RINNA chuan nasa takin thil a ti thei a. Entîr nân, Setana’n Jehova nêna kan inlaichînna tihchhiat tum mah se, rinna chuan ‘mi sual thal alh thei zawng zawng timit thei’ tûrin min ṭanpui a ni. (Eph. 6:16) Rinna nên chuan, tlâng anga lian buaina khirh takte pawh kan hmachhawn thei a. Isua chuan a zirtîrte hnênah: “Anṭam mu fangkhat ang rinna in neih chuan, he tlâng hnênah hian, ‘Heta ṭangin sawtah sâwn va insawn rawh,’ in ti ang a, a insawn mai ang,” tiin a hrilh a ni. (Mt. 17:20) Rinna chuan thlarau lamah min tihchak theih avângin, hêng zawhnate hi i lo ngaihtuah ang u: Rinna chu eng nge ni? Engtin nge kan thinlung awm dânin kan rinna chungah nghawng a neih? Engtin nge kan rinna kan tihchak theih? Tu chungah nge kan rinna kan nghah ang? tihte hi.—Rom 4:3.

‘Ramhuaite pawhin [Pathian a awm tih] an rin a, an khurh ṭhin’ avângin rinna chu thutak rin emaw, hriat satliah mai emaw a ni lo. (Jak. 2:19) A nih leh, rinna chu eng nge ni?

Bible chuan rinna chu hmêlhmang pahnih nei angin a sawi a. Pakhatnaah, “rinna hi thil beiseite awm ngeia hriatna” a ni. (Heb. 11:1a) Rinna i neih chuan Jehova sawi zawng zawng chu a dikin, a thleng famkim ang tih i ring tlat ang. Entîr nân, Jehova chuan Israel mite hnênah: “Ka chhûn ruat leh ka zân ruat thu hi in phelh theih a, chhûn leh zân hi an hun taka awm lo tûra in tih theih chuan ka rawngbâwltu Davida hnêna ka thuthlung pawh . . . tihchhiat a ni ve chauh vang,” tiin a hrilh a. (Jer. 33:20, 21) Chhûn leh zân awm tawh lo tûrin, ni khi a chhuah tawh loh i hlau ngai em? Leilung hi a vir ngaia vir reng a, nî hêl reng tûra thununtu leilung dânte chu i ringhlel lo a nih chuan, chûng dânte Siamtu chuan a thutiam chu a thlen famkimtîr thei tih i ringhlel dâwn em ni? Ringhlel lo ngei ang!—Is. 55:10, 11; Mt. 5:18.

Pahnihnaah, rinna chu “thil hmuh lohte hriatfiahna” a ni a. Rinna chu mita hmuh theih loh thilte a awm ngei nia “hriatfiahna,” a nih loh leh “chiang taka finfiahna” tia sawi a ni. (Heb. 11:1b.) Eng kawngin nge? Naupang pakhatin, ‘Thli a awm tih engtin nge i hriat?’ tiin a zâwt che angah han inchan teh. Thli chu hmu ngai lo mah la, thaw te, thli chhêm chêt ang chi finfiahna awmte chu i chhûtpui ngei ang. Naupangin chûng finfiahnate a rin tawh chuan, mita hmuh theih loh thilte a awm tih a pawm ang. Chutiang bawkin, rinna chu finfiahna chiang taka innghat a ni.—Rom 1:20.

Rinna chu finfiahnaa innghat a nih avângin, rinna nei tûr chuan, miin ‘thutak hriatna’ a neih hmasak a ngai a. (1 Tim. 2:4) Mahse, chu chu a tâwk mai lo. Tirhkoh Paula chuan: “Miten thinlungin an ring a,” tiin a ziak a ni. (Rom 10:10) Mi chuan thutak chu a ring mai ni lovin, a hlut bawk tûr a ni. Chutiang a nih chauhvin, thutak mila thil tiin, a rinna lantîr tûra chêttîrin a awm ang. (Jak. 2:20) Thinlung tak aṭanga thutak ngaihhlutna nei lotu chuan a ngaih dân vuan burin emaw, a tisa châkna atân chhuanlam siamin emaw, finfiahna chiang tak pawh a hnâwl  mai thei a ni. (2 Pet. 3:3, 4; Jud. 18) Chuvâng tak chuan alâwm, Bible hun laia thilmak tihte mit ngeia hmutu zawng zawngin rinna an neih kher loh ni. (Num. 14:11; Joh. 12:37) Pathian thlarau thianghlim chuan dâwt thu aia thutak ngainatna thinlung neitute hnênah chauh rinna a neihtîr a ni.—Gal. 5:22; 2 Thes. 2:10, 11.

Rinna nghet tak neite zîngah Lal Davida pawh a tel a. (Heb. 11:32, 33) Mahse, Davida chhûngte zînga mi zawng zawngin chutiang rinna chu an nei vek lo. Entîr nân, Davida unau zînga upa ber Eliaba chuan Goliatha chona avânga Davida a thinrim chu a rilru chhiat vâng nia a sawi khân, rinna a tlâkchhamzia a târ lang a. (1 Sam. 17:26-28) Tumah hi rinna nei saa piang emaw, nu leh pate hnên aṭanga rochun sa emaw kan awm loh avângin Davida rinna chu Pathian nêna an inlaichînna aṭanga a neih a ni.

Sâm 27-naah, Davida’n chutianga rinna nghet tak a neih dân chu a sawi a. (Châng. 1) Davida chuan tûn hmaa a thiltawnte leh Jehova’n a hmêlmate a cheibâwl dânte chu a chhût ngun a ni. (Châng. 2, 3) Biakna atâna Jehova ruahmanna chu a hlut tak zet a. (Châng. 4) Ani chuan biak bûkah a rinpui unaute nên Pathian a bia a ni. (Châng. 6) Ṭawngṭaiin Jehova chu tih tak zetin a zawng a. (Châng. 7, 8) Davida chuan Pathian kaihhruaia awm chu a duh bawk. (Châng. 11) “LALPA ṭhatna hmuh inring suh ila chuan ka chau tawh tûr a ni,” tia sawi chhuak khawpin, chu mizia chu Davida tân a pawimawh hle a ni.—Châng. 13.

Sâm 27-a târ lan, rilru put hmang leh chîn dânte entawn i tum chuan Davida neih ang rinna chu i nei ve thei ang. Rinna chu hriatna dika innghat a nih avângin, Pathian Thu leh Bible ṭanchhan thu leh hla chhuahte i zir tam poh leh, he Pathian thlarau rah hmêlhmang zînga pakhat rinna neih chu a awlsam lehzual ang. (Sâm 1:2, 3) Inzirna i neih laiin, chhût ngun ṭhîn ang che. Lâwmna châng hre tûr chuan chhût ngunna kan neih tam a ngai a. Jehova chunga i lâwmna a pun zêl rualin, kohhran inkhâwma amah biak leh mi dangte hnêna beiseina puanchhuahna hmanga i rinna lantîr chu i duh lehzual ang. (Heb. 10:23-25) Chu bâkah, ‘beidawng lova kan ṭawngṭai’ chhunzawm zêl chuan rinna kan lantîr a ni ang. (Lk. 18:1-8) Chuvângin, Jehova’n ‘a ngaihsak ṭhîn che’ tih ring tlatin, a hnênah “bâng lovin ṭawngṭai” ang che. (1 Thes. 5:17; 1 Pet. 5:7) Rinna chuan thil ti tûrin min chêttîr a, kan thiltih chuan kan rinna a tichak a ni.—Jak. 2:22.

A thih hma zânah, Isua chuan a zirtîrte hnênah: “Pathian in ring e, kei pawh mi ring ve rawh u,” tiin a hrilh a. (Joh. 14:1) Chuvângin, Jehova chauh ni lovin, Isua pawh kan ring tûr a ni. Isua kan rinzia engtin nge kan lantîr theih? Kan lantîr theih dân kawng thum i lo en ang u.

 Pakhatna, tlanna chu Pathianin mi mal taka a thilpêk che angin thlîr rawh. Tirhkoh Paula chuan: “Ka nung hi rinnaa nung ka ni - Pathian Fapa, mi hmangaiha ka aia inpetu rinnaah chuan,” tiin a sawi. (Gal. 2:20) Isua i rin chuan tlanna chu i tân a ni a, i sualte ngaihdamna a ni tih leh tlanna chuan chatuan nun beiseina a neihtîr chein, chu chu Pathianin a hmangaih che tih finfiahna ropui ber a ni tih i ring tlat tihna a ni ang. (Rom 8:32, 38, 39; Eph. 1:7) Tlanna chuan a ṭanpui thei che tih i rin tak tak chuan, mahni inthiam lohna i nei lo vang a, a chhe zâwngin i inthlîr lo bawk ang.—2 Thes. 2:16, 17.

Pahnihna, Isua inthawina aṭang chauhva neih theih ṭawngṭaina hmangin Jehova hnaih rawh. Tlanna avângin ‘zahngaihna kan hmuh theihna tûr leh, puih kan ngaih huna ṭanpuina khawngaihna kan hmuh theihna tûrin,’ Jehova hnênah kan ṭawngṭai thei a. (Heb. 4:15, 16; 10:19-22) Ṭawngṭaina chuan sual tûra thlêmnate do thei tûrin min tichak thei a ni.—Luka 22:40.

Pathumna, Isua thu âwih rawh. Tirhkoh Johana chuan: “Tupawh Fa ring apiangin chatuana nunna an nei tawh; nimahsela tupawh Fa thu âwih lo apiangin nunna an nei lo vang a, Pathian thinur an chungah a awm reng zâwk a ni,” tiin a ziak a. (Joh. 3:36) Johana’n rinna lantîrna leh thu âwih lohna chu a inkalh tia a sawi hi chhinchhiah ang che. Chuvângin, Isua thu i âwih hian amah i rinzia i lantîr a ni. Isua zirtîrna leh a thupêk zawng zawng—“Krista dân” chu zâwmin Isua thu i âwih a ni. (Gal. 6:2) Chu bâkah, “bawi rinawm, fing tak” hmanga a kaihhruaina pêkte zâwmin Isua thu kan âwih bawk. (Mt. 24:45) Isua thu kan âwihna hmangin, thlipui ang dinhmun khirh tak takte hmachhawn thei tûrin chakna kan nei ang.—Lk. 6:47, 48.

Ṭum khat chu, mi pakhat chuan Isua hnênah: “Ka ring e, ka rinhlelhnaah hian mi pui ang che,” tiin a au chhuak a. (Mk. 9:24) Ani chuan rinna chu engemaw chen a nei tawh a; mahse, neih belh a mamawh tih inngaitlâwm takin a pawm a ni. Chu pa ang bawkin, kan za hian rinna kan neih lehzual a ngaihna dinhmunte a awm a. Chu bâkah, tûnah ngei pawh, kan rinna kan tichak ṭheuh thei a ni. Kan hriat tawh angin, Pathian Thu kan zir a, kan chhût ngun chuan kan rinna a chak lehzual ang a, chu chuan Jehova chunga kan lâwmna a tipung lehzual ang. Unaute ruala Jehova kan biak a, kan beiseina vântlâng hmaa kan puan a, ṭhahnemngai taka kan ṭawngṭai chuan kan rinna a nghet lehzual bawk ang. Chu bâkah, kan rinna kan tihngheh hian, lâwmman azawnga lâwmman ropui ber chu kan dawng a. Pathian Thu chuan: “Duh takte u, nangni zawngin in rin chhan thianghlim ber chungah chuan nangmahni leh nangmahni inrem chhovin, . . . Pathian hmangaihnaah chuan invawng ṭha rawh u,” tiin min fuih a ni.—Jud. 20, 21.