1. Eng chanvo hlu nge kan neih?

JEHOVA kohhrana kan tel thei chu chanvo hlu a va ni tak êm! Remna leh hlimna neitute awmna thlarau lam paradis-ah kan awm a ni. Kohhrana i hmun neih chu eng nge ni?

2. Tirhkoh Paula’n thlarau thâwk khuma a ziah lehkha thawn tam takah eng tehkhin thu nge a hman?

² Thlarauva thâwk khum tirhkoh Paula lehkha thawn tam taka kan hmuh tehkhin thu aṭangin hemi chungchâng tam tak kan zir thei a. Chûng a lehkha thawnahte chuan, kohhran chu mihring taksa nên a khaikhin a. Kohhrana mi tinte chu taksa pêngte nên a khaikhin bawk a ni.—Rom 12:4-8; 1 Kor. 12:12-27; Eph. 4:16.

3. He thuziakah hian eng zawhna pathumte nge kan sawiho vang?

³ He thuziakah hian, Paula tehkhin thu aṭanga zir tûr pawimawh pathumte kan sawiho vang. Pakhatna, kan za hian Jehova kohhranah chanvo * kan neih ṭheuh tih kan hria ang. Pahnihna, kohhrana kan hmun neih hre tûra kan tih theihte kan sawiho vang a. Pathumna, Pathian kohhrana kan chanvo hlen tûra kan buai reng a ngaih chhante kan sawiho bawk ang.

4. Rom 12:4, 5-na chuan eng nge min zirtîr?

⁴ Paula tehkhin thu aṭanga kan zir theih hmasa ber chu Jehova kohhranah hmun pawimawh kan neih ṭheuh tih hi a ni a.  A tehkhin thu chu hetiang hian a sawi ṭan a ni: “Taksa pumkhatah pêng tam tak kan nei a, pêng zawng zawng thiltih erawh chu a inang lo va, chutiang bawkin keini tam tak ni mah ila, Kristaah chuan taksa pumkhat kan ni a: a mal malin inpêng tawn ṭheuh kan ni,” tiin. (Rom 12:4, 5) Paula sawi tum chu eng nge ni? Kohhrana kan hmun neihte chu inang lo mah se, kan za hian kan hlu vek tih hi a ni.

5. Jehova’n kohhran tân eng “thilpêkte” nge a pêk?

⁵ Kohhrana hmun neite i ngaihtuah hian kohhrana hruaitute chu i rilruah an lo lang nghâl mai thei. (1 Thes. 5:12, 13; Heb. 13:17) Jehova’n Krista hmangin, A kohhran tân ‘mihringte hnêna thilpêkte’ a pe a ni. (Eph. 4:8) Chûng ‘mihringte hnêna thilpêkte’ zîngah chuan Governing Body member te, Governing Body ṭanpuitu unaupa te, Branch Committee member te, bial kantu te, thlawhhmaa zirtîrna petu te, kohhran upa te, leh kohhranho rawngbâwltute an tel a. Chûng unaupate chu Jehova berâm hlu takte ngaihsak tûr leh kohhran hmasâwnna atâna rawngbâwl tûra thlarau thianghlima ruat an ni.—1 Pet. 5:2, 3.

6. Thessalonika thawn khat 2:6-8-a sawi angin, thlarau thianghlima ruat unaupate chuan eng tih nge an tum tlat?

⁶ Unaupate chu mawhphurhna hrang hrang chelh tûra thlarau thianghlima ruat an ni a. Kut leh kete ang taksa pêng hrang hrangin taksa pumpui ṭhatna atân hna an thawk ang bawkin, thlarau thianghlima ruat chûng unaupate chu kohhran pumpuiin hlâwkna an hmuh theih nân an thawk rim hle a ni. Anni chuan mahni ropuina tûr an zawng lo va. An unaute tichak tûrin theih tâwp an chhuah zâwk a ni. (1 Thessalonika 2:6-8 chhiar rawh.) Chutianga mahni hmasial lo leh thlarau lama mi puitlingte min pêk avângin Jehova chungah kan va lâwm tak êm!

7. Hunbi kima rawngbâwltu tam takte’n eng malsâwmnate nge an dawn?

⁷ Kohhrana unau ṭhenkhat chu missionary te, special pioneer te, a nih loh leh regular pioneer te nia rawngbâwl tûra ruat an ni mai thei. Dik tak chuan, khawvêl pumpuia kan unaute chuan thu hrilh leh zirtîr siamna hna chu hunbi kima thawh an thlang a. Chutiang chuan, mi tam tak chu Krista Isua zirtîrte ni tûrin an ṭanpui a ni. Chûng hunbi kima rawngbâwltute chu tisa lamah hausa lo mah se, Jehova chuan an nunah malsâwmna tam tak a pe a ni. (Mk. 10:29, 30) Chûng unaute chu kan ngaihlu hlein, kohhran zînga mite an nih avângin kan va lâwm tak êm!

8. Engvângin nge chanchin ṭha hriltu zawng zawngte chu Jehova tâna hlu tak an nih?

⁸ Kohhrana hmun neite chu thlarau thianghlima ruat unaupate leh hunbi kima rawngbâwltute chauh an ni em? Ni lo ve! Chanchin ṭha hriltu zawng zawngte chu Pathian leh kohhran tân an pawimawh a ni. (Rom 10:15; 1 Kor. 3:6-9) Dik tak chuan, kohhran thiltumte zînga pawimawh ber pakhat chu kan Lal Isua Krista zirtîrte ni tûra mite ṭanpui hi a ni a. (Mt. 28:19, 20; 1 Tim. 2:4) Baptisma chang tawhte leh la chang lote pawh tiamin, kohhrana unau zawng zawngte chuan he hna hi an nuna dah pawimawh ber an tum a ni.—Mt. 24:14.

9. Engvângin nge kan Kristian unaunute chu kan ngaihhlut?

⁹ Jehova chuan Kristian unaunute chu kohhranah hmun pawimawh tak a pe a. Rinawm taka a rawngbâwltu Kristian nupui te, chhûngkaw nu ber te, hmeithai te, leh kawppui nei lo unaunute chu a ngaihlu tak zet a ni. Bible chuan Pathian tilâwmtu hmeichhiate chu a târ lang fo va. Finna te, ṭhahnemngaihna te, huaisenna te, thilphalna te, leh thil ṭha tihna kawnga entawn tûr ṭha  siamtute angin a fak a ni. (Lk. 8:2, 3; Tirh. 16:14, 15; Rom 16:3, 4, 6; Phil. 4:3; Heb. 11:11, 31, 35) Kan kohhranah chutiang mize duhawm tak tak târ langtu Kristian hmeichhiate min pêk avângin Jehova chungah kan va lâwm tak êm!

10. Engvângin nge kum upa unaute chu kan ngaihhlut?

¹⁰ Kum upa unau tam takte kan nei pawh hi malsâwmna a ni. Kohhran ṭhenkhatah chuan rinawm taka Jehova rawngbâwl nâna an nun pumhlûm hmangtu kum upa unaute an awm a. Ṭhenkhat chu thutaka an awmna a la rei vak lo pawh a ni mai thei. A enga pawh chu ni se, chûng kan unaute chuan kum upatna avângin hrisêlna lamah harsatnate an nei mai thei a ni. Chûng an harsatnate avâng chuan kohhranah leh thu hrilh rawngbâwlnaah an tih theihte chu a beitham mai thei bawk. Chuti chung pawhin, chûng kum upa kan unaute chuan thu hrilh rawngbâwlnaa an tih theihte chu an ti a, an chakna zawng zawng chu mi dangte fuih nân leh zirtîr nân an hmang a ni! An thiltawn aṭangin hlâwkna tam tak kan hmu a. Kan tân leh Jehova tân an hlu tak zet a ni.—Thuf. 16:31.

11-12. In kohhrana ṭhalaite chuan engtin nge an tihchak che?

¹¹ Kan ṭhalai unaute chungchâng pawh hi han ngaihtuah teh. Diabol-Setana leh a ngaih dân ṭha lo tak thununnaa khat he khawvêlah lo piangin harsatna tam tak an hmachhawn a. (1 Joh. 5:19) Mahse, inkhâwmnaah chhânnate pe a, rawngbâwlnaahte telin, huaisen taka an rinna an humhim tih kan hmuh hian kan chak phah sawt a ni. Ni e, nangni ṭhalaite hian Jehova kohhranah hmun pawimawh tak in nei a ni!—Sâm 8:2.

¹² Mahse, kan unau ṭhenkhat chuan kohhranah pawimawhna an nei tih chu rin harsa an ti a ni. Kohhranah chanvo kan nei ṭheuh nia inhriatna nei tûrin engin nge min ṭanpui thei? I lo en ang u.

13-14. Engvângin nge unau ṭhenkhatin kohhranah ṭangkaina nei lo nia an inngaih mai theih?

¹³ Paula tehkhin thu aṭanga kan zir theih a  pahnihna hi lo chhinchhiah rawh. Ani chuan tûn laia mi tam takte harsatna chu a târ lang a, chu chu kohhran tâna ṭangkaina an nei tih rin harsa an ti hi a ni. Paula chuan: “Kephah hian, ‘Kut ka nih loh avângin taksaa tel ka ni lo ve,’ ti sela, chumi avâng chuan taksaa tel lo a ni chuang lo ve. Tin, beng hian, ‘Mit ka nih loh avângin taksaa tel ka ni lo ve,’ ti sela, chumi avâng chuan taksaa tel lo a ni chuang lo ve,” tiin a ziak a ni. (1 Kor. 12:15, 16) Paula sawi tum chu eng nge ni?

¹⁴ Kohhrana mi dangte nêna i inkhaikhin chuan, i hlutna i hmuh hmaih thei a ni. Kohhrana unau ṭhenkhat chu zirtîrtu thiam tak te, huaihawttu thiam tak te, a nih loh leh unaute fuih thiam takte an ni thei a. Anmahni ang tluka thiamna nei lo niin i inngai mai thei. Chu chuan mi inngaitlâwm tak leh thuhnuairawlh tak i ni tih a târ lang a ni. (Phil. 2:3) Mahse, fîmkhur ang che! Chûng thiam bîkna nei unaute nêna i inkhaikhin reng chuan, i lunghnual mai ang. Paula târ lan angin, kohhranah hmun nei miah lo angin i inngai hial thei a ni. Chutiang rilru put hmang chu engtin nge i hneh theih ang?

15. Korinth thawn khat 12:4-11-a sawi angin, kan neih mai theih thilpêk chungchânga kan hriat ngai chu eng nge ni?

¹⁵ Hei hi han ngaihtuah teh: Jehova chuan kum zabi khatnaa Kristian ṭhenkhat hnênah thlarau thianghlim thilpêk chu mak danglam takin a pe a; mahse, Kristian zawng zawngin chu thilpêk chu an dawng vek lo. (1 Korinth 12:4-11 chhiar rawh.) Chu aiin, thilpêk hrang hrang leh theihna hrang hrang a pe zâwk a; mahse, Kristian tinte chuan hlutna an nei ṭheuh a ni. Tûn laiah, chu thlarau thianghlim thilpêk chu mak danglam takin kan dawng lo va. Mahse, thu bul erawh a la ngai reng. Kan thiamnate chu inang vek lo mah se, kan za hian Jehova’n min ngaihlu vek a ni.

16. Tirhkoh Paula’n kan nunpui ngai eng fuihna nge min pêk?

¹⁶ Kristian unau dangte nêna inkhaikhin aiin, thlarau thâwk khuma tirhkoh Paula ziah he fuihna hi kan nunpui a ngai a ni: “Mi tinin mahni thiltih fiah ṭheuh zâwk rawh se, chumi  hunah chuan mi dang chung ni lovin, mahni chung chauhvah chhuan tûr a nei ang,” tih hi.—Gal. 6:4.

17. Engtin nge Paula fuihna zawm chu kan hlâwkpui ang?

¹⁷ Paula fuihna kan zawm a, mahni thiltihte kan inendik chuan thilpêk mak danglam tak leh thiamnate kan lo nei reng tih kan hmu ṭan mai thei a ni. Entîr nân, kohhran upa pakhat chu platform aṭanga thusawi thiam tak a ni lo mai thei; mahse, rawngbâwlnaah mite zirtîr thiam tak a ni thei thung. A nih loh leh, an kohhrana upa dangte angin mite huaihawt thiam tak a ni lo mai thei; mahse, thuchhuahtute’n tîm lova Bible ṭanchhan thurâwn ṭha takte hre tûra an zawh ngam bêram vêngtu ngilnei tak nia hriat hlawh a ni thei thung. A nih loh leh, khualchhâwn thiamna lama unaute hriat hlawh tak pawh a ni thei bawk. (Heb. 13:2, 16) Kan chakna lai leh thilpêk kan dawnte kan hriat chian chuan kohhran tâna kan tih theihte avângin hlimna tûr chhan kan nei thei ang a. Chu bâkah, kan dawn ang ni lo, thilpêk dang dawngtu kan unaute chungah thîkna rilru kan nei tlêm lehzual ang.

18. Engtin nge kan thiamnate chu kan tihhmasâwn theih?

¹⁸ Kohhranah eng hmun pawh nei ila, kan za hian rawngbâwlnaa hmasâwn duhna kan neih a ngai a. Chutiang hmasâwnna kan neih theih nân, Jehova chuan a inawpna pâwl hmangin zirtîrna ṭha tak takte min pe a ni. Entîr nân, chawlhkâr chhûng inkhâwmahte chuan rawngbâwlnaa hma kan sâwn theih dân chungchângah kaihhruainate kan dawng a. Chu inkhâwmna aṭanga kan dawn zirtîrnate chu nunpui i tum em?

19. Engtin nge Lalram Chanchin Ṭha Puangtute School chu i kal theih ang?

¹⁹ Zirtîrna ṭha tak dang leh chu Lalram Chanchin Ṭha Puangtute School hi a ni a. He school hi kum 23 aṭanga kum 65 inkâr, hunbi kima rawngbâwltu unaute tâna buatsaih a ni. He school-a kal thei ngai lo tûrah i inngai mai thei. Mahse, i kal theih loh chhan zawng zawngte ziah chhuah vek aiin, i kal duh chhante chu ziak chhuak la. Chumi hnuah, i kal theih ngeina tûra nangmah ṭanpui theitu tûr ruahmanna siam ang che. Jehova ṭanpuina nêna theih tâwp i chhuah chuan, i tih theih ngai loh tûr nia i ngaihte pawh i tithei mai thei a ni.

20. Rom 12:6-8-a thu aṭangin eng nge kan zir theih?

²⁰ Paula sawi tehkhin thu aṭanga kan zir theih pathumna chu Rom 12:6-8-naah kan hmu a. (Chhiar rawh.) Hetah pawh hian, Paula chuan kohhrana mite’n thilpêk hrang hrang an dawng tih a târ lang leh a. Mahse, kan thilpêk dawn engpawh chu kohhran tihchak nân kan hmang tûr a ni tih a sawi uar a ni.

21-22. Unau Robert-a leh unau Felice-a te hnên aṭangin eng nge kan zir theih?

²¹ Unau Robert-a thiltawn hi han ngaihtuah teh. Ram danga rawng a bâwl hnuah, a seilenna rama Bethel-a rawngbâwl tûra tih a ni a. Chutianga a chanvo thlâk a ni chu a tlin lohna avâng a ni lo tih hriattîr ni mah se, ani chuan: “A thim zâwnga mahni in thlîrna—hlawhchham nia inhriatna—ka neih chu hun rei tak chhûng ka rilruah a châm reng a. Bethel rawngbâwlna chawlhsan duh châng ka nei hial a ni,” tiin a sawi. Engtin nge hlimna a neih leh theih? A rawngbâwlpui kohhran upa pakhat chuan Jehova’n tûna kan chanvo neiha kan ṭangkai lehzual theih nân kan chanvo dawn hmasate hmangin min zirtîr tih a hriatnawntîr a. Unau Robert-a chuan hun kal tawh chu theihnghilh a, tûna a tih theihte chu a ngaihvên a ngai tih a hre thiam ta a ni.

 ²² Unau Felice Episcopo-a pawhin chutiang harsatna chu a hmachhawn a. Kum 1956-ah a nupui nên Gilead School an zir chhuak a, Bolivia ramah bial kantu hna an thawk a ni. Kum 1964-ah fa an nei a. Felice-a chuan: “Kan ngainat tak chanvo kalsan chu harsa kan ti hle a. Mahni inkhawngaihin kum khat vêl chu ka lo khawhral mai mai a ni. Mahse, Jehova ṭanpuinain, ka rilru put hmang ka thlâk danglam thei a, chhûngkaw pa ber anga ka mawhphurhna tharah ka rilru ka pe thei ta a ni,” tiin a sawi. Unau Robert-a, a nih loh leh unau Felice-a angin i awm ve em? Tûn hmaa i chanvo hlu dawn ang i dawn tawh loh avângin i lunghnual em? Chutiang a nih chuan, i rilru put hmang i thlâk danglam a, Jehova leh i unaute tâna tûna i tih theihte i ngaihven tlat chuan, i hlim lehzual ang. I chanvo neiha i buai reng a, i thilpêk dawn leh i theihnate chu mi dangte ṭanpui nâna i hman chuan, kohhran i tihchak zêl rualin hlimna pawh i hmu bawk ang.

23. Eng tih nân nge hun kan sên ang a, a dawta thuziakah eng nge kan sawiho vang?

²³ Kan za hian Jehova tân kan hlu ṭheuh va. A chhûngkaw zînga mi ni tûrin min duh a ni. Kan unaute tihchak theih dân kan ngaihtuah a, chumi tihlawhtling tûra theih tâwp kan chhuah chuan, kohhrana tel ve lo nia inhriatna kan nei tlêm lehzual ngei ang! A nih leh, kohhrana unaute kan thlîr dân chu eng nge ni ve? Anni chu kan ngaihlu tih engtin nge kan lantîr theih? A dawta thuziakah chu thu pawimawh tak chu kan sawiho vang.