1. Eng kawngtein nge Jehova nên kan thawh dun theih?

JEHOVA’N mihringte a siam khân, anni chu a hnathawhpui atân a duh a. Mihringte chu ṭha famkim ni tawh lo mah se, mi rinawmte chu Jehova nên nî tin an la thawk dûn thei a ni. Entîr nân, Ram chanchin ṭha kan hrilh a, zirtîr kan siam hunah “Pathian hnathawhpuite kan ni.” (1 Korinth 3:5-9) Engkimtithei Siamtuin hna pawimawh tak thawk tûra min thlang chu chawimawina ropui a va ni êm! Mahse, thu hrilhna hna chu Jehova nêna kan thawh dûn theih dân kawng awm chhun a ni lo. He thuziakah hian, kan chhûngkuate leh kohhrana mite kan ṭanpui hunah, khualchhâwn thiamna kan lantîr hunah, khawvêl pum huapa inawpna pâwl hnathawh kan ṭanpui hunah, leh Jehova tâna rawngbâwlna kan zauh hunah amah nêna kan thawh dûn theih dân kan zir bawk ang.—Kolossa 3:23.

2. Engvângin nge Jehova tâna kan thiltihte leh mi dangte thiltih chu kan khaikhin loh vang?

² He thuziak kan zir laiin mi tinte hi kan inang lo tih hriat a pawimawh a. Kan kum te, hrisêlna te, dinhmun te, leh theihnate chu a inang lo va. Chuvângin, Jehova tân i tih theihte leh mi dangte tih theih chu khaikhin ngai suh. Tirhkoh Paula  chuan: “Mi tinin mahni thiltih fiah ṭheuh zâwk rawh se, chu mi hunah chuan mi dang chung ni lovin, mahni chung chauhvah chhuan tûr a nei ang,” tiin a sawi a ni.—Galatia 6:4.

3. Engvângin nge mahni chhûngte ngaihsaktu chu Pathian nên an thawk dûn tia kan sawi theih?

³ Jehova chuan mahni chhûngkua ngaihsak tûrin min beisei a. Entîr nân, i chhûngkaw mamawh phuhhrûk nân sum i thawhchhuah a ṭul thei a. Nu tam tak chu an fate enkawlin ina an awm a ngai a ni. Kan nu leh pate chu mahnia an inenkawl theih loh hunah kan ngaihsak a ngai a. Chûngte chu tih ngei ngei tûr thilte a ni. Bible chuan: “Tupawh mahni chhûngkhat lainate ngaihsak lo va, mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk,” tiin a sawi. (1 Timothea 5:8) Chhûngkaw mawhphurhna i nei a nih chuan i duh anga tamin Jehova tân i thawk thei lo pawh a ni mai thei. I chhûngkua i ṭanpui hian Jehova chu a lâwm a ni.—1 Korinth 10:31.

4. Engtin nge nu leh pate’n Lalram hmasâwnna an dah hmasak theih a, chutianga an tih chuan eng nge thleng?

⁴ Kristian nu leh pate chuan an fate chu Jehova rawngbâwlnaa thiltum nei tûra an ṭanpui hian amah nên an thawk dûn tihna a ni a. Nu leh pa tam takin chutianga an tih avângin an fapate, leh an fanute chuan in aṭanga hmun hla taka insawn a, Jehova tân hunbi kima rawngbâwl tûrin thu tlûkna an siam a. Ṭhenkhat chu missionary-te, thuchhuahtu mamawh zualna hmuna pioneer thawk te, leh Bethel-a rawngbâwlte an ni. Hmun hlaa fate an awm hian nu leh pate chuan an duh anga tamin an fate nên hun an hmang dûn thei lo ngei mai. Mahse, an fate chu an awmna apiangah Jehova rawngbâwl zawm zêl tûrin mahni hmasialna tel lovin an fuih a. Engvângin nge? An fate’n an nuna Jehova an dah hmasak ber avângin an hlim a ni. (3 Johana 4) Chûng nu leh pa tam takte chuan Jehova hnêna a fapa Samuela ‘hlântu’ Hani ang niin an inngai a. Chutiang kawnga Jehova nêna thawh dun chu chawimawina ropui tak niin an ngai bawk.—1 Samuela 1:28.

5. Kohhrana unaute chu engtin nge i ṭanpui theih? (A thupui chunga milem en rawh.)

⁵ Chhûngkaw mawhphurhna pawimawh tak i nei lo a nih chuan unau dam lo te, kum upa te, leh ṭanpui ngai mi dangte chu i ṭanpui thei ang em? A nih loh leh, anmahni enkawltute chu i ṭanpui thei ang em? Chutianga ṭanpui ngai kohhrana mite chu hriat tum ang che. Entîr nân, kum upa tak a nu leh pate enkawltu unaunu tuemaw a awm mai thei a. Thil dang a tih theih nân a nu leh pate tân hun i pe thei ang em? A nih loh leh, tuemaw chu inkhâwm tûra hruaiin, dâwra kalpuiin, damdawi ina mu tuemaw va tlawhin ṭanpuina i pe thei a. Chutianga i tih chuan an ṭawngṭaina chhânna i ni ang a, Jehova nên in thawk dûn thei ang.—1 Korinth 10:24 chhiar rawh.

6. Engtin nge khualchhâwn thiamna kan lantîr theih?

⁶ Pathian hnathawhpuite chu an khualchhâwn thiamna avângin mite hriat an hlawh a. Bible-a “khualchhâwn thiamna” atâna hman Grik thu mal chuan mikhualte  chunga khawngaihna lantîr a kâwk a ni. (Hebrai 13:2) Khawngaihna kan lantîr theih dân chungchânga entawn tûr ṭhate chu Bibe-ah kan chhiar thei a. (Genesis 18:1-5) Hun remchâng kan neih apiangin mite chu “rinna chûngte zînga” mi an ni emaw, ni lo emaw pawh ni se, kan ṭanpui tûr a ni.—Galatia 6:10.

7. Hunbi kima rawngbâwlte chunga khualchhâwn thiamna kan lantîr hunah eng hlâwknate nge kan hmuh ang?

⁷ Awmna tûr mamawh hunbi kima rawngbâwlte chungah khualchhâwn thiamna lantîrna hmangin Jehova nên i thawk dun thei ang em? (3 Johana 5, 8 chhiar rawh.) Chutianga kan tih chuan hlâwkna an hmu ang a, keini pawhin kan hmu bawk ang. Chu chu Bible chuan “inthlamuan tawn theihna,” tiin a sawi. (Rom 1:11, 12) Olaf-a thiltawn hi han ngaihtuah teh. A tleirâwl laiin an kohhran rawn tlawhtu nupui nei lo bial kantu chuan thlenna tûr a mamawh a; mahse, kohhrana mi tu mahin an ṭanpui thei lo va. Olaf-a chuan Thuhretu ni lo a nu leh pate hnênah an ina bial kantu a thlen theih dâwn leh dâwn loh a zâwt a. A thleng thei a; mahse, ṭhutthlênga a mut a ngai ang tih an hrilh a. Chutianga a tih avângin Olaf-a’n inchhîrna a nei lo. Bial kantu nên chuan chawlhkâr nuam tak an hmang dûn a ni! Zîng tin hma taka thovin, zîng chaw ei pahin thu ngaihven awm takte an sawi dûn ṭhîn a. Bial kantu chuan Olaf-a chu ṭha taka a fuih avângin hunbi kima Jehova rawngbâwl tûrin thu tlûkna a siam ta a. Kum 40 chhûng zet chu Olaf-a chuan ram tam takah missionary niin rawng a bâwl a ni.

8. Mite chuan lâwmna châng hre nghâl lo mah se, engvângin nge ngilneihna kan lantîr ang? Entîrna pe rawh.

⁸ Hmêl hriat lohte’n an chunga hmangaihna kan lantîr chu châng lêt nghâl lo mah se, kawng tam takin hmangaihna kan lantîr thei tho va. Entîr nân, Spain rama unaunu chu Ecuador rama Yesica-i nên Bible an zir a. Ni khat chu Bible an zir laiin, Yesica-i chu a ṭap ta zawih zawih mai a. A ṭah chhan a han zâwt a. Yesica-i chuan Spain rama a lo kal hma chuan rethei tak a ni a. Ni khat chu a fanu chaw pêk tûr a nei lova, tui chauh a pe a ni. Yesica-i chuan a fanu a awih mut laiin Pathian hnênah ṭanpuina dîlin a ṭawngṭai a. Rei vak lovah Thuhretu pahnih an rawn thleng a, Yesica-i chu magazine an pe a. Mahse, chaltlai taka chhâng lêtin, magazine pawt thlêr pahin: “Ka fanu pe tûra min duh chaw chu hei hi maw?” tiin a sawi a. Unaunute chuan thlamuan an tum a; mahse, a ngaithla duh lo. A hnuah, unaunute chuan ei tûra khat bâwm chu a kawngka bulah an dah a. A ṭawngṭainaa Pathian chhânna chu a ngaihthah tih a hriat avângin Bible an zir lai mêkin a ṭap a ni. Tichuan, Yesica-i’n Jehova rawngbâwl a tum ta a. Chûng unaunute thilphalna chuan rah ṭha a chhuah tih a chiang hle.—Thuhriltu 11:1, 6.

9, 10. (a) Israel mite chuan tlâwmngaihna lantîr theihna hun remchâng ṭhenkhat eng nge an neih? (b) Tûn laiah unaupate’n eng kawngtein nge kohhran an ṭanpui theih?

⁹ Tûn hma chuan Israel mite’n tlâwmngaihna lantîr theihna hun remchâng tam tak an nei a. (Exodus 36:2; 1 Chronicles 29:5; Nehemia 11:2) Tûn laiah pawh kan unaute ṭanpui tûrin kan hun te, thil neih te, leh thiamnate hmang tûrin hun remchâng tam tak kan nei a ni. Chutianga kan tih chuan kan hlim ang a, Jehova’n mal min sâwm ang.

¹⁰ Pathian Thu chuan kohhrana mipate chu kohhranho rawngbâwltu leh kohhran upa nia rawngbâwla Jehova nêna thawk dûn tûrin a fuih a. (1 Timothea 3:1, 8, 9; 1 Petera 5:2, 3) Chutianga rawngbâwltute chuan mi dangte chu Pathian an biaknaah ṭha taka ṭanpui an duh a ni. (Tirhkohte 6:1-4) Kohhran upate chuan attendant ni tûrin, thu leh hla chhuahte enkawl turin, rawngbâwlna bial te, thawm ṭhat hna te, leh thil dangte ti tûrin ṭanpuina an dîl che em? Chutiang kawnga ṭanpuitu unaute chuan an hnathawhah hlimna nasa tak an nei a ni.

11. Engtin nge unaunu pakhat chuan construction-a hnathawh chu a hlâwkpui?

¹¹ Construction hnaa tlâwmngaia thawkte chuan ṭhian thar an siam ṭhîn a. Unaunu Margie-i chu kum 18 chhûng Kingdom Hall saknaah a thawk tawh a. Chûng hnaahte chuan ṭhalai unaunute chungah ngaihsakna lantîrin, hna thawh dân a zirtîr a ni. Ani chuan hei hi tlâwmngaia hnathawktute tân infuih tawnna kawng ṭha tak a ni tiin a sawi. (Rom 1:12) A nihna takah chuan a nuna hun harsa a tawh hunah chûng a hnathawhnaa a ṭhiante chuan an fuih ṭhîn a. Construction hnaah tlâwmngaiin i thawk ngai tawh em?  Thiam bîkna i nei lo a nih pawhin chûng hnate chu i thawk thei tho a ni.

12. Engtin nge leilung chhiatna a thlen hnuah ṭanpuina i pêk theih?

¹² Leilung chhiatna a thlen hunah unaute kan ṭanpuina hmangin Jehova nên kan thawk dûn thei a. Entîr nân, thawhlâwm kan thawh thei a ni. (Johana 13:34, 35; Tirhkohte 11:27-30) Ṭanpui theih dân kawng dang leh chu leilung chhiat hnua thenfaina leh thawm ṭhatnaa telna hmangin a ni bawk. Poland rama unaunu Gabriela-i in chu tui lian avângin a chhia a, a bul hnaia kohhran unaute’n an rawn ṭanpui chuan a lâwm hle. Chu a thiltawn a ngaihtuah chuan a hloh tâk zawng zawngte avânga lungkham aiin a thil dawnte chu a ngaihtuah tlat zâwk a ni. Ani chuan: “He thiltawn hian Kristian kohhran zînga mi nih theihna chu chanvo hlu tak a nih bâkah, hlimna leh lâwmna tûr chhan a ni tih min hriat chiantîr a ni,” tiin a sawi. Leilung chhiatna an tawh hnua ṭanpuina dawng mi tam takte pawhin chutiang chuan an ngai a. Chûng unaute ṭanpuitute chuan Jehova nêna thawk dûnin hlimna leh lungawina an nei a ni.—Tirhkohte 20:35; 2 Korinth 9:6, 7.

13. Tlâwmngaia kan inpêk hian Jehova kan hmangaihna chu engtin nge kan tihngheh? Entîrna pe rawh.

¹³ Unau Stephanie-i leh a awmna hmuna thuchhuahtu dangte chuan indona avânga United States-a râltlân Thuhretute chu ṭanpuiin Pathian nên an thawk dûn a. Anni chuan chûng râltlânte chu in leh inchhûng bungruate nei tûrin an ṭanpui a ni. “Khawvêl pum huap unaute hmangaihna an dawn avânga an hlimna leh lâwmna chuan kan rilru a khawih hle a. Chhûngkuate chuan kan ṭanpui niin an ngai a; mahse, a nihna takah chuan min ṭanpui nasa zâwk a ni. Keimahni ngeiin kan tawn hmangaihna, inpumkhatna, rinna, leh Jehova rinchhanna chuan Jehova kan hmangaihna a tinghet lehzual a, chu chuan a inawpna pâwl aṭanga kan dawn zawng zawngte avânga lâwmna nasa tak min neihtîr a ni,” tiin a sawi.

14, 15. (a) Eng rilru put hmang nge zâwlnei Isaia’n a neih? (b) Engtin nge Kristiante chuan Isaia rilru put hmang chu an entawn theih?

¹⁴ Nasa lehzuala Jehova nêna hnathawh i duh em? Thuchhuahtu mamawh zualna hmunah insawn i duh em? Ni e, thilphal tûrin hla taka kan insawn a ngai kher lo. Mahse, chutianga ti thei unau ṭhenkhat an awm a. Anni chuan zâwlnei Isaia rilru put hmang ang an nei a ni. Jehova’n: “Tu nge ka tirh ang a, tu nge kan tân kal ang?” tia a  zawh chuan Isaia’n: “Kei heta hi ka awm, mi tîr ta che,” tiin a chhang a. (Isaia 6:8, 9) Jehova inawpna pâwl ṭanpui chu i duhin, i ṭanpui thei ang em? I ṭanpui theih dân kawng ṭhenkhat chu eng nge ni?

¹⁵ Isua chuan thu hrilh rawngbâwlna leh zirtîr siamna chungchângah: “Buh seng tûr a tam hle si a, nimahsela a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u,” tiin a sawi a. (Matthaia 9:37, 38) Thuchhuahtu mamawh zualna hmunah pioneer i thawk thei ang em? A nih loh leh, chutianga ti tûrin tuemaw chu i ṭanpui thei ang em? Kan unau tam takte chuan Pathian leh an vêngte chunga hmangaihna an lantîr theih dân kawng ṭha ber chu thuchhuahtu mamawh zualna hmuna pioneer thawh hi a ni tiin an ngai a. I rawngbâwlnaah nasa lehzuala thawh theih dân kawng dangte i hria em? Chutianga i tih chuan i hlim hle ngei ang.

16, 17. Jehova tâna i rawngbâwlna zauh theih dân kawng ṭhenkhat chu eng nge ni?

¹⁶ Bethel-a rawngbâwl i duh em? A nih loh leh, construction hnaah hun rei lote chhûng, a nih loh leh châwlhkâr khatah ni hnih khat i thawk thei ang em? Jehova inawpna pâwl chuan a ṭûlna hmun apianga thawk duhtute leh an thiamna nêna inmil lo hna thawk tûra tih an nih huna thawk tûra inhuamte chu a mamawh reng a. Jehova chuan inhuam taka inpe duhte leh mamawh zualna hmuna rawngbâwl duhtute chu a hlut a ni.—Sâm 110:3.

¹⁷ Jehova rawng nasa lehzuala i bâwl theih nân tam lehzuala zirtîrna dawn i duh em? Lalram Chanchin Ṭha Puangtute School kal tûrin dîlna i theh lût thei a. Hunbi kima Jehova rawngbâwl tawh unau mi puitlingte chu Jehova inawpna pâwlin nasa lehzuala a hman theih nân chu school chuan zirtîrna a pe a ni. Chu school kalte chuan an tirhna hmun apianga rawngbâwl chu an inhuam tûr a ni. Chutiang kawnga Jehova tâna tam lehzuala thawh chu i inhuam ang em?—1 Korinth 9:23.

18. Nî tina Jehova nên thawh dunna aṭanga hlâwknate chu eng nge ni?

¹⁸ Jehova mite kan nih angin kan thilphalin, mite chungah kan ṭhain, ngilneihna, leh hmangaihna kan lantîr a. Nî tin hian mite chu kan ngaihsak a ni. Chu chuan hlimna, remna, leh lâwmna min thlen a ni. (Galatia 5:22, 23) I dinhmun chu engpawh ni se, Jehova thilphalna mizia i entawn a, a hnathawhpuite zînga mi i nih reng chuan i hlim ang!—Thufingte 3:9, 10.