1, 2. (a) Eng thiamna pawimawh tak nge kan neih ngai a, engvângin nge? (b) He thuziakah hian eng nge kan sawiho vang?

KAN zavai hian kan thu hriatte chu ngun taka kan ngaihtuah a, thu tlûkna dik tak kan siam a ngai a. (Thufingte 3:21-23; 8:4, 5) Chuti lo chuan, Setana leh a khawvêlin kan ngaihtuahnate chu awlsâm takin an la pêng thei a ni. (Ephesi 5:6; Kolossa 2:8) Ni e, thu tlûkna dik tak siam tûr chuan thu dik tak kan hre tûr a ni a. Thufingte 18:13 chuan: “Ngaihthlâka hmâa chhân chu, a tân âtthlâk nihna leh mualphona a ni,” tiin a sawi.

² He thuziakah hian, thu dik tak hriat leh thu tlûkna dik tak siam a harsat chhante kan hmu ang a. Kan thu hriatte ngaihtuah chiang tûra min ṭanpuitu Bible thu bulte leh entîrnate kan hre bawk ang.

3. Thufingte 14:15-a kan hmuh Bible thu bul chu engvângin nge nunpui a ngaih? (A thupui chunga milem en rawh.)

³ Tûn lai hian, hmun hrang hrang aṭangin chanchin kan dawng a. Internet-te, TV-te, leh chanchin theh darhna hrang  hrang aṭangin kan hmu thei a ni. E-mail te, SMS te, leh ṭhiante hnên aṭang pawhin thu chi hrang hrang kan dawng thei bawk. A châng chuan, chûng chanchinte chu tâwp thei dâwn lo niin a lang. Chuvângin, kan fîmkhur a ngai a ni. Kan ṭhiante chuan tum ṭha tak an nei pawh a ni thei; mahse, chanchin dik lo theh darh luitu emaw, thu dik tidanglam duhtute pawh an awm a. Eng Bible thu bulin nge kan thu hriatte ngaihtuah chiang tûra min ṭanpui thei? Thufingte 14:15 chuan: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tiin a sawi a ni.

4. Engtin nge Philippi 4:8, 9 chuan kan thu chhiar tûrte thlang tûra min ṭanpui a, engvângin nge thu dik tak hriat chu a pawimawh? (“ Thu Dik Min Hriattîr Theitu Ruahmannate” tih bâwm chu en rawh)

⁴ Thu tlûkna ṭha siam tûr chuan kan thu hriat chu a rin tlâk tûr a ni a. Chuvângin, chhiar tûr kan thlan hunah kan fîmkhur hle tûr a ni. (Philippi 4:8, 9 chhiar rawh.) Rinchhan tlâk loh Internet-a chanchin te, a nih loh leh e-mail aṭanga thuthang theh darhte chhiar nân hun kan khawhral tûr a ni lo. A bîk takin, kalpêngte’n an thurin theh darh nâna an hman website-te kan pumpelh chu a pawimawh lehzual. Pathian mite rinna tiderthâwng a, thu dik tihdanglam chu an duh a ni. Thu rinchhan tlâk lohte chuan thu tlûkna ṭha lo min siamtîr thei a. Thu dik lovin a nghawng thei lo tûr cheah ring ngai suh.—1 Timothea 6:20, 21.

5. Israel mite’n eng chanchin dik lo nge an hriat a, chu chuan an chungah eng nghawng nge a neih?

⁵ Chanchin dik lote chuan nghawng ṭha lo tak a thlen thei a. Mosia hun laiin, enthlatu mi 12-te chu Ram Tiamah an va kal a. An zînga sâwmte chuan thu ṭha lo an lo hawn a ni. (Numbers 13:25-33) Anni chuan a nihna bâka an sawi avângin Jehova mite’n an hlauvin, an lunghnual ta a ni. (Numbers 14:1-4) Engvângin nge mite chuan chutianga an chhân lêt? Enthlatu a tam zâwkte thusawi chu a inan avângin an thusawi chu dik tûrah an ngai pawh a ni thei. Chuvângin, enthlatu pahnihin Ram Tiam chungchâng a ṭha lam thu an sawite chu an ngaithla duh lo a. (Numbers 14:6-10) Mite chuan thu dik hriat tum a, Jehova rinchhan aiin a chhe lam thu an hriatte chu âtthlâk takin an ring ta zâwk a ni.

6. Jehova mite chungchâng thu dang lam tak kan hriat hunah engvângin nge mak kan tih loh vang?

⁶ Jehova mite chanchin kan hriat hunah, kan fîmkhur lehzual a ngai a. Kan hmêlma Setana chu “kan unaute hêktu” a ni tih hre reng ang che. (Thu Puan 12:10) Isua’n  dodâltute ‘dâwta sual tinrênga hêkin’ kan awm ang tih min vaukhân a. (Matthaia 5:11) Chu vaukhânna chu kan ngaih pawimawh chuan Jehova mite chungchânga thu danglam tak kan hriat hunah mak kan ti lo vang.

7. E-mail emaw, SMS emaw hmanga thu i thawn chhuah hmain eng nge i inzawh ang?

⁷ I ṭhiante hnênah e-mail te, SMS te thawn chu nuam i ti em? Chanchin ngaihvenawm tak i hmuh a, thilthleng mak tak i hriat hunah chûng thute sawi chhuak duh nghâl maitu chanchin puangtu ang niin i inhria em? E-mail te, SMS te i thawn hmain, heti hian inzâwt rawh: ‘He thu hi a dik tih ka chiang em? Ka thu hriatte hi a dik tak zet em?’ I chiang lo a nih chuan dâwt i theh darh thei a ni. Chuvângin, i thu hriat chu a dik ngei tih i hriat loh chuan thawn chhuak suh. Paih bo rawh!

8. Ram ṭhenkhatah min dodaltute chuan eng nge an tih a, engtin nge tum loh taka kan ṭanpui theih?

⁸ Ngaihtuah chiang lova e-mail emaw, SMS emaw hmanga thu thawn chhuah mai a hlauhawm chhan dang a awm a. Ram ṭhenkhatah chuan kan hna chu khuahkhirh, a nih loh leh khap beh a ni thei a ni. Chûng rama awm min dodâltute chuan min tihlauthâwng thei leh inrinhlelh tawnna min neihtîr thei thute chu tum reng vângin an theh darh a. Tûn hmaa Soviet Union rama thilthleng hi han ngaihtuah teh. KGB an tih police-te chuan hriat hlawh tak unau ṭhenkhat chu Jehova mite lakah an rinawm lo tiin dâwt thu an theh darh a. * (Footnote en rawh.) Lungchhiatthlâk takin, unau tam tak chuan chûng dâwt thute chu ringin Jehova inawpna pâwl  an chhuahsan a ni. An zînga tam tak chu an lo kîr leh a, ṭhenkhat chu an lo kîr tawh lo. Chûng dâwt thute chuan an rinna a tichhia a ni. (1 Timothea 1:19) Engtin nge chutiang chhiatna chu kan pumpelh theih? Chanchin dik lo leh chiang lo chu tichhuak suh. I thu hriat apiang chu ring mai suh. Chu ai chuan, thu dik a ni tih chian ang che.

9. Eng thil dangin nge thu dik tak hriat tiharsa?

⁹ A châng chuan, thu dik chanve chauh kan hre ṭhîn a. Chanchin ṭhenkhat chuan thu dik zawng zawng a târ lang lo. Chûngte chuan thu tlûkna dik siam a tiharsa a. Thu dik chanve chauh chu rin tlâk a ni ngai lo! Chûng thu dik lote buma awm lo tûrin eng nge kan tih theih?—Ephesi 4:14.

10. Engvângin nge Israel mi ṭhenkhatin an unaute chu an va beih hman ṭêp a, chutianga bei leh lo tûrin engin nge ṭanpui?

¹⁰ Josua hun laia Jordan Lui khaw thlang lama awm Israel mite chunga thilthleng aṭangin kan zir thei a. (Josua 22:9-34) Anni chuan Jordan Lui khaw chhak lama awm Israel mite’n lui bulah maichâm lianpui an siam tih an hria a. Chu an thu hriat chu a dik ngei mai; mahse, kimchang takin an hre vek lo a ni. Khaw thlang lama awm Israel mite’n khaw chhak lama awm an unaute chu Jehova lakah an hel nia an ngaih avângin bei tûrin an pungkhâwm ṭan a. (Josua 22:9-12 chhiar rawh.) Mahse, an va beih hmain khaw thlang lama Israel mite’n chanchin dik tak hre tûrin mi an tîr a. Eng nge an hriat tâk? Khaw chhak lama Israel mite chuan pathian dik lote hnêna inthawina atâna maichâm siam an ni lo. Jehova chibai an bûk tih mi zawng zawng hriattîr an duh avânga hriatrengna atâna siam an ni zâwk. Israel mite’n an unaute va bei lo va, kimchang taka chanchin hre tûra hun an pêk avângin an lâwm ngei ang.

11. (a) Engtin nge Mephibosetha chu dik lo taka cheibâwl a nih? (b) Engtin nge Davida chuan Mephibosetha chu dik taka a cheibâwl theih?

¹¹ Mite’n kan chungchâng thu dik chanve chauh an theh darh avângin rilru nat châng kan nei ngei ang. Chutiang chu Mephibosetha chungah a thleng a ni. Lal Davida chuan Mephibosetha chu a pu Saula ram zawng zawng a pe a. (2 Samuela 9:6, 7) Mahse, a hnuah Davida’n Mephibosetha chanchin chu dik lo takin a hria a. A thu hriat chu a dik leh dik loh fiah lovin, Mephibosetha thil neih zawng zawng chu a lâk sak a ni. (2 Samuela 16:1-4) Davida’n a hnua a biak leh chuan thil a lo tisual tih a inhre chhuak ta a. Tichuan, a thil neih ṭhenkhat chu a pe lêt leh a ni. (2 Samuela 19:24-29) Davida’n a thu hriat kimchang lo tak chu chhâng lêt nghâl lovin, chanchin kimchang tak hriat tum ta se, Mephibosetha’n he rorêl dik lohna hi a tuar lo ngei ang.

12, 13. (a) Mite’n a chungchâng dik lo taka an sawi khân, Isua’n eng nge a tih? (b) Tuemawin kan chanchin dik lo takin sawi ta se, eng nge kan tih theih?

¹² Tuemawin i chanchin dik lo takin theh darh ta se, eng nge i tih theih? Chu chu Isua leh Baptistu Johana chungah a thleng a ni. (Matthaia 11:18, 19 chhiar rawh.) Isua’n eng nge a tih? Chûng thute chu a dik lo a ni tih mite rintîr tûrin a hun leh tha zawng zawng a hmang lo. Chu aiin, mite chu thu dik ngaihven tûrin a fuih a. A thiltih leh zirtîrte ngaihven tûrin a duh bawk.  Ani chuan: “Finna chu a thiltih aṭangin a dikzia a lang a ni,” tiin a sawi.—Matthaia 11:19.

¹³ Isua hnên aṭangin zir tûr pawimawh tak kan nei a. Mite’n dik lo tak leh ṭha lo taka kan chanchin sawi châng an nei a, chu chuan kan hming a tihchhiat kan hlauthâwng mai thei a ni. Mahse, kan nihna dik tak chu kan nun dânin kan lantîr thei a. Isua entawn tûr siam aṭanga kan zir angin, kan nungchang ṭhain mite sawi thu dik chanve leh dik lo taka min puhnate chu dâwt a ni tih a lantîr thei a ni.

14, 15. Engvângin nge mahni hriatnaa kan innghah loh vang?

¹⁴ Thu rin tlâk tak hmuh chu a harsa thei tih kan hre tawh a. Harsatna dang leh chu kan ṭhat famkim lohna hi a ni. Kum tam tak Jehova rawng kan lo bâwl tawh avângin kawng ṭhenkhatah chuan kan fing pawh a ni mai thei. Rilru fîm taka thil kan ngaihtuah theih avângin mi dangte chuan min zah mai thei a. Chu chu kan tân harsatna a ni thei em?

¹⁵ Thei e. Mahni hriatnaah kan innghat ṭan thei a. Kan rilru vei zâwng leh ngaih dânte chuan kan thlîr dânte chu a thunun thei a ni. Chanchin kimchang tak kan hre lo chung pawhin dinhmun chu hre thiam niin kan inngai ṭan thei a. Chu chu a va hlauhawm tak êm! Bible chuan mahni hriatnaa innghat lo tûrin chiang takin min vaukhân a ni.—Thufingte 3:5, 6; 28:26.

16. He entîrnaah hian, restaurant-ah eng thil nge thleng a, Tom-a’n engtin nge a ngaih?

¹⁶ Entîr nân, tlai khat chu thiltawn ngah tak kohhran upa unau Tom-a chu restaurant-ah a kal a, chutah chuan kohhran upa pakhat John-a chu a nupui ni lo hmeichhe pakhat nên an lo ṭhu dûn a. An hlim hle niin a lang. Tom-a chuan an nui dûn leh an  inpawm chu a hmu a. Mak a tih êm avângin heti hian a ngaihtuah a ni: ‘John-a leh a nupui hi an inṭhen ta em ni? Engtin nge an fate chu an awm tâk ang?’ tiin. Tom-a chuan tûn hmain chutiang thilthleng chu a lo hmu tawh a ni. Tom-a ni ta la, engtin nge i ngaih ang?

17. He entîrnaah hian Tom-a’n a hnuah eng nge a hmuh chhuah a, chuta ṭang chuan eng nge kan zir theih?

¹⁷ Tom-a chuan John-a chu a nupui laka rinawm lo niin ngai mah se, chanchin kimchang takin a hria em? Chu mi zânah Tom-a’n John-a a han phone chuan hmeichhia chu hmun hla tak aṭanga rawn zin a farnu a lo ni reng tih a hre ta a. John-a leh a farnu chu kum tam tak an inhmu tawh lo va. A farnu chuan a rawn tlawh lawk avângin John-a’n restaurant-a chaw eipui zawk nân chauh hun a nei a. A nupui chu a tel ve thei lo a ni. Tom-a’n a ngaih dân tumah a hrilh lo chu a lâwm hle! Chuta ṭang chuan eng nge kan zir theih? Jehova rawng kan bâwlna chu engtianga rei pawh ni se, thu tlûkna dik tak kan siam hmain chanchin kimchang kan hriat a ngai a ni.

18. Kan unaute chungchâng a ṭha lo zâwnga min rintîr theitu chu eng nge ni?

¹⁸ Kan hriat chian vak loh unaupa telna dinhmun chu chiang taka hriat a harsa thei bawk. Kan danglamna ringawt kan ngaihtuah reng chuan kan unaupa chu kan ringhlel mai thei a ni. Tichuan, a chanchin a chhe zâwnga kan hria a nih chuan a dik tih finfiahna a awm lo chung pawhin kan ring duh mai thei a. Zir tûr eng nge kan neih? Kan unaute chungchâng a chhe zâwng ringawt kan ngaihtuah a nih chuan thu dik lo ṭanchhanin thu tlûkna dik lo kan siam thei a ni. (1 Timothea 6:4, 5) Itsîkna leh thîkthuchhiatna ang chi rilru put hmang ṭha lo chu kan thinlungah kan pai reng tûr a ni lo. Jehova chuan kan unaute a hmangaih a, thinlung taka ngaidam tûrin min duh tih theihnghilh ngai suh.—Kolossa 3:12-14 chhiar rawh.

19, 20. (a) Eng Bible thu bulte’n nge kan thu hriatte ngun taka ngaihtuah tûra min ṭanpui thei? (b) A dawta thuziakah eng nge kan sawiho vang?

¹⁹ Tûn laiah, thu rin tlâk hmuh leh chûng thute ngun taka ngaihtuah chu a harsa hle a. Engvângin nge? Kan thu hriat a tam zâwkte chu a kimchang lovin, thu dik chan ve chauh a nih bâkah, keimahni ngei pawh kan ṭhat famkim loh vâng a ni. Engin nge min ṭanpui thei? Pathian Thua thu bulte a ni! Entîr nân, Bible thu bul pakhat chuan ngaihthlâka hmâa chhân chu a âtthlâk tih min hrilh a. (Thufingte 18:13) Thu bul dang leh chuan a dik leh dik lo fiah lovin, thu tin ring tûr kan ni lo tih hre thiam tûrin min ṭanpui bawk. (Thufingte 14:15) Jehova rawng chu engtianga rei pawh bâwl tawh mah ila, mahni hriatna chu kan rinchhan thei lo. (Thufingte 3:5, 6) Bible thu bulte chuan dik taka thu tâwp siam tûr leh thu tlûkna fing siam tûra thu rinchhan tlâkte hmang tûrin min ṭanpui a, min venghim a ni.

²⁰ Dinhmun dik tak hriat a harsat chhan dang pawh a la awm a. Mihring kan nih angin, kan thil hmuhte ṭanchhanin thu tlûkna kan siam nghâl mai ṭhîn a ni. A dawta thuziakah, chutianga kan tihsual theihna dinhmunte leh kan pumpelh theih dânte kan sawiho vang.