Chhechham tih chu ‘thil eng emaw hlen tûra Pathian hmaa urhsûn tak leh dân anga puan chhuahna, a nih loh leh thu tiamna’ a ni a. Chu chu ṭawngkam, a nih loh leh lehkha ziak hmanga tih theih a ni.

Isua’n: “Chhia rêng rêng chham suh u. . . . In thu sawi chu ‘a ni’ chu ni, ‘a ni lo’ chu ni lo ngawt rawh se; chûng aia chuang aliam chu sual laka chhuak a ni,” tia a sawi avângin, mi ṭhenkhat chuan chhecham chu thil sual angin an ngai mai thei. (Mt. 5:33-37) Isua chuan Mosia Dânin dinhmun ṭhenkhatah chhechham tûrin a phût tih leh Pathian chhiahhlawh rinawmte pawhin chhia an chham tih chu a hre chiang a. (Gen. 14:22, 23; Ex. 22:10, 11) Jehova ngeiin chhia a chham tih pawh a hre bawk. (Heb. 6:13-17) Chuvângin, Isua’n englai mahin chhia kan chham tûr a ni lo a tihna a ni lo. Chu aiin, ani chuan thil pawimawh lovah leh awmze nei lo taka chhia chham mai mai lo tûrin a vaukhân zâwk a ni. Jehova’n kan thutiam hlen tûra min duh avângin kan thusawi angin kan nung tûr a ni.

A nih leh, chhechhama thutiam tûra tih ni ta la, eng nge i tih ang? A hmasain, i chhechham anga i tih theih dâwn leh dâwn loh chian ang che. I chiang lo a nih chuan, chhechham loh chu a ṭha ber ang. Bible chuan: “Thu tiama hlen si loh ai chuan tiam loh law law i tân a ṭha zâwk,” tiin min vaukhân a ni. (Thur. 5:5) A dawtah, chhechham chungchânga Bible thu bulte chu ngaihtuah la; tichuan, sawizawi tawh i chhia leh ṭha hriatna milin thil ti ang che. A nih chuan, chûng Bible thu bul ṭhenkhat chu engte nge ni?

Chhechham ṭhenkhat chu Pathian duh zâwng nên a inmil. Entîr nân, Jehova Thuhretute an inneih hian thu an intiam a. Chûng thutiamte chu chhechhamna chi khat a ni. Pathian leh hriatpuitute hmaah, monu leh mopa chuan inhmangaih tawn a, inchawimawi tawn a, inzah tawn tûrin leh “[an] pahniha an dam chhûnga” chutianga incheibâwl tawn tûrin thu an tiam a. (Nupa tuak dangte chuan an inneihnaah chutiang thu chiah chu sawi lo mah se, Pathian hmaah thutiamna an nei tho a ni.) Chumi hnu chuan anni chu nupa nia puan an ni a, an inneihna chu dam chhûng atân a lo ni ta a ni. (Gen. 2:24; 1 Kor. 7:39) Chu inneihna thutiam chu inâwm tak a ni a, Pathian duh zâwng nên pawh a inmil a ni.

Chhechham ṭhenkhat chu Pathian duh zâwng nên a inmil lo. Kristian dik chuan râlthuam hmanga a ram humhim tûr leh Pathian a rinna phatsan tûrin chhia a chham lo vang. Chutianga tih chu Pathian thupêk bawhchhiatna a ni dâwn si a. Kristiante chu “khawvêla mi” kan nih loh avângin, chutiang dinhmunah chuan chhia kan chham tûr a ni lo.—Joh. 15:19; Is. 2:4; Jak. 1:27.

Chhechham ṭhenkhat chu chhia leh ṭha hriatnaah  a innghat. A châng chuan, Isua fuihna, “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” tih thu chu ngun taka ngaihtuahin, chhechham âwm a nih leh nih loh kan ngaihtuah a ngai thei a ni.—Lk. 20:25.

Entîr nân, hei hi han ngaihtuah teh, Kristian pakhat chuan ram khua leh tui ni thei tûrin emaw, passport nei thei tûrin emaw hma a la a, dân anga pawm theih ni tûr chuan rinawmna chhechham a ngai tih a hre ta a ni. Chumi rama chhechhamnaah chuan Pathian dân kalha thil eng emaw ti tûra intiamna a tel chuan, Bible hmanga ṭha taka sawizawi tawh a chhia leh ṭha hriatna chuan chhechham chu a remti lo vang. Mahse, sawrkâr chuan chhechhamna thute chu a chhia leh ṭha hriatnain a pawm theih tûr zâwnga a siamrem chu a remti pawh a ni thei.

Chhechhamnaa thute tihdanglam chu Rom 13:1-naa kan hmuh: “Mi tin an chunga rorêltute thu thuin awm rawh se,” tih thu bul nên a inmil pawh a ni thei. Chuvângin, Kristian chuan Pathianin mawhphurhna a pêk tawhte’n ti tûra an phûtte tih chu a sual lo niin a ngai thei a ni.

Chhia i chham laia thil eng emaw hmang tûrin emaw, zaizir tûrin emawa phût i nih chuan, Bible hmanga sawizawi i chhia leh ṭha hriatna mila thil tih chu thil pawimawh tak a ni. Hmân lai Rom mite leh Skuthia mite chuan an ngûnhnâm kengin chhia an chham ṭhîn a, chu chu miin indona pathian chunga rinna a neihzia a lantîrna a ni. Grik mite chuan chhia an chham hian vân lam hawiin an kut an phar ṭhîn a. Chutiang chuan an thusawi leh thiltih hmutu pathian thiltithei tak a awm tih leh mihringte hian chu pathian hmaah chuan an chanchin an la sawi dâwn tih an pawmzia an lantîr a ni.

Ni e, Jehova chhiahhlawh chuan biakna dik lo nêna inzawmna nei ram aiawh thil rêng rêng hmaah chhia a chham lo vang. A nih leh, court hmaah dingin Bible chunga i kut nghat chunga thu tiam tûra tih ni ta la, engtin nge ni ang? Chutiang dinhmunah chuan, chhecham chu i hnial lo ngei ang, Bible-ah pawh zaizira chhechhamtu mi rinawmte chungchâng târ lan a ni si a. (Gen. 24:2, 3, 9; 47:29-31) Chutiang hunah chuan, thu dik tak sawi tûrin Pathian hmaah chhia i chham tih hriat chu thil pawimawh tak a ni a. An zawh mai theih zawhna eng pawh chu dik taka chhâng tûrin i inpeih sa a ngai a ni.

Jehova nêna kan inlaichînna kan ngaih pawimawh êm avângin, chhechham tûra phûtna eng pawh chu kan chhia leh ṭha hriatna leh Bible thu bulte nên a inkalh lo tih chian tûrin ṭawngṭaina nên ngun takin kan ngaihtuah tûr a ni a. Chhechham i thlang a nih chuan, i hlen ngei tûr a ni.—1 Pet. 2:12.