1. Eng nge kan rinngheh tlat?

 JEHOVA mite kan nih angin, ani chuan min hmangaih a, nun ṭha ber nei tûrin min duh tih kan hria a ni. (Rom 8:35-39) Bible thu bulte kan nunpui hian kan hlâwkpui ziah ṭhîn tih kan ring nghet tlat bawk. (Is. 48:17, 18) Mahse, kan beisei loh harsatnate kan hmachhawn hian engtin nge kan awm?

2. Eng harsatnate nge kan tawh theih a, chu chuan eng nge min ngaihtuahtîr mai theih?

² Jehova chhiahhlawh zawng zawngte chuan harsatna an nei ṭheuh va. Entîr nân, chhûngkuaa tuemaw chuan kawng engemawti takin min tilunghnual thei a. Jehova rawngbâwlnaa min tel tamtîr thei lotu natna khirh tak kan nei pawh a ni thei. Leilung chhiatna nasa tak kan tuar thei bawk a. A nih loh leh, kan rinna avângin tihduhdahna kan tuar thei bawk. Chutiang harsatnate kan tawh chuan, heti hian kan ngaihtuah mai thei: Engvângin nge hei hi ka chungah a thlen? Thil dik lo ka ti em ni? Hei hi Jehova’n mal min sâwm lo tihna a ni em?’ tiin. Chutiang chuan i ngaihtuah ngai em? I ngaihtuah a nih chuan lunghnual suh ang che. Jehova chhiahhlawh rinawm tam takte pawhin chutianga ngaihtuah châng chu an nei a ni.—Sâm 22:1, 2; Hab. 1:2, 3.

3. Sâm 34:19 aṭangin eng nge kan zir theih?

³ Sâm 34:19 chhiar rawh. He fakna hlaa thil pawimawh pahnih hi chhinchhiah ang che: (1) Mi felte chuan harsatnate an tâwk. (2) Jehova’n kan harsatnate lak ata min chhan chhuak. Engtin nge Jehova’n min chhan chhuah? Kawng khat chu he khawvêla nun hi a âwm tâwka thlîr thiam tûra min ṭanpuina hmangin a ni. Pathian Jehova chuan a rawng kan bâwlnaah  hlimna kan nei ang tih min tiam mah se, harsatna kan tâwk lo vang tih erawh min tiam lo. (Is. 66:14) Ani chuan a duh ang taka chatuana nun kan chen theih hun tûr, kan nakin hun chu thlîr tlat tûrin min fuih a. (2 Kor. 4:16-18) Chumi hun a lo thlen hma chu, nî tina a rawngbâwl zawm zêl tûrin min ṭanpui a ni.—ṬH. 3:22-24.

4. He thuziakah hian eng nge kan sawiho vang?

⁴ Bible hun lai leh kan hun laia Jehova betu rinawmte entawn tûr siam aṭanga kan zir theihte i lo sawiho vang u. Kan la hmuh tûr angin, beisei loh harsatnate kan hmachhawn thei a. Mahse, Jehova kan rinchhan tlat chuan ani chuan min tichak ang. (Sâm 55:22) Hêng entîrnate kan ngaihtuah lai hian heti hian inzâwt ang che: ‘Engtin nge hetiang dinhmun hi ka chhân lêt ṭhin? Engtin nge hêng entîrnate hian Jehova ka rinna a tihngheh? Engtin nge ka nunpui theih ang?’ tiin.

5. Labana avângin Jakoba’n eng harsatnate nge a tawh? (A kâwma milem en rawh.)

⁵ Bible hun laia Jehova chhiahhlawhte chuan an beisei loh harsatnate an hmachhawn a. Jakoba hi han ngaihtuah teh. Ani chu a pain ringtu an chhûng khat Labana fanute zînga mi nupuia nei tûrin thu a pe a, chutianga a tih chuan Jehova’n nasa takin mal a sâwm ang tih a hrilh bawk a ni. (Gen. 28:1-4) Jakoba chuan chutiang chuan a ti a. Tichuan, Kanaan ram chhuahsanin, fanu pahnih—Leaii leh Rakili—neitu Labana in lam a pan ta a ni. Jakoba chuan Labana fanu naupang zâwk Rakili chu a hmangaih êm avângin, nupuia a neih theih nân a pa hna kum sarih thawh a remti a. (Gen. 29:18) Mahse, Jakoba beisei angin thil a thleng lo. Labana’n ani chu bumin a fanu upa zâwk Leaii a neihtîr a. Kâr khat hnuah, Labana’n Jakoba chu Rakili neihtîr a remti a; mahse, kum sarih dang a rawng a bâwlsak leh a ngai thung ang. (Gen. 29:25-27) Labana chuan Jakoba hlawh tûr chungchângah pawh dik lo takin thil a ti a. Chutiang chuan kum 20 chhûng zet Jakoba chungah dik lo takin a ti a ni!—Gen. 31:41, 42.

6. Eng harsatna dangte nge Jakoba’n a tawrh?

⁶ Jakoba chuan harsatna dang pawh a tuar a. Ani chuan chhûngkaw hung tak a nei a; mahse, a fapate chu inngeih takin an awm reng thei lo. An unaupa ngei, Josefa chu salah an hralh hial a ni. Jakoba fapa pahnih, Simeona leh Levia te chuan an chhûngkaw hming leh Pathian Jehova hming an tichhia a. Chu bâkah, Jakoba nupui duh tak Rakili chu fa pahnihna a hrin laiin a thi a ni. Ṭâm nasa tak a tlâk avângin, a tar lamah Jakoba chu loh theih lohva Aigupta rama a pêm a ngai bawk.—Gen. 34:30; 35:16-19; 37:28; 45:9-11, 28.

7. Engtin nge Jehova’n Jakoba chu A duhsakna a dawng tih a hriattîr?

⁷ Hêng zawng zawngah hian Jakoba chuan Jehova leh A thutiamte a rinna a hloh ngai lo va. Chuvângin, Jehova’n A duhsak a hlawh tih a hriattîr a ni. Entîr nân, Labana’n a bum chung pawhin Jehova’n Jakoba chu tisa lamah mal a sâwm a. Hun rei tak chhûng thi tawha a ngaih, a fapa Josefa nêna an inhmuh laia Jehova chunga Jakoba lâwm dân tûr chu han mitthla teh! Jehova nêna an inṭhian ṭhatna chuan Jakoba chu a harsatna tawhte hlawhtling takin a hmachhawntîr thei a ni. (Gen. 30:43; 32:9, 10; 46:28-30) Keini pawhin Jehova nêna kan inṭhian ṭhatna kan vawng tlat a nih chuan, beisei loh harsatnate chu hlawhtling takin kan hmachhawn ve thei ang.

8. Lal Davida’n eng tih nge a duh?

⁸ Lal Davida chuan Jehova rawngbâwlnaah a tih duh ang apiang a ti vek thei lo va. Entîr  nân, Davida chuan a Pathian tân biak in sak a châk hle a. Chu chu zâwlnei Nathana hnênah a hrilh a. Nathana chuan: “I rilrua i vei ang tak chuan ti ta che; Pathian i hnênah a awm si a,” tiin a lo chhâng a ni. (1 Chro. 17:1, 2) Chûng thute’n Davida a tihphûr dân tûr chu kan ngaihtuah thei a. Ani chu, chu hna hautak tak atân chuan a inbuatsaih ṭan nghâl ngei a rinawm.

9. Engtin nge Davida’n thu thar duhawm lo tak chu a chhân lêt?

⁹ Rei lote hnuah, Jehova zâwlnei chu thu thar duhawm lo tak nên a rawn kîr leh a. “Chumi zân vêk chuan” Jehova’n Nathana hnênah Davida chu biak in satu tûr a ni lovang a, a fapate zînga pakhatin a sa zâwk ang tih a hrilh a ni. (1 Chro. 17:3, 4, 11, 12) Chu thu a hriat chuan Davida’n engtin nge a chhân lêt? A thiltum chu a siamrem a. A fapa Solomona’n biak in sakna atâna a mamawh tûr sum leh hmanruate lâkkhâwmsak chu a tum ta zâwk a ni.—1 Chro. 29:1-5.

10. Engtin nge Jehova’n Davida mal a sâwm?

¹⁰ Davida chu biak in satu tûr a ni dâwn lo tih hrilh a nih hnu lawkah, Jehova’n thu a thlunpui a. A thlahte zînga pakhatin chatuanin ro a rêl dâwn tih a tiam a ni. (2 Sam. 7:16) Khawvêl tharah, a chhûngkaw thlah aṭanga Lal pakhat, Isua Kum Sâng Rorêlna hnuaiah nun a chên tih a hriat huna Davida hlim tûrzia chu han mitthla teh! He thilthleng hian Jehova tâna kan beisei anga thil kan tih theih loh hunah pawh, kan Pathian chuan kan beisei loh malsâwmnate min vûr thei tih min hriattîr a ni.

11. Kum zabi khatnaa Kristiante chu an beisei huna Pathian Ram a lo thleng lo chung pawhin, engtianga malsâwm nge an nih? (Tirhkohte 6:7)

¹¹ Kum zabi khatnaa Kristiante chuan an beisei loh harsatnate an hmachhawn a. Entîr nân, Pathian Ram lo thlen hun tûr chu an nghâkhlel hle a; mahse, chumi lo thlen hun tûr chu an hre lo. (Tirh. 1:6, 7) Chuvângin, eng nge an tih tâk? Thu hrilh rawngbâwlnaah an buai reng a. Chanchin ṭha a darh zêl rualin, an ṭan lâknate chunga Jehova malsâwmna chu chiang takin an hmu a ni.—Tirhkohte 6:7 chhiar rawh.

12. Ṭâm a tlâk laiin kum zabi khatnaa Kristiante’n eng nge an tih?

¹² Ṭum khat chu “khawvêl zawng zawngah” ṭâm nasa tak a tla a. (Tirh. 11:28) Kum zabi khatnaa Kristiante pawhin an tuar ve a ni. Chu ṭâm nasa takin anmahni a nghawng dân tûr chu i mitthla thei em? Chhûngkaw lûte chuan an chhûngkua an châwm dân tûr chu an lungkham ngei ang. An rawngbâwlna zauh tûra ruahmanna nei ṭhalaite chu engtin nge an awm ang? Ṭâm tla a zawh thleng an nghah a ngai niin an hre mai thei. An dinhmun chu eng pawh ni se, Kristiante chu an insiamrem a. Chu bâkah, Judai rama an Kristian unaute chu an thil neihte lâwm takin an sem a ni.—Tirh. 11:29, 30.

13. Ṭâm tlâk laiin Kristiante’n eng malsâwmnate nge an dawn?

¹³ Ṭâm tlâk laiin Kristiante’n eng malsâwmnate nge an dawn? Chhawmdâwlna dawngtute chuan Jehova’n a ṭanpui tih an hmu a. (Mt. 6:31-33) Anmahni ṭanpui tûra lo kal an Kristian unaute chu hnaih lehzual niin an inhre ngei ang. Thawhlâwm thawhtute, a nih loh leh chhawmdâwlna hnaa telte chuan pêkna aṭanga lo awm hlimna an nei a ni. (Tirh. 20:35) Dinhmun inthlâk danglamna mila an insiamrem avângin an zain Jehova’n mal a sâwm a ni.

14. Barnaba leh tirhkoh Paula chungah eng nge thleng a, chu chuan eng nge a rah chhuah? (Tirhkohte 14:21, 22)

¹⁴ Kum zabi khatnaa Kristiante chuan tihduhdahna an tâwk fo va, a châng chuan an beisei loh lai pawhin an tâwk ṭhîn a ni. Lustra  khaw chhehvêla thu an hrilh laia Barnaba leh tirhkoh Paula chunga thil thleng hi han ngaihtuah teh. A tîrah, an thusawi ngaithlatute chuan an lo lâwm hle a. Mahse, a hnuah dodâltute’n “mipuite chu an thlêm thlu” a, chûng zînga ṭhenkhat chuan tirhkoh Paula chu lunga dêngin thi tûrin an kalsan a. (Tirh. 14:19) Mahse, Barnaba leh Paula chuan hmun dangah thu an hril zawm zêl a ni. Eng nge a rah chhuah? “Zirtîr tam tak” an siam a, an thusawi leh entawn tûr siam chuan an Kristian unaute a tinghet a ni. (Tirhkohte 14:21, 22 chhiar rawh.) Tihduhdahna an tâwk chung pawha Barnaba leh Paula tlâwm mai lohna chu mi tam takin an hlâwkpui a ni. Jehova hnathawh tûr min pêk hi tlâwm lova kan thawh chhûng chuan malsâwmna kan dawng ang.

15. Unau A. H. Macmillan-a hnên aṭangin eng nge i zir?

¹⁵ Kum 1914 thlen hma kumahte chuan, Jehova mite’n beiseina sâng tak an lo nei a. Entîr nân, Unau A. H. Macmillan-a chungchâng hi lo ngaihtuah ta ila. Chumi hun laia mi tam takte ang bawkin, Unau Macmillan-a chuan a vân lam lâwmman chu dawng vat tûrin a inngai a. Kum 1914 September thlaa a thusawiah: “Hei hi ka vântlâng thusawi tâwpna ber tûr a ni mai thei,” tiin a sawi a ni. Mahse, chu chu a vântlâng thusawi tâwp ber a ni lo. A hnuah, heti hian a ziak a ni: “Kan zînga ṭhenkhat chu vâna kai nghâl tûrin kan inring hma lutuk niin a lang,” tiin. Heti hian a sawi belh a ni: “Kan tih tûr chu Lalpa hna ṭhahnemngai taka thawh hi a ni,” tiin. Unau Macmillan-a chu rawngbâwlnaah a buai hle a, ṭhahnem a ngai hle bawk. Ani chuan an tualdawihna avânga tân ina tâng unau tam takte fuih theihna chanvo a nei a. A tar hnuah pawh kohhran inkhâwmnaah rinawm takin a tel ṭhîn a ni. Engtin nge Unau Macmillan-a chuan a lâwmman dawn tûr nghâk chunga Jehova rawngbâwlnaa buai rengna chu a hlâwkpui? Kum 1966-a a thih hma lawkin, heti hian a ziak a ni: “Ka rinna chu tûn hma ang bawkin a la chak reng a ni,” tiin. A bîk takin, kan beisei aia rei harsatna kan tâwk a nih chuan, a rilru put hmang chu kan tân entawn tûr ṭha a va ni êm!—Heb. 13:7.

16. Herbert Jennings-a leh a nupuiin beisei loh eng harsatna nge an tawh? (Jakoba 4:14)

¹⁶ Jehova mi tam tak chuan beisei loh takin hrisêlna lamah harsatna an nei a. Entîr nân, Unau Herbert Jennings-a b chuan an nupaa Ghana rama missionary nia an rawngbâwlna chu nuam an tih thu a sawi a. Mahse, a hnuah nasa taka rilru awm dân inthlâk thut thut ṭhîn natna a nei a ni. Unau Jennings-a chuan Jakoba 4:14 thu la chhuakin, a dinhmun thar chu “kan beisei loh ‘naktûk’” tiin a sawi a. (Chhiar rawh.) Ani chuan heti hian a ziak a ni: “Chu kan thiltawn avâng chuan Ghana ram leh kan ṭhian ṭha tak takte chu kalsana Canada rama [damdawi lama inenkawl tûrin] lêt leh chu kan tum ta a ni,” tiin. Jehova’n Unau Jennings-a leh a nupui chu harsatna an tâwk chung pawha rinawm taka rawngbâwl zawm zêl tûrin a ṭanpui a ni.

17. Engtin nge Unau Jennings-a thiltawn chu Kristian unaute’n an hlâwkpui?

¹⁷ Unau Jennings-a thusawite chuan mite a ṭanpui nasa hle a. Unaunu pakhat chuan heti hian a ziak a ni: “He thuziak anga ka rilru khawih hi ka la chhiar ngai lo. . . . Unau Jennings-a’n inenkawl tûra a chanvo a kalsan dân ka chhiarna chuan, inbûk tâwk taka ka dinhmun thlîr tûrin min ṭanpui a ni,” tiin. Chutiang chiah chuan unaupa pakhatin heti hian a  ziak ve bawk: “Kum sâwm chhûng kohhran upa nia rawng ka bâwl hnuah, rilru lam natna ka neih avângin ka chawlhsan a ngai a. Tlâk tlai lo nia inhriatna ka neih nasat êm avângin nun kawng chanchinte chhiar peih lo khawp hiala lunghnual châng ka nei a ni. . . . Mahse, Unau Jennings-a beih fan fanna chuan min tichak hle,” tiin. Hei hian beisei loh harsatnate kan tâwk chung pawhin mi dangte kan tichak thei tih min hriatnawntîr a ni. Kan beisei anga thil a thleng lo a nih pawhin rinna leh chhelna kawngah entawn tûr kan la ni thei reng tho a ni.—1 Pet. 5:9.

18. Milema kan hmuh ang hian Nigeria rama hmeithai pakhat thiltawn aṭangin eng nge i zir?

¹⁸ COVID-19 ang chi hripui lêngte chuan Jehova mi tam tak a nghawng a. Entîr nân, Nigeria rama hmeithai pakhat chuan ei tûr leh sum hman tûr tlêm tê chauh a nei a. Tûk khat chu, a fanuin an buhfai neih chhun an chhum zawh hnuah eng nge an ei leh ang tih a zâwt a. Kan unaunu chuan a fanu chu pawisa leh ei tûr nei tawh lo mah se, Zarephath hmeithai chu entawnin an ei tûr neih chhun chu Pathian Jehova chunga rinna pumhlûm nghatin an buatsaih tûr a ni tih a hrilh a ni. (1 Lal. 17:8-16) Chumi nîa chhûn chaw atân eng nge an ei ang tih pawh an ngaihtuah hmain, an Kristian unaute hnên aṭangin ṭanpuina an dawng a. Chu an ṭanpuina dawnah chuan chawlhkâr hnih aia tam daih ei tûr a tel a ni. Chu unaunu chuan a fanu hnêna a thusawi chu Pathian Jehova’n chutiang khawpa ranga a chhân a rin loh thu a sawi. A nihna takah chuan, Pathian Jehova kan rinchhan hian nuna harsatnate kan tawh hunah, chûngte chuan amah min hnaihtîr lehzual thei a ni.—1 Pet. 5:6, 7.

19. Aleksey Yershov-a’n eng ang tihduhdahna nge a tawrh?

¹⁹ Tûn hnai kumahte khân, kan unau tam takin an beisei loh tihduhdahna an tuar a. Russia rama chêng Unau Aleksey Yershov-a chungchâng hi han ngaihtuah teh. Kum  1994-a baptisma a chan lai chuan, chu hmuna chêng Jehova mite chuan zalênna engemaw chen an la nei a. Mahse, chumi hnu kumahte chuan Russia ram dinhmun chu a inthlâk a. Kum 2020-ah, Unau Yershov-a in chu luh khunga dap a ni a, a thil neih tam takte pawh chhuhsak a ni. Thla engemaw zât a liam hnuah, sawrkârin dân bawhchhia angin thubuai a siamsak a. Chu thubuai siamsak nâna an ṭanchhan video chu, kum khat chuang Bible zir duh anga lem chang mi pakhat siam a ni chu a lungchhiatthlâk hle. Inbumna tenawm tak a va ni êm!

20. Engtin nge Unau Yershov-a chuan Jehova nêna an inlaichînna a tihngheh?

²⁰ Unau Yershov-a tihduhdahna tawrh chuan nghawng ṭha engemaw tal a nei em? Nei e. Jehova nêna an inlaichînna a nghet lehzual a. Ani chuan: “Ka nupui nên nasa lehzualin kan ṭawngṭai dûn ṭhîn a. Jehova ṭanpuina tel lo chuan chu dinhmun chu ka tawrh chhuah theih ka ring lo,” tiin a sawi a. Heti hian a sawi belh a ni: “Mahnia inzirna chuan lunghnualna do thei tûrin min ṭanpui a. Hun kal tawha mi rinawmte entawn tûr siam chu ka chhût ngun a. Thlamuang taka awm a, Jehova rinchhan a pawimawh dân târ langtu Bible-a thilthleng tam tak a awm a ni,” tiin.

21. He thuziakah hian eng nge kan zir?

²¹ He thuziakah hian eng nge kan zir? He khawvêlah hian beisei loh harsatnate kan tâwk ṭhîn a. Chutichung pawhin, Jehova’n a chhiahhlawhte chu amah an rinchhan chuan a ṭanpui ziah ṭhîn. He thuziak ṭanchhan Bible chângin a târ lan angin, “mi fel hrehawmnate chu a tam a, nimahsela LALPAN chûng zawng zawngah chuan a chhan chhuak ṭhîn,” a ni. (Sâm 34:19) Kan harsatnate ni lovin, Jehova min ṭanpui theihna chu i ngaihtuah tlat ang u. Chutianga kan tih chuan tirhkoh Paula angin: “Mi tichaktuah chuan engkim ka ti thei a ni,” tiin kan sawi ve thei ang.—Phil. 4:13.