1. Engtin nge mipa naupang pakhatin thawhleh beiseina a neih chu a sawi chhuah?

 MIPA naupang pakhat Matthew-a chuan natna khirh tak a neih avângin vawi tam tak inzai a hmachhawn a. Kum sarih a nihin a chhûngte nên thla tina chhuak JW Broadcasting^® an en a. Chu an thil en tâwp lamah chuan, mite’n an hmangaih tak lo tho lehte an lâwm lai music video a tel a ni. b An en zawhah Matthew-a chuan a nu leh pate kut vuanin heti hian a sawi a ni: “Anu Apa in lo hmu em? Ka thi a nih pawn thawhlehnaah ka tho leh dâwn asin. Min lo hmuak thei a; lungngaihna tûr a awm lo,” tiin. A nu leh pate’n an fapa tâna thawhleh beiseina a takzia an hriat laia an awm dân tûr chu i mitthla thei em?

2-3. Engvângin nge thawhlehna thutiam ngaihtuah ṭhin chu kan tân a ṭhat?

² Thawhlehna lo thleng tûr chungchânga Bible thutiamte ngaihtuah ṭhin chu kan tân thil ṭha tak a ni. (Joh. 5:28, 29) Engvângin nge? Natna khirh tak kan tawrh hun tûr, a nih loh leh beisei loh taka kan hmangaih takte kan chân hun tûr chu kan hriat loh vâng a ni. (Thur. 9:11; Jak. 4:13, 14) Thawhleh beiseina chuan chutiang harsatnate chu tuar chhuak tûrin min ṭanpui thei a. (1 Thes. 4:13) Bible chuan kan Pa vâna miin min hre chiangin min hmangaih hle tih min hrilh a. (Lk. 12:7) Kan mizia leh kan hriatrengna ngai chiah neia min kaitho leh tûrin Pathian Jehova chuan min hre chiang hle. Min hmangaih êm avângin kan tân chatuana nun theihna hun remchâng a siam a ni. Kan thi a nih pawhin, ani chuan min kaitho leh ang.

³ He thuziakah hian thawhlehna kan rin theih chhante kan sawiho hmasa ang a. Tichuan, he thuziak ṭanchhan Bible  châng: “I nuṭa a tho leh ang,” tih chuanna Bible-a thilthleng mi tichak thei tak kan bih chiang ang. (Joh. 11:23) A tâwpnaah, thawhleh beiseina kan tâna tak lehzual kan nihtîr theih dân kan hria ang.

4. Thutiam ring tûr chuan eng nge kan rinngheh ngai? Hrilhfiah rawh.

⁴ Thutiam ring tûr chuan, a tiamtuin tihhlawhtlin châkna mai bâkah, chutianga ti tûr chuan thiltihtheihna, a nih loh leh theihna a nei tih kan rinngheh tlat a ngai a. Entîr nân: I in chu thlipuiin a nuaichhia angah han inchan teh. I ṭhian pakhat chuan, ‘I in sa ṭha leh tûrin ka ṭanpui ang che,’ a ti a. Ani chuan a ti tak zet a, ṭanpui che a duh tih pawh i ring nghet tlat a ni. Ani chu in sa thiam tak a ni a, hmanraw mamawhte a neih bâkah, ṭanpui tûr chein theihna a nei tih i hre bawk. Chuvângin, a thutiam chu i ring a ni. A nih leh, thawhlehna chungchânga Pathian thutiam chu eng nge ni ve? Chumi tihlawhtling tûr chuan tih châkna leh theihna a nei tak zet em?

5-6. Engvângin nge Pathian Jehova’n mitthite kaihthawh châkna a nei tih kan chian theih?

⁵ Pathian Jehova’n mitthite kaihthawh châkna a nei em? Nei tehrêng mai. Ani chuan Bible ziaktu tam takte chu thawhlehna lo thleng tûr chungchânga a thutiam ziak tûrin a thâwk khum a. (Is. 26:19; Hos. 13:14; Thup. 20:11-13) Jehova’n thu a tiam tawh chuan a tihlawhtling ziah ṭhîn. (Jos. 23:14) A nihna takah chuan, mitthite kaihthawh chu a châk hle. Engvângin nge chutianga kan sawi theih?

⁶ Thlahtu Joba thusawite hi lo ngaihtuah ta ila. Ani chuan a lo thi a nih pawhin, Jehova’n kaihthawh leh a duh ang tih a hre chiang a ni. (Job. 14:14, 15) Jehova chuan amah betu thi tawh zawng zawngte pawh kaihthawh a châk hle a. Ani chuan hrisêlna leh hlimna neia nunna pêk leh chu a châk hle a ni. Pathian Jehova chungchâng zirna hun nei lova thi ta mi tlûklehdingâwn têlte chungchâng hi eng nge ni ve? Hmangaihna nei tak kan Pa chuan, chûng mite pawh chu kaihthawh a duh a. (Tirh. 24:15) A ṭhian ni tûr leh leia chatuana nun theihna hun remchâng nei tûrin a duh a ni. (Joh. 3:16) Pathian Jehova chuan mitthite kaihthawh châkna a nei tih a chiang hle.

7-8. Jehova’n mitthite kaitho tûrin thiltihtheihna a nei tih engvângin nge kan chian theih?

⁷ Pathian Jehova’n mitthite kaitho tûrin thiltihtheihna a nei tel em? Nei tehrêng mai! Ani chu “Engkimtitheia” a ni a. (Thup. 1:8) Chuvângin, thihna hial pawh ni se, hmêlma eng pawh hneh tûrin thiltihtheihna a nei tâwk a. (1 Kor. 15:26) Chumi hriatna aṭang chuan chakna leh thlamuanna kan nei a ni. Unaunu Emma Arnold-i thiltawn hi han ngaihtuah teh. Khawvêl Indopui II-na chhûng khân, an chhûngkuain rinna fiahna nasa tak an tâwk a. Emma-i chuan Nazi concentration camp-a a hmangaih takte chântu a fanu thlamuan nân: “Mitthite an lo nung leh thei lo a nih chuan kan hmêlma, thihna chu Pathian aiin a chak zâwk a ni ang. Mahse, chu chu thil dik a ni thei lo,” tiin a sawi a. Dik takin, Jehova aia chak zâwk engmah a awm lo! Nunna siamtu Pathian Engkimtitheia chuan mitthite hnênah nunna a pe leh thei a ni.

⁸ Pathianin mitthite a kaitho thei tih kan hriat theih nachhan dang leh chu hriatrengna tâwp chin nei lo a neih vâng a ni. Ani chuan arsite khi an hmingin a ko ṭheuh va. (Is. 40:26) Chu bâkah, mitthite chu a hre reng a ni. (Job. 14:13; Lk. 20:37, 38) Ani chuan a kaihthawh tûrte chu an lan dân leh an mizia te pawh tiamin, an dam laia an thiltawnte chu chipchiar takin a hre reng a ni.

9. Thawhlehna lo thleng tûr chungchânga Jehova thutiam chu engvângin nge i rin?

 ⁹ Pathian Jehova’n a thutiamte tihlawhtling tûra châkna leh thiltihtheihna a nei tih kan hriat avângin thawhlehna lo thleng tûr chungchânga a thutiam pawh kan ring nghet tlat thei a. Pathian thutiam thawhlehna kan rin theih nachhan dang leh hi han ngaihtuah teh: Jehova chuan mitthite a lo kaitho thawh ṭhîn a. Bible hun laiin, ani chuan Isua pawh tiamin, mi rinawm tlêm tête hnênah mitthite kaitho tûrin thiltihtheihna a pe a. Isua’n mitthi a kaihthawhte zînga pakhat chungchâng Johana bung 11-a chhinchhiah hi i lo bih chiang ang u.

10. Bethani aṭanga Jordan râla Isua’n thu a hrilh laiin eng thil nge thleng a, ani chuan eng nge a tih? (Joh. 11:1-3)

¹⁰ Johana 11:1-3 chhiar rawh. C.E. 33 kum tâwp lama Bethani khuaa thilthleng hi han ngaihtuah teh. Isua’n chu khuaah chuan ṭhian ṭha tak tak Lazara leh a farnute pahnih Mari leh Marthi te a nei a. (Lk. 10:38-42) Mahse, Lazara chu a dam lo ta a, a farnute chu an lungngai hle. Bethani aṭanga kea ni hnih kal vêl, Jordan lui râla awm Isua hnênah mi an tîr a. (Joh. 10:40) Lungchhiatthlâk takin, an mi tirhin Isua hnên a thlen lai vêlin Lazara chu a thi a ni. A ṭhian chu a thi tih hre mah se, Isua chu chumi hmunah chuan ni hnih dang a la awm a; tichuan, Bethani a pan ta a ni. Chuvângin, Isua a va thlen chuan Lazara thihna chu ni li lai a ni tawh a. Isua chuan a ṭhiante hlâwkpui tûr leh Pathian chawimawitu tûr thil tih a tum a ni.—Joh. 11:4, 6, 11, 17.

11. He thilthleng aṭang hian inṭhianna chungchângah eng nge kan zir theih?

¹¹ He thilthleng aṭang hian inṭhianna chungchâng kan zir a. Hei hi han ngaihtuah teh: Mari leh Marthite’n Isua hnêna mi an tirh khân, ani chu Bethani-a an hnêna kal tûrin an ngên lo. A ṭhian duh tak a dam loh thu an hrilh mai a ni. (Joh. 11:3) Lazara a thih khân, Isua chuan hmun hla tak aṭang pawhin a kaitho thei a. Mahse, a ṭhian Mari leh Marthi te hnênah Bethani-ah a kal zâwk a ni. An ṭanpuina i dîl lo chung pawha nangmah ṭanpuitu tûr che ṭhian i nei em? I nei a nih chuan, ‘mangan nîa’ ṭanpui tûr chein i rinchhan thei a ni. (Thuf. 17:17) Isua angin, mi dangte tân chutiang ṭhian chu i ni ve ang u! Tûnah chuan thilthlengah khân lêt lehin a dawta thilthleng i lo en ang u.

12. Isua’n Marthi hnênah eng nge a tiam a, engvângin nge chu thutiam chu a rin theih? (Johana 11:23-26)

¹² Johana 11:23-26 chhiar rawh. Marthi chuan Isua’n Bethani khua a thleng dâwn hnai tih a hria a. Hmanhmawh taka va panin, a hnênah: “Lalpa, heta awm ni la chu ka nuṭa a thi lo tûr,” tiin a hrilh a ni. (Joh. 11:21) Ni e, Isua’n Lazara chu a tidam thei a. Mahse, chu aia thil chhinchhiah tlâk zâwk chu tih a duh a ni. Ani chuan: “I nuṭa a tho leh ang,” tiin a tiam a. Marthi hnênah a thutiam a rinngheh lehzual theih chhan hrilhin: “Kei hi  thawhlehna leh nunna chu ka ni,” tiin a sawi. Ni e, Pathianin Isua chu mitthite kaitho tûrin thiltihtheihna a pe a. A hmain, ani chuan hmeichhe naupang pakhat chu a thih aṭanga rei lotêah a kaitho va; chu bâkah, ṭhalai pakhat chu a thih nîah a kaitho bawk niin a lang. (Lk. 7:11-15; 8:49-55) Mahse, a thihna ni li lai ni tawh leh, a taksa pawh ṭawih ṭan tawh mi tuemaw chu a kaitho thei ang em?

13. Johana 11:32-35-a chhinchhiah angin, Mari leh a rawn zuitute ṭap a hmuh khân Isua chu engtin nge a awm? (Milem en bawk rawh.)

¹³ Johana 11:32-35 chhiar rawh. A dawta thilthleng hi han mitthla teh. Lazara farnu dang Mari chu Isua hmu tûrin a rawn chhuak a. Ani chuan a farnu thusawi chu rawn sawi nawnin: “Lalpa, heta awm ni la chu, ka nuṭa a thi lo tûr,” tiin a sawi a ni. Amah leh a rawn zuitute chu an lungchhe hle a. Chûng mite ṭap a hmuh chuan Isua pawh a lungchhe hle a ni. A ṭhiante a khawngaih êm avângin ani chu a ṭap ta a. Hmangaih takte an thih huna a nat dân tûr chu a hre thiam a ni. An mittui tlâk chhan lâk bosak chu a châk hle ngei ang!

14. Mari ṭap a hmuh laia Isua awm dân aṭangin Jehova chungchâng eng nge kan zir theih?

¹⁴ Mari ṭap a hmuh laia Isua awm dân chuan Jehova chu khawngaihna Pathian a ni tih min zirtîr a ni. Engvângin nge chutianga kan sawi theih? Thuziak hmasaa kan hmuh tawh angin, Isua chuan a Pa ngaihtuahna leh rilru vei zâwngte chu ṭha famkimin a lantîr a. (Joh. 12:45) A ṭhian lusûnte a khawngaih êm avângin Isua chu a ṭap a; chuvângin, kan lungngaihna mittui a hmuh hunah Jehova pawhin min khawngaih hle ang tih kan hria a ni. (Sâm 56:8) Chu chuan khawngaihnaa khat kan Pathian hnaih lehzual duhna a neihtîr ngei ang che.

15. Johana 11:41-44-in a sawi angin, Lazara thlânah eng thil nge thleng? (Milem en bawk rawh.)

¹⁵ Johana 11:41-44 chhiar rawh. Isua’n Lazara thlân a thlen chuan, thlân kawngkâa lung chu chawi sawn tûrin a hrilh a. Marthi chuan tûnah zawng a uih tawh ang tiin a lo dang a ni. Isua chuan: “I rin chuan Pathian ropuizia i hmu ang, ka ti lo che em  ni?” tiin a chhâng lêt a. (Joh. 11:39, 40) Ani chuan a dawta thilthleng atâna chawimawina zawng zawng Pathian Jehova hnêna pêk a duh avângin, vân lam enin mipui hmaah a ṭawngṭai a ni. Tichuan: “Lazar, lo chhuak rawh,” tiin a au va. Lazara chu thlân aṭangin a lo chhuak ta! Isua chuan mi ṭhenkhatte’n thil theih loh anga an ngaih chu a ti ta a ni.

16. Engtin nge Johana bung 11-a thilthleng chuan thawhleh beiseina kan rinna a tihngheh?

¹⁶ Johana bung 11-a chhinchhiah thilthleng chuan thawhleh beiseina kan rinna a tinghet a ni. Engtin nge? Isua’n Marthi hnêna: “I nuṭa a tho leh ang,” tia a thutiam kha han ngaihtuah leh teh. (Joh. 11:23) A Pa ang bawkin, Isua chuan chu thutiam thlen famkimtîr châkna leh theihna a nei a. A mittui chuan mitthite kaihthawh châkna leh thihna avânga mite lungngaihna nuai bo duhna nasa tak a nei tih a târ lang a ni. Chu bâkah, thlân aṭanga Lazara a rawn chhuah khân, Isua chuan mitthite kaitho tûrin thiltihtheihna a nei tih a târ lang leh a ni. Isua’n Marthi hnêna: “I rin chuan Pathian ropuizia i hmu ang, ka ti lo che em ni?” tia a hriatnawntîrna kha han ngaihtuah bawk teh. (Joh. 11:40) Pathian thutiam thawhlehna chu a rawn thleng dik ngei ang tih rin nachhan tûr ṭha tak kan nei a ni. A nih chuan, he beiseina hi kan tâna tak lehzual nihtîr tûrin eng nge kan tih theih?

17. Bible-a thawhlehna chanchin kan chhiar hian eng nge kan hriat reng ang?

¹⁷ Hun kal tawha thawhlehna thlengte chungchâng chhiarin chhût ngun rawh. Bible-ah hian leia kaihthawh mi pariatte chungchâng a chuang a. c Chûng thilthlengte chu ngun takin zir la. Chutianga i tih hunah, chûng mite chu mi awm tak tak—mipa, hmeichhia, leh naupangte—an ni tih hre reng ang che. Chuta ṭanga i zir theihte chu hmuh chhuah tum la. Thilthleng tinte’n  Pathianin mitthite kaihthawh châkna leh theihna a nei tih a târ lan dân chu ngaihtuah bawk ang che. Chu bâkah, thawhlehna azawnga pawimawh ber Isua thawhlehna chungchâng ngaihtuah rawh. A tho leh tih mita hmutu a za têl an awm a, chu chuan thawhlehna lo thleng tûr kan rinna nghahchhan ṭha tak min pe a ni.—1 Kor. 15:3-6, 20-22.

18. Thawhleh beiseina chungchâng târ lanna kan hlate chu engtin nge ṭha taka i hman theih ang? (Footnote en bawk rawh.)

¹⁸ Thawhleh beiseina chungchâng târ langtu ‘thlarau lam hlate’ chu ṭha takin hmang rawh. d (Eph. 5:19) Hêng hlate hian thawhlehna chu kan tân a ti tak lehzual a, he beiseina hlu tak kan rinna hi a tinghet lehzual bawk. Chûng hlate chu ngaithlain zir la, chhûngkuaa Pathian biakna in neih hunah a hla thu awmziate chu sawiho vang che u. A hla thute chu i rilru leh thinlungah vawng tlat la. Tichuan, nunna atâna hlauhawm fiahna, a nih loh leh i hmangaih tak thihnaah i chân a nih pawhin, Jehova thlarau chuan chûng hlate chu hre chhuak leh a, thlamuanna leh chakna nei tûrin a ṭanpui ang che.

19. Thawhlehna chungchângah eng nge kan mitthla theih? (“ An Hnênah Eng Nge I Zawh Ang?” tih bâwm chu en rawh.)

¹⁹ I mitthla theihna hmang rawh. Jehova chuan khawvêl thara awm anga inmitthla theihna min pe a. Unaunu pakhat chuan: “Paradis-a rose pâr rimte pawh hre thei hial ang khawpin khawvêl thara awm anga inmitthla nân hun tam tak ka hmang a ni,” tiin a sawi. Bible hun laia mi rinawm a hmei a pate hmu angah han inmitthla teh. Tu nge hmuh i châk? Ani chu eng zawhnate nge i zawh ang? I hmangaih tak thi tawhte nêna awmho leh angin inmitthla bawk teh. Anmahni i hmuh huna i thusawi hmasak ber tûr te, hmangaih taka i kuah dân tûr te, leh anmahni i hmuh avânga i lâwm dân tûrte chu mitthla ang che.

20. Eng nge tih kan tum tlat ang?

²⁰ Jehova thutiam thawhleh beiseina avângin kan va lâwm tak êm! Jehova’n he thutiam hi thlen famkimtîr châkna leh theihna a neih avângin a lo thleng dik ngei ang tih kan chiang thei a ni. He beiseina hlu tak hi tihngheh zawm zêl i tum tlat ang u. Chutianga kan tih chuan, ‘I hmangaih takte an tho leh ang!’ tia min tiamtu Pathian chu kan hnaih lehzual ang.