1. Isua’n thilmak a tih hmasak ber ṭuma thilthleng chu sawi rawh.

 ISUA rawngbâwl ṭan kum, C.E. 29 tâwp lam chu han mitthla chhin teh. Isua leh a nu Mari bâkah, tirhkoh ṭhenkhatte chu Isua awmna khua Nazaret hmâr lama awm Kana khuaa inneihna hmanpui tûra sâwm an ni a. Mari chu, chu chhûngkaw ṭhian chu a ni a, mikhual lo kalte lo lâwmin a ṭanpui niin a lang. Mahse, inneih ruai an kîl laiin, chu chhûngkua leh innei tharte zahna nasa tak thlen thei thil a thleng a, chu chu an uain neih a zo hi a ni. b Mikhualte chu beisei aiin an ṭhahnem hle a nih a rinawm. Mari chu a fapa hnênah kal vatin, “Uain an tlachham ta e,” tiin a va hrilh a. (Joh. 2:1-3) Isua’n eng nge a tih? Thilmak danglam tak tiin—tui chu ‘uain ṭha takah’ a chantîr a ni.—Joh. 2:9, 10.

2-3. (a) Engtin nge Isua’n a thilmak tihtheihna a hman? (b) Engtin nge Isua thilmak tihte ngaihtuahna chu kan hlâwkpui theih?

² Isua chuan rawng a bâwl chhûngin thilmak dang tam tak pawh a ti a. c Ani chuan a thilmak tihtheihna chu mi a sâng têlte ṭanpui nân a hmang a ni. Entîr nân, a thilmak tih pahnih—mipa 5,000 leh a hnua mipa 4,000 a hraiah—khân hmeichhia leh naupang awm vete kan chhiar tel a nih chuan, an vaiin mi 27,000 chuang vêl an nih a rinawm. (Mt. 14:15-21; 15:32-38) Chûng thilthleng pahnihah chuan Isua’n dam lo tam  tak a tidam bawk a ni. (Mt. 14:14; 15:30, 31) Isua’n mak tak maia mite tidam a, a hrai laia mipuite mak tih dân tûr chu han mitthla teh!

³ Tûn laiah Isua thilmak tihte aṭangin zir theih tam tak kan nei a. He thuziakah hian, chûng thilmak tihte’n rinna tichak thei tak thil ṭhenkhat min zirtîr theihte kan sawiho vang a. Tichuan, Isua’n thilmak a tih laia a lantîr inngaihtlâwmna leh khawngaihna kan entawn theih dân kan bih chiang bawk ang.

4. Isua thilmak tihte chuan tu chungchânga rinna tinghet thei tak thute nge min zirtîr?

⁴ Isua thilmak tihte chuan a chungchâng chauh ni lovin, a Pa chungchânga rinna tinghet thei tak thute min zirtîr a. A nihna takah chuan, chûng thilmak tihtheihna lo chhuahna Hnâr chu Jehova a ni. Tirhkohte 10:38, C.L. Re-edited chuan: “Pathianin thlarau thianghlim leh thiltihtheihnain [Isua chu] a thuam a, Pathian chuan a awmpui reng a, thil ṭha tia zin vêlin Diabola sawisak zawng zawng a tidam zêl a,” tiin min hrilh a ni. Isua chuan a thilmak tihte pawh tiamin, a thusawi leh thiltih engkimah a Pa ngaihtuahna leh rilru vei zâwngte chu ṭha famkimin a lantîr tih hre reng ang che. (Joh. 14:9) Isua thilmak tihte aṭanga kan zir theih thil pathum i lo ngaihtuahho vang u.

5. Engin nge Isua chu thilmak ti tûra chêttîr? (Matthaia 20:30-34)

⁵ Pakhatna, Isua leh a Pa chuan min hmangaih hle. Leia a awm lai khân, Isua chuan mite a hmangaihzia chu a thilmak tihtheihna hmanga an hrehawm tawrhnate lâk bosakin a lantîr a. Ṭum khat chu mitdel pahnihin ṭanpui tûrin an ngên a. (Matthaia 20:30-34 chhiar rawh.) Isua’n anni chu “a khawngaih êm êm” avângin a tidam a ni tih chhinchhiah ang che. Heta “khawngaih êm êm” tia lehlin Grik thu mal hi chhûngril aṭanga khawngaihna nasa tak tihna a ni a. Chutiang khawngaihna nasa tak, hmangaihna târ lanna ni bawk chuan Isua chu rilṭâmte hrai tûr leh phârte tidam tûrin a chêttîr bawk a ni. (Mt. 15:32; Mk. 1:41) “Khawngaihna” Pathian Jehova leh a Fapa chuan min hmangaih hle a, kan hrehawm tawrhnate min tawrhpui tih kan chiang thei a ni. (Lk. 1:77, 78; 1 Pet. 5:7) Anni chuan mihringte tihrehawmtu harsatna zawng zawngte nuai bo chu an nghâkhlel hle!

6. Pathianin Isua hnênah eng thiltihtheihna nge a pêk?

⁶ Pahnihna, Pathianin Isua chu mihringte harsatna zawng zawng chingfel tûrin thiltihtheihna a pe. Isua’n a thilmak tihte hmangin keimahnia kan chinfel theih ngai loh tûr harsatnate a chingfel thei tih a târ lang a. Entîr nân, ani chuan mihringte harsatna thlentu bul ber sual rochunna leh, chumi sawhkhâwk natna leh thihna lak aṭanga min chhuah zalên tûrin thiltihtheihna a nei a ni. (Mt. 9:1-6; Rom 5:12, 18, 19) A thilmak tihte chuan dam lohna “tinrêng” a tidam theiin, mitthite hial pawh a kaitho thei tih a finfiah a. (Mt. 4:23; Joh. 11:43, 44) Chu bâkah, thlipui na tak thunun tûr leh ramhuaite hnawt chhuak tûr pawhin thiltihtheihna a nei bawk. (Mk. 4:37-39; Lk. 8:2) Jehova’n a Fapa kutah chutiang thiltihtheihna a pe tih hriat chu a va thlamuanthlâk tak êm!

7-8. (a) Isua thilmak tihte aṭangin eng nge kan rinngheh tlat theih? (b) Khawvêl thara eng thilmak lo thleng tûr nge i nghahhlelh?

⁷ Pathumna, Pathian Ram rorêlna hnuaia malsâwmna lo thleng tûrte chu a lo thleng ngei ang tih kan ring nghet tlat thei. Leia mihring a nih laia Isua thilmak tihte chuan vâna Pathian Rama Lalber a nih angin, chu  aia nasa zâwk chuan a la rawn ti ang tih min hriattîr a. Nakin lawka Krista rorêlna hnuaia kan tawn tûrte chu han ngaihtuah teh. Mihringte’n an tawh ṭhin dam lohna zawng zawng leh piansualnate a nuai bo dâwn avângin hrisêlna ṭha famkim kan chên ang a. (Is. 33:24; 35:5, 6; Thup. 21:3, 4) Rilṭâmna, a nih loh leh leilung chhiatnate avânga harsatnate kan hmachhawn a ngai tawh lo bawk ang. (Is. 25:6; Mk. 4:41) Kan hmangaih thi ta “thlâna” awmte lo hmuahna aṭangin hlimna nasa tak kan nei ang. (Joh. 5:28, 29) Khawvêl thara eng thilmak lo thleng tûr nge i nghahhlelh ber?

⁸ Thilmakte a tih laiin Isua’n kan entawn tûr inngaihtlâwmna leh khawngaihna nasa tak a lantîr a. Kana khua inneih ruaiṭhehnaa thilthleng aṭanga ṭanin entîrna pahnih i lo ngaihtuah ang u.

9. Inneih ruaiṭhehnaah Isua’n eng nge a tih? (Johana 2:6-10)

⁹ Johana 2:6-10 chhiar rawh. Inneihna ruaiṭheh laia uain a zawh khân, Isua’n thil engemaw ti tûrin mawhphurhna a nei em? Nei lo. Messia’n mak tak maiin tui uainah a chantîr ang tih hrilh lâwkna pakhat mah a awm lo. Mahse, in inneih nî-ah ei leh in tlachham ta ula, engtin nge i awm ang? Isua’n chu chhûngkua, a bîk takin mo leh moneitu chu a khawngaih niin a lang a, zak tak maia an awm tûr chu a duh lo a ni. Chuvângin, a  tîra kan sawi tâk ang khân, ani chuan thilmak a ti ta. Tui—liter 390 (gal 103) vêl—chu uain ṭha berah a chantîr a. Chutianga tam tak a chantîr chhan chu, a bâng nakina hman leh atân emaw, innei tharte’n chu chu an hralha sum an neih theih nân emawa ti a nih a rinawm. Innei tharte chu an va han lâwm dâwn tak êm!

10. Johana bung 2-ah eng thilthleng nge chipchiar taka chhinchhiah a nih? (Milem en bawk rawh.)

¹⁰ Johana bung 2-a chhinchhiah thilthleng chu chipchiar zâwkin lo ngaihtuah ila. Isua’n bêlte chu tuiin a tikhat lo tih i lo hria em? Mite ngaihvenna lâk aiin, bêlte chu tikhat tûrin chhiahhlawhte a hrilh zâwk a ni. (Châng 6, 7) Tui uaina a chantîr hnuin, amah ngeiin uain ṭhenkhat chu lain ruaiṭheh fatu hnênah a kalpui lo. Chutianga ti tûr chuan chhiahhlawhte a hrilh zâwk a ni. (Châng 8) Isua chuan uain no laa, mikhual lo kalte hmaa chawikângin ‘ka uain siam ṭhenkhat hi han tem teh u!’ tiin inchhuang takin a sawi lo.

11. Isua thilmak tih aṭangin eng nge kan zir theih?

¹¹ Isua’n tui uaina chantîra thilmak a tihna aṭangin eng nge kan zir theih? Inngaihtlâwmna chungchâng kan zir thei a ni. Isua chuan a thilmak tih chu a chhuang lo va; a nihna takah chuan, a thiltih engmah chu a chhuang ngai lo. Chu aiin, inngaitlâwm takin a Pa hnênah ropuina leh chawimawina zawng zawng a pe ziah zâwk. (Joh. 5:19, 30; 8:28) Isua entawna kan inngaihtlâwm reng chuan kan thil hlen chhuahte avânga inchhuanna kan nei lo vang. Jehova rawngbâwlnaah eng chanvo pawh chelh ila, mahni inchhuang lovin a rawng kan bâwl Pathian ropui tak chu i chhuang zâwk ang u. (Jer. 9:23, 24) Ani chu a phû ang ngeiin kan chawimawi tûr a ni. Jehova ṭanpuina tel lo chuan eng thil ṭha nge kan hlen chhuah theih tehlul ang?—1 Kor. 1:26-31.

12. Isua inngaihtlâwmna kan entawn theih dân kawng dang chu eng nge ni? Hrilhfiah rawh.

¹² Isua inngaihtlâwmna kan entawn theih dân kawng dang lo ngaihtuah ila. Hei hi han mitthla teh: Kohhran upa pakhat chuan a vawi khatna atâna vântlâng thusawi sawi tûr kohhranho rawngbâwltu ṭhalai pakhat ṭanpui nân hun tam tak a hmang a. A ṭanpuina avângin, ṭhalai unaupa chuan mi tichak thei tak thu a sawi a, chu chu kohhrana unaute’n ṭha an ti hle a ni. Inkhâwm bânah kohhran upa hnênah chuan tuemaw rawn kalin: ‘Unaupa thusawi chu a ṭha hle mai tiraw?’ a rawn ti a. Upa chuan: ‘Nia, amah ṭanpui nân hun tam tak ka hmang a lâwm,’ tia a sawi kher a ngai em? Nge ni a, inngaitlâwm takin: ‘Ni e, a sawi ṭha khawp mai. Ka chhuang tak zet a ni,’ tiin a sawi zâwk dâwn? Kan inngaihtlâwm chuan mi dangte tâna thil ṭha kan tihte avângin chawimawina kan dawn a ngai lo. Jehova’n kan thiltihte a hmuin, a ngaihlu a ni tih kan hriat avângin kan lungawi a ni. (Matthaia 6:2-4 nên khaikhin rawh; Heb. 13:16) Inngaihtlâwmna kawnga Isua kan entawn hian Jehova kan tilâwm tih a chiang hle.—1 Pet. 5:6.

13. Nain khaw bulah Isua’n eng nge a hmuh a, eng thil nge a tih? (Luka 7:11-15)

¹³ Luka 7:11-15 chhiar rawh. Isua rawngbâwl chhûng lai hâwl vêla thilthleng hi han ngaihtuah teh. Ani chu kum 900 vêl kaltaa zâwlnei Elisa’n nu pakhat fapa a kaihthawhna khua Sunem aṭanga hla vak lova awm, Galili mite khua Nain-ah a kal a. (2 Lal. 4:32-37) Isua’n khawpui kulh kawngkhâr a rawn hnaih chuan, mitthi vui tûra khawpui  rawn chhuahsante a hmu a. Dinhmun chu a lungchhiatthlâk hle—hmeithai pakhatin a fa neih chhun a chân a ni. Mahse, hmeithai nu chu amah chauhvin a ni lo, khawpui aṭangin mi tam takin an rawn zui a ni. Isua chuan lo tidingin chu nu tân thil chhinchhiah tlâk tak a tihsak a—a fapa a kaihthawhsak a ni! Hei hi Chanchin Ṭha ziakte’n an chhinchhiah, Isua’n mitthi a kaihthawhte zînga a hmasa ber a ni.

14. Luka bung 7-naah eng thilthleng nge chipchiar taka chhinchhiah a nih? (Milem en bawk rawh.)

¹⁴ Luka bung 7-a târ lan thilthleng chu chipchiar zawkin lo ngaihtuah ta ila. Isua’n lusûn nu “a hmuh” chuan “a khawngaih êm êm” tih i lo hria em? (Châng 13) Isua chuan a fapa ruang bula kal paha a ṭap chu hmuin a khawngaih pawh a ni thei. Chu nu chu a khawngaih satliah mai a ni lo; a chungah khawngaihna a lantîr a ni. Ani chu aw dam taka biain: “Ṭap suh,” tiin a hrilh a. Tichuan, amah ṭanpui nân thil engemaw a ti a. A fapa chu kaihthawhsakin, “a nu hnênah a pe ta” a ni.—Châng 14, 15.

15. Isua thilmak tih aṭangin eng nge kan zir theih?

¹⁵ Isua’n hmeithai fapa a kaihthawhna aṭangin eng nge kan zir theih? Lusûnte chungah khawngaihna kan lantîr a ngai tih kan zir a ni. Isua tih angin mitthite kan kaitho thei lo ngei mai. Mahse, lusûnte ngaihsakin an chungah khawngaihna kan lantîr thei a. Kan ṭawngkam leh thiltiha anmahni ṭanpui tûr leh thlamuan tûrin khawngaihna lantîr kawngah hma kan la thei bawk. d (Thuf. 17:17; 2 Kor. 1:3, 4; 1 Pet. 3:8) Khawngaihna thiltih hotê pawhin lusûnte chu a tichakin a thlamuan thei a ni.

16. Milema kan hmuh angin, tûn hnaia a fanu sûntu nu pakhat thiltawn aṭangin eng nge i zir?

¹⁶ Thiltawn pakhat lo ngaihtuah ta ila. Kum engemawti kalta khân, unaunu pakhat chuan kohhran inkhâwma hla sak laiin a bula nu pakhat chu a ṭap tih a hria a. Chu hla chu thawhleh beiseina chungchâng a ni a, chu nu chuan tûn hnai lawkah a fanu naupang tê a sûn a.  Chu chu hriain unaunu chuan a va pan vat a, ani chu kuahin hla chu a tâwp thlengin a sakpui a ni. A hnuah, chu lusûn unaunu chuan: “Unaute hmangaihna nasa tak ka dawng,” tiin a sawi a. A inkhâwm avângin a lâwm tak zet a ni. Ani chuan, “Kingdom Hall chu ṭanpuina kan hmuhna hmun a ni,” tiin a sawi. “Thinlunga lungchhia” lusûnte chunga khawngaihna lantîr tûra kan thiltih hotê pawh Jehova’n a hriain a ngaihlu tih kan chiang thei a ni.—Sâm 34:18.

17. He thuziakah hian eng nge kan zir?

¹⁷ Bible-a Isua thilmak tihte chungchâng zirna chuan nasa takin min tichak thei a. Chûngte chuan Jehova leh Isua’n min hmangaih tak zet tih te, Isua’n mihringte harsatna zawng zawng chingfel tûrin thiltihtheihna a nei tih te, leh nakin lawka Lalram malsâwmna lo thleng tûrte chu kan ring nghet tlat thei tihte min zirtîr a ni. Chûng thilthlengte kan zir hunah, Isua mizia kan entawn theih dân kawngte kan chhût ngun thei a. Mahnia inzirna i neih hunah emaw, Chhûngkuaa Pathian Biakna in neih hunah emaw engvângin nge Isua thilmak tih dangte chu in zir loh vang? Chuta ṭanga i thil zirte chu mi dangte hrilh ve ang che. Chutianga i tih chuan mi tichak thei tak inbiakna tam tak i nei thei dâwn a ni!—Rom 1:11, 12.

18. A dawta thuziakah eng nge kan sawiho vang?

¹⁸ A rawngbâwlna tâwp lamah Isua chuan thilmak a ti a, chu chu Bible-a chhinchhiah mitthi a kaihthawh vawi thumna leh hnuhnûng ber a ni. Mahse, chu chu a danglam bîk hle—a ṭhian duh tak ni li lai thi tawh chu a kaitho a ni. Chanchin Ṭha ziaka chhinchhiah, chu thilmak tih aṭang chuan eng nge kan zir theih? Engtin nge thawhleh beiseina kan rinna chu kan tihngheh theih? A dawta thuziakah chûng zawhnate chu kan sawiho vang.