1. Jehova chu thilphal tak a ni tih engin nge târ lang?

JEHOVA chu amah chauhvin a lo awm tawh ṭhîn a. Tichuan, lei leh vâna hriatna nei thil siamte chu nunna pêk a tum ta a ni. “Pathian hlim,” Jehova chuan thil ṭha min pêk chu nuam a ti a. (1 Timothea 1:11; Jakoba 1:17) Hlim tûra min duh avângin thilphal tûrin min zirtîr a ni.—Rom 1:20.

2, 3. (a) Kan thilphal hian engvângin nge kan hlim? (b) He thuziakah eng nge kan sawiho vang?

² Pathianin mihringte chu a anpuiin a siam a. (Genesis 1:27) Chu chu Jehova’n a miziate ang neiin min siam tihna a ni. Hlimna dik tak nei a, Jehova malsâwmna dawng tûr chuan a entawn tûr siam chu kan zui tûr a ni. Mite chu kan ngaihsak a, kan thil neihte phal taka kan pêk a ngai a. (Philippi 2:3, 4; Jakoba 1:5) Engvângin nge? Chu chu Jehova min siam dân a nih avângin. Ṭha famkim lo kan ni chung pawhin Jehova kan entawn theiin, mi thilphal tak kan ni thei a ni.

 ³ Tûnah, Bible-in thilphalna chungchâng min zirtîrna aṭanga zir tûr ṭhenkhat chu kan sawiho ang. Mi thilphal kan nih avânga Jehova a lâwm chhan kan hre bawk ang. Thilphalnain Jehova min pêk hna thawk tûra min ṭanpui dân leh kan thilphal avânga kan hlim chhante kan hria ang a. Chu bâkah, mi thilphal kan nih zawm zêlna tûr chhan kan sawiho bawk ang.

4, 5. Engtin nge Jehova leh Isua chu thilphal tak an nih a, engvângin nge kan entawn ang?

⁴ Jehova’n amah entawn tûra min duh avângin kan thilphal hian ani chu a lâwm a. (Ephesi 5:1) Ani chuan mihringte chu hlim tûrin a duh bawk. Chu chu mak danglam taka min siam dân, leh leilung mawi tak leh a chhûnga thil awmte chên tûra a siam dân aṭangin kan hre thei a ni. (Sâm 104:24; 139:13-16) Chuvângin, mi dangte tihhlim kan tum hian Jehova kan chawimawi a ni.

⁵ Thilphalna chungchânga entawn tûr ṭha famkim hnutchhiahtu Isua chu kan entawn thei bawk. Ani chuan: “Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zawka a lo kal ang khân,” tiin a sawi a ni. (Matthaia 20:28) Tirhkoh Paula chuan Kristiante chu: “He rilru, Krista Isua pawha awm bawk kha, nangmahniah awm rawh se; mihringte anga lo piangin, bâwih angah a insiam a,” tiin a fuih a. (Philippi 2:5, 7) Chuvângin, heti hian kan inzâwt thei a: ‘Isua entawn tûr siam chu theih tâwp chhuahin ka zui em?’ tiin.—1 Petera 2:21 chhiar rawh.

6. Samari mi ṭha chanchin aṭangin Isua’n eng nge min zirtîr? (A thupui chunga milem en rawh.)

⁶ Jehova chuan Isua nêna an hnutchhiah entawn tûr ṭha famkim kan zui a hmuhin a lâwm a. Chu chu mite kan ngaihsakna leh kan ṭanpuina hmangin kan lantîr thei a ni. Chu mi pawimawh dân chu Isua’n Samari mi ṭha chungchâng a sawi khân a târ lang a. (Luka 10:29-37 chhiar rawh.) A hnungzuitute hnênah mite chu eng ang mi pawh niin, an ṭobul chu engpawh ni se, an ṭanpui tûr a ni tih a zirtîr a. Isua’n chu chanchin a sawi chhan chu i la hria em? Juda mi pakhatin: “Ka vêngte chu tunge ni?” tia a zawh vâng a ni. Jehova tilawm tûr chuan Samari mi angin kan thilphal tûr a ni tih Isua chhânna chuan mi zirtîr a ni.

7. Jehova thiltih dân chu a ṭha ber tih kan rinzia engtin nge kan lantîr? Hrilhfiah rawh.

⁷ Kan thilphalna tûr chhan dang leh chu Eden huana thilthleng nên a inkungkaih a. Setana chuan Adama leh Evi chu Jehova thu âwih lova, mahni tân chauh an ngaihtuah chuan an hlim zâwk ang tiin a hrilh a. Evi chuan mahni hmasial takin Pathian ang nih a duh a ni. Adama pawhin mahni hmasiak tak niin, Pathian tihlâwm aiin Evi tihlâwm chu a duh zâwk a. (Genesis 3:4-6) A rah chhuah chu râpthlâk tak a ni. Mahni hmasialna chuan hlimna a thlen lo tih a chiang hle. Mahse, mahni hmasial lo leh mi thilphal kan nih chuan Jehova thiltih dân chu a ṭha ber tih kan rinzia kan lantîr a ni.

8. Engvângin nge Adama leh Evi chuan mi dangte tân an ngaihtuah tel a ngaih?

⁸ Adama leh Evi chu Eden huanah anmahni chauhvin awm mah se, mi dangte  tân an ngaihtuah tel tûr a ni. Engvângin nge? Jehova chuan thawh tûr hna a pe a. Fate nei a, leilung hi luah khat a, paradis-a chantîr tûrin a hrilh a ni. (Genesis 1:28) Jehova’n leia mi zawng zawngte hlim tûra a duh ang bawkin, Adama leh Evi pawhin nakina lo piang tûr an fate chu hlim tûrin an duh ngei ang. Lei pumpui hi paradis-a chantîr tûrin an thawhho a ngai dâwn a ni. Hna ropui tak a va ni dâwn êm!

9. Mihringte chuan lei chu paradis ni tûra an thawh laiin engvângin nge an hlim ang?

⁹ Mihring ṭha famkimte chuan lei chu paradis-a siam tûr leh Jehova duh zâwng hlen chhuah a nih theih nân amah nên an thawhho a ngai bawk a. Chutiang chuan a chawlhnaah an lût thei ang. (Hebrai 4:11) Chu hnathawh a lungawithlâk dân tûr leh a hlimawm dân tûr chu han mitthla teh! Jehova chuan mahni hmasialna nei lova, mi dangte ngaihsaktute chu nasa takin mal a sâwm ngei ang.

10, 11. Thu hrilh leh zirtîr siam tûrin engin nge min ṭanpui ang?

¹⁰ Tûn laiah, Jehova’n hnathawh tûr ṭha tak min pe a. Thu hril a, zirtîr siam tûrin min duh a ni. Chu hna thawk tûr chuan mi dangte kan ngaihsak tak zet tûr a ni a. Dik tak chuan, Jehova leh mite hmangaihna dik tak kan neih chauhvin chu hna chu kan thawk zawm zêl thei ang.

¹¹ Paula chuan amah leh kum zabi khatnaa Kristian dangte chu mite hnêna thu hril a, thutak an zirtîr avângin “Pathian  hnathawhpuite” an ni tiin a sawi a. (1 Korinth 3:6, 9) Tûn laiah, keini pawh Pathian min pêk thu hrilh rawngbâwlna hnaah kan hun te, tha te, leh sum leh paite phal taka kan pêkna hmangin “Pathian hnathawhpuite” kan ni thei a ni. Chawimawina ropui tak a va ni êm!

12, 13. Zirtîr siamna lâwmman chu eng nge nia i hriat?

¹² Thu hrilhna leh zirtîrnaah kan hun leh thate phal taka kan hmanna chuan hlimna nasa tak min pe a. Chu chu Bible zirpui nei unau tam takte sawi ṭhin a ni. Kan zirpuite chuan Bible zirtîrte an hriat a, rinna dik tak an neih chhoh va, an nuna inthlâk danglamna an siam a, an thu zirte mi dangte an hrilh ṭan kan hmuh hian kan hlim hle a. Thu hril tûra a tirh chhuah mi 70-te chu thiltawn ṭha tak nei a, ‘lâwm taka an lo hâwng’ avângin Isua chu a hlim hle a ni.—Luka 10:17-21.

¹³ Khawvêl puma kan unaute chuan Bible thuchahin mite nun a tih hmasâwn dân an hmuh hian an hlim a. Entîr nân, unaunu Anna-i chuan Jehova tân tam lehzuala thawh a duh a. * (footnote en rawh.) Chuvângin, thu hriltu mamawh zualna hmun Europe chhak lamah a insawn a ni. Ani chuan: “Bible zirpui tam tak ka nei thei a, nuam ka ti hle a. Ka rawngbâwlna hian hlimna min pe a. In ka thlen chuan mahni inngaihsakna hun pawh ka nei lo. Ka zirpuite buaina leh lungkhamnate chungchâng ka ngaihtuah ṭhîn a ni. Ka fuih theih dân leh ṭha taka ka ṭanpui theih dân kawngte ka zawng a. Tichuan, ‘lâk aiin pêkin lukhâwng a nei zâwk’ tih chu ka ring nghet tlat a ni,” tiin a ziak a ni.—Tirhkohte 20:35.

14. Mite’n an ngaithla lo a nih pawhin, engtin nge thu hrilh chu nuam i tih theih?

¹⁴ Thu kan hrilh hunah mite’n an ngaithla lo a nih pawhin, chanchin ṭha hriat theihna hun remchâng kan pêk avângin kan hlim tho a ni. Jehova’n Ezekiela hnênah: “An ngaithla emaw, ngaithla lo emaw, an hnênah ka thu i sawi tûr a ni,” tia a phût angin keini pawh chutianga ti tûrin min beisei a ni. (Ezekiela 2:7; Isaia 43:10) Chuvângin, mite’n engtiang pawhin min chhâng lêt mah se, Jehova’n kan thawhrimna chu a hlut a ni. (Hebrai 6:10 chhiar rawh.) Unaupa pakhatin a rawngbâwlna chungchâng chu heti hian a sawi a ni: “Kan phun a, tuiin kan châwm a, Jehova ṭhantîr beiseiin kan ṭawngṭai a ni,” tiin.—1 Korinth 3:6.

15. Mite’n kan chunga lâwmna an lantîr hunah chauh kan thilphal tûr a ni em? Hrilhfiah rawh.

¹⁵ Thilphalnain min tihhlim avângin mi thilphal ni tûrin Isua’n min duh a. Kan thilphal hian mite pawh kan chungah an thilphal ve a ni. Chuvângin: “Pe rawh u, chutichuan  pêkin in awm ang, ṭhahnemngai taka teh a, beng muk a, sawi muk a, liam zawih zawihin, in mal chungah an pe ang che u. In tehna ngai bawkin an tehsak leh dâwn si che u a,” tiin min fuih a ni. (Luka 6:38) Ni e, i thilphal hian, mi zawng zawng chu an lâwm vek lo ngei ang. Mahse, lâwmna châng an hre lo a ni pawhin thilphal zêl ang che. Vawi khat thilphalnain rah ṭha a chhuah tam dân chu i hre thei lo ang.

16. Tute chungah nge kan thilphal ang a, engvângin nge?

¹⁶ Mi thilphal takte chu thil engemaw an beisei lêt avânga thilphal an ni lo. Isua chuan: “Ruai i ṭheh hun chuan pachhiate, piangsualte, kebaite, mitdelte sâwm zâwk ang che; tichuan chûng ang chuan rulhna tûr che an neih loh avângin i eng a thâwl ang,” tiin a sawi a. (Luka 14:13, 14) Bible chuan: “Mi thilphal chu malsâwmin a awm ang,” a tih bâkah, “Retheite ngaihtuah mi chu a eng a thâwl e,” a ti bawk a. (Thufingte 22:9; Sâm 41:1) Mite ṭanpui kan duh tak zet avângin kan thilphal tûr a ni.

17. Hlimna min thlen thei thilpêk dân kawng ṭhenkhat chu eng nge ni?

¹⁷ Paula’n Isua sawi “lâk aiin pêkin lukhâwng a nei zâwk,” tih thu a sawi chhâwn khân, tisa lam thil pêkna chauh a sawina a ni lo. Mite chu kan fuih theih bâkah, Bible aṭanga thurâwnte pein, ṭha takin kan ṭanpui thei a. (Tirhkohte 20:31-35) Paula chuan a thusawi leh thiltih hmangin, kan hun te, tha te, ngaihsakna te, leh hmangaihnate chu phal taka kan pêk a pawimawhzia min zirtîr a ni.

18. Mi thiam tam takin mi thilphalte chungchâng eng nge an sawi?

¹⁸ Mihringte nungchang zirchîk mite chuan thilpêknain min tihlim a ni tih an  hmu chhuak a. Thuziak pakhatin a sawi dân chuan, mite chuan mi dangte tâna thil ṭha engemaw an tihsak hnuah hlimna an nei lehzual tih a sawi a. Mi thiamte chuan mi dangte kan ṭanpui hian kan nunin thiltum a neiin, awmzia a nei nia inhriatna kan nei tih an sawi. Chuvângin, mi thiam ṭhenkhat chuan tlâwmngaia hna thawkte chu an hrisêlin, an hlim lehzual tih an sawi bawk. Ni e, chûng an thusawite chu mak kan ti lo, a chhan chu hmangaihna nei min siamtu Jehova’n thil pêknain hlimna min thlen tih a sawi fo avângin.—2 Timothea 3:16, 17.

19, 20. Engvângin nge mi thilphal nih i duh?

¹⁹ Kan chhehvêla mite chuan mahni chauh an inngaihsak hian kan tân thilphalna lantîr zêl chu a harsa thei a. Mahse, Isua chuan thupêk ropui ber pahnih min hrilh a, chu chu kan thinlung zawng zawng, thlarau zawng zawng, rilru zawng zawng, leh chakna zawng zawnga Jehova hmangaih leh mahni inhmangaih anga vêngte hmangaih hi a ni. (Marka 12:28-31) He thuziakah hian Jehova hmangaihtute chuan amah an entawn tih kan hre tawh a. Jehova leh Isua chu an thilphal a. An entawn tûr siam zuina chuan hlimna dik tak min neihtîr thei tih an hriat avângin chutianga ti tûrin min fuih a ni. Pathian leh kan vêngte tân phal taka thil kan tih chuan Jehova kan chawimawi a, mahni leh midangte tân hlâwkna a thlen bawk ang.

²⁰ Theih tâwp chhuaha thilphalna i lantîr chuan, mi dangte leh a bîk takin i unaute chu i ṭanpui a ni ang. (Galatia 6:10) Chutianga i tih zawm zêl chuan mite’n an lâwm chein, an hmangaih ang che a, nang pawh i hlim bawk ang. Bible chuan: “Mi thilphal nunna chu tihthauvin a awm a, tui leih ṭhîntu chuan mahni pawh a inleih a ni,” tiin a sawi. (Thufingte 11:25) Kan nunah leh rawngbâwlnaah hmasial lova, ngilneihna leh thilphalna lantîr theih dân kawng tam tak a awm a. A dawta thuziakah chûng zînga ṭhenkhat chu kan sawiho vang.