1. Engvângin nge inkhâwmnaahte chhânna kan pêk?

 ENGVANGIN nge kohhran inkhâwmnaah kan tel? A chhan bul ber chu Jehova fak tûrin a ni a. (Sâm 26:12; 111:1) Hêng hun khirh tak chhûnga infuih tawn tûr pawhin kan inkhâwm bawk. (1 Thes. 5:11) Bân phara chhânna kan pêk hian chûng thiltum pahnihte chu kan tihlawhtling a ni.

2. Kan inkhâwma eng hunah nge chhânna kan pêk theih?

² Chawlhkâr tin hian inkhâwmnaah chhânna pêk theihna hun remchâng kan nei a. Entîr nân, chawlhkâr tâwpah chuan, kohhrana Vênnainsâng Zirnaah chhânnate kan pe thei a ni. Chawlhkâr chhûng inkhâwmahte chuan Thlarau Lam Lunghlu te, Kohhrana Bible Zirna te, leh sawihona ang chi thil dangahte chuan chhânna kan pe thei bawk.

3. Kan tâna chhânna pêk tiharsa thei thilte chu eng nge ni a, engtin nge Hebrai 10:24, 25-nain min ṭanpui theih?

³ Kan za hian Pathian Jehova fak leh kan Kristian unaute fuih chu kan duh ṭheuh va. Mahse, kan tâna chhânna pêk tiharsa thei thilte a awm a ni. Chhânna pêk kan ngam lo mai thei a, a nih loh leh chhânna pêk chu kan duh hle a; mahse, kan duh anga zingin chhânna pe tûra koh kan ni lo thei. Chûngte chu engtin nge kan hmachhawn theih ang? Hebrai mite hnêna tirhkoh Paula lehkhathawnah a chhânna kan hmu a ni. Inkhâwm pawimawhzia a sawinaah, ani chuan “infuih tawn” kan tum tlat tûr a ni tih a sawi a. (Hebrai 10:24, 25 chhiar rawh.) Kan rinna târ langtu chhânna ho tê pêkna pawhin, mi dangte a tichak thei tih kan hre reng a nih chuan  chhânna pêk hlauhna kan nei tlêm lehzual ang. Bân kan phar apianga koh kan nih loh pawhin, kohhrana mi dangte’n chhânna an pêk theih avângin kan hlim thei a ni.—1 Pet. 3:8.

4. He thuziakah hian eng thil pathumte nge sawiho a nih ang?

⁴ He thuziakah hian chhânna petu tlêm tê awmna kohhran têa kan infuih tawn theih dân kan sawiho hmasa ang a. Tichuan, chhânna pe tûra bân phar tam tak awmna kohhran liana kan infuih tawn theih dân pawh kan bih chiang bawk ang. A tâwpah, chhânna kan pêk huna kan thusawite hmanga mi dangte kan fuih theih dân kan sawiho vang.

5. Mi tlêm tê inkhâwmnaah engtin nge kan infuih tawn theih?

⁵ Kohhran tê, a nih loh leh group-ah chuan zirna kaihruaitu tân chhânna pe tûra koh tûr tam tak an awm lo va. A châng chuan chhânna pe tûra bân phar an awm hmain a nghah deuh hlek a ngai thei. Inkhâwm chu ninawm leh infuih tawnna awm lo angin a lang thei a ni. Eng nge i tih theih? Chhânna pe tûrin bân phar ziah ṭhîn ang che. Chutianga i tih chuan mi dangte pawh chhânna tam lehzual pe tûrin i chêttîr thei a ni.

6-7. Chhânna pêk chungchânga lungkhamna kan neihte chu engtin nge kan tihkiam theih?

⁶ Chhânna pêk chu i ngaihtuah ringawt pawha i zâm a nih chuan, engtin nge ni ang? Mi tam tak chutiang chuan an awm a ni. Mahse, i unaute fuihtu ṭha lehzual ni tûrin, chhânna pêk hlauhna tihkiam theih dân kawng engvângin nge i zawn loh vang? Engtin nge chutiang chuan i tih theih?

⁷ Vênnainsâng tihchhuah tawhtea rawtna ṭhenkhat ennawn chu ṭangkai i ti mai thei. b Entîr nân, ṭha takin inbuatsaih ang che. (Thuf. 21:5) A thute i hriat chian poh leh, chhânna pêk chu awlsam i ti lehzual ang. Chu bâkah, tâwi têin chhâng rawh. (Thuf. 15:23; 17:27) Chhânna tâwi tê pêk chu i huphurh lo zâwk ang. Chhânna sei tak aiin, chhânna tâwi tê, thu châng kim pahnih khat ang chi chu i unaute tân hriatthiam a awlsam zâwk mai thei. I irâwm chhuaka chhânna tâwi tê pêkna hmangin, ṭha takin i inbuatsaih tih leh zirlai thute chu i hre chiang tih i lantîr a ni.

8. Engtin nge Jehova’n theih tâwp kan chhuahna chu a thlîr?

⁸ Hêng rawtnate hi i tichhin chung pawha vawi khat aia tam chhânna pêk i la ngam lo a nih chuan, engtin nge ni ang? I tih theihte ti tûra theih tâwp i chhuahna chu Jehova’n a ngaihlu ang tih ring tlat rawh. (Lk. 21:1-4) Jehova chuan kan tih theih aia tam ti tûrin min phût lo. (Phil. 4:5) I tih theih tûrte chu hriat tum la, chumi ti tûr chuan thiltum insiam la, rilru thlamuanna nei tûrin ṭawngṭai ang che. A tîrah chuan chhânna tâwi tê pêk i tum thei a ni.

9. Kohhran lianahte chuan eng harsatna nge awm mai thei?

⁹ In kohhranah thuchhuahtu tam tak an awm a nih chuan harsatna dang a awm thei a. Chhânna pe tûra unau tam tak an awm avângin koh i ni lo fo pawh a ni thei. Entîr nân, Danielle-i chuan inkhâwmnaah chhânna pêk chu nuam a ti thei hle a. c Chu chu a biakna pêng pakhat ang te, mi dangte tihchak  theih dân kawng ang te, leh Bible zirtîrnatea a rinna tihngheh theih dân kawng angtein a thlîr a ni. Mahse, kohhran lian zâwkah a insawn hnu chuan chhânna pe tûra koh a ni lo fo va, a châng phei chuan inkhâwm pumpuiah vawi khat mah koh a ni lo. Ani chuan, “Ka lunghnual hle a. Chanvo hlu tak chân angin ka inngai a. Chutianga a nih fo tâkah chuan, min ko duh lo lui anga ngaih a awl khawp mai,” tiin a sawi.

10. Engtin nge chhânna pêk theihna hun remchâng tam lehzual kan neih theih ang?

¹⁰ Danielle-i ang chuan i awm ve tawh ṭhîn em? I awm tawh ṭhîn a nih chuan, inkhâwmah chhânna pe tawh lova, lo ngaihthlâk tawp i tum pawh a ni thei. Mahse, chhânna pe chhunzawm zêl ang che. Eng nge i tih theih? Inkhâwm tina chhânna tam tak pe tûra lo inbuatsaih chu ṭangkai i ti viau mai thei. Zirna ṭan tîra chhânna pe tûra koh i ni lo a nih pawhin, inkhâwm chhûng zawngin chhânna pêk theihna hun remchâng dang i la nei reng a ni. Vênnainsâng Zir Tûr atâna i inbuatsaih hunah, paragraph tinte chu thuziak thupui nêna a inthlun zawm dân ngaihtuah ang che. Chutianga i tih chuan, zir chhûng zawngin chhânna ṭha tak pêk theih tûrte i neih ngei a rinawm. Chu bâkah, thutak ril zâwk, hrilhfiah harsa zualte chuanna paragraph-a chhâng tûrin i inbuatsaih thei bawk. (1 Kor. 2:10) Engvângin nge? A chhan chu, chûng paragraph-ah chuan chhâng tûra bân phar an tlêm mai theih vâng a ni. A nih leh, hêng rawtna zawng zawngte hi i zâwm chung pawha inkhâwma chhânna pêk theihna hun remchâng i la nei lo fo a nih chuan, engtin nge ni ang? Inkhâwm hmain, zirna kaihruaitu hnênah zawhna i chhân duh bîk chu i lo hrilh lâwk thei a ni.

11. Philippi 2:4-in eng ti tûrin nge min fuih?

¹¹ Philippi 2:4 chhiar rawh. Thlarauva thâwk khuma awmin tirhkoh Paula chuan mi dangte ṭhatna tûr zawng tûrin Kristian unaute chu a fuih a. Chu fuihna chu engtin nge inkhâwmnaah kan nunpui theih ang? Mi dangte pawhin, keimahni ang bawkin chhânna pêk an duh tih hriatrengna hmangin a ni.

12. Inkhâwma mi dangte tihchak theih dân kawng ṭha tak chu eng nge ni? (Milem en bawk rawh.)

¹² Hetiang hian han ngaihtuah teh. I ṭhiante  nêna in tîtî hunah an tâna ṭawng ve theihna hun remchâng awm lo khawpin i ṭawng tam lutuk ang em? Chutiang chuan i ti lo ngei ang! In tîtînaah chuan anni pawh teltîr i duh a ni. Chutiang bawkin, inkhâwmnaah hian mi a tam thei ang berin chhânna an pêk chu kan duh a. A nihna takah chuan, kan unaute kan tihchak theih dân kawng ṭha ber pakhat chu, an rinna sawi chhuah theihna hun remchâng pêk hi a ni. (1 Kor. 10:24) Chutianga kan tih theih dân i lo ngaihtuah ang u.

13. Inkhâwma a tam zâwkin chhânna an pêk theih nân eng nge kan tih theih?

¹³ Kan tih theih pakhat chu tâwi têin chhânna kan pe thei a, chu chuan mi tam lehzual chhânna pêk theihna hun a siam a ni. Kohhran upate leh tawn hriat ngah thuchhuahtute chuan entawn tûr an siam thei a. Chhânna tâwi tê i pêk hunah pawh, a thu pawimawh lai zawng zawng sawi suh ang che. Paragraph-a thu zawng zawng i chhâng a nih chuan mi dangte chhân tûr a awm tawh lo vang. Entîr nân, he paragraph-ah hian rawtna pahnih târ lan a ni a, tâwi têa chhânna pêk leh a thu pawimawh lai tam tak sawi loh a ni. He paragraph-a chhâng tûra koh hmasak ber i nih chuan, engvângin nge a thu pawimawh lai pakhat chauh i sawi loh vang?

14. Engtianga zingin nge bân kan phar ang tih hre tûrin engin nge min ṭanpui thei? (Milem en bawk rawh.)

¹⁴ Chhânna pe tûrin engtianga zingin nge bân i phar ang tih hre tûrin remhriatna hmang ang che. Kan phar zing lutuk a nih chuan, mi dangte’n chhânna hun remchâng la nei lo mah se, kaihruaitu chu min zâwt fo tûrin nawr nia inhriatna kan neihtîr thei a. Chu chuan mi dangte bân phar hrehna a neihtîr thei a ni.—Thur. 3:7.

15. (a) Chhânna pe tûra koh kan nih loh pawhin engtin nge kan awm ang? (b) Engtin nge kaihruaitute’n mi zawng zawng chungah ngaihsakna an lantîr theih? (“ Kaihruaitu I Nih Chuan,” tih bâwm chu en rawh.)

¹⁵ Zirna neih laiin thuchhuahtu tam takin bân an phar a nih chuan, kan duh anga zingin chhânna kan pe thei lo pawh a ni thei a.  A châng chuan, kaihruaitu chuan vawi khat mah min ko lo pawh a ni thei. Chu chu a lunghnualthlâk thei a; mahse, min ko lo a nih pawhin lungnih loh nân kan hmang tûr a ni lo.—Thur. 7:9.

16. Chhânna petu mi dangte chu engtin nge kan tihchak theih?

¹⁶ I duh anga zingin chhânna i pe thei lo a nih pawhin, engvângin nge mi dangte chhânna pêk chu ngun taka ngaithlain, inkhâwm bânah an chhânna pêk avânga i fak loh vang? I unaute i fakna chuan chhânna i pêk tlukin anni chu a tichak thei a ni. (Thuf. 10:21) A nihna takah chuan, mi dangte fak hi kan infuih tawn theih dân kawng dang pakhat a ni tho a ni.

17. (a) Engtin nge nu leh pate chuan an fate chu chhânna inâwm tak inbuatsaih tûra an ṭanpui theih? (b) Video-a kan hmuh angin, chhânna inbuatsaih tûra kan tih theih rahbi pali chu engte nge ni? (Footnote en bawk rawh.)

¹⁷ Inkhâwmnaah hian eng kawng dangin nge kan infuih tawn theih? Nu emaw, pa emaw i nih chuan, i fate chu an kum mila chhânna inâwm tak inbuatsaih tûrin ṭanpui ang che. (Mt. 21:16) A châng chuan, zirna neih chhûngin nupa inkâra buaina, a nih loh leh nungchang nêna inkûngkaih thu ang chi thu pawimawh takte chu sawiho a ni a; mahse, chumi chungchângah chuan naupangin a chhân theih tûr paragraph pahnih khat a  awm mai thei a ni. Chu bâkah, i fate chu an bân phar apianga koh an nih loh theih chhan hre thiam tûrin ṭanpui bawk ang che. Chutianga hrilhfiahna chuan chhânna pe tûra anmahni aia mi dangte koh an nih hunah lunghnual lo tûrin a vêng thei a ni.—1 Tim. 6:18. d

18. Engtin nge chhânna kan pêk hunah mi dangte ngaihsakna lâk chu kan pumpelh theih ang? (Thufingte 27:2)

¹⁸ Kan za hian Jehova chawimawitu leh kan Kristian unaute tichak theitu chhânna ṭha tak pe tûrin kan inbuatsaih thei a. (Thuf. 25:11) A châng chuan, kan mi mal thiltawn tâwi kan chhâng pawh a ni thei a, chutiang hunah chuan mahni chungchâng kan sawi tam lutuk tûr a ni lo. (Thufingte 27:2 chhiar rawh; 2 Kor. 10:18) Chu aiin, Pathian Jehova, a Thu, leh a mite chu kan ngaihven tlat zâwk tûr a ni. (Thup. 4:10, 11) Amaherawhchu, paragraph-a zawhnain mi mal chungchâng min zâwt a nih erawh chuan, chutianga tih chu a inâwm a ni. A dawta thuziakah hemi chungchânga entîrna pakhat kan hmu ang.

19. (a) Inkhâwmnaa tel zawng zawngte chunga ngaihsakna kan lantîrna chuan eng nge a rah chhuah ang? (Rom 1:11, 12) (b) Inkhâwmnaa chhânna pêk chungchângah a mi mal takin eng nge i ngaihhlut?

¹⁹ Chhânna pêk chungchângah dân khauh tak awm lo mah se, kan za hian mi tichak thei tak chhânnate pêk kan tum ṭheuh thei a ni. Chutah chuan chhânna pêk ngun lehzual a tel thei a. A nih loh leh, chhânna kan pêk theih chhuna lungawi leh mi dangte pawhin chhânna pêk theihna hun remchâng an neih avânga hlimna a tel thei a ni. Kohhran inkhâwmtea mi dangte ṭhatna tûr ngaihtuah tlatin, kan zain “kan inthlamuan tawn” thei a ni.—Rom 1:11, 12 chhiar rawh.