Isua pianna leh a naupan lai chungchâng Matthaia ziak leh Luka ziak inan loh chhan chu, mi hrang pahnihin an ngaihtuah dân leh an thiltawnte an târ lan vâng a ni.

Matthaia ziak hian Josefa chungchânga thilthlengte a târ lang a. Chutah chuan, Mari a rai tih a hriat huna Josefa ngaih dân te, a mumanga vântirhkohvin chu dinhmun a hrilhfiah dân te, leh vântirhkoh kaihhruaina a zawm dânte chu a chuang a ni. (Matthaia 1:19-25) Chu bâkah, Josefa chu an chhûngkuaa Aigupta rama tlân tûrin a mumangah vântirhkohvin a hrilh thu leh, chu thu a zawm dânte a chuang bawk a. Tichuan, ṭum danga a mumangah vântirhkohvin Josefa chu Israel rama kîr leh tûra a hrilh thu te, a kîr leh ngei thu te, leh Nazareth khuaa chhûngkaw din a tum thute chu Matthaia buah kan chhiar bawk a ni. (Matthaia 2:13, 14, 19-23) Chanchin Ṭha Matthaia bung khat leh bung hnihah Josefa hming vawi riat a chuan laiin Mari hming erawh vawi li chauh a chuang a ni.

Luka ziak ve thung chuan Mari chungchâng a sawi uar a. Chutah chuan, vântirhkoh Gabriela’n Mari a tlawh thu te, Mari’n a laizâwnnu Elizabethi a tlawh thu te, leh Jehova a chawimawi thute a chuang a ni. (Luka 1:26-56) Chu bâkah, Simeona’n Mari hnênah nakin huna Isua hrehawm tawrh tûr chungchâng a hrilh thu pawh a chuang bawk. Tichuan, Isua kum 12 mi a nihin a chhûngte nên biak in an tlawh thu Luka’n a târ lang bawk a ni. He Luka thuziakah hian Josefa thusawi ni lovin, Mari thusawite târ lan a ni a, chûng thilthlengte’n Mari rilru a khawih dân kan chhiar bawk. (Luka 2:19, 34, 35, 48, 51) Chanchin Ṭha Luka ziak bung khat leh bung hnihah, Mari hming vawi 12 a chuan laiin, Josefa hming erawh vawi 3 chauh a chuang a ni. Chuvângin, Matthaia hian Josefa ngaihtuah dân leh a thiltihte chu min hrilh deuh bîk a. Luka erawh chuan Mari ngaihtuah dân leh a thiltawnte a sawi uar a ni.

He Chanchin Ṭha bu pahniha Isua chhûngkaw chungchâng târ lan dân pawh a inang lo. Matthaia chuan Josefa chhûngkuate târ langin, Isua chu Josefa fapa nia sawiin Davida lalna chang tûrin dân angin dikna a nei tih a sawi a. Engvângin nge? Josefa chu Davida fapa Solomona kal tlanga Lal Davida thlah a nih vâng a ni. (Matthaia 1:6, 16) Luka ve thung chuan Mari chhûngkuate târ langin Isua chuan “tisa lam thu-ah” Davida lalna chang tûrin leilung dân angin dikna a neih thu a sawi a. (Rom 1:3) Engvângin nge? Mari chu Davida fapa Nathana kal tlanga Lal Davida thlah a nih vâng a ni. (Luka 3:31) A nih leh, engvângin nge Luka chuan Mari chu a pa Helia fanu anga a sawi loh? A tlângpui thuin chhûngkua mipate chauh hi chhinchhiah bîk an nih ṭhin vâng a ni. Chuvângin, Luka chuan Josefa chu Helia fapa anga a sawi hian ani chu Helia mâkpa a ni tih mite’n an hre thiam nghâl mai a ni.—Luka 3:23.

Chanchin Ṭha Matthaia leh Luka ziaka Isua chhûngte chanchin hian ani chu Pathian tiam Messia a nihzia a nemnghet a. Isua chu Lal Davida thlah a ni tih hi hriat lâr tak a nih avângin Pharisaite leh Saddukaite meuh pawhin chu chu an hnial lo. Matthaia leh Luka bua chuang Isua chhûngkaw chanchin hian kan rinna a tihchak bâkah, nakina thleng famkim tûr Pathian thutiam dangte pawh min rin nghehtîr bawk a ni.