“NI HNUHNUNGAHTE” hian nun hi a harsat êm avângin tûn hma zawng aiin dawhtheihna kan neih a ngai lehzual a. (2 Timothea 3:1-5) Kan chhehvêla mi tam tak chuan dawhtheihna an nei lo va. Mahni hma an sial a, inhnial an hrât a, insumtheihna an nei lo a ni. Chuvângin, heti hian kan inzâwt tûr a ni: ‘Ka vêla mite angin dawhtheihna ka tlachham ta em? Mi dawhthei tak nih awmzia chu eng nge ni? Dawhtheihna chu ka mize pêng nihtîr tûrin eng nge ka tih theih?’ tiin.

Bible-a “dawhtheihna” tih ṭawngkam hian eng awmzia nge a neih? Chu chuan buainate tawrh hram hram aia tam a kâwk a. Mi dawhthei chuan thiltum neiin a tuar ṭhîn a, thilte chu a ṭhat chhoh zêl a beisei a ni. Ama tân chauh ngaihtuah lovin, amah tilung ni lotu emaw, dik lo taka cheibâwltu emaw pawh ni se, mi dangte rilru vei zâwng chu a ngaihsak a. An inlaichînna chu a ṭhat chhoh a beisei tlat a ni. Bible-in dawhtheihna chu hmangaihna * avânga lo awm a ni a ti pawh hi a mak lo ve. (Footnote en rawh.) (1 Korinth 13:4) Dawhtheihna hi “thlarau rah” pêng pakhat a ni bawk. (Galatia 5:22, 23) Chuvângin, mi dawhthei tak ni tûr chuan eng nge kan tih ngai?

Mi dawhthei tak ni tûr chuan Jehova’n a laka rinawmte hnêna a pêk a thlarau thianghlim dawng tûra kan ṭawngṭai a ngai a. (Luka 11:13) Chu thlarau thianghlim chuan thiltithei hle mah se, kan ṭawngṭaina mila thil kan tih a ngai tho a ni. (Sâm 86:10, 11) Chu chu nî tina dawhtheihna lantîr tûr leh kan mize pêng nihtîr tûrin theih tâwp kan chhuah tûr tihna a ni. Mahse, hlawhchham châng kan nei ngei ang. A nih leh, engin nge min ṭanpui thei?

Isua entawn tûr siam ṭha famkim chu kan zir a, kan chhût ngun a ngai a. Tirhkoh Paula’n dawhtheihna mize telna, “mihring thar,” chungchâng a sawi khân: “Krista thlamuanna chuan in thinlungah ro rêl rawh se,” tiin min fuih a ni. (Kolossa 3:10, 12, 15) Chutianga ti tûr chuan, Isua entawn tûr siam kan zui a, Pathianin thilte chu a hun takah a siam ṭha ang tih kan ring tlat tûr a ni. Chutiang rinna kan neih chuan, kan chhehvêlah engpawh thleng se, dawhtheihna lantîr lovin kan awm lo vang.—Johana 14:27; 16:33.

Khawvêl thar chu lo thleng thuai se tih kan duh ṭheuh va. Mahse, kan chunga Jehova dawhtheihzia kan ngaihtuah hian dawhtheihna lantîr kan zir a ni. Bible chuan: “Mi ṭhenkhatin muanga an ruat angin Lalpa chu a thutiam kawngah chuan a muang lo ve; tuma boral duh lova, mi zawng zawng lo sim duhin, nangmahni lamah a dawhthei a ni zâwk e,” tiin min tiam a ni. (2 Petera 3:9) Chuvângin, kan chunga Jehova dawhtheihzia kan ngaihtuah chuan, keini pawh mi dangte chungah kan dawhthei lehzual ang. (Rom 2:4) Dawhtheihna kan lantîr a ngaihna dinhmun ṭhenkhat chu engte nge ni?

Kan nî tin nunah dawhtheihna lantîr a ngaihna dinhmun tam tak a awm a. Entîr nân, thil pawimawh sawi tûr nei mah ila, mite tibuai lo tûr chuan dawhtheihna lantîr a ngai a ni. (Jakoba 1:19) Tuemawin min tihlung nih loh hunah dawhtheihna lantîr a ngai bawk. Thinrim taka chhân lêt aiin, Jehova leh Isua’n kan chak lohnate an chhân lêt dân hriat reng chu a ṭha zâwk a. Kan thil tihsual tê tham takte chu an hre reng lo. Chu aiin, kan mize ṭhate chu an hmu a, hma kan sâwn theih nân kan chungah dawhtheihna an lantîr zâwk a ni.—1 Timothea 1:16; 1 Petera 3:12.

Tuemawin thil kan sawi sual leh kan tihsual min hrilh hunah dawhtheihna kan lantîr a ngai bawk. Thinrim takin kan chhâng lêt emaw, thiam thu sawi nghâl emaw kan duh a ni mai thei. Mahse, Pathian Thu chuan kawng danga chhâng lêt tûrin min hrilh a. “Rilrua chhel hi a ṭha zâwk, rilrua chapo aiin. I rilruah thinur hmanhmawh suh, mi âte ṭâng laiah a châm ṭhîn, thinurna hi,” tiin min hrilh a ni. (Thuhriltu 7:8, 9) Chuvângin, min puhna chu dik lo hulhual mah se, dawhtheihna lantîr a, chhân lêt hmaa ngun taka kan ngaihtuah a ngai a. Mite’n dik lo taka an puh hunah Isua’n chutiang chuan a ti a ni.—Matthaia 11:19.

Nu leh pate’n an fate rilru put hmang siam ṭha tûr leh châkna sual pumpelh tûra an ṭanpui hunah dawhtheihna an lantîr lehzual a ngai a. Scandinavia Bethel-a rawngbâwl unau Mattias-a thiltawn hi han ngaihtuah teh. A tleirâwl chhoh chuan, a rinna avângin a school kalpuite’n an nuihsawh ṭhîn a. Atîr chuan, a nu leh pate’n chu chu an hre lo. Mahse, a hnuah, an fapain a rinnaah rinhlelhna a nei ṭan tih an hre ta a. Mattias-a pa Gillis-a chuan, chu dinhmunah chuan an nupain dawhtheihna nasa tak an lantîr a ngai tih a sawi. Mattias-a chuan hêng zawhna: “Pathian chu tu nge ni? Bible hi Pathian Thu ni lo ta se, engtin nge ni ang? Pathianin ti tûra min duhte chu engtin nge kan hriat ang?” tihte a zâwt a. A pa hnênah: “I rin dân leh i ngaih dân ang ka neih ve loh chuan, engah nge rorêlsak ka nih kher ang?” tihte a zâwt bawk.

Gillis-a’n: “A châng chuan, kan fapa hian kan chunga a thinrim vâng ni lovin, thutakin a nun a tiharsa nia a ngaih avângin, thutak kalh zâwngin zawhnate a zâwt ṭhîn,” tiin a sawi. Engtin  nge Gillis-a’n a fapa chu a ṭanpui? “Ka fapa nên ṭhu dûnin, rei tak kan tîtî ṭhîn,” a ti a. A tlângpui thuin, Gillis-a chuan a fapa Mattias-a sawite chu a ngaihthlâksak a, a rilru vei zâwng leh ngaih dânte hriat tumin zawhnate a zâwt ṭhîn a ni. A châng chuan, thil engemaw a hrilh a, tichuan ni khat vêl, a nih loh leh chumi chungchâng an sawi leh hma chu lo ngaihtuah tûrin a hrilh a ni. Ṭum dangahte chuan, a fapa thusawi chu ni engemaw chhûng a ngaihtuah phawt a ngaih thute a sawi bawk. Chutianga an titi ṭhin avângin, Mattias-a chuan tlanna awmzia leh Jehova’n min hmangaihin, kan chungah rorêl tûrin dikna a nei tihte a rawn hre thiam ṭan ta a ni. A pa chuan: “Hun pêk a ngai a, chuan, a harsa hle ṭhîn bawk; mahse, a thinlungah zawi zawiin Jehova hmangaihna a rawn nei chho va. Kan fapa tleirâwl chhoh laia a thinlung thleng tûra dawhtheihna nêna hlawhtling taka kan ṭanpui theih avângin kan nupain kan hlim tak meuh a ni,” tiin a sawi.

Gillis-a leh a nupuiin dawhthei taka an fapa an ṭanpui laiin, Jehova’n a ṭanpui ang tih pawh an ring tlat a. Gillis-a chuan: “Mattias-a hnênah a nu nên kan hmangaih tak zet a, Jehova ṭanpuinaa hre thiam thei tûrin tih tak zeta kan ṭawngṭaisak thu ka hrilh fo a ni,” tiin a sawi. Dawhthei tak leh beidawng lo va zirtîrtu a nu leh pate chu an va hlim tak êm!

Keini pawh natna benvawn nei kan chhûng zînga mi emaw, kan ṭhiante emaw kan enkawl hunah dawhtheihna kan neih a ngai a. Scandinavia biala chêng unaunu Ellen-i * (Footnote en rawh) thiltawn hi han ngaihtuah teh.

Kal ta kum riat vêl khân, Ellen-i pasal chu ṭum hnih lai vawilehkhata a zen thut avângin a thluak a chiang ta lo a. Chu mi avângin, hlimna, lungchhiatna, leh khawngaihna ang chi hriatna a nei tawh lo a ni. Ellen-i tân chuan dinhmun harsa tak a ni a. “Dawhtheihna nasa tak lantîr a, ṭawngṭai fan fan a ngai a ni. Mi thlamuantu Bible châng ka duh deuh mai chu Philippi 4:13 a ni a: ‘Mi tichaktuah chuan engkim ka ti thei a ni,’ tih hi,” tiin a sawi. Jehova thiltihtheihna leh ṭanpuina nên, Ellen-i chuan a dinhmun chu chhel takin a hmachhawn thei a ni.—Sâm 62:5, 6.

Ni e, dawhtheihna lantîrna kawnga entawn tûr ṭha ber chu Jehova a ni a. (2 Petera 3:15) Jehova’n dawhtheihna nasa tak a lantîr thu Bible-ah kan chhiar fo a ni. (Nehemia 9:30; Isaia 30:18) Jehova’n Sodom khua tiboral tûra thu tlûkna a siam chungchângah Abrahama’n vawi tam tak a zawh laia a chhân lêt dân kha i la hria em? Ani chuan Abrahama thu sawi lai chu a pawtchat lo va. A zawhnate leh a hlauhthâwnnate chu dawhthei takin a ngaihthlâksak a. Tichuan, a hlauhthâwnnate chu a hriatthiampuizia târ langin, Sodom khuaa mi fel sâwm chauh an awm a nih pawhin chu khawpui chu a tiboral lo vang tih a tiam a ni. (Genesis 18:22-33) Jehova chuan dawhthei takin a ngaithla ṭhîn a, a lutukin a châng lêt ngai lo!

Dawhtheihna hi Kristian zawng zawngte neih tûr mihring thar pêng pawimawh tak a ni a. Mi dawhthei tak ni tûra theih tâwp kan chhuah chuan, ngaihsakna leh dawhtheihna lantîrtu kan Pa Jehova kan chawimawi a ni ang a, “rinna leh nghah peihna vânga thutiamte rochung tawhte” zînga mi kan ni ang.—Hebrai 6:10-12.