1, 2. (a) Mihring tharin kan inthuam thei tih engtin nge kan hriat? (b) Kolossa 3:10-14-ah mihring thara eng miziate nge kan hriat ngai?

NEW World Translation of the Holy Scriptures Bible-ah “mihring thar” tih ṭawngkam hi vawi hnih kan hmu a. (Ephesi 4:24; Kolossa 3:10) Hei hi “Pathian anga siam” mize sawina a ni. Mihring thara inthuam chu a theih em? Thei e. Jehova’n mihringte chu a anpuia a siam avângin a mize duhawm takte chu kan entawn thei a ni.—Genesis 1:26, 27; Ephesi 5:1.

² Ṭhat famkim lohna kan rochun avângin kan vai hian châkna dik lo kan neih châng a awm a. Kan chhehvêl hian kan chungah nghawng a nei bawk. Mahse, Jehova ṭanpuina avângin a mi duhzâwng kan ni thei a ni. Chutiang mi ni tûra min ṭanpui theitu mihring thara tel mize hrang hrang chu i lo sawiho ang u. (Kolossa 3:10-14 chhiar rawh.) Chumi hnuah hêng miziate hi kan rawngbâwlnaa kan lantîr theih dân kan hmu ang.

3. Mihring thara tel mize pakhat chu eng nge ni?

³ Duhsak bîk neih lohna hi mihring thara mizia pawimawh tak a ni tih Paula’n a sawi a. Ani chuan: “Chu miah chuan Grik mi leh Juda mi, serhtan leh tan loh, awze mite, Skuthia mi te, bâwih te, bâwih lo te pawh a awm theih loh,” tiin a sawi. * (Footnote en rawh.) Kohhran chhûngah tumahin a hnam te, khua leh tui nihna te, leh khawtlânga a nihnate avângin mi dang aia ṭha zâwkah a inngai tûr a ni lo. Engvângin nge? Krista hnungzuitute kan nih avângin kan zain “pumkhat” kan ni.—Kolossa 3:11; Galatia 3:28.

4. (a) Engtin nge Jehova chhiahhlawhte chuan mi dangte an cheibâwl ang? (b) Eng dinhmunin nge Kristian inpumkhatna tiharsa thei?

⁴ Mihring thara kan inthuam chuan mite chu an hnam leh an ṭobul chu engpawh ni se, zahawm takin kan cheibâwl a. (Rom 2:11) Khawvêl hmun ṭhenkhatah chuan hei hi thil harsa tak a ni thei. Entîr nân, tûn hmaa South Africa ramah chuan sawrkârin mite chu an hnam a zirin awmna tûr hmun a siamsak a. Thuhretute pawh tiamin chumi rama a tam zâwkte chu chûng hmunahte chuan an la chêng reng a ni. Governing Body chuan kan unaute chu “inhawng” tûrin fuih a duh a. Chuvângin, kum 2013 October thlaah chûng unau hnam hrang hrangte chu an inhriat chian lehzual theih nân ruahmanna ṭha tak a siamsak a ni.—2 Korinth 6:13.

5, 6. (a) Pathian mite inpumkhat lehzual tûra ṭanpui nân ram pakhatah eng ruahmanna nge siam a nih? (A thupui chunga milem en rawh.) (b) Eng hlâwknate nge awm?

⁵ Ṭawng leh hnam inang lo kohhran pahnihte chu chawlhkâr tâwpa an inhmuhkhâwm theih nân unaute’n ruahmanna an siamsak a. Chu kohhran pahniha unaute chu thu an hrilho va, an inkhâwmho va, an intlawh tawn ṭhîn a ni. He ruahmannaah hian kohhran za têl an tel a, branch office chuan he ruahmannain hlâwkna a neihzia thu tam tak a dawng a. Jehova Thuhretute ni lote pawhin an hlâwkpui a ni. Entîr nân, sakhaw rawngbâwltu pakhat chuan: “Thuhretu ka ni lo naa in thu hrilh rawngbâwlnaah inrêlbâwlna ṭha tak in neih bâkah, hnam lungrual tak in ni tih ka sawi duh a ni,” tiin a sawi. Engtin nge unaute’n he ruahmanna chungchâng hi an ngaih?

⁶ A hmasa berin, Xhosa ṭawng hmanna kohhrana unaunu Noma-i chuan Sâp ṭawng hmanna kohhrana Thuhretute chu a in tlâwm taka lêng tûra sâwm chu a hreh a. Mahse, anniho nêna rawng an bâwl tlân a, an inahte a lên hnu chuan a rilru a hahdam huaiin a inhria a. Ani chuan: “Anni pawh keimahni anga mi pângngai ve bawk an ni!” tiin a sawi. Tichuan, Sâp ṭawng hmang kohhrana unaute chu Xhosa ṭawng  hmang kohhrana unaute nên thu an hril dun chuan Noma-i’n an zînga ṭhenkhat chu a ina chaw ei tûrin a sâwm a. A mikhual zînga pakhat, kohhran upa, Sâpa chu plastic thingrem hniamtêa a ṭhu duh a hmuh chuan mak a ti hle a ni. He ruahmanna avângin unau tam takte chuan ṭhian tharte an siam a, ṭobul hrang hranga mite chu an hriat belh zêl a ni.

7. Engvângin nge khawngaihna kan lantîr reng a ngaih?

⁷ Setana khawvêl tâwp hma chu Jehova mite chuan harsatna an tâwk ang. Hna hmuh lohna te, natna nasa tak te, tihduhdahna te, leilung chhiatna te, inrawkna avânga thil neih chânna leh harsatna dangte chuan kan zavaiin min nghawng a ni. Harsat huna inṭanpui tawn tûr chuan khawngaihna dik tak kan neih a ngai a. Khawngaihnain mi dangte chu ngîlnei taka cheibâwl tûrin min chêttîr ang. (Ephesi 4:32) Hêng miziate hi mihring thara tel a ni. Chu chuan Pathian entawn tûr leh mi dangte thlamuan tûrin min ṭanpui ang.—2 Korinth 1:3, 4.

8. Kohhran mi leh sate chunga khawngaihna leh ngilneihna kan lantîr hian eng thil ṭha nge thleng thei? Entîrna pe rawh.

⁸ Kan kohhrana awm ram dang aṭanga rawn pêmte, a nih loh leh, mi chan chhiate chungah engtin nge khawngaihna kan lantîr lehzual ang? Anni chu kan lâwm ang a, ṭhianah kan siam ang a, kohhranah kan mamawh tih hre tûrin kan ṭanpui ang. (1 Korinth 12:22, 25) Entîr nân, Dannykarl-a chu Philippin-a aṭangin Japan ramah a insawn a. Ram dang mi a nih avângin, a hnathawhnaah mi dangte anga cheibâwl a hlawh lo. A hnuah Jehova Thuhretute inkhâwmnaah a tel ve a. Ani chuan: “Inkhâwm zawng zawngte chu Japan mi deuh vek ni mah se, ka hriat tawh ṭhin ang maiin, ṭha takin min lo lâwm a ni,” tiin a sawi. Unaute ngilneihna chuan Jehova hnaih tûrin a ṭanpui zawm zêl a. A hnuah baptisma a chang a, tûnah chuan kohhran upa niin rawng a bâwl a ni. A thawhpui kohhran upate chuan a nupui Jennifer-i nên an kohhrana an awm ve chu an lâwm hle a: “Pioneer niin nun an tisamkhai a, Lalram zawn hmasaknaah entawn tûr ṭha an siam a ni,” tiin an sawi.—Luka 12:31.

9, 10. Rawngbâwlnaa khawngaihna lantîrnain rah ṭha a chhuah tih entîrna pe rawh.

⁹ Ram chanchin ṭha kan hrilh hian ‘mi zawng zawng chunga thil ṭha’ tih theihna hun remchâng kan nei a. (Galatia 6:10) Thuhretu tam takte chuan ram dang aṭanga rawn pên lûtte chungah khawngaihna an lantîrin an ṭawngte an zir a ni. (1 Korinth 9:23) Chutianga an thiltih chuan rah ṭha a chhuah a. Entîr nân, Australia rama pioneer unuanu Tiffany-i chuan Brisbane khawpuia Swahili kohhrana unaute a ṭanpui duh avângin Swahili ṭawng a zir a. Chu ṭawng zir chu harsa hle mah se, a nun chuan awmzia a nei lehzual a ni. Tiffany-i chuan: “Rawngbâwlnaa hlim i duh chuan ram dang ṭawng hmang kohhranah rawngbâwl rawh. Chu chu mahni awmna khua chhuahsan lova khualzin ang a ni. Khawvêl pum huap kan inunauna leh kan lungrualna chu i mit ngeiin i hmu ang,” tiin a sawi.

 ¹⁰ Japan rama chhûngkaw khat pawhin chutiang chuan an ti a. An fanu Sakiko-i chuan: “Rawngbâwla kan chhuah hian ram dang aṭanga rawn pêm Brazil mite hi kan hmu fo ṭhîn. Thu Puan 21: 3, 4 leh Sâm 37:10, 11, 29 ang chi Bible chângte hi an Portuguese ṭawnga kan chhiarsak chuan an ngaihven a, a châng chuan an mittui a tla hial a ni,” tiin a sawi. An chhûngkua chuan chûng rawn pêm lûtte chungah khawngaihna an lantîr a, thutak hriattîr an duh avângin an chhûngin Portuguese ṭawng an zir a ni. A hnuah, an chhûngkua chuan Portuguese ṭawng hmang kohhran chu an ṭanpui a. Kum tam a liam hnu chuan rawn pêm lût mi tam takte chu Jehova chhiahhlawh ni tûrin an ṭanpui thei a ni. Sakiko-i chuan: “Portuguese ṭawng zir tûr chuan theih tâwp chhuah a ngai a. Mahse, malsâwmnate chu thawhrimna aiin a tam zâwk,” tiin a sawi.—Tirhkohte 10:34, 35 chhiar rawh.

11, 12. (a) Engvângin nge mihring thara inthuam tûrin chêttîrtu dik tak kan neih a ngaih? (b) Inngaitlâwm reng tûrin engin nge min ṭanpui ang?

¹¹ Mihring thar inthuam tûra min chêttîrtu chu mi dangte fak hlawh duh vâng ni lovin, Jehova chawimawi duh vâng a ni tûr a ni. Vântirhkoh ṭha famkim tak ngial pawh a chapovin a sual thei tih chhinchhiah ang che. (Ezekiela 28:17 nên khaikhin rawh.) Kan famkim loh avângin, chapona pumpelh chu kan tân a harsa lehzual a. Chuti chung pawhin, inngaihtlâwmnain kan la inthuam thei tho va. Chutiang ti tûrin engin nge min ṭanpui ang?

¹² Inngaitlâwm tûra min ṭanpuitu pakhat chu nî tina Pathian Thu chhiar a, chhût ngun hi a ni. (Deuteronomy 17:18-20) Isua min zirtîrte leh inngaihtlâwmna chungchânga a entawn tûr siam chu kan chhût ngun lehzual a ngai a. (Matthaia 20:28) Isua chu a tirhkohte ke sil khawpa mi inngaitlâwm a ni. (Johana 13:12-17) Kan tih theih kawng dang leh chu thlarau thianghlim dawng tûra Jehova hnêna ṭawngṭai hi a ni a. A thlarau thianghlim chuan mi dangte aia ṭha zâwka inngaihna nei lo tûrin min ṭanpui thei a ni.—Galatia 6:3, 4; Philippi 2:3.

13. Inngaihtlâwmnain eng malsâwmnate nge a thlen?

¹³ Thufingte 22:4 chhiar rawh. Jehova  chuan inngaitlâwm tûrin min duh a. Inngaihtlâwmna chuan malsâwmna tam tak a thlen a ni. Kan inngaihtlâwm hian kohhranah inremna leh inpumkhatna a awm lehzual a. Jehova phû loh ngilneihna kan dawng ang. Tirhkoh Petera chuan: “In zain rawng inbâwl tâwn ṭheuh tûrin thuhnuairawhnain inthuam rawh u; Pathianin chapote a dodâl a, inngaitlâwmte erawh chu khawngaihna a pe si ṭhîn,” tiin a sawi.—1 Petera 5:5.

14. Nunnêmna leh dawhtheihna kawnga entawn tûr ṭha ber chu tu nge ni?

¹⁴ Tûn lai khawvêlah mi chu a nunnêm a, dawhtheihna a neih chuan mi chak lova ngaih a ni fo ṭhîn. Mahse, chu chu a dik lo. Hêng mize duhawm takte hi lei leh vâna thilti thei ber Jehova hnên aṭanga lo kal a ni. Ani chu nunnêmna leh dawhtheihna kawnga entawn tûr ṭha ber a ni a. (2 Petera 3:9) Entîr nân, Jehova’n a vântirhkohte hmanga Abrahama leh Lota te zawhna a chhan laia a dawhtheihzia kha ngaihtuah ang che. (Genesis 18:22-33; 19:18-21) Jehova’n thuâwih lo Israel mite kum 1,500 aia rei dawhthei taka a dâwr dân pawh ngaihtuah bawk ang che.—Ezekiela 33:11.

15. Nunnêmna leh dawhtheihna lantîrnaah Isua’n eng entawn tûr nge a hnut chhiah?

¹⁵ Isua chu mi “thuhnuairawlh” tak a ni a. (Matthaia 11:29) A zirtîrte chak lohnaah a dawhthei hle a ni. Leia a rawngbâwl laiin, dik lo taka sawichhiat leh hêk a ni fo ṭhîn. Mahse, a thih thlengin mi nunnêm tak leh dawhthei tak a ni a. Nghaisakna bana nasa taka a tawrh lai khân, amah thattute ngaidam tûrin a Pa hnênah a ngên a. “An thiltih hi an hre lo a nih hi,” tiin a sawi a ni. (Luka 23:34) Lungngaihna nasa tak a tawh hunah pawh nunnêm tak leh dawhthei tak a ni reng a ni.—1 Petera 2:21-23 chhiar rawh.

16. Engtin nge nunnêmna leh dawhtheihna kan lantîr theih?

¹⁶ Paula chuan nunnêmna leh dawhtheihna kan lantîr theih dân kawng khat târ langin: “Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u,” tiin a ziak a ni. (Kolossa 3:13) Mi dangte ngaidam tûr chuan nunnêmna leh dawhtheihna kan neih a ngai a. Chu chuan kohhranah inpumkhatna a awmtîr lehzual ang.

17. Engvângin nge nunnêmna leh dawhtheihna hi a pawimawh?

¹⁷ Jehova chuan mi dangte chunga nunnêmna leh dawhtheihna lantîr tûrin min duh a. Khawvêl thara nun kan duh chuan hêng miziate hi kan neih a ngai a ni. (Matthaia 5:5; Jakoba 1:21) Mi nunnêm leh dawhthei tak kan nih chuan Jehova kan chawimawiin, mi dangte pawh chutianga ti ve tûrin kan ṭanpui tihna a ni.—Galatia 6:1; 2 Timothea 2:24, 25.

18. Engtin nge hmangaihna leh duhsak bîk neih lohna hi a inthlunzawm tlat?

¹⁸ Kan sawi tâk miziate kha hmangaihna nên a inthlunzawm vek a ni. Entîr nân, zirtîr Jakoba’n a unaute chu mi reithei aia mi hausate an duhsak avângin anni chu a zilh a ngai a. Chu chu “nangmah i inhmangaih angin i vêngte i hmangaih tûr a ni,” tih Pathian thupêk nên a inkalh thu a hrilh a ni. “Mi thlei bîk in neih chuan in tisual a ni,” tiin a sawi belh bawk. (Jakoba 2:8, 9) Mite kan hmangaih chuan an zirna te, an hnam te, a nih loh leh an khawtlâng nihnate avângin kan pawngpaw huat loh vang. Mi duhsak bîk nei lo anga lan mai kan tum tûr a ni lo va. Duhsak bîk neih lohna hi kan mize dik tak a ni zâwk tûr a ni.

19. Engvângin nge hmangaihnaa kan inthuam a pawimawh?

¹⁹ Hmangaihna hi “a dawhthei a, ngil a nei bawk ṭhîn” a, “a uang lo” bawk. (1 Korinth 13:4) Mite hnêna chanchin ṭha hril chhunzawm zêl tûr chuan kan dawhtheih a, ngil kan nei a, thuhnuai kan rawlh a ngai a ni. (Matthaia 28:19) Hêng miziate hian kohhran mi leh sa zawng zawngte nên inrem tûrin a tiawlsam lehzual a ni. Chutiang hmangaihna kan lantîr a nih chuan kohhranah kan inlungrualin Jehova a chawimawi ngei ang. Mite’n chu kan inpumkhatna an hmuh chuan thutak hriat duhna an nei ngei ang. Bible-in mihring thar chungchâng a sawi hian: “Chûng zawng zawng chungah chuan hmangaihna inbel rawh u, chu chu phuar famkimna a ni,” tiin thu tâwp a siam chu inâwm tak a ni.—Kolossa 3:14.

20. (a) Eng zawhnate nge kan inzawh ang? Engvângin nge? (b) Eng nakin hun ṭha tak nge kan beisei theih?

²⁰ ‘Mihring hlui hlîpa bânsan tûrin eng inthlâk danglamna nge ka siam ngai?’ tiin kan inzâwt ṭheuh tûr a ni. Tichuan Jehova hnênah ṭawngṭaiin ṭanpuina kan dîl tûr a ni. ‘Pathian Ram kan chan’ theih nân ngaihtuahna dik lo leh thiltihte thlâk danglam tûra theih tâwp kan chhuah a ngai a. (Galatia 5:19-21) ‘Jehova tilâwm tûrin ka ngaihtuah dânte ka siam ṭha zêl em?’ tiin kan inzâwt bawk tûr a ni. (Ephesi 4:23, 24) Kan ṭhat famkim loh avângin, mihring thara inthuam chhunzawm zêl kan tum tûr a ni. Hei hi thiltih zawm zêl ngai a ni a. Mi zawng zawngin mihring thara an inthuam a, Jehova mize duhawm takte an entawn huna nun chu a va nuam dâwn tak êm!