1. Eng thil ṭhate nge ṭhalai tam takte’n an hlen chhuah tawh?

 KUM tin hian, ṭhalai sâng tam takte chuan baptisma an chang a ni. Chûng zîngah chuan i tel ve em? I tel a nih chuan, kohhrana unaute chuan an lâwmpui tak zet che a, Pathian Jehova pawh a hlim hle bawk! (Thuf. 27:11) I thil hlen chhuah tawhte chu rei lo te chhûng han ngaihtuah lawk teh. Entîr nân, kum tam tak chhûng ṭhahnemngai takin Bible i lo zir tawh pawh a ni thei. Chutianga i zirna chuan Bible hi Pathian Thu a ni tih a rinnghehtîr che a ni. Chu mai chu ni lovin, Bible Ziaktu hriatna leh hmangaihna i rawn nei a. Jehova i hmangaihna a ṭhan chhoh zêl avângin, tûnah chuan inpumpêka baptisma chang tawh a chhiahhlawhte zînga mi i rawn ni ta a ni. A va ropui tak êm!

2. He thuziakah hian eng nge kan sawiho vang?

 ² Baptisma chang tûra hma in lâk laiin, in rinna fiahtu thil tam tak in hmachhawn ngei ang. Mahse, in puitlin chhoh zêl rualin, fiahna dangte pawh in la hmachhawn dâwn a ni. Setana chuan Jehova in hmangaihna leh a rawng in bâwlna chu bânsantîr che u a tum ang. (Eph. 4:14) Chutiang thil a thlen chu phal ngai suh ang che u. Engin nge Jehova chunga rinawm tlat tûr leh in inpumpêkna thutiam hlen tûra ṭanpui thei che u? Kristian puitling ni tûrin theih tâwp in chhuah chhunzawm zêl tûr a ni. (Heb. 6:1, 2) A nih leh, engtin nge chutiang chuan in tih theih?

3. Kristian zawng zawngte’n baptisma an chan hnuah eng nge an tih ngai?

³ Baptisma kan chan hnuah, Epesi khuaa Kristiante hnêna tirhkoh Paula fuihna hi kan zavaia kan nunpui a ngai a. Ani chuan Kristian “puitling” ni tûrin a fuih a ni. (Eph. 4:11-13) Thu danga sawi chuan, ‘Hmasâwn chho zêl rawh u,’ tia fuih ang a ni. Paula’n thlarau lama ṭhan chhohna leh tisa lama naupang ṭhan chhohna a tehkhin chhan chu kan hre thiam thei a. Nausên piang hlim chu a nu leh pate chuan an hmangaihin an chhuang hle a. Mahse, nausên a ni reng thei lo. A hnuah “naupang tih dân” a bânsan a ngai ang. (1 Kor. 13:11) Kristiante tân pawh chutiang bawk chu a ni a. Baptisma chan hnuah pawh hma kan sâwn chho zêl tûr a ni. Chutianga hmasâwn chho zêl tûra min ṭanpuitu tûr rawtna ṭhenkhat i lo sawiho vang u.

4. Thlarau lama hmasâwn tûrin eng miziain nge ṭanpui thei che? Hrilhfiah rawh. (Philippi 1:9)

⁴ Jehova i hmangaihna chu tinghet lehzual rawh. Jehova chu i hmangaih reng tawh a. Mahse, i hmangaihna chu i tinghet lehzual thei a ni. Engtin nge? Tirhkoh Paula chuan Philippi 1:9-ah chutianga kan tih theih dân kawng khat a târ lang a. (Chhiar rawh.) Ani chuan Philippi khuaa Kristiante’n hmangaihna an “ngah lehzual nân” a ṭawngṭai ṭhîn a ni. Keini pawhin kan hmangaihna chu kan tinghet lehzual thei a. Chu chu “hriat famkimna leh bengvârna tinrêng” neihna hmangin kan tithei a ni. Jehova kan hriat chian poh leh, amah kan hmangaih lehzualin, a miziate leh a thil tih dânte chu kan ngaihlu lehzual a. Amah tihlâwm duhna kan nei lehzualin, amah tilungni lo theitu thil eng mah tih kan duh ngai lo vang. Ti tûra min duhte leh kan tih theih dânte hriat tumin theih tâwp kan chhuah zâwk a ni.

5-6. Engtin nge Jehova kan hmangaihna kan tihngheh lehzual theih? Hrilhfiah rawh.

⁵ A Pa miziate ṭha famkima lantîrtu a Fapa chanchin hriat chianna hmangin Jehova kan hmangaihna chu kan ṭhan chhohtîr thei a. (Heb. 1:3) Isua kan hriat chian theih dân kawng ṭha ber chu Chanchin Ṭha ziak palite zir hi a ni. Nî tina Bible chhiar chu tih ṭhana i la nei lo a nih chuan, engvângin nge tûn aṭanga i chhiar ṭan loh vang? Isua chanchin i chhiar hunah a miziate chu chhinchhiah bîk ang che. Ani chu pan nuam tak a nih bâkah, naupangte pawh hmangaih takin a kuah ṭhîn. (Mk. 10:13-16) A zirtîrte chungah a zaidamin a nêlawm êm êm a, anni chuan an rilrua awmte chu zalên takin an hrilh ngam a ni. (Mt. 16:22) Chumi kawngah chuan Isua’n a Pa vâna mi chu a entawn a. Jehova pawh pan nuam tak a ni. Ṭawngṭaiin amah kan pan thei a. Kan ṭawngṭai hian, kan thinglunga awmte chu kan phawrh vek thei a ni. Ani chuan thiam loh min chantîr lo vang tih kan ringnghet tlat bawk. Min hmangaihin, min ngaihsak hle si a.—1 Pet. 5:7.

⁶ Isua chuan mite chu a khawngaih hle a. Tirhkoh Matthaia chuan: “Chutichuan, mipuite chu a hmuhin, vêngtu nei lo berâmte anga hrehawm leh darha an awm avângin a khawngaih ta êm êm a,” tiin a sawi a ni. (Mt. 9:36) Engtin nge Jehova’n a ngaih ve? Isua chuan: “Chutiang bawkin, hêng mi tête zînga pakhat boral pawh hi in Pa vâna mi duh zâwng a ni lo ve,” tiin a sawi a ni. (Mt. 18:14) Chu chuan min va tihlim tak êm! Isua kan hriat chian rualin, Jehova kan hmangaihna pawh a pung lehzual a ni.

7. Engtin nge thlarau lama puitling unaute kawmna chuan a ṭanpui theih che?

⁷ Kohhran chhûnga thlarau lama puitling  unaute kawmna hmangin Jehova chunga hmangaihna lantîr lehzual dân kan zir theiin, Kristian puitling kan ni thei a. Chûng unaute hlimzia chu i hmu em? Jehova rawngbâwl tûra an thu tlûkna siam avângin inchhîrna an nei lo. Jehova rawngbâwlnaa an thiltawnte chu zâwt la. Thu tlûkna pawimawh tak i siam a ngaih hunah an hnênah thurâwn dîl ang che. “Remruat thiam tamnaah himna [“hlawhtlinna,” NWT] a awm” si a.—Thuf. 11:14.

8. Bible sawite chungchângah rinhlelhna i nei a nih chuan eng nge i tih theih?

⁸ I rinhlelhna chu hneh rawh.  Paragraph 2-naa târ lan tawh angin, Setana chuan thlarau lama i hmasâwn zêlna tûr chu dan a tum ang. Chutianga a tih mai theih dân kawng khat chu, Bible zirtîrna ṭhenkhat rinhlelhtîr che hi a ni. Entîr nân, mi ṭhenkhatin Pathianin min siam vâng ni lovin, chanchhâwnna avâng zâwka lo awm kan ni tih rintîr che an tum pawh a ni thei. I naupan lai chuan chanchhâwnna chungchâng chu i ngaihtuah ngai lo pawh a ni thei a; mahse, tûnah chuan school-ah zirtîrna i dawng a. Chumi chungchânga in zirtîrtute thusawi chu dik hmêl tak leh awihawm tak angin a lang mai thei bawk. Mahse, anni chuan Siamtu a awm leh awm loh hriat tumna tak tak an nei ngai lo. Thufingte 18:17-naa kan hmuh thu bul hi hre reng ang che: “A thiamna thu sawi hmasatu chu felin a lang ṭhîn a; mahse, a ṭhenawmte an lo kal a, an rawn tilang ṭhîn,” tih hi. School-a zirtîrna i dawn zawng zawngte chu pawm nghâl mai lovin, Pathian Thu, Bible-a kan hmuh thutakte chu ngun takin zir chiang ṭhîn la. Kan thu leh hla chhuahte hmangin zir bingna nei ang che. Chanchhâwnna lo ring tawh ṭhîn unaute chu kâwm la. Hmangaihna nei tak Siamtu a awm tih rintîrtu chu zâwt ang che. Chutianga mi tichak thei tak sawihona neihnate chuan Siamtu a awm ngei tih hre tûrin a ṭanpui thei che a ni.

9. Unaunu Melissa-i thiltawn aṭangin eng nge i zir?

⁹ Unaunu Melissa-i chuan thil siam chungchânga zir bingna a neih chu a hlâwkpui hle a. * Ani chuan: “School-ah zirtîrtute chuan chanchhâwnna chu âwihawm takin an sawi ṭhîn a. A tîr chuan, chanchhâwnna hi a dik tih finfiahna hmuh ka hlauh avângin zir bingna neih ka duh lo. Mahse, Jehova’n kan rinnate  chu fiah tûrin min duh tih ka hria. Tichuan, zir bingna chu ka nei ṭan ta a. Is There a Creator Who Cares About You? tih lehkhabu bâkah, Was Life Created? tih leh The Origin of Life—Five Questions Worth Asking tih brochure-te chu ka chhiar a. Chûngte chu ka mamawh tak a ni. Zir bingna lo nei hma lehzual ila ka ti khawp mai,” tiin a sawi.

10-11. Nungchang thianghlimna vawng reng tûrin engin nge ṭanpui thei che? (1 Thessalonika 4:3, 4)

¹⁰ Nungchang ṭha lo chu hnâwl rawh. Tleirâwl chhoh lai vêl hi mipat hmeichhiatna hman châkna a sosân lai tak a nih bâkah, mi ṭhenkhat chuan anmahni hmanpui tûrin an thlêm che pawh a ni thei. Chu tak chu Setana’n ti tûra a duh che chu a ni. Nungchang thianghlimna vawng reng tûrin engin nge ṭanpui thei che? (1 Thessalonika 4:3, 4 chhiar rawh.) Mi mala i ṭawngṭai hunah, i rilrua awmte chu Jehova hnênah hrilhin, chakna pe tûr chein dîl ang che. (Mt. 6:13) Ani chuan thiam loh chantîr che ni lovin, ṭanpui che a duh tih hre reng rawh. (Sâm 103:13, 14) Bible pawhin a ṭanpui thei bawk che a ni. A chunga kan târ lan tâk Unaunu Melissa-i chuan ngaihtuahna ṭha lo hnâwl chu harsa a ti a. Ani chuan: “Nî tina Bible chhiarna chuan ka châkna ṭha lote do hneh tûrin min ṭanpui a. Chu chuan Jehova ta ka ni tih leh a rawngbâwl ka duh tih min hriat nawntîr ṭhîn,” tiin a sawi.—Sâm 119:9.

¹¹ I harsatnate chu mahnia chinfel tum lo la. I nu leh pate hrilh ang che. Chutianga mi mal harsatnate sawi chhuah chu thil awlsam a ni lo ngei mai; mahse, chu chu thil pawimawh tak a ni. Unaunu Melissa-i chuan: “Huaisenna dîla ka ṭawngṭai hnuah ka harsatnate chu ka pa ka hrilh a. Chutianga ka hrilh hnu chuan ka hahdam huai mai. Jehova’n min chhuang hle tih pawh ka hria,” tiin a sawi a ni.

12. Engtin nge thu tlûkna ṭha i siam theih?

¹² Bible thu bulte inkaihhruaitîr rawh. I puitlin chhoh zêl rualin, i nu leh pate’n mahnia thu tlûknate siam tûrin zalênna an pe tam lehzual ang che. Mahse, i hriat loh thil tam tak pawh a la awm a ni. Engtin nge Jehova nêna in inṭhian ṭhatna tichhe theitu thilte tih chu i pumpelh theih? (Thuf. 22:3) Unaunu Kari-i’n thu tlûkna ṭha lehzual siam tûra amah ṭanpuitu chu a sawi a. Ani chuan Kristian puitling tân thil engkima dân insiam a ngai lo tih a hre thiam a. “Dân insiam aiin, Bible thu bulte ka hriatthiam chu a ngai zâwk a ni,” tiin a sawi. Bible i chhiar hunah heti hian inzâwt ang che: ‘Hei hian Jehova ngaihtuahna chungchâng eng nge min hrilh? Thil dik ti tûra min ṭanpui theitu thu bulte a chuang em? A chuang a nih chuan, chûng thu bulte nunpuina chu engtin nge ka hlâwkpui ang?’ tiin. (Sâm 19:7; Is. 48:17, 18) Bible chhiar a, i thu chhiarte chhût ngunna chuan Jehova tilâwmtu thu tlûknate siam a tiawlsam lehzual tih i hria ang a. Thlarau lama hma i sâwn chhoh zêl ruala Jehova ngaihtuah dânte i hriatthiam dâwn avângin dinhmun engkima dân siam a ngai lo tih i hre bawk ang.

13. Ṭhian ṭhate chuan engtin nge an ṭanpui theih che? (Thufingte 13:20)

¹³ Jehova hmangaihtute chu ṭhianah thlang rawh. A chunga kan târ lan angin, i ṭhian thlan chuan thlarau lama hma i sâwn chhohna kawngah nasa takin nghawng a nei dâwn a ni. (Thufingte 13:20, chhiar rawh.) Unaunu Sara-i chuan a hlimna a hloh va. Mahse, a hnuah hlimna nasa zâwk neihtîr leh theitu thil a thleng a ni. Ani chuan: “A hun takah ṭhian ṭhate ka chhar a. Chawlhkâr tin Vênnainsâng inkhâwmah ṭhalai unaunu pakhat nên kan ṭhu tlâng ṭhîn a. Ka ṭhian dang leh chuan inkhâwmnaahte chhânna pe tûrin min  ṭanpui bawk. Chutianga ka ṭhiante min ṭanpuina avâng chuan, mi mala inzirna ka nei ṭanin, tih tak zetin ka ṭawngṭai a. Jehova nêna inlaichînna nghet tak ka neih bâkah, hlimna ka nei ṭan leh a ni,” tiin a sawi.

14. Engtin nge Unau Julien-a’n ṭhian ṭhate a siam?

¹⁴ Engtin nge i chunga a ṭha lama thunun thei tûr mite chu ṭhiana i siam theih? Kohhran upa Unau Julien-a chuan: “Ka naupan lai chuan rawngbâwlnaa ka thawhpuite chu ṭhianah ka siam ṭhîn a. Chûng ka ṭhiante chu ṭhahnem an ngaiin, anni chuan rawngbâwlna hlimawm dânte hre tûrin min ṭanpui a. Hunbi kima rawngbâwl chu thiltumah ka nei ṭan ta a ni. Ka rualpuite chauh ṭhiana ka siam avângin ṭhian ṭha ka neih tlêm phah tih ka hre bawk. A hnuah, Bethel-ah rawngbâwlin, chutah chuan ṭhian ṭhate ka nei leh a. An entawn tûr siamte chuan intihhlimna ṭha thlang tûra min ṭanpui bâkah, Jehova min hnaihtîr lehzual a ni,” tiin a sawi.

15. Ṭhian kawm chungchângah Paula’n Timothea hnênah eng vaukhânna nge a pêk? (2 Timothea 2:20-22)

¹⁵ Kohhrana mi ṭhenkhat chu i tân ṭhian ṭha an ni lo tih hre ta la, engtin nge ni ang? Paula chuan kum zabi khatnaa Kristian kohhran chhûnga mi ṭhenkhatin thlarau lam thil an ngaihsak lo tih a hria a; chuvângin, chûng mite chu kâwm lo tûrin Timothea chu a vaukhân a ni. (2 Timothea 2:20-22 chhiar rawh.) Jehova nêna kan inṭhian ṭhatna hi a hlu hle a. Chuvângin, kan Pa vâna mi nêna inlaichînna ṭha nei tûra theih tâwp kan chhuahnate chu tu mahin an tihchhiat kan phal tûr a ni lo.—Sâm 26:4.

16. Eng ang thiltumte nge i insiam ang?

¹⁶ Thiltum ṭha insiam rawh. I rinna tichak theitu leh Kristian puitling ni tûra ṭanpuitu tûr che thiltumte chu insiam rawh. (Eph. 3:14-19) Entîr nân, mi mala inzirna leh Bible chhiarna tihhmasâwn chu i duh mai thei a. (Sâm 1:2, 3) A nih loh leh, ṭawngṭai ngun lehzual leh ṭawngṭai dân tihhmasâwn chu i tum thei a ni. Intihhlimna i thlanna kawngah leh i hun hman dânah i fîmkhur lehzual a ngai pawh a ni thei. (Eph. 5:15, 16) Jehova’n hmasâwn chho tûra theih tâwp i chhuahnate a hmuh hian, chu chuan ani chu a tilâwm ngei ang.

17. Mi dangte i ṭanpuinain engtin nge a ṭanpui ang che?

 ¹⁷ Mi dang i ṭanpui hian, Kristian i nih angin hma i sâwn chho va. Isua chuan: “Englo lâk aiin pêkin lukhâwng a nei zâwk,” tiin a sawi a ni. (Tirh. 20:35) Mi dangte ṭanpui nâna i hunte leh i vânglai chaknate i hmang a nih chuan, chu chuan hlimna nasa tak a thlen ang che. Entîr nân, in kohhrana kum upate leh dam lote ṭanpui chu thiltumah i insiam thei a. A nih loh leh, anni chu i bazârsak theiin, electronic hmanruate hman dân i zirtîr thei a ni. Unaupa i nih chuan, kohhrana unaute i ṭanpui lehzual theih nân kohhranho rawngbâwltu nih chu thiltumah nei ang che. (Phil. 2:4) Lalram chanchin ṭha hrilhna hmangin kohhran chhûnga mi ni lote chungah pawh hmangaihna i lantîr bawk. (Mt. 9:36, 37) A theih phawt chuan, hunbi kima Jehova rawngbâwl chu thiltumah insiam ang che.

18. Engtin nge hunbi kima rawngbâwlna chuan hmasâwn chho tûra a ṭanpui theih che?

¹⁸ Hunbi kima rawngbâwlna chuan thlarau lama hmasâwn theihna hun remchâng tam tak a pe thei che a. Pioneer thawhna chuan Lalram Chanchin Ṭha Puangtute School-a kal theihna kawng a hawnsak thei che a ni. Bethel-ah, a nih loh leh biakna atâna hman in sakna lamah thawkin rawng i bâwl pawh a ni thei. Kum 21-a upa pioneer unaunu Kaitlyn-i chuan: “Rawngbâwlnaa tawn hriat ngah unaute nêna thawhhona chuan baptisma chan hnuah pawh thlarau lama hmasâwn chho zêl tûrin nasa takin min ṭanpui a. An entawn tûr siamte chuan Bible zir nasa lehzual tûr leh zirtîr thiamna tihmasâwn tûrin min chêttîr a ni,” tiin a sawi.

19. Thlarau lama hma i sâwn chhoh zêl rualin eng malsâwmnate nge i dawn ang?

¹⁹ Thlarau lama hma i sâwn zêl rualin, malsâwmna tam tak pawh i dawng ang. Thiltum awmze nei lote ûm avânga i vânglai hun khawhralna chu i pumpelh ang a. (1 Joh. 2:17) Thu tlûkna ṭha lo siam avânga rilru natnate pawh i pumpelh bawk ang. Chu aiin, hlawhtlinna leh hlimna dik tak i nei zâwk ang. (Thuf. 16:3) I entawn tûr ṭha siamte chuan i Kristian unau zawng zawngte chu a tichak ang a. (1 Tim. 4:12) A pawimawh berah chuan, Jehova thinlung tihlâwmna leh amah nêna inlaichînna ṭha tak neihna aṭanga lo awm rilru hahdamna leh lungawina i nei ang.—Thuf. 23:15, 16.