,’ tiin i ngaihtuah mai thei. Mahse, chutiang thiltum hlen dân hriat chu a awlsam lo thei a; chu bâkah, i hlen theih hun tûr pawh i hre thei hek lo. Chuvângin, thiltum eng emaw bîk tak insiam la. Chu i thiltum leh i hlen theih dânte chu ziakin chhinchhiah ang che.

14. Engvângin nge thiltumte kan insiam hunah kan inbûk tâwk a ngaih?

¹⁴ Thiltumte kan insiam hian inbûk tâwk tak kan nih a ngai bawk. Engvângin nge? Kan dinhmunte kan thunun thei vek loh vâng a ni. Entîr nân: Tirhkoh Paula chuan Thessalonika khuaah kohhran thar din tûrin a ṭanpui a. Chumi khuaa châma Kristian rawn ni tharte  ṭanpui chu a tum ngei ang. Mahse, dodâltute chuan Paula chu an khua chhuahsan tûrin an ti a. (Tirh. 17:1-5, 10) Chu khuaa a awm zawm zêl a nih chuan, a unaute chu dinhmun hlauhawmah a dah ngei ang. Mahse, ani chu a beidawng mai lo. Dinhmun inthlâk danglamna milin a insiamrem zâwk a ni. A hnuah, Timothea chu Thessalonika khuaa ringtu tharte thlarau lam mamawh ngaihsak tûrin an hnênah a tîr a. (1 Thes. 3:1-3) Timothea chu mamawhna hmun apianga rawngbâwl tûra a inpeih reng avângin Thessalonika khuaa mite chu an lâwm hle ngei ang!

15. Engtin nge thunun theih loh dinhmunte’n kan thiltumte a nghawng mai theih? Entîrna pe rawh.

¹⁵ Thessalonika khuaa Paula thiltawn aṭangin zir theih kan nei a. Thiltum eng emaw kan insiam a; mahse, kan dinhmun inthlâk danglamna avângin chu kan thiltum chu hlen thei lovin kan awm pawh a ni thei. (Thur. 9:11) Chutiang dinhmuna i awm a nih chuan, inhuam takin i hlen theih tûr thiltum dang insiam ang che. Nupa tuak Ted-a leh Hiedi-i te’n chutiang chuan an ti a ni. An hrisêl lohna avângin Bethel an chhuahsan a ngai a. Mahse, Jehova an hmangaihna chuan an rawngbâwlna zauh theih dân kawng dangte zawng tûrin a chêttîr a ni. A hmasain, regular pioneer an thawk a. A hnuah, special pioneer nia rawngbâwl tûra ruat an nih bâkah, Unau Ted-a chuan bial kantu aiawh ni tûrin zirtîrna a dawng bawk. Mahse, bial kantu hna thawk tûra kum phût zât chu a inthlâk danglam a. Unau Ted-a leh Hiedi-i chuan chu rawngbâwlna chanvo hlu chu an chelh thei dâwn tawh lo tih an hria a. Lunghnual mah se, kawng dang pawhin Jehova rawng an bâwl thei tih an hria a ni. Unau Ted-a chuan, “Rawngbâwlna kawng khat chauh ngaihven loh chu kan zir a ni,” tiin a sawi.

16. Galatia 6:4-na aṭangin eng nge kan zir theih?

¹⁶ Kan nuna thilthleng zawng zawngte chu kan thunun vek thei lo va. Chuvângin, kan hlutna chu rawngbâwlna chanvo hlu kan dawnte hmanga teh loh leh kan chanvo chelhte chu mi dangte chanvo neihte nêna khaikhin loh chu thil pawimawh tak a ni. Unaunu Hiedi-i chuan, “I nuna thilthlengte leh mi dangte nuna thilthlengte i khaikhin chuan i hlimna a bo vang,” tiin a sawi. (Galatia 6:4 chhiar rawh.) Jehova leh unaute tâna kan ṭangkai theih dân kawngte zawn chu thil pawimawh tak a ni. c

17. Engtin nge rawngbâwlna chanvo hlu atâna tling tûra hma i lâk theih?

¹⁷ I nun i tihsamkhai a, ṭûl lo taka leiba neih i pumpelh a nih chuan Jehova rawngbâwlnaah  tam lehzualin i inhmang thei ang. Thiltum lian thamte hlen thei tûra ṭanpuitu tûr thiltum tênaute insiam ang che. Entîr nân, regular pioneer thawh chu i thiltum lian tham a nih chuan, tûn aṭangin thla tin auxiliary pioneer i thawk thei ang em? Kohhranho rawngbâwltu nih chu i thiltum a nih chuan, thlawhhma rawngbâwlnaah tam lehzuala inhmangin, in kohhrana dam lote leh kum upate tlawh nân hun tam lehzual i pe thei ang em? Tûna i thiltawn hian nakinah rawngbâwlna chanvo hlu tam lehzual thawk thei tûrin a ṭanpui ang che. Chuvângin, tûna i chanvo neih eng pawh chu theih tâwp chhuahin tih tum tlat rawh.—Rom 12:11.

18. Milema târ lan Unaunu Beverley-i entawn tûr siam aṭangin eng nge i zir?

¹⁸ Thlarau lam thiltumte insiam tûr leh hlen tûrin kum upa lutuk tih a awm thei lo. Kum 75-a upa unaunu Beverley-i entawn tûr siam hi han ngaihtuah teh. Ani chu kal pawh harsat khawpin a hrisêl lo hle a. Mahse, Hriatrengna campaign-ah tam lehzuala tel a châk hle a ni. Chuvângin, thiltum eng emaw bîk tak a insiam a. Unaunu Beverley-i chu compaign chhûnga a thiltumte a hlen theih avângin a hlim hle. Theih tâwp a chhuahna chuan unau dangte chu rawngbâwlnaa ṭhahnemngai lehzual tûrin a chêttîr a ni. Jehova chuan kan unau kum upate chu an dinhmunte avângin thawk tam thei tawh lo mah se, an thawhrimna chu a ngaihlu hle a ni.—Sâm 71:17, 18.

19. Thlarau lam thiltum kan insiam theih ṭhenkhat chu engte nge ni?

¹⁹ I hlen theih tûr thiltumte insiam la. Jehova tilâwmtu miziate chu neih chhoh zêl tum ang che. Kan Pathian leh a inawpna pâwl tâna mi ṭangkai lehzual nihtîr theitu che thiamnate chu zir la. Tam lehzuala i unaute rawngbâwlsak theih dân kawngte chu zawng ang che. d Chutianga i tih chuan, Timothea angin, Jehova malsâwmnain ‘mi zawng zawng hnênah i sâwtna a lang thei ang.’—1 Tim. 4:15.