1. Kan za hian kan chhûngte tâna kan duhsak chu eng nge ni?

“THUTAK ka zir phat aṭangin ka chhûngte zawng zawng chu ka ruala Paradis-a awm tûrin ka duh a. A bîk takin, ka pasal Wayne-a leh kan fapa chuan ka rualin Jehova rawngbâwl ve se tih ka duh a ni,” tiin unaunu Pauline-i chuan a sawi. * Jehova la hre lo va, hmangaih lotu chhûngte i nei em? I nei a nih chuan, Pauline-i’n a chhûngte tâna a ngaihtuah angin i ngaihtuah ve ngei a rinawm.

2. He thuziakah hian eng zawhnate nge kan sawiho vang?

² Kan chhûngte chu chanchin ṭha pawm a, chatuan nunna nei tûrin kan tilui thei lo va; mahse, an thinlung leh rilrua Bible thuchahte pawm thei tûrin kan fuih thei a ni. (2 Tim. 3:14, 15) Engvângin nge kan chhûngte chu thu kan hrilh ang? Engvângin nge lainatna kan lantîr a ngaih? Kan chhûngte chu keimahni anga Jehova hmangaih ve tûrin engtin nge kan ṭanpui theih? Engtin nge kohhrana mi zawng zawngin min ṭanpui theih?

3. Petera thawn hnih 3:9-a sawi angin, engvângin nge kan chhûngte chu thu kan hrilh ang?

³ Nakin lawkah, Jehova chuan he khawvêl hi a tiboral dâwn a. “Chatuana nun duhna rilru dik tak” pute chauh an dam khawchhuak ang. (Tirh. 13:48, NW) Hun leh tha tam tak sêngin kan rawngbâwlna biala mite chu thu kan hrilh a, chuvângin, kan chhûngte chu kan ruala Jehova be tûra kan duh chu thil inâwm  tak a ni a. Hmangaihna ngah tak kan Pa, Jehova chuan “tuma boral duh lova, mi zawng zawng lo sim” chu a duh a ni.—2 Petera 3:9 chhiar rawh.

4. Kan chhûngte hnêna thu kan hrilh hunah eng nge kan tihsual mai theih?

⁴ Chhandamna thuchah hrilh dân kawng dik leh dik lo a awm tih kan hriat a ngai a. Mite chu remhre takin thu kan hrilh pawh a ni thei; mahse, kan chhûngte chu bung takin kan bia pawh a ni thei bawk.

5. Kan chhûngte hnêna thutak hrilh kan tum hmain eng nge kan hriat reng ang?

⁵ Kan zînga tam tak chuan chhûngte hnêna thu hrilh kan tum ṭan laite ngaihtuah lêtin, kawng dangin lo sawi ta ila chu aw, tiin kan inchhîr vawng vawng mai thei a. Tirhkoh Paula chuan Kristiante chu: “Mi tin engtia chhân ṭheuh tûr nge ni tih in hriat theih nân in ṭawngka chhuak chu chia al, khawngaihna tel ni fo rawh se,” tiin min fuih a ni. (Kol. 4:5, 6) Kan chhûngte kan pan hunah he fuihna hriat reng hi a ṭha a. Chuti lo chuan, anmahni hîp ahnêkin, min hlat hret hret zâwk thei a ni.

6-7. Ring lotu kawppui lakah lainatna lantîr a ngai tih târ langtu entîrna pakhat pe rawh.

⁶ Lainatna lantîr rawh. Kan sawi tâk Pauline-i chuan: “Atîr chuan, ka pasal hnênah thlarau lam chungchâng chauh sawi ka duh a. ‘Pângngai’ taka inkawmna kan nei ngai lo,” tiin a sawi. Mahse, Pauline-i pasal Wayne-a chuan Bible hriatna a neih tlêm avângin a nupui thusawi chu a hre thiam lo va. A tân chuan, a nupuiin a sakhua ringawt a ngaihtuah niin a lang. Ani chuan a nupuiin pâwl hlauhawm a zawm leh buma a awm a hlauthâwng a ni.

⁷ Pauline-i chuan zan lamahte leh chawlhkâr tâwpahte—inkhâwmte, thu hrilh te, leh inkawm khâwmnaahte—chuan thlarau lama  unaute nên hun a hmang tam hle tih a pawm a. Ani chuan: “Wayne-a ina a haw hian, tumah kan awm loh chângte a awm a, mal niin a inhria a ni,” tiin a sawi. Wayne-a’n a nupui leh a fapa a ngai ṭhîn chu hriatthiamawm tak a ni. A nupui leh a fapa chu tute nên nge an awm tih a hre lo va, a nupui ṭhian tharte chu amah aiin an pawimawh zâwk niin a lang. Wayne-a chuan a nupui Pauline-i chu ṭhen tumin a vau va. Pauline-i’n lainatna a lantîr lehzual theih dân kawngte chu i hmu thei em?

8. Petera thawn khat 3:1, 2-a sawi angin, kan chhûngte chunga nghawng nei bertu chu eng nge ni thei?

⁸ Entawn tûr ṭha siam rawh. Kan thusawi aiin kan thiltihin kan chhûngte chungah nghawng a nei nasa zâwk ṭhîn a. (1 Petera 3:1, 2 chhiar rawh.) Pauline-i chuan a tâwpah, chu chu a hre thiam ta a ni. “Wayne-a chuan min hmangaihin, inṭhen chu a duh tak tak lo tih ka hria. Mahse, a mi vauna chuan Jehova tih dâna thil ka tih ṭan a ngai tih min hriatchhuahtîr a. Ṭawng tam lutuk aiin, ka nungchanga entawn tûr ṭha ka siam a ngai a ni,” tiin a sawi. Pauline-i chuan a pasal Wayne-a chu Bible chungchâng sawipui tawh lovin, ni tina an thiltihte chu a sawipui zâwk a. Wayne-a chuan a nupuiin inrem taka awm a duhzia a rawn hmu ṭan a, an fapa nungchang pawh a ṭha chho tih a hmu a ni. (Thuf. 31:18, 27, 28) Wayne-a chuan Bible thuchahin an chhûngkuaah nghawng ṭha a nei tih a hmuh chuan, Pathian thu ngaihthlâk a duh lehzual ta a ni.—1 Kor. 7:12-14, 16.

9. Engvângin nge kan beih ṭâng ṭâng ang?

⁹ I chhûngte chu ṭanpui ṭâng ṭâng rawh. Jehova chuan kan tân entawn tûr ṭha a siam a. Ani chuan mite’n chanchin ṭha an pawm a, nunna an hmuh theih nân hun remchâng a pe  “ṭhîn a.” (Jer. 44:4, Mizo King James Bible) Tirhkoh Paula chuan Timothea chu mi dangte ṭanpui ṭâng ṭâng tûrin a hrilh a ni. Engvângin nge? Chutianga a tih ṭâng ṭâng chuan, amah leh a thu ngaithlatute chu a chhandam dâwn a ni. (1 Tim. 4:16) Kan chhûngte kan hmangaih avângin Pathian Thu-a kan hmuh thutak hriattîr chu kan duh a. Pauline-i thusawi leh thiltih chuan a tâwpah, a chhûngte chungah rah ṭha a chhuah a ni. Tûnah chuan hlim takin a pasal nên Jehova rawng an bâwl tawh a. An pahnihin pioneer an thawk a, Wayne-a chuan kohhran upa niin rawng a bâwl a ni.

10. Engvângin nge dawhtheihna kan lantîr a ngaih?

¹⁰ Dawhtheina nei rawh. Pathian tehnate mila kan nun hian, kan rinna leh nun dâna inthlâk danglamna kan neihte chu kan chhûngte tân pawm a harsa thei a. A tlângpui thuin, an hmuh hmasak ber chu sakhuana kûtahte leh politics thiltihnaahte an ruala kan tel tawh lo hi a ni. Atîr chuan, kan chhûngte zînga ṭhenkhat chu kan chungah an thinrim mai thei a. (Mt. 10:35, 36) Mahse, an chungah kan beidawng mai tûr a ni lo. Kan thurinte hre thiam tûra kan ṭanpui chhunzawm loh chuan, anni chu chatuan nunna hmu tlâk lova ruat ang kan ni ang. Jehova chuan rorêl tûrin min ruat lova, chu chu Isua thawh tûrah a ruat a ni. (Joh. 5:22) Dawhtheihna kan lantîr chuan, kan chhûngte chuan a tâwpah kan thuchah ken chu an ngaithla duh mai thei a ni.—“ Zirtîr Nân Kan Website Hmang Rawh,” tih bâwm chu en ang che.

11-13. Alice-i’n a nu leh pa a cheibâwl dân aṭangin eng nge kan zir?

¹¹ Nghet tlat la, mahse, remhre rawh. (Thuf. 15:2) Alice-i entawn tûr siam hi han ngaihtuah ta ila. Ani chuan Pathian awm ring lo leh politics lama inhnamhnawih a nu leh pate hnên aṭanga hmun hla taka a awm laiin Jehova chanchin a hria a. Chûng a thu hriat ṭha tak takte chu a nu leh pate a hrilh vat a ngai tih a hria a ni. Alice-i chuan: “I thurin leh thiltih dânte i thlâk danglam tih a hnu daiha i chhûngte i hrilh chuan, an thin a ṭhawng nasa lehzual ang,” tiin a sawi. Ani chuan a nu leh pa hnênah lehkha a thawn a, hmangaihna ang chi, an ngaihven tûra a rin thupuite chungchânga Bible zirtîrna an thlîr dânte chu a zâwt a ni. (1 Kor. 13:1-13) An enkawl seilen avânga a lâwm thute hrilhin, thilpêkte pawh a thawn tel a. A nu leh pate hnêna a va zin châng pawhin, in chhûng thiltih engkimah a nu chu a ṭanpui bawk. Atîr chuan, Alice-i’n a nu leh pate hnênah a thurinte a hrilh chuan an chhâng ṭha vak lo a ni.

¹² Alice-i chuan a nu leh pate hnêna a awm laiin a tih dân ṭhin angin, nî tin Bible a chhiar a. Ani chuan: “Chu chuan Bible hi ka tân a pawimawhzia hre thiam tûrin ka nu a ṭanpui a ni,” tiin a sawi. Chutih lai chuan, Alice-i pa chuan a fanuin a ngaihtuahna a thlâk chhan leh Bible dik lohna hmuh tumin Bible chungchângah thil engemaw zir a tum ta a. Alice-i chuan: “Ka pa chu Bible ka pe a, Bible kârah chuan lehkha tâwi tê ka ziah chu ka zep tel bawk a ni,” tiin a sawi. Eng nge a rah chhuah? Bible dik lohna hmuh aiin, Pathian Thu a chhiarte chuan a rilru a hneh hle zâwk a ni.

¹³ Fiahnate kan tâwk a nih pawhin, nghet tak si; mahse, remhre taka kan awm a ngai a. (1 Kor. 4:12b) Entîr nân, Alice-i chuan a nu dodâlna a hmachhawn a ngai a. “Baptisma ka chan chuan, ka nu’n ‘fanu sual,’ tiin min ko va,” tiin a sawi. Engtin nge Alice-i’n a chhân lêt? “Harsatna pumpelh tum aiin, Jehova Thuhretu pakhat nih ka tum thu leh thu tlûkna ka siam mila nun zêl ka tum thu zah thiam takin ka hrilhfiah a. Ka nu chu ka hmangaih tak zet tih hriatchiantîr ka tum a. Ka nu nên chuan kan pahnihin kan ṭap dûn a; tichuan, a tân  chawhmeh tui tak ka siamsak bawk a. Chuta ṭang chuan, ka nu chuan, Bible-in mi ṭha zâwk ni tûrin min siam tih a pawm ta a ni,” tiin a sawi belh a ni.

14. Engvângin nge nêksâwrna hnuaiah kan tlâwm ngai loh vang?

¹⁴ Kan tâna Jehova rawngbâwl a pawimawhzia kan chhûngte’n an hriatthiam nân hun engemaw chen pêk a ngai a. Entîr nân, Alice-i chuan a nu leh pate’n thawk tûra an duh hna chu thawk lo va, pioneer thawh a tum chuan, a nu chu a ṭap a. Mahse, Alice-i chuan pioneer thawh chu a tum tlat a ni. “Nêksâwrna pakhata i tlâwm a nih chuan, thil dangah pawh i chhûngte chuan an nawr lui duh mai thei che a. Mahse, i chhûngte chungah ngilneihna i lantîr ruala nghet taka i awm chuan, an zînga ṭhenkhatin i thusawi chu an ngaithla duh mai thei,” tiin a sawi. Alice-i chungah chutiang chiah chuan a thleng a. A nu leh pate chuan tûnah pioneer an thawk a, a pa chu kohhran upa a ni.

15. Matthaia 5:14-16 leh 1 Petera 2:12-a sawi angin, mi dangte “thil tih ṭhatte” chuan engtin nge kan chhûngte chu a ṭanpui theih?

¹⁵ Jehova chuan Kristian kohhrana “thil tih ṭhatte” hmangin mite chu a lamah a hîp a. (Matthaia 5:14-16; 1 Petera 2:12 chhiar rawh.) I kawppui chu Jehova Thuhretu a nih loh chuan, kohhrana unaute chu a hmu tawh ṭhîn em? A chunga kan sawi tâk Pauline-i chuan a Kristian unaute chu a pasal Wayne-a’n a hriat theih nân an ina lêngah a sâwm a. Wayne-a chuan Thuhretute chungchânga hriat sualna a neih tibo tûra unaupa pakhatin a ṭanpui dân heti hian a sawi a ni:  “Football min enpui tûr ringawtin a hna aṭangin ni khat chawlh a la a. ‘Mi pângngai tak a nih hi maw le!’ ka ti rilru a,” tiin a sawi.

16. Engvângin nge kan chhûngte chu inkhâwma lo te ve tûra kan sâwm ang?

¹⁶ Kan chhûngte ṭanpui theih dân kawng ṭha tak pakhat chu kan ruala inkhâwm tûra sâwm hi a ni. (1 Kor. 14:24, 25) Wayne-a inkhâwm hmasak ber ṭum chu Hriatrengna inkhâwm a ni a, chu inkhâwm chu hna thawh bân hnua ṭan a niin, dârkâr rei vak lo a ni. “Thusawi chu ka hre thiam lo rêng rêng; mahse, ka rilru khawihtu ber chu mite an ni. Min rawn pan a, min lâwm a, min chibai a. Mi ṭha tak an ni tih ka sawi thei,” tiin a sawi. A bîk takin, nupa tuak khat chuan inkhâwmnaah leh rawngbâwlnaah Pauline-i leh a fapa chu ṭanpuiin an chungah an ṭha hle a. Chuvângin, Wayne-a chuan a nupui Pauline-i thurin chungchâng a hriatthiam lehzual a ngai nia a inhriat chuan, chu unaupa hnênah Bible zirpui tûrin ṭanpuina a dîl ta a ni.

17. Engvângin nge mahni inthiam lohna kan neih loh vang a, kan chhûngte chunga kan beidawn loh vang?

¹⁷ Kan chhûngte zawng zawng chu kan rualin Jehova rawngbâwl ve se tih kan beisei a. Mahse, Pathian chhiahhlawhte ni tûra theih tâwp chhuaha kan ṭanpui chung pawhin, thutakah an rawn awm lo pawh a ni thei. Chutiang a nih chuan, an thu tlûkna siam avângin thiam loh kan inchan tûr a ni lo. Dik tak chuan, kan rinna pawm tûrin tumah kan tilui thei lo va. Mahse, i chhûngte’n hlim taka Jehova rawng i bâwl an hmuhnain an chunga nghawng a neih theih dân chu ngainêp ngai suh. An tân ṭawngṭaisak la. Remhre takin be ṭhin ang che. Anni chu ṭanpui lovin awm suh! (Tirh. 20:20) Jehova’n i thawhrimna chu mal a sâwm ang tih ring tlat ang che. I chhûngte’n i thu an ngaihthlâk chuan, chhandam an ni ang!