TUNA i la dawn rih loh kohhran chanvo engemaw neih chu i châk em? Chu chu kohhrana unau tuemawin a chan mawhphurhna pawh a ni thei a. A nih loh leh, i lo chelh ṭhin rawngbâwlna chanvo hlu engemaw pawh a ni thei bawk. Mahse, kum upatna te, hrisêl lohna te, sum leh pai harsatna te, leh chhûngkaw mawhphurhnate avângin tûnah i nei thei lo va. A nih loh leh, hun rei tak chhûng i lo chelh tawh mawhphurhna chu inawpna pâwl inthlâk danglamna avângin i hloh pawh a ni thei bawk. A chhan chu engvâng pawh ni se, Pathian rawngbâwlnaa i tih duh ang zawng zawng ti lo niin i inhre mai thei a ni. Chutiang dinhmunah chuan, lunghnual châng i nei a nih pawhin hriatthiam awm tak a ni. Chuti chung pawhin, lunghnualna te, khâkna te, lungawi lohnate ang chi a chhe zâwnga thlîrna i neihte chu engtin nge a zung chawpa i phawi theih ang? Engtin nge i hlimna chu i vawn reng theih ang?

Baptistu Johana entawn tûr siam chu ngaihtuahin, hlimna neih reng theih dân chungchângah zir tûr pawimawh tak kan hmu thei a ni. Johana chuan chanvo pawimawh tak a nei a; mahse, a nuna thilthleng tûrte chu a beisei lohte niin a lang. Rawngbâwlnaa a hun hman zât aia tam, tân inah hun a hmang ang tih a ngaihtuah ngai lo ngei ang. Mahse, Johana chuan hlimna a nei chhunzawm zêl a, chu rilru put hmang chu a dam chhûngin a nei reng a ni. Engin nge ani chu ṭanpui? Lungnihlohnate kan neih hunah pawh engtin nge hlimna kan neih reng theih ang?

C.E. 29 tîr lamah, Johana chuan Messia entîr lâwktu nia a chanvo chu thawk ṭanin: “Sim rawh u! vân ram chu a hnai tawh e,” tiin a puang a. (Mt. 3:2; Lk. 1:12-17) Mi tam takin an chhâng lêt a. Dik tak chuan, a thu ngaithla tûrin hmun hla leh hnai aṭangin mipui an lo kal a, mi tam tak chu sim a, baptisma chang tûra chêttîrin an awm a ni. Johana chuan mahni felna zawngtu sakhaw hruaitute pawh an inthlâk danglam loh chuan rorêlna an hmachhawn dâwn tih a vaukhân bawk. (Mt. 3:5-12) C.E. 29 tâwp lama Isua a baptis khân, Johana chuan a rawngbâwlnaa thil pawimawh ber a ti a. Chuta ṭang chuan, Johana’n mi dangte chu thutiam Messia hnungzui tûrin a hrilh a ni.—Joh. 1:32-37.

 Johana mawhphurhna danglam tak avângin, Isua chuan heti hian a sawi thei a ni: “Hmeichhe hrin zîngah Baptistu Johana aia ropui zâwk an la chhuak ngai lo,” tiin. (Mt. 11:11) Johana chuan malsâwmnate a dawn avângin a hlim ang tih a chiang a. Johana angin, tûn laia mi tam tak pawhin malsâwmna tam tak an dawng a ni. Entîrna pakhat chu unau Terry-a hi a ni a. A nupui Sandra-i nên hunbi kima rawngbâwlnaah kum 50 aia tam an tel a. Terry-a chuan: “Chanvo hlu tam tak ka dawng a. Pioneer te, Bethel-a rawngbâwl te, special pioneer-te, bial kantu te, district overseer te ka thawk ṭhîn tawh a, tûnah pawh special pioneer ka thawk leh a ni,” tiin. Theocratic chanvo hlu dawn chu a hlimawm hle a; mahse, Johana entawn tûr siam aṭanga kan la hriat tûr angin, dinhmun inthlâk danglam hunah pawh hlimna nei reng tûr chuan thawhrim a ngai a ni.

Baptistu Johana’n hlimna a neih reng theih chhan ber chu a chanvo hlu dawnah lâwmna a hloh ngai loh vâng a ni. He entîrna hi han ngaihtuah teh. Isua’n baptisma a chan hnuin, a rawngbâwlna chuan hma a sâwn chho zêl a, Johana rawngbâwlna erawh a tla hniam telh telh a ni. Chu chu an lungkham avângin, Johana zirtîrte chuan rawn panin: “Ngai teh, kha mi khân mi a baptis a, mi zawng zawng a hnênah an lo kal a ni,” tiin an hrilh a. (Joh. 3:26) Johana chuan: “Mo neitu chu a pasal chu a ni; nimahsela moneitu ṭhian, a thu lo ngaichâng rengtu chu moneitu aw a hriat chuan a lâwm êm êm ṭhîn; hei ka lâwmna a thleng ta a nih hi,” tiin a chhâng a. (Joh. 3:29) Ani chuan Isua a el lo va, Isua chanvo dawn chu a ropui zâwk avângin a chanvo chu tihkiam niin a ngai hek lo. Chu aiin, Johana chuan “moneitu ṭhian” anga a chanvo chu a hlut avângin a lâwm reng a ni.

Johana chanvo chu awlsam lo mah se, a rilru put hmang chuan lâwmna nei reng tûrin a ṭanpui a. Entîr nân, Johana chu Nazarit mi nia a pian avângin uain rêng rêng a in lo a ni. (Lk. 1:15) Isua chuan Johana nun samkhai tak chu târ langin: “Johana chu a lo kal a, a eiin a in lo va,” tiin a sawi. Kawng leh lamah chuan, Isua leh a zirtîrte chu chutiang khuahkhirhna hnuaia an awm loh avângin, nun pângngai takin an nung a. (Mt. 11:18, 19) Chu bâkah, Johana chuan thilmak pakhat mah ti lo mah se, a hnungzui ni tawh ṭhînte pawh tiamin, Isua zirtîrte chuan chu thiltihtheihna chu an dawng tih a hria a ni. (Mt. 10:1; Joh. 10:41) Chûng inan lohnate avânga rilru buaia awm aiin, Jehova pêk a chanvo dawnah a rilru a pe tlat zâwk a ni.

Keini pawh Jehova rawngbâwlnaa tûna kan chanvo dawnte kan hlut a nih chuan kan lâwmna chu kan humhim thei ang. A chunga kan sawi tâk Terry-a chuan, “Ka chanvo dawn apiangah ka rilru ka pe tlat a ni,” tiin a sawi. Hunbi kima a rawngbâwlna a thlîr lêt chuan, “Inchhîrna tûr engmah ka nei lo va, ka thil hriatchhuah apiangte chu lâwmna tûr hlîr a ni,” tiin a sawi.

Theocratic chanvo leh mawhphurhnate hlutna neihtîrtu dik tak chhût ngunna aṭangin Pathian rawngbâwlnaah hlimna nasa tak kan nei thei a. Chu chu “Pathian hnathawhpuite” kan nihna hi a ni. (1 Kor. 3:9) Thil hlu engemaw chu kan vawn ṭhat reng chuan a hlutna a ngai reng ṭhîn angin, Pathian rawngbâwlna hmanga amah kan chawimawi theihna chu kan ngaihtuah tlat chuan hlimna kan nei reng thei ang. Kan thawhrimnate leh mi dangte thawhrimnate chu kan khaikhin lo vang a. Mi dangte dawn chanvo hlute avângin kan chanvo dawnte chu kan ngainêp hek lo vang.—Gal. 6:4.

Johana chuan hun rei tak chhûng rawng a bâwl dâwn lo tih a hre mai thei a; mahse, vawilehkhatah a tâwp thut ang tih erawh a hre lo mai thei. (Joh. 3:30) C.E. 30-a Isua a baptis hnu thla ruk vêlah, ani chu Lal Heroda’n tân inah a khung a. Chuti chung pawhin, Johana chuan a theih ang tâwkin thu a la hril zawm zêl a ni. (Mk. 6:17-20) Chûng inthlâk danglamna kârah pawh lâwmna nei reng tûrin engin nge ani chu ṭanpui? Thlarau lam thilte ngaihtuah tlatna hmangin a ni.

Tân ina a awm laiin, Johana chuan Isua rawngbâwlna zauh a nih thu a lo hria a. (Mt. 11:2; Lk. 7:18) Ani chuan Isua chu Messia a ni tih ring tlat mah se, Messia tihfamkim tûr, Pathian Thu-a târ lan zawng zawngte chu engtin nge a tihfamkim ang, tiin a ngaihtuah mai thei a ni. Messia chu lalna chang tûr a nih avângin, Isua rorêlna chu a inṭan  hnai tawh ang em? Chu chuan Johana chu tân in ata a chhuah zalêntîr ang em? Isua chanvo chu chiang taka a hriatthiam duh avângin, Johana chuan a zirtîrte zînga pahnih chu Isua hnênah he zawhna va zâwt tûr hian a tîr a ni: “Lo kal tûra chu i ni nge, mi dang kan la ngai ang?” tiin. (Lk. 7:19) An lo kîr leh chuan, Johana chuan Isua’n thilmak tia mite a tihdam thute leh “mitdelte an mit a lo vâr ta, kebaite kein an lo kal ta, phârte an lo thianghlim ta, bengngawngte pawh an beng a lo vâr ta, mitthite kaihthawhin an awm ta, pachhiaten chanchin ṭha hrilh an dawng ta,” tih thu an hrilhte chu ngun takin a ngaithla ngei ang.—Lk. 7:20-22.

Johana chuan a thu hriatte chu a chakpui ngei ang tih a chiang a. Chu a thu hriatte chuan Isua’n Messia hrilh lâwknate chu a tifamkim tih a nemnghet a ni. Isua lo lanna chuan Johana chu tân in ata chhuah zalêntîr dâwn lo mah se, Johana chuan a rawngbâwlna chu a thlâwn lo tih a hria a. A dinhmun chu ṭha lo mah se, hlimna tûr chhan a nei a ni.

Johana ang bawkin, thlarau lam thilte kan ngaihven chuan, hlimna leh dawhtheihna kan nei reng thei ang. (Kol. 1:9-12) Bible kan chhiar a, kan chhût ngun a, Pathian rawngbâwlnaa kan thawhrimnate chu a thlâwn ngai dâwn lo tih kan inhriatnâwntîr chuan keini pawh kan hlim reng ang. (1 Kor. 15:58) Sandra-i chuan heti hian a sawi a ni: “Nî tin, Bible bung khat chhiarna chuan Jehova hnaih tûrin min ṭanpui a. Chu chuan mahni ni lovin, amah ngaihtuah tlat tûrin min ṭanpui a ni,” tiin. Keini pawh Lalram rawngbâwlna chanchinte kan ngaihven thei a, chu chuan mahni dinhmun piah lam thlenga thlîr tûr leh Jehova thil hlenchhuahte ngaihven tlat tûrin min ṭanpui thei a ni. Sandra-i chuan: “Thla tin chhuak JW Broadcasting^® hian inawpna pâwl nên inhnaih lehzual nia inhriatna min neihtîr a, chu chuan kan chanvo dawna hlimna nei reng tûrin min ṭanpui a ni,” tiin a sawi.

Baptistu Johana chuan a rawngbâwl chhûng rei lo tê chu “Elija rilru leh a thiltihtheihna puin” a thawk a, Elija angin, ani chu “keimahni nungchang ang pu mihring bawk a ni.” (Lk. 1:17; Jak. 5:17) Ngaihhlutna châng hria a, thlarau lam thilte ngaihven tlatna kawnga a entawn tûr siam kan zui chuan, eng pawh lo thleng se, Lalram rawngbâwlnaah hlimna kan nei reng thei ang.