1. Philippi khuaa kohhran din tûrin tute’n nge ṭanpui?

TIRHKOH Paula te, Sila te, Luka te, leh Timothea te chuan Rom awpna hnuaia awm Philippi khua an thlen chuan mi tam takin Lalram thuchah an ngaihven tih an hmu a. Chûng unau pali ṭhahnemngai takte chuan kohhran din tûrin an ṭanpui a, zirtîr zawng zawngte chu an inhmukhâwm a, chu hmun chu khualchhâwn thiam tak, ringtu Ludi in a nih a rinawm.—Tirh. 16:40.

2. Kohhranin a hmachhawn thuai harsatna chu eng nge ni?

² Chu kohhran din thar chuan fiahna a hmachhawn ta thuai a. Setana chuan chûng Kristian mi rinawmte thu hrilh rawngbâwlna nasa taka dodâltu thutak hmêlmate chu a chêttîr a ni. Paula leh Sila chu an man a, hruiin an vua a, tân inah an khung a. Tân in aṭanga chhuah an nih chuan, zirtîr tharte chu va tlawhin, an fuih a. Tichuan, Paula, Sila, leh Timothea te chuan khua chu an chhuahsan a, Luka erawh chu a la châm rih a ni. Kohhran din thar chu engtin nge a awm tâk zêl? Jehova thlarau thianghlim ṭanpuinain, ringtu tharte chuan Jehova rawngbâwlnaah hma an sâwn zêl a. (Phil. 2:12) Chu chu Paula’n anmahni a chhuan chhan ṭha tak a va ni êm!

3. Philippi 1:9-11-a târ lan angin, Paula chu eng atân nge a ṭawngṭai?

³ Kum sâwm têl a liam hnu chuan, Paula’n Philippi khuaa kohhran hnênah lehkha a thawn a. Chu lehkha thawn i chhiar chuan, Paula’n a unaute a hmangaihzia i hmu nghâl thei ang. Ani chuan: “Krista Isua lainatna chuan in zavaiin ka ngaihzia mai che u chu,” tiin a ziak a. (Phil. 1:8) An tân a  ṭawngṭaisak thu pawh a ziak bawk. Hmangaihna tipung tûr te, thil pawimawh zâwk fiah tûr te, sawisêl bova awm tûr te, mi dang tlûkna siam lo tûr te, leh felna rah, rah zawm zêl tûra Jehova ṭanpuina dawng tûrtein a dîlsak a ni. Thinlung taka Paula thusawite chu tûn laiah kan hlâwkpui thei tih i pawm ngei ang. Chuvângin, Philippi khuaa Paula lehkha thawn chu i lo chhiar ang u. (Philippi 1:9-11 chhiar rawh.) Tichuan, a târ lan thu pawimawh laite kan ngaihtuahho vang a, kan nunpui theih dânte pawh kan sawiho bawk ang.

4. (a) Johana thawn khat 4:9, 10-a sawi angin, Jehova’n min hmangaihzia engtin nge a târ lan? (b) Pathian chu engtiang khawpa hmangaih tûr nge kan nih?

⁴ Jehova chuan a Fapa chu kan sualte tâna thi tûra leia rawn tîrin min hmangaihzia a lantîr a. (1 Johana 4:9, 10 chhiar rawh.) Mahni hmasial lo Pathian hmangaihna chuan amah hmangaih tûrin min chêttîr a ni. (Rom 5:8) Pathian chu engtiang khawpa hmangaih tûr nge kan nih? Isua’n chu zawhna chu chhângin, Pharisai pakhat hnênah heti hian a sawi a ni: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,” tiin. (Mt. 22:36, 37) Thinlung chanve chauhva Pathian hmangaih chu kan duh lo. Chu aiin, amah kan hmangaihna chu ni tina nghet zual deuh deuh tûrin kan duh a ni. Paula chuan Philippi khuaa mite chu an hmangaihna ‘tipung deuh deuh’ tûrin a hrilh a. Pathian kan hmangaihna tinghet lehzual tûrin eng nge kan tih theih?

5. Engtin nge kan hmangaihna chu a ngheh zual deuh deuh theih?

⁵ Pathian hmangaih tûr chuan amah kan hriat a ngai a. Bible chuan: “Hmangaihna nei lo chuan Pathian a hre lo; Pathian chu hmangaihna a ni si a,” tiin a sawi. (1 Joh. 4:8) Tirhkoh Paula chuan Pathian chungchâng ‘hriatna dik leh hriatthiam theihna’ kan neih chhoh zêl rualin, amah kan hmangaihna chu a nghet telh telh ang tih a sawi a ni. (Phil. 1:9) Bible kan zir ṭantîr chuan, Pathian mize duhawm takte hriain, hmangaihna kan nei ṭan a. Tichuan, Jehova chanchin kan zir tam poh leh amah kan hmangaihna pawh a nghet lehzual sauh vang. Bible zirna neih ziah leh Pathian Thu chhût ngunna chu kan nuna thil pawimawh berte zînga mi nia kan ngai chu a mak lo ve!—Phil. 2:14-16.

6. Johana thawn khat 4:11, 20, 21-a sawi angin, eng kawngin nge kan hmangaihna kan tihpun theih?

⁶ Pathian hmangaihna nasa tak chuan kan unaute hmangaih tûrin min chêttîr ang. (1 Johana 4:11, 20, 21 chhiar rawh.) Kan unaute hmangaih chu thil awlsam takah kan ngai mai thei a. Chutiang a nih chhan chu Jehova kan bia a, a mize duhawm tak takte entawn kan tum tlat vâng a ni. Kan aia a nun pe hial khawpa min hmangaihtu Isua entawn tûr siam chu kan zui a. Mahse, inhmangaih tawn tûra a thupêk chu zawm harsa tih châng kan nei mai thei a ni. Philippi kohhrana entîrna pakhat hi i lo ngaihtuah ang u.

7. Paula’n Euodii leh Suntuki te a fuihna aṭangin eng nge kan zir theih?

⁷ Euodii leh Suntuki chu chanchin ṭha hrilhnaa tirhkoh Paula “beihpui,” unaunu ṭhahnemngai tak an ni a. Mahse, mi mal inkâra inrem lohna an neih avângin an inṭhian tawh lo niin a lang. Chûng unaunute awmna kohhran hnêna lehkha a thawnnaah, Paula chuan Euodii leh Suntuki te hming sawi langin, “rilru hmun khat pu tûrin” fuihna chiang tak a pe a ni. (Phil. 4:2, 3) Paula chuan kohhran pumpui chu hetianga kaihhruaina pêk an ngai niin a hria a ni: “Phunnawina leh inhnialnate awm lovin engkim ti rawh u,” tiin. (Phil. 2:14-16) Tlang taka Paula fuihna chuan unaunu  rinawm pahnihte chauh ni lovin, kohhran pumpui chu an inhmangaih tawnna tinghet tûrin a ṭanpui ngei ang.

8. Unaute kan hmangaihna dâltu ber chu eng nge ni a, chu chu engtin nge kan hneh theih?

⁸ Euodii leh Suntuki te angin, keini pawhin mi dangte kan hmangaihna dâltu lian tak—ṭhat famkim lohnate ngaihvenna—kan nei thei a. Kan za hian ni tinin thil kan tisual ṭhîn a ni. Mi dangte ṭhat famkim lohna kan ngaihven reng chuan, anmahni kan hmangaihna a dai ang. Entîr nân, unaupa pakhatin Kingdom Hall tihthianghlimnaah min ṭanpui a theihnghilh chuan, thin a rim duh mai thei. Chu bâkah, tûn hmaa a thiltih sual zawng zawngte kan ngaihtuah chhuah phei chuan, kan thinrimna chu a nasa lehzual ang a, amah kan hmangaihna chu a kiam ang. Chutiang dinhmunah kan awm a nih chuan, heti hian ngaihtuah a ṭha a ni: Jehova chuan kan ṭhat famkim lohna leh chu unaupa ṭhat famkim lohna pawh a hmu a. Mahse, ṭhat famkim lohnate kan nei chung pawhin, ani chuan kan unaupa chu a la hmangaih reng a, keini pawh min la hmangaih reng a ni. Chumi avâng chuan Jehova hmangaihna chu kan entawn a ngai a, unaute chu a ṭha zâwnga kan thlîr reng a ngai a ni. Unaute hmangaih tûra theih tâwp kan chhuah hian, kan inlungrualna kan tihnghet a ni.—Phil. 2:1, 2.

9. Philippi khuaa mite hnêna Paula târ lan “thil pawimawh zâwkte” zîngah engte nge tel?

⁹ Thlarau thianghlim chuan Paula chu Philippi khuaa Kristian zawng zawngte hnênah “thil pawimawh zâwkte chu fiah” tûra kaihhruaina pe tûrin a thâwk khum a. (Phil. 1:10, NW) Chûng thil pawimawhte zîngah chuan Jehova hming tihthianghlimna te, a thiltum tihfamkimna te, leh kohhrana remna leh inlungrualna awmtîrte a tel a ni. (Mt. 6:9, 10; Joh. 13:35) Kan nunah chûng thil pawimawhte kan dah hmasak chuan Jehova kan hmangaih tih kan târ lang a ni ang.

10. Sawisêl bo ni tûr chuan eng nge kan tih ngai?

¹⁰ Paula chuan “sawisêl bo” kan ni tûr a ni tih a sawi bawk. Chu chu ṭha famkim kan ni tûr tihna a ni lo. Pathian Jehova angin sawisêl bo kan ni thei lo va. Mahse, kan hmangaihna pung zêl tûra theih tâwp kan chhuah a, thil pawimawh zâwkte kan fiah chuan Jehova’n sawisêl bo angin min thlîr ang. Hmangaihna kan lantîr theih dân kawng khat chu mi dangte titlu lo tûra theih tâwp kan chhuahna hi a ni.

11. Engvângin nge mi dangte tihtlûk chu kan pumpelh ang?

¹¹ Dik tak chuan, mi dangte titlu lo tûra kaihhruaina hi vaukhânna a ni a. Engtin nge mi chu kan tihtlûk mai theih? Intihhlimna kan thlan dân te, kan inthuam dân te, leh hnathawh tûr kan thlan dânte chuan mi dang a titlu thei a. Kan thiltih chu thil sual a ni hran lo mai thei. Mahse, kan duhthlannain tuemaw chhia leh ṭha hriatna khawih pawi a, a tihtlûk chuan, chu tak chu thil sual a ni. Isua chuan a berâm zînga pakhat kan tihtlûk aiin kan nghâwnga buh râwt sawmna lung lianpui awrhtîr a, tuifinriat thûk taka thlâk chu kan tân a ṭha zâwk ang tih a sawi!—Mt. 18:6.

12. Pioneer nupa tuak khat entawn tûr siam aṭangin eng nge kan zir theih?

¹² Pioneer nupa tuak khatin Isua vaukhânna an ngaih pawimawh dân chu chhinchhiah ang che. Anni chu kohhran pakhata ngaih dân thlâk harsat mite zînga seilian baptisma chang thar nupa tuak khat nên rawng an bâwl tlâng a. Baptisma chang thar nupate chuan Kristiante chu film ṭha en tûr pawhin Cinema Hall-ah an kal tûr a ni lo tih ngaih dân an nei a. An rawngbâwlpui pioneer nupate’n Cinema  an en tih an hmuh chuan mak an ti hle a ni. A hnuah, chu pioneer nupa chuan baptisma chang thar nupate’n an chhia leh ṭha hriatna an sawizawi ṭhat lehzual hma chu cinema an en tawh lo va. (Heb. 5:14) Mahni hmasial lo an thiltih hmangin, pioneer nupa chuan baptisma chang thar nupate chu ṭawngkâ mai ni lovin, thiltihin an hmangaihzia an lantîr a ni.—Rom 14:19-21; 1 Joh. 3:18.

13. Engtin nge tuemaw chu thil sual ti tûra kan thlêm mai theih?

¹³ Tuemaw kan tihtlûk theih dân kawng dang leh chu thil sual ti tûra thlêmna hmangin a ni. Chutiang chu engtin nge a thlen theih? He dinhmun hi han ngaihtuah teh. Hun rei tak chhûng, theih tâwp a chhuah hnuah, Bible zirlai pakhat chuan a tâwpah a zu ngawlveina chu a hneh thei ta a. Zu chu a bânsan hmak a ngai tih a hria a. Ani chu hmasâwn chho zêlin, baptisma a chang ta a ni. A hnuah, Kristian inkawm khâwmnaa in neitu ṭha tak chuan, chu kan unau thar hnênah zu inve tûrin heti hian a fuih a ni: “Tûnah chuan, Kristian i ni tawh a, Jehova thlarau thianghlim i nei a. Thlarau rah pêng pakhat chu insûmtheihna a ni a. Insûmtheihna i lantîr chuan, zu chu a âwm tâwkin i in thei alâwm,” tiin. Chu kan unau thar chuan, chu fuihna dik lo tak chu a zâwm a nih chuan, a sawhkhâwk tûr chu kan hre nghâl thei ang!

14. Engtin nge Kristian inkhâwmte chuan Philippi 1:10, 11-a kan hmuh kaihhruainate nunpui tûra min ṭanpui theih?

¹⁴ Kan Kristian inkhâwmte chuan Philippi 1:10, 11-a kan hmuh kaihhruaina chu kawng tam taka zâwm tûrin min ṭanpui thei a. Pakhatnaah, thlarau lam chaw hnianghnâr taka min  buatsaihsakna chuan Jehova’n thil pawimawh zâwka a ngaihte min hriatchhuahtîr a ni. Pahnihnaah, sawisêl bova kan awm theih nân kan thil zirte nunpui theih dân chu kan hria a ni. Pathumnaah, ‘hmangaih leh thil ṭha tiin kan inchawk tho bawk.’ (Heb. 10:24, 25) Kan unaute avânga tihchaka kan awm poh leh, Pathian leh kan unaute chu kan hmangaih lehzual ang. Chu hmangaihna chi hniha kan thinlung kan tihkhah chuan unaute titlu lo tûrin theih tâwp kan chhuah ang.

15. ‘Felna raha khat’ tih awmzia chu eng nge ni?

¹⁵ Paula chuan Philippi khuaa mite chu ‘felna raha khat’ tûrin tih tak zetin a ṭawngṭaisak a. (Phil. 1:10, 11) Chu ‘felna rahah’ chuan Jehova leh a mite an hmangaihna pawh a tel a. Isua an rinna leh an beiseina ropui tak chungchâng mi dangte hnêna an hrilhna pawh a tel bawk. Philippi 2:14-16-na chuan “khawvêlah hian tiêngtu angin” tih entîr nei ṭawngkam dang a hmang a. Isua’n a zirtîrte chu “khawvêl êng in ni e,” tia a koh avângin, chu chu inâwm tak a ni. (Mt. 5:14-16) A hnungzuite chu mite “zirtirahte” siam tûrin thu a pêk bâkah, anni chu ‘kâwlkil thleng pawhin . . . thuhretute an ni ang’ tih a sawi a ni. (Mt. 28:18-20; Tirh. 1:8) He rawngbâwlna pawimawh bera ṭhahnemngai taka kan tel hian “felna rah” chu kan rah a ni.

16. Engtin nge Philippi 1:12-14-na chuan dinhmun harsa tak hnuaiah pawh tiêngtute kan ni thei tih a târ lan? (A kâwma milem en rawh.)

¹⁶ Kan dinhmun chu engpawh ni se, tiêngtute angin kan êng thei a. Dinhmun ṭhenkhatah chuan, chanchin ṭha hrilhna dâltu anga langte chu, thu hrilh theihna remchângah a inlet thei a ni. Entîr nân, tirhkoh Paula chu Philippi khuaa mite hnêna lehkha thawn a ziah lai khân ina khuahkhirh a ni a. Mahse, an phuarna hruite chuan amah vêngtute leh  rawn tlawhtute hnêna thu hril lo tûrin a dang thei lo. Paula chuan chûng dinhmun hnuaiahte chuan ṭhahnemngai takin thu a hril a, chu chuan unaute chu ‘hlau lova Pathian thu hril tûrin’ inrintâwkna leh huaisenna a pe a ni.—Philippi 1:12-14 chhiar rawh; 4:22.

17. Engtin nge dinhmun harsa tak hnuaiah pawh unau ṭhenkhat chuan thu an hrilh theih?

¹⁷ Kan unau tam tak chuan huaisenna kawnga Paula entawn tûr siam chu an zui a. Anni chuan zalên taka thu hrilh theih lohna ramahte an awm avângin, chanchin ṭha hrilh theih dân kawng dangte an zawng a. (Mt. 10:16-20) Chutiang ram pakhatah chuan, bial kantuin thuchhuahtu zawng zawngte chu an chhûng te, vêng te, school kalpui te, hna thawhpui te, leh ṭhiante awmna chu mahni thu hrilhna “biala” nei tûrin a fuih a. Kum hnih chhûngin, chu bial chhûnga awm kohhrante chu a pung chak hle a ni. Zalên taka thu hrilh theih lohna hmunah kan awm lo pawh a ni thei. Mahse, chûng kan unau rem hre takte entawn tûr siam aṭangin zir tûr pawimawh tak kan nei a ni: Rawngbâwlnaa a kima tel theih dân kawngte chu zawng la, Jehova chuan harsatna engpawh paltlang tûra i mamawh chakna chu a pe thei che tih ring tlat rawh, tih hi.—Phil. 2:13.

18. Eng tih nge kan tum tlat ang?

¹⁸ He hun pawimawh takah hian, Philippi khuaa mite hnêna Paula lehkha thawna kan hmuh, thlarauva thâwk khum fuihnate chu nunpui i tum tlat ang u. Thil pawimawh zâwkte chu fiahin, sawisêl bova awmin, mi dangte titlu lovin, leh felna rahte rahin awm zêl i tum ang u. Chutiang a nih chuan, hmangaihna kan tipung ang a, min ngaihsaktu kan Pa, Jehova kan chawimawi thei ang.