Chutiang dinhmunah chuan, kohhran chuan an inneihna hmasa chu a tâwpin, inneihna hnuhnûng zâwk chu inneihna ding lai angin a thlîr ang. Chutianga thu tâwp kan siam chhan hriatthiam nân, inṭhenna leh kawppui dang neih lehna chungchânga Isua sawi hi i lo ngaihtuah ang u.

Matthaia 19:9-naa chhinchhiah angin, Isua chuan Bible ṭanchhana inneihna tihtâwp theihna awm chhun chu a târ lang a. Ani chuan: “Tu pawh tlangvâl ngaih vâng ni lova nupui maa mi dang nei apiang chu a uirê a ni,” tiin a sawi. Isua thusawi aṭanga kan hriat chu (1) tlangvâl ngaihna, a nih loh leh nungchang bawlhhlawhna chauh chu Bible ṭanchhana inṭhen theihna awm chhun a ni, tih leh (2) chutianga Bible ṭanchhan tûr awm lova nupui ṭhen a, nupui dang neitu chu a uirê a ni, tih hi a ni. a

Isua thusawi awmzia chu, mi dang a uirêsan hnua a nupui ṭhentu chuan Bible thu angin nupui dang nei leh tûrin zalênna a nei nghâl tihna a ni em? Ni kher lo ve. Nupa inkârah uirêna a lo awm hian, a uirê lo zâwk chuan a ngaidam dâwn nge a ṭhen dâwn tih chungchângah thu tlûkna a siam tûr a ni. A ngaihdam theih loh va, dân anga inṭhenna a kalpui chuan, an inṭhen fel hnuah, an pahnihin kawppui dang a nei thei ve ve a ni.

Kawng leh lamah chuan, a thiam zâwk a nupui chuan an inneihna chu a kehchhiat hlen a duh loh avângin a pasal ngaihdam chu a duh mai thei. A nih leh, a pasal chuan a nupui ngaihdamna chu pawm duh lovin, ama lam aṭang chauhvin dân anga inṭhenna lehkha siam ta se, engtin nge ni ang? A nupuiin ngaihdam a duh a, inneih zawm zêl a duh avângin, pasal chuan Pathian Thu anga nupui dang nei tûrin zalênna a nei lo. Chuti chung pawha, Bible kalh zâwnga nupui dang a nei lui a nih chuan, vawi khat dang a uirê leh tihna a ni a, kohhran upate chuan a chung thu rêl tûrin judicial committee an din leh a ngai ang.—1 Kor. 5:1, 2; 6:9, 10.

Pathian Thu anga nupui nei leh tûra zalênna nei lo mipain nupui dang a neih leh hunah, engtin nge kohhranin an inneihna hmasa leh hnuhnûng zâwk chu a thlîr ang? An inneihna hmasa zâwk chu Bible ṭanchhanin a la ding nghet em? A nupui chuan a pasal hlui chu ngaidam tûr emaw, ṭhen tûr emawin thu tlûkna a la siam thei em? Inneihna hnuhnûng zâwk chu uirêna anga thlîr tûr a ni em?

Tûn hma chuan, a uirê lo zâwk chu a la dam a, kawppui dang a neih loh va, mipat hmeichhiatna lama chêtsualna a neih loh chhûng chuan chu inneihna hnuhnûng zâwk chu uirêna angin kohhran chuan a thlîr a. Mahse, Isua chuan inṭhenna leh kawppui dang neih lehna chungchâng a sawi khân, a thiam zâwk chungchâng eng mah a târ lang lo. Chu aiin, Bible ṭanchhan awm lova nupui ṭhen a, nupui dang nei lehtu chu uirê  a nih thu a sawi zâwk a ni. Chutiang dinhmunah chuan, Isua’n uirêna tia a sawi, inṭhenna leh kawppui dang neih lehna chuan inneihna hmasa zâwk chu a titâwp a ni.

Inṭhenna leh kawppui dang neih lehna hmanga inneihna hmasa zâwk a tâwp tawh chuan, a thiam zâwk tân ngaihdam leh ngaihdam loh hian awmzia a nei tawh lo. Chuvângin, a pasal hlui a ngaidam dâwn nge dâwn lo tih chungchângah thu tlûkna harsa tak a siam a ngai tawh lo a ni. Chu bâkah, kohhranin inneihna hnuhnûng zâwk a thlîr dân chu uirê lo a nupui hmasa thihna emaw, pasal dang a neihna emaw, a nih loh leh inngaihna suala a tlûk luhna emawah a innghat lo vang. b

A chunga kan ngaihtuah tâk entîrnaah khân, pasal chu a uirê a, chu chuan inṭhenna a thlen a ni. A nih leh, pasal chuan uirê lovin a nupui chu ṭhenin nupui dang nei ta se, engtin nge ni ang? A nih loh leh, pasal chu an inṭhen hma zawng uirê lovin, an inṭhen hnuah a uirê a; chutah a nupuiin a ngaidam duh chung pawhin nupui dang nei ta se, engtin nge ni ang? Chûng dinhmunahte chuan, inṭhenna leh kawppui dang neih lehna—uirêna—a nih avângin inneihna hmasa chu a tâwp a. Inneihna hnuhnûng zâwk chu dân anga inneihna anga ngaih tûr a ni. Vênnainsâng (English) November 15, 1979 chhuak phêk 32-naa târ lan angin, “tûnah chuan, mi dang a neih tawh avângin, chu inneihna chu titâwp a, a nupui hlui hnêna kîr leh chu thil theih a ni tawh lo; inneihna hmasa chu inṭhenna, uirêna, leh kawppui dang neihna avânga tihtâwp a ni tawh si a.”

He hriatthiamna thar hian inneihna thianghlimna emaw, uirêna sual a pawina emaw chu a tinêp chuang lo. Bible ṭanchhan awm lova nupui ṭhen a, Pathian Thu aṭanga zalênna nei lo chung pawha nupui dang nei lehtu mipa chu uirêna avânga a chung thu rêl tûr a ni ang. (A kawppui thar chu Kristian a nih chuan, ani pawh uirêna avânga a chung thu rêl tûr a ni.) Chu inneihna hnuhnûng zâwk chu uirêna anga thlîr tûr ni lo mah se, mipa chu a thil sual tih avânga a chunga lungni lo leh zah phu lo nia amah ngaitu an awm tawh loh thleng, kum tam tak chhûng chu kohhranah chanvo hlute chelh tûrin a tling lo vang. Chanvo hlute a chelh leh theih hmain, upate chuan a uirêsan tâk a nupui hmasa dinhmun hnuhnûng ber leh a kalsan tâk kum tling lo an fate dinhmun pawh an ngaihtuah tel ang.—Mal. 2:14-16.

Bible ṭanchhan awm lova inṭhenna leh kawppui dang neih lehna sawhkhâwk pawi takte kan en hian, Kristiante tân Jehova thlîr dân anga inneihna thlîr a, thil thianghlim tak anga ngaih chu a finthlâk hle a ni.—Thur. 5:4, 5; Heb. 13:4.