1. Kristiante chuan nun intlânsiaknaah a tâwp thlenga tlân tûrin eng nge an tih ang?

KRISTIANTE chu nun intlânsiaknaah kan tel a. Nun intlânsiaknaah kan tlân ṭan chauh emaw, kum tam tak kan lo tlân tawh emaw pawh ni se, a tâwp kan thlen hma chu kan tlân zawm zêl a ngai a ni. Philippi khuaa Kristiante hnêna tirhkoh Paula fuihna chuan a tâwp thlenga tlân tûrin min chêttîr thei a. Kum zabi khatnaa chu kohhrana mi ṭhenkhat chuan Paula lehkha thawn an dawn lai chuan kum tam tak chhûng Jehova rawng an bâwl tawh a. Anni chu ṭha takin an tlân tawh a; mahse, Paula’n chhel taka tlân zawm zêl tûrin a hriatnawntîr a. ‘Tiam chin lam pan ṭâlh ṭâlhna’ kawnga a entawn tûr siam chu zui tûrin a duh a ni.—Phil. 3:14.

2. Philippi khuaa mite hnêna Paula fuihna chu engvângin nge a hun taka pêk a nih?

² Philippi khuaa mite hnêna Paula fuihna chu a hun taka pêk a ni a. Chumi khuaa kohhran chuan atîr aṭang rêngin huat an hlawh a. A inṭan dân chu, C.E. 50 vêl khân, Paula leh Sila chuan “Makedonia ramah lo kai la,” tia Pathian sâwmna chu pawmin, Philippi khuaa mite hnêna chanchin ṭha hril tûrin an kal a. (Tirh. 16:9) Chutah chuan, Ludi an tih hmeichhe pakhat an hmu a, an chanchin ṭha sawi “zâwm tûrin Lalpa chuan a thinlung a tivâr ta a.” (Tirh. 16:14) Ani chuan rei vak lovah, a chhûngte nên baptisma an chang ta a ni. Mahse, Diabola chuan buaina a siam ta nghâl a. Khuaa mite chuan Paula leh Sila chu rorêltute hmaah hruaiin, buaina siamtute angin dik lo takin an puh a. Chumi avâng chuan, Paula leh Sila chu an vua a, tân inah an khung a, a hnuah, khua ata chhuak tûrin an hrilh a ni. (Tirh. 16:16-40) Anni chu an dawl em? Dawl lo ve! A nih leh, chu kohhran din thara unaute chungchâng chu eng nge ni ve? Anni pawhin chhelna an lantîr a, an fakawm hle! Paula leh Sila te siam entawn tûr ṭha avângin nasa taka tihchakin an awm tih chu rinhlelh rual a ni lo.

3. Paula’n eng nge a hriat a, eng zawhnate nge kan sawiho vang?

³ Paula chuan dawl lova awm a tum tlat a. (2 Kor. 4:16) Nun intlânsiaknaa a tâwp thlenga tlân tûr chuan tiam chin lam chu a en  tlat a ngai tih a hria a ni. Paula entawn tûr siam aṭangin eng nge kan zir theih? Tûn laia mi rinawmte entawn tûr siamin harsatna engpawh chhel takin kan tuar chhuak thei tih engtin nge an târ lan? Engtin nge hma lam hun beiseina chuan dawl loh kan tum tlatna chu a tihngheh theih?

4. Engtin nge Paula chuan dinhmun khirh tak hnuaiah pawh thu hril tûra hma a lâk?

⁴ Paula’n Philippi khuaa mite hnêna lehkha a ziah laia theih tâwp a chhuah dân chu han ngaihtuah teh. Ani chu Rom khuaa in pakhatah khuahkhirhin a awm a. Duh angin thu a hril thei lo va. Chuti chung pawhin, amah rawn tlawhtute hnênah thu hrilin leh hmun hlaa kohhrante hnênah lehkha thawnte ziakin a buai hle a ni. Chutiang bawkin, tûn laiah pawh, pâwn chhuak thei lova awm Kristian tam takte chuan an ina lo kalte hnêna chanchin ṭha an hrilh theih nân hun remchâng an neih apiang chu an hmang ṭangkai a. Mi mal taka va tlawh theih loh in neitute hnênah pawh mi tichak thei tak lehkha thawnte an ziak a ni.

5. Philippi 3:12-14-a kan hmuh angin, Paula chu tiam chin lam pan tlat tûrin engin nge ṭanpui?

⁵ Paula chuan tûn hmaa a hlawhtlinnate leh a thil sual tihte avângin a rilru kal pêntîr a duh lo va. Dik tak chuan, ‘hnung lama thil awmte theihnghilh’ chu nun intlânsiaknaa hlawhtling tûr leh ‘hma lama thil awmte ban’ nâna thil pawimawh tak a ni tih a sawi. (Philippi 3:12-14 chhiar rawh.) Paula rilru kalpêntîr theitu thil ṭhenkhat chu eng nge ni? Pakhatna, Juda sakhuanaah hlawhtlinnate a nei a. Mahse, chûng thilte chu “hnâwmhneah lek” a ngai a ni. (Phil. 3:3-8) Pahnihna, tûn hmaa Kristiante a lo tihduhdah avânga mahni inthiam lohna neiin, engmah ti thei lovin a awm lo. Pathumna, Jehova tâna thawk tam tâwk tawh angah a inngai lo. Paula chuan tân ina khung te, vuak te, lunga den te, lawng chhiatna te leh ei leh in tlâkchhamnate tâwk mah se, rawngbâwlnaah a hlawhtling tho a ni. (2 Kor. 11:23-27) Hrehawm tuarin a rawngbâwlnaah thil tam tak hlen chhuak tawh mah se, Paula chuan a beih zawm zêl a ngai tih a hria a. Keini pawhin chutianga kan tih chu a ngai a ni.

6. Kan theihnghilh tûr “hnung lama thil awmte” zînga ṭhenkhat chu eng nge ni?

⁶ ‘Hnung lama thil awmte theihnghilhna’ kawnga Paula entawn tûr siam chu engtin nge kan zui theih? Kan zînga ṭhenkhat chuan tûn hmaa an thil sual tihte avânga mahni inthiam lohna an neih chu an hneh a ngai thei a. Chutiang a nih chuan, engvângin nge Krista tlanna inthawina chungchâng chu mi mala i zir chian loh vang? Mi tichak thei tak, chu thu chu kan zir a, kan chhût ngun a, kan ṭawngṭai chuan ṭûl lo taka mahni inthiam lohna kan nei tawh lo vang. Jehova’n a ngaihdam tawh kan thil sual tihte avângin rilru hrehawmin kan awm tawh lo bawk ang. Paula hnên aṭanga kan zir theih zir tûr dang hi han ngaihtuah leh teh. Mi ṭhenkhat chuan an nuna Lalram an dah hmasak theih nân sum tam tak hmuh theihna hnate chu an kalsan mai thei. Chutiang a nih chuan, kan kalsan tâk hausak theihna tûr remchângte chu pawiti taka thlîr lêt tawh lovin, hnung lama thil awmte chu kan theihnghilh thei ang em? (Num. 11:4-6; Thur. 7:10) “Hnung lama thil awmte” zîngah chuan hun kal tawha kan thil hlenchhuahte emaw, fiahna kan tawrh chhuah tawhte emaw a tel thei a. Kum tam tak kaltaa Jehova’n mal min sâwm dânte leh min ṭanpui dânte thlîr lêtna chuan kan Pa hnaih lehzual tûrin min ṭanpui thei tih a chiang hle. Mahse, Jehova tâna thawk tam tâwk tawh anga inngaiin, kan lungawi mai tûr a ni lo.—1 Kor. 15:58.

7. Korinth thawn khat 9:24-27-a sawi angin, nun intlânsiaknaa hlawhtling tûr chuan eng nge ngai? Entîrna pe rawh.

⁷ Paula chuan Isua thusawi: “Luh tum hrâm  rawh u,” tih chu a hre chiang hle a. (Lk. 13:23, 24) Ani chuan, Krista angin, a tâwp thlenga a beih ṭâlh ṭâlh a ngai tih a hria a. Chuvângin, Kristian nun kawng chu intlânsiakna nên a khaikhin a ni. (1 Korinth 9:24-27 chhiar rawh.) Intlânsiaknaa tel tuemaw chuan rilru la pêng thei thilte chu pumpelhin, a tâwp thlenga tlân tumin a rilru a pe a. Entîr nân, tûn laia intlânsiaknaa telte chu dâwrte leh rilru la pêng thei thilte awmna kawngah an tlân mai thei a. Chu mi kawnga tlân tuemaw chu dâwra thil zawrhte en tûrin a châwl lawk angah i mitthla thei ang em? Lâwmman hmuh a duh chuan a châwl lo ngei ang! Nun intlânsiaknaah pawh, rilru la pêng thei thilte chu kan pumpelh tûr a ni. Tiam chin lam kan en tlat a, Paula anga kan beih ṭâlh ṭâlh chuan, lâwmman chu kan hmu ngei ang!

8. Eng harsatna pathumte nge kan ngaihtuah ang?

⁸ Tûnah, min tilunghnual theitu harsatna pathumte chu i lo ngaihtuah ang u. Chûngte chu beiseina tihkhawtlaina te, hrisêlna tlâk hniamna te, leh hun rei tak chhûng hmachhawn ngai fiahnate hi a ni a. Chûng dinhmunte tuar chhuaktu mi dangte hnên aṭangin kan inzir thei a ni.—Phil. 3:17.

9. Beiseina tihkhawtlaina chuan engtin nge min nghawng theih?

⁹ Beiseina tihkhawtlaina. Jehova min tiam thil ṭhate neih châkna chu thil pângngai tak a ni a. Dik tak chuan, zâwlnei Habakkuka chuan Jehova’n Judai rama thil ṭha lo tak takte a tihtâwp hun a hmuh châkzia a sawi khân, Jehova chuan “nghâk rawh,” tiin a hrilh a. (Hab. 2:3) Mahse, kan beiseite thleng lawk lo anga a lan hian, kan ṭhahnemngaihnain a kiam phah mai thei a ni. Kan lunghnual hial pawh a ni thei bawk. (Thuf. 13:12) Chutiang chu kum zabi 20-na tîr lam khân a thleng a. Chutih hun lai chuan, hriak thih Kristian tam tak chuan 1914-ah vân lam lâwmman dawn an inbeisei a ni. An beisei anga a thlen tâk lovah chuan, mi rinawm tam tak chuan beiseina tihkhawtlaina chu engtin nge an hmachhawn?

10. Engtin nge nupa tuak khatin beiseina tihkhawtlaina chu an hmachhawn?

¹⁰ Chutiang harsatna tâwktu mi rinawm pahnihte  entawn tûr siam hi i lo ngaihtuah ang u. Unau Royal Spatz-a chuan kum 1908-ah kum 20 mi niin baptisma a chang a. Ani chuan a lâwmman chu a dawng thuai ang tih a ring tlat a ni. Dik tak chuan, kum 1911-a nupui neih a tum chuan, a nupui tûr Pearl-i hnênah: “Kum 1914-a thilthleng tûr chu i hria a. Kan inneih dâwn chuan, inneih vat a ṭha!” tiin a hrilh a ni. Chu Kristian nupa chu kum 1914-a vân lam lâwmman an dawn loh avângin nun intlânsiaknaah an beidawng ta em? Beidawng lo ve, an ngaihven ber chu an lâwmman dawn tûr ni lovin, rinawm taka Pathian duh zâwng tih hi a ni. Nun intlânsiaknaah chhel taka tlân chu an tum tlat a. Dik tak chuan, Royal-a leh Pearl-i te chuan kum sâwmbi tam tak hnua an lei lam nun a tâwp thlengin phûr tak leh rinawm takin rawng an bâwl a ni. Jehova hming leh a lalchungnunna thiamchantîr a nih a, a thutiam zawng zawng a thlen famkim hun chu hmuh i châk hle ngei ang. Chûngte chu Jehova hun ruatah a thleng famkim ang tih ring tlat ang che. Chu hun a thlen hma chuan, beiseina tihkhawtlai avânga lunghnual lovin, Pathian rawngbâwlin i buai reng ang u.

11-12. Kan taksa chakna a tlahniam a nih pawhin, engvângin nge hma lam kan pan zêl theih? Entîrna pakhat pe rawh.

¹¹ Hrisêlna tlâk hniamna. Intlânsiaknaa telte chu tisa lama an hrisêl a ngai a; mahse, thlarau lama chak reng tûr chuan tisa lama hrisêl ṭhat kher a ngai lo. Dik tak chuan, tisa lama chak ṭha tawh lo mi tam tak chuan an theihna zawng zawnga Jehova rawngbâwl chu an la duh reng a. (2 Kor. 4:16) Entîr nân, Unau Arthur Secord-a * chu kum 88 mi a ni a, kum 55 chhûng Bethel-a rawng a bâwl hnu chuan tisa lamah a chak tawh lo va. Amah enkawltu nurse chuan a mamawhte pe tûrin a khum lam a va pan a. Chu nurse chuan khuma mu lai unaupa chu en pahin heti hian nêlawm takin a sawi a ni: “Unau Secord, Jehova rawngbâwlnaah i inhmang nasa tawh hle a ni,” tiin. Mahse, unau Arthur Secord-a chuan tûn hmaa a thiltih tawhte chu a ngaihven lo va. A enkawltu nurse chu chiang taka enin, nui chung hian: “Ni e, a dik alâwm. Mahse, kan thiltih tawhte chu a pawimawh lo. Vawiin nia rinawm taka kan awm hi a pawimawh zâwk a ni,” tiin a chhâng a ni.

¹² Kum tam tak chhûng Jehova rawng lo bâwl tawh pawh i ni thei; mahse, tûnah chuan i hrisêlna a tlâk hniam avângin, tûn hmaa i thawh anga tamin i thawk thei tawh lo pawh a ni thei bawk. Chutiang dinhmuna i awm chuan, lunghnual suh. Jehova chuan tûn hmaa rinawm taka i rawngbâwlnate chu a hlut tak zet tih hria ang che. (Heb. 6:10) Tûnah pawh hian, Jehova rawngbâwlnaa thinlung zawng zawnga kan  inpêkna chu kan thawh tam lamah a innghah lo tih hria ang che. Chu aiin, rilru put hmang dik tak lantîrin, kan taksa tlin tâwk ang zela theih tâwp chhuahin kan inpe tak zet tih kan lantîr zâwk a ni. (Kol. 3:23) Jehova chuan kan theih chin tâwkte a hria a, kan tihtheih aia tam ti tûrin min phût lo a ni.—Mk. 12:43, 44.

13. Fiahna tam tak kârah pawh Jehova rawngbâwl chhunzawm zêl tûrin Anatoly-a leh Lidiya-i te thiltawn chuan engtin nge min tihchak?

¹³ Hun rei tak chhûng hmachhawn ngai fiahnate. Jehova chhiahhlawh ṭhenkhat chuan harsatnate leh tihduhdahnate chu kum sâwm têl an tuar a. Entîr nân, Anatoly Melnik-a * chu kum 12 mi a nih laiin, a pa chu man leh tân ina khung a ni a, Moldova rama a chhûngte hnên aṭanga mêl 4,000 (km 7,000) aia hla Siberia rama hnawhchhuah a ni. Kum khat a liam hnu chuan, Anatoly-a, a nu leh a pi leh pute pawh Siberia rama hnawhchhuah an ni a. A hnuah chuan khaw dangah an va inkhâwm thei hram a; mahse, vûr tlâk avângin khaw vawt tak hnuaiah mêl 20 (km 30) a hla kea an kal a ngai a ni. A hnuah, Unau Melnik-a chuan a nupui Lidiya-i, leh an fanu kum khat mi chu kum thum chhûng lung in a tânsan a. Chûng kum chhûngte chu harsa hle mah se, Anatoly-a leh a chhûngte chuan rinawm takin Jehova rawng an bâwl a ni. Tûna kum 82 mi ni tawh, unau Anatoly-a chu Central Asia-ah Branch Committee member niin rawng a bâwl a ni. Anatoly-a leh Lidiya-i te angin, tûn hma ang bawkin, chhel takin Jehova rawngbâwlnaah theih tâwp i chhuah zêl ang u.—Gal. 6:9.

14. Paula’n tiam chin lam thleng tûra a tih ngai nia a hriat chu eng nge ni?

¹⁴ Paula chuan intlânsiaknaah tiam chin lam pana a tâwp thlenga a tlân a inring tlat a. Hriak thih Kristian a nih angin, “Pathian chung lam koh chhan lâwmman” hmuh chu a beisei a ni. Mahse, chu tiam chin lam thleng tûr chuan, chumi lam chu a “pan ṭâlh ṭâlh,” a ngai tih a hria a. (Phil. 3:14) Paula chuan Philippi khuaa mite chu tiam chin lam pan ṭâlh ṭâlh tûra anmahni ṭanpui nân entîrna ngaihvenawm tak a hmang a ni.

15. Paula chuan vân khua leh tui nihna chu engtin nge tiam chin lam pan ṭâlh ṭâlh tûra Philippi khuaa mite fuih nâna a hman?

¹⁵ Paula chuan Philippi khuaa mite chu vân lam khua leh tuite an ni tih a hriatnawntîr a. (Phil. 3:20) Engvângin nge chu khua leh tui nihna chu hriat reng a pawimawh? Chûng hun lai chuan, mi tam takin Rom khua leh tui nihna  chu nasa taka an hlâwkpui theih avângin chu ram mi nih chu an duh a. * Mahse, hriak thih Kristiante chuan chu aia nasaa hlâwkpui tûr, khua leh tui nih theihna ṭha zâwk an nei a ni. Vân sawrkâra tel theihna nêna khaikhin chuan Rom khua leh tui nihna chu engmah a ni lo! Chuvângin, Paula chuan Philippi khuaa mite chu “In awm dân chu Krista chanchin ṭha nên inmawi phawt rawh se,” tiin a fuih a. (Phil. 1:27, 28.) Tûn laia hriak thih Kristiante chuan vâna chatuan nun hmu tûra tiam chin lam an pannaah entawn tûr ṭha an siam a ni.

16. Kan beisei chu vâna nun emaw, leia nun emaw pawh ni se, Philippi 4:6, 7-a sawi angin, eng nge kan tih chhunzawm zêl ang?

¹⁶ Kan beisei chatuana nunna chu vânah emaw, lei paradis-ah emaw pawh ni se, chu kan thil tum panna kawngah chuan theih tâwp kan chhuah tûr a ni. Kan dinhmun chu engpawh ni se, hnung lama thil awmte chu kan en tûr a ni lo va: Jehova rawng kan bâwlna chu engmahin min tihtâwptîr kan phal tûr a ni lo. (Phil. 3:16) Kan beiseite chu thleng har lutuk angin a lang mai thei a, a nih loh leh kan tisa lam chakna a tlahniam pawh a ni mai thei bawk. Hrehawmna leh tihduhdahnate chu kum tam tak chhûng kan tawrh a ngai pawh a ni thei. Eng dinhmun hnuaiah pawh awm mah ila, kan ‘mangang tûr a ni lo.’ Chu aiin, kan duhnate chu Pathian hnênah i hriattîr ang u, tichuan, ani chuan kan ngaihtuah phâk bâkin thlamuanna min pe ang.—Philippi 4:6, 7 chhiar rawh.

17. A dawta thuziakah eng nge kan sawiho vang?

¹⁷ Intlânsiaknaa tel tuemaw chu a tâwp thlenga theih tâwp chhuaha a tlân angin, keini pawh nun intlânsiaknaah tiam chin lam en tlatin, i tlân zêl ang u. Kan chaknate leh dinhmunte azirin, hma lama awm thil ṭhate hmu tûrin ṭhahnemngai takin theih tâwp i chhuah ang u. Intlânsiakna kawnga kan theih ang tâwka chaka tlân zawm zêl tûrin eng nge kan tih ang? A dawta thuziak chuan kan nuna dah hmasak tûrte hre tûr leh “thil pawimawh zâwkte chu fiah” tûrin min ṭanpui ang.—Phil. 1:9-11, New World Translation.