1. Jehova’n a chhiahhlawh rinawm zawng zawngte chu eng nge a pêk?

JEHOVA chuan a chhiahhlawh rinawm zawng zawngte chu hmangaihna nei takin kohhranah hmun a pe ṭheuh a ni. Kan chanvo neihte chu inang lo mah se, kan za hian hlutna kan neiin, kan inmamawh tawn ṭheuh va. Tirhkoh Paula chuan he zir tûr pawimawh tak hi hre thiam tûrin min ṭanpui a ni. Engtin nge?

2. Ephesi 4:16-a sawi angin, engvângin nge inngaihhlut tawnna leh thawhhona kan neih a ngaih?

² He thuziak atâna Bible châng thlana târ lan angin, Paula chuan kan zînga tu mahin unaute hnênah, “Engah mah ka duh lo va che,” tiin kan sawi theih lo tih a sawi uar a. (1 Kor. 12:21) Kohhranah remna awmtîr kan duh chuan, inngaihhlut tawnna leh thawhhona kan nei tûr a ni. (Ephesi 4:16 chhiar rawh.) Lungrual taka thawhhona kan neih hian kohhran chuan hma a sâwnin, hmangaihnaah a inpumkhat tlat a ni.

3. He thuziakah hian eng nge kan sawiho vang?

³ Kohhrana unaute chunga zahna kan lantîr theihna dinhmun ṭhenkhat chu eng nge ni? He thuziakah hian kohhran upate’n an rawngbâwlpui upa dangte chunga zahna an lantîr theih dân sawiho a ni ang. A dawtah, nupui pasal nei lo kan unaute chu kan ngaihlu tih kan lantîr theih dân kan sawiho leh ang a. A tâwp berah, kan ṭawng hmang thiam lutuk lo kan unaute chunga lâwmna kan lantîr theih dân kan zir bawk ang.

4. Paula’n Rom 12:10-ah kohhran upate zawm tûr eng fuihna nge a pêk?

⁴ Kohhran upa zawng zawng chu Jehova thlarau thianghlima  ruat an ni a. Mahse, an thilpêk dawn leh thiamnate chu a inang vek lo. (1 Kor. 12:17, 18) Ṭhenkhat chu upa an nihna a la rei loh avângin thiltawn an la nei tlêm mai thei a. A dang lehte chu kum upatna leh hrisêl lohna avângin an tihtheihte a beitham mai thei a ni. Mahse, kohhran upa tu mahin an rawngbâwlpui upa dangte hnênah, “Engah mah ka duh lo va che,” an ti tûr a ni lo. Chu aiin, Rom 12:10-a chhinchhiah Paula fuihna chu an zâwm zâwk tûr a ni.—Chhiar rawh.

5. Engtin nge upate chuan an rawngbâwlpui upa dangte chungah zahna an lantîr a, chu chu engvângin nge a pawimawh?

⁵ Upate chuan an rawngbâwlpui upa dangte thusawi chu ngun taka ngaihthlâksakin, zahna an lantîr thei a. Hei hi thu pawimawh sawiho tûra an inhmuhkhâwm hunah a pawimawh lehzual a ni. Engvângin nge? October 1, 1988 chhuak, Vênnainsâng-a târ lan he thu hi an chhinchhiah tûr a ni: “Kohhran upate chuan Krista’n thlarau thianghlim hmangin an zînga a tua pawh dinhmunte chingfel tûr, a nih loh leh thu tlûkna pawimawh tak siam tûra an mamawh Bible thu bul hre chhuak tûrin a kaihruai thei tih an pawm ang a. (Tirh. 15:6-15) An zîngah upa dangte thunun duhna rilru nei tu mah an awm tûr a ni lo,” tih hi.

6. Engtin nge upate chu inpumkhata an thawhho theih a, engtin nge chu chu kohhranin a hlâwkpui?

⁶ A rawngbâwlpui upa dangte zahtu upa chuan upaho inkhâwmnaah sawi hmasak ber a tum reng lo. Sawihona chu thunun a tum lo va, a ngaih dân chu englai pawha dik niin a ngai hek lo. Chu aiin, a ngaih dânte chu inngaitlâwm tak leh thuhnuairawlh takin a sawi a. Upa dangte thusawi pawh ngun takin a ngaithla a ni. A pawimawh zâwk chu, Bible thu bulte târ lan leh ‘bâwih rinawm, fing tak’ kaihhruainate zawm a tum tlat hi a ni. (Mt. 24:45-47) Upate’n inhmangaih tawnna leh inzah tawnna boruak nuam tak hnuaia sawihona an neih chuan, Pathian thlarau thianghlimin a awmpui ang a, kohhran tichak theitu thu tlûkna siam thei tûrin a kaihruai ang.—Jak. 3:17, 18.

7. Engtin nge Isua’n nupui pasal nei lote chu a thlîr?

⁷ Tûn laia kohhranahte chuan nupui pasal neite leh ṭhenkhat chu fa neite pawh an awm a. Mahse, nupui pasal la nei lo unau tam tak pawh an awm bawk. Chûng nupui pasal nei lote chu engtin nge kan thlîr ang? Isua’n chûng mite a thlîr dân chu han ngaihtuah teh. Ani chuan leia rawng a bâwl chhûngin nupui a nei lo va. A hun leh thate chu rawngbâwlna atân a hmang zâwk a ni. Kristiante tân nupui pasal neih emaw, nei lova awm emaw chu tih ngei ngei tûr angin a zirtîr ngai lo. Mahse, Kristian ṭhenkhatin nupui pasal nei lova awm chu an thlang ang tih a sawi a ni. (Mt. 19:11, 12; Matthaia 19:12 ṭanchhan NW study note chu en rawh.) Ani chuan chûng nupui pasal nei lote chungah zahna a lantîr a. Anni chu mi hnuaihnung zâwk angin emaw, kawng engemawti taka kim lo angin emaw a thlîr lo.

8. Korinth thawn khat 7:7-9-a sawi angin, Paula’n Kristiante chu eng nge ngaihtuah tûra a fuih?

⁸ Isua angin, tirhkoh Paula pawhin nupui nei lovin rawng a bâwl a. Kristiante tân nupui pasal neih chu thil sual niin a zirtîr ngai lo. Chu chu mi mal duhthlanna a ni tih a hria a. Mahse, Kristiante chu nupui pasal nei lova Jehova rawng an bâwl theih dâwn leh dâwn loh ngaihtuah tûrin a fuih a ni. (1 Korinth 7:7-9 chhiar rawh.) Paula chuan nupui pasal nei lo Kristiante chu a hmusit lo tih a chiang hle. Dik tak chuan, mawhphurhna rit tak chelh tûrin nupui nei lo ṭhalai Timothea chu a thlang a ni. * (Phil. 2:19-22) Chutiang a nih chuan, unaupa chu kawppui a neih vâng, a nih loh leh a neih loh vâng maia tling zâwk emaw, tling lo zâwk emaw anga ngaih chu a dik lo ngei ang tih a chiang a ni.—1 Kor. 7:32-35, 38.

9. Nupui pasal neih leh nei lova awm chungchângah eng nge kan sawi theih?

⁹ Isua leh Paula chuan Kristiante chu nupui pasal nei tûrin emaw, nei lo tûrin emaw an zirtîr lo. A nih chuan, nupui pasal neih leh nei lova awm chungchângah eng nge kan sawi theih? October 1, 2012 chhuak,Vênnainsâng chuan hetiang hian chhânna ṭha tak a pe a ni: “[Nupui pasal neih leh nei lova awm] chu Pathian hnên aṭanga kan dawn thilpêk anga sawi theih a ni a. . . . Jehova chuan [nupui pasal nei lova awm] chu thil zahthlâk leh lungngaihna thlentu angin a thlîr lo,” tiin. Chu chu rilrua vawng rengin, kan kohhrana nupui pasal nei lo unaute chungah zahna kan lantîr tûr a ni.

10. Engtin nge nupui pasal nei lo unaute chungah zahna kan lantîr theih?

 ¹⁰ Nupui pasal nei lo kan unaute chungah engtin nge zahna kan lantîr theih? Nupui pasal nei lova awm kan Kristian unau ṭhenkhat chu duh rêng vânga chutianga awm an ni tih i hre reng ang u. Mi dangte chuan nupui pasal neih chu an duh a; mahse, an kawppui âwm tak an la hmu rih lo mai a ni. Mi dang lehte chuan thihnaah an kawppuite an chân a ni thei bawk. A enga pawh chu ni se, kohhrana unaute chuan chûng nupui pasal nei lo unaute chu chutianga an awm chhan zawh ngai niin emaw, kawppui zawnsak ngai niin emaw an ngai tûr a ni em? Nupui pasal nei lo Kristian ṭhenkhat chuan chutiang ṭanpuina chu an dîl mai thei a ni. Mahse, ṭanpuina an dîl loh chuan, chutianga ṭanpui va tumna chuan nupui pasal nei lo unaute chu engtin nge a awmtîr theih? (1 Thes. 4:11; 1 Tim. 5:13) Nupui pasal nei lo unau rinawmte thusawi ṭhenkhat hi i lo ngaihtuah ang u.

11-12. Engtin nge nupui pasal nei lo unaute chu rilru nuam lova kan siam mai theih?

¹¹ A chanvo neih ṭha taka hlentu nupui nei lo bial kantu chuan nupui nei lova awm chu kawng tam takin a hlâwkpui niin a hria a. Mahse, unaute’n: “Engati nge nupui nei lova i awm?” tia duhsakna avânga an zawh hian nuam lo a ti thei hle a ni. Branch office-a rawngbâwl nupui nei lo unaupa chuan: “Unau ṭhenkhatin nupui pasal nei lote chu mi khawngaihthlâk angin an thlîr tih ka hria. Chu chuan nupui pasal nei lova awm chu thilpêk ang ni lovin, phurrit angin a lantîr thei a ni,” tiin a sawi.

¹² Bethel-a rawngbâwl pasal nei lo unaunu chuan: “Thuchhuahtu ṭhenkhatin nupui pasal nei lote chu kawppui tûr zawng vek angin an ngai a, a nih loh leh unaute nêna a huhova intihhlimna hunte chu kawppui tûr zawnna hun remchâng anga thlîr niin an ngai a. Ṭum khat chu, ka chanvo dawn avânga ram chhûng hmun danga ka zin chuan inkhâwm an neih zânah ka va thleng a. Ka thlenna unaunu chuan kohhranah ka rualpui unaupa pahnih an awm thu min hrilh a. Kawppui tûr min zawnsak tum a nih loh thu min hrilh bawk. Mahse, Kingdom Hall chhûng kan luh veleh chûng unaupa pahnihte hnênah chuan inhmêl hriattîr tûrin min hruai nghâl a. Chutiang dinhmun chu kan pathum tân a nuam lo duh khawp mai,” tiin a sawi.

13. Eng entîrnate’n nge pasal nei lo unaunu chu tichak?

¹³ Bethel-a rawngbâwl pasal nei lo unaunu dang leh chuan: “Nupui pasal nei lo kum upa zâwk pioneer-te chuan thiltum chiang tak an neiin, mi dangte ṭanpui an duh a, kohhran tân pawh an ṭangkai hle. Nupui pasal nei lova awm chungchângah thlîr dân inbûk tâwk tak an nei a, chutianga an awm avângin mi dangte aia ṭha zâwkah an inngai lo va, kawppui emaw, fate emaw an neih loh avânga hlim thei lo tûr angin an inngai hek lo,” tiin a sawi. Inzah tawnna leh inngaihhlut tawnna awmna kohhrana tel chu nuam tak a ni. Unaute chuan mi khawngaihthlâk angin min thlîr lo va, min thîk hek lo; min ngaihthah lo va, anmahni aia ṭha zâwk angin min thlîr hek lo tih leh an hmangaih che tih i hria a ni.

14. Engtin nge nupui pasal nei lo kan unaute chungah zahna kan lantîr theih?

¹⁴ Nupui pasal nei lo kan unaute chu kawppui an neih loh vâng ni lo va, an mize ṭhate avânga kan ngaihlu a nih chuan an lâwm hle ngei ang. Mi khawngaihthlâk tak anga thlîr lovin, an rinawmna chu kan ngaihlu zâwk tûr a ni. Chutiang chuan, nupui pasal nei lo kan unaute chuan: “Engah mah ka duh lo va che,” tia hrilh niin an inngai lo vang. (1 Kor. 12:21) Chu aiin, anni chu kan zah tih leh kohhrana an hmun neih chu kan ngaihlu tih an hria ang.

15. Unau ṭhenkhat chuan an rawngbâwlna zauh tûrin eng insiamremna nge an neih?

¹⁵ Tûn hnai kumahte khân, thuchhuahtu tam tak chuan an rawngbâwlna an zauh theih nân ṭawng thar zir chu thiltumah an nei a. Chutianga ti tûr chuan insiamremna an neih a ngai a ni. Chûng unaute chuan Lalram thuchhuahtu mamawh zualna, ṭawng dang hmang kohhrana rawng an bâwl theih nân, an pianpui ṭawng hmanna kohhran chu an chhuahsan a. (Tirh. 16:9) Chu chu Lalram hmasâwn nâna mi mala an duhthlanna siam a ni. Thiam nâl taka ṭawng dang sawi thei tûrin kum tam tak ngai mah se, kawng tam takin kohhran an ṭanpui a. An mize ṭhate leh thiltawnte chuan kohhran a tinghetin, a tichak a ni. Inhuam taka an inpêkna avângin chûng kan unaute chu kan va ngaihlu tak êm!

16. Kohhran upate chuan unaupate chu upa atân, a nih loh leh kohhranho rawngbâwltu atâna an tlin leh tlin loh an endik hunah eng nge an ṭanchhan ang?

¹⁶ Kohhran upate chuan unaupa chu kohhrana an ṭawng hman a thiam lutuk loh vâng maiin kohhran upa, a nih loh leh kohhranho rawngbâwltu ni thei lo angin an ngai tûr a ni lo. Upate chuan unaupa chu tualchhûng kohhrana an ṭawng hman a thiam dânah ni lovin, Pathian Lehkha Thua thil phûtte ṭanchhanin upa, a nih loh leh kohhranho rawngbâwltu atâna a tlin leh tlin loh an endik ang.—1 Tim. 3:1-10, 12, 13; Tit. 1:5-9.

17. Ram danga insawn chhûngkaw ṭhenkhatin eng zawhnate nge an hmachhawn?

¹⁷ Kristian chhûngkaw ṭhenkhat chu hmun him zâwk emaw, hnathawh tûr emaw zawngin ram dangah an insawn a. Chutiang dinhmunah chuan an fate chu an va insawnna ram ṭawnga lehkha an zir a ngai thei a. Anmahni ngei pawhin hna an hmuh theih nân chu ṭawng chu an zir a ngai thei a ni. A nih leh, chu ramah chuan an pianpui ṭawng hmanna kohhran, a nih loh leh group awm ta se, engtin nge ni ang? Eng kohhranah nge an awm tâk ang? Chu ram ṭawng hmanna kohhranah nge nia, an pianpui ṭawng hmanna kohhranah zâwk?

18. Galatia 6:5-a sawi nêna inmilin, chhûngkaw lû ber thu tlûkna siam chu engtin nge kan zahsak theih?

¹⁸ Chhûngkaw lû ber chuan a chhûngkua chu eng ṭawng hmanna kohhranah nge a awmpui dâwn tih chungchângah thu tlûkna a siam tûr a ni. Hei hi mi mal thu tlûkna siam tûr a nih avângin, a chhûngkaw tâna ṭha ber tûr a ngaihtuah tûr a ni. (Galatia 6:5 chhiar rawh.) Chhûngkaw lû ber thu tlûkna siam chu kan zahsak tûr a ni. A thu tlûkna siam chu engpawh ni se, chu chu pawmsakin, an chhûngkua chu kan kohhrana mi hlu takte angin i lo lâwm ang u.—Rom 15:7.

19. Chhûngkaw lûte chuan eng chungchâng nge ṭawngṭaia an ngaihtuah ang?

¹⁹ Dinhmun dang lehah chuan, chhûngkuate chu nu leh pate pianpui ṭawng hmanna kohhranah awm mah se, an fate chuan chu ṭawng chu an thiam vak lo pawh a ni thei a. Chu kohhran  chu tualchhûng ṭawng hmanna biala awm a nih chuan, naupangte chuan inkhâwma thusawite chu hriatthiam harsa an tiin, thlarau lamah hma an sâwn vak lo pawh a ni thei bawk. Engvângin nge? Naupangte chu nu leh pate ṭawng hmanna school-ah ni lovin, tualchhûng ṭawng hmanna school-a an kal vâng a ni thei. Chutiang dinhmunah chuan chhûngkaw lû berte chuan an fate’n Jehova leh unaute an hnaih lehzual theih nâna an ṭanpui theih dân tûr chu ṭawngṭaia an ngaihtuah a ngai a ni. An pianpui ṭawng thiam tûra an fate an ṭanpui a ngai ang, chumi a nih loh vêk chuan naupangte hriatthiam theih ṭawng hmanna kohhrana insawn chu an ngaihtuah a ngai ang. Chhûngkaw lûte thu tlûkna siam chu engpawh ni se, awm tûra a thlanna kohhran chuan amah leh a chhûngte chu an zahin an ngaihlu tûr a ni.

20. Ṭawng thar zir mêk kan unaute chungah engtin nge zahna kan lantîr theih?

²⁰ Kan sawiho tâk thute avângin kohhran tam takah chuan theih tâwp chhuaha ṭawng thar zir mêk unaute an awm ngei ang. Irâwm chhuaka thusawi chu an tân a harsa mai thei a. Mahse, an duh anga thu an sawi theih lohna ringawt i ngaihtuah loh chuan, Jehova an hmangaihna leh a rawngbâwl an duhna chu i hmu thei ang. Chûng an mize duhawm takte kan hmuh chuan, anni chu kan ngaihluin kan zah lehzual ngei bawk ang. Kan ṭawng hman an sawi thiam loh avâng maiin, “Engah mah ka duh lo va che,” tiin kan sawi lo vang.

21-22. Kan neih chanvo hlu tak chu eng nge ni?

²¹ Jehova chuan a kohhrana hmun neih theihna chanvo hlu tak min pe ṭheuh va. Unaupa kan ni emaw, unaunu kan ni emaw, kawppui kan nei emaw, nei lo emaw, ṭhalai kan ni emaw, kum upa kan ni emaw, ṭawng dang kan thiam emaw, thiam lo emaw pawh ni se, kan za hian Jehova tân kan hluin, kan inmamawh tawn ṭheuh a ni.—Rom 12:4, 5; Kol. 3:10, 11.

²² Mihring taksa chungchânga tirhkoh Paula tehkhin thu aṭanga zir tûr pawimawh tak takte chu nunpui zawm zêl i tum ang u. Chutiang kawng chuan, Jehova kohhrana kan hmun neih leh mi dangte hmun neih chu kan ngaihlu lehzual ang.