KUM 1932 November thla nawi lama, mi maktaduai khat aia tam chênna Mexico Khawpuiah a ni a. Kâr hmasa mai khân, a hmasa ber atân traffic mei êng vuah a ni a. Mahse, mite chu thil dang pakhat avângin an phûr hle a ni. Chanchin latute chuan an camera-te inpeihsain rêl chawlhna hmuna khual lian pakhat lo thleng tûr chu an nghâk a. Chu pa chu tu nge ni? Watch Tower Society hruaitu ber Joseph F. Rutherford-a a ni. Tualchhûng Thuhretute pawhin ni thum awh inkhâwmpui rawn hmang tûr Unau Rutherford-a hmuak tûrin an lo nghâk ve bawk.

Golden Age chuan: Mexico rama thutak theh darhnaah “he inkhâwmpui hi thilthleng pawimawh tak angin mihring chanchinah chhinchhiah a ni ngei ang,” tiin a sawi. Mahse, hei hi mi 150 chauh telna inkhâwmpui pakhat ve mai a ni a. A nih leh, chu chu engvânga pawimawh êm êm nge a nih?

Chu inkhâwmpui hma chuan Mexico ramah thutak a la darh nasa lo va. Kum 1919 aṭangin inkhâwmpui tê tham tak an nei ve a, a hnu kum engemaw chhûng chu kohhran a kiam telh telh a ni. Kum 1929-ah Mexico Khawpuiah branch office hawn a nih chuan dinhmun chu a ṭhat chhoh hmêl hle a; mahse, hmachhawn tûr harsatnate pawh a la awm tho a ni. Inawpna pâwl chuan tûna pioneer kan tih colporteur-te chu thu hrilh rawngbâwl hna an thawh laiin sumdâwnna hna thawk lo tûrin a hrilh a. Chumi avângin colporteur pakhat chu a thinrim hle a, thutak chhuahsanin, Bible zir pâwl pakhat a din a ni. Chu bâkah, chutih hun lai chuan branch overseer chu a nungchang ṭhat lohna avângin thlâk a ngai a. Mexico rama tualchhûng Thuhretute chuan fuihna an mamawh a ni.

Unau Rutherford-a chuan a tlawh hun chhûngin inkhâwmpuia thusawi nung tak pahnih leh radio aṭanga tihchhuah thusawi dang pangate hmangin chûng unau rinawmte chu nasa takin a fuih a. Hei hi Mexico ramah chanchin ṭha theh darhna atâna radio an hman hmasak ber ṭum a ni. Inkhâwmpui zawh chuan hna huai hawttu atânah branch overseer thar ruat a ni a. Tûnah chuan Thuhretute chu an phûr hlein, Jehova malsâwmna nên thu an hril chhunzawm zêl a ni.

A hnu kum 1933-ah chu ramah chuan inkhâwmpui pahnih neih a ni a, pakhat chu Veracruz khawpuiah a ni a, a dang pakhat chu Mexico Khawpuiah a ni. Unaute chuan thlawhhmaah theih tâwp an chhuah avângin rah ṭha an seng a. Entîr nân, kum 1931 khân thuchhuahtu 82 an awm a. Kum 1941-ah chuan a lêt sâwmin an pung a ni! Kum 1941-a neih Theocratic inkhâwmpui chhim tûrin mi 1,000 vêl chu Mexico Khawpuiah an rawn kal a ni.

Kum 1943-ah Thurhretute chuan Mexico rama  khawpui 12-a neih tûr “Hnam Zalên” tih Theocratic inkhâwmpui chu an tlâng zarh ṭan a. * (Footnote en rawh.) An tlâng zarh dân chu kawr hma lam leh hnung lama thil ziakte hmangin a ni. Chûng lehkha ziakte chu hawrawp lian tak tak a ni a, an kawr hma lam leh hnung lama bel a ni. Thuhretute chuan kum 1936 aṭangin an inkhâwmpui tlâng zarhna atân chutiang chu an lo hman tawh ṭhîn a ni.

Mexico Khawpuia chutianga an tlâng zarhna hmanrua chu a hlawhtlin hle avângin La Nación magazine chuan inkhâwmpui chhimtu Thuhretute chungchângah heti hian a sawi a ni: “Inkhâwmpui ni hmasa ber chuan mi tam lehzual sâwm tûra fuih an ni. A ni hnih nîah chuan inkhâwmpuina hmunah an kal khâwm a ni,” tiin a ziak. He hlawhtlinna avângin Catholic Church chu a lâwm lo hle a, Thuhretute chu a dodâl a. Mahse, unaute chuan an hlau lo. Inkhâwmpui tûr chungchâng chu an tlângzarh chhunzawm zêl a. La Nación magazine-a thuziak dang pakhat chuan: “Khaw chhûnga mi zawng zawngin Thuhretute chu an hmu,” a tih bâkah, “kawr hma lam leh hnung lama lehkha ziakte inthuama tlângzarhin an pung khâwm a ni,” tiin a sawi bawk. Mexico Khawpuia kalkawnga pung khâwm unaute thlalâk pawh a târ lang a, chu thlalâkah chuan: “Kalkawnga Pung Khâwmte,” tih lehkha ziak a chuang a ni.

Chûng kum chhûng chuan Mexico-a neih inkhâwm ṭhenkhata tel thei tûrin Thurhretu a tam zâwkte chu nasa taka an inpêk a ngai a. Unau tam takte chu rêl kawng leh khualzin kawng aṭanga hla taka awm khaw hrang hrang aṭanga lo kal an ni a. Kohhran pakhat chuan: “Chûng hmuna awmte biak pawh theih dân kawng awmchhun chu thîrhruia thu inthawn hi a ni,” tiin a ziak a. Chuvângin, inkhâwmpui chhim tûrte chuan inkhâwmpuina hmun thleng tûr rêl chuang tûrin sabengtung an chuan emaw, nî engemaw zât kea an kal emaw a ngai a ni.

Thuhretu tam tak chu an retheih avângin inkhâwmpui an kal thei zen zen lo va. Inkhâwmpuina hmun an thlen chuan hmangaihna leh khualchhâwn thiamna lantîrtu tualchhûnga Thuhretute inah an thleng a ni. Ṭhenkhat chu Kingdom Hall-ahte an riak a. Ṭum khat chu unau 90 vêl branch-ah an thleng a, chutah chuan lehkhabu dahna bâwmte phahin an mu a ni. Chûng lehkhabu dahna bâwmte chu “cement chhuat aia dûp leh lum zâwk” a nih avângin unaute chu an lâwm hle tih Yearbook chuan a târ lang.

Chûng Thuhretute tân chuan an unaute nêna awm khâwm thei tûra an inpêkna engpawh chu thil lâwmawm tak a ni. Tûnah, Mexico ramah chuan, Thuhretu mi 8,50,000 aia tam an awm a, anni pawh chutiang bawkin an lâwm ve a. * (Footnote en rawh.) Kum1949 Yearbook-a thuziak pakhatin unaute inpêkna chuan Pathian biaknaa an ṭhahnemngaihna a ti kiam lo tiin a sawi a. Inkhâwmpui an neih ṭhinte chu “a hnu hun rei takah pawh an tî tî thupui berte zînga mi” a la ni. Unaute zawhna zawh fo ṭhin chu, “Engtikah nge inkhâwmpui kan neih leh ang?” tih hi a ni.—From our archives in Central America.