1. Thessalonika thawn khat 5:11-nain a sawi angin, eng hnathawhnaah nge kan tel ṭheuh?

 I LAWINA kohhranin Kingdom Hall an sa, a nih loh leh an thuam ṭha tawh ṭhîn em? Chutiang a nih chuan, Kingdom Hall thar, a nih loh leh thawm ṭhat a nih hnua in inkhâwm hmasak ber ṭum chu i la hre ngei ang. Jehova chungah i lâwm hle a ni. Dik tak chuan, i hnuk a ulh avângin inkhâwm ṭanna hla chu i sa ṭha thei lo hial pawh a ni thei. Ṭha taka sak kan Kingdom Hall-te hian Jehova chawimawina a thlen a ni. Mahse, thil dang sakna hnaa kan tel hian Jehova chawimawina nasa zâwk kan thlen a. Chu hnathawhnaah chuan in tak tak sakna aia hlu zâwk thil eng emaw a tel a ni. Chu chu Pathian biakna hmuna lo kalte tihsâwtna a ni a. Tirhkoh Paula chuan in sakna nêna inkûngkaih entîr nei ṭawngkamte chu rilrua dah reng chungin kan thuziak ṭanchhan Bible châng, 1 Thessalonika 5:11-a thute hi a ziak a ni.—Chhiar rawh.

2. He thuziakah hian eng nge kan sawiho vang?

² Tirhkoh Paula chu a Kristian unaute tihsâwtna kawnga entawn tûr ṭha tak a ni a. Ani chuan a unaute chungah khawngaihna a nei a ni. He thuziakah hian, tirhkoh Paula’n (1) fiahnate chhel taka tuar chhuak thei tûr te, (2) mi dangte nêna inrem taka awm tûr te, leh (3) Jehova an rinna tinghet tûrtea a unaute a ṭanpui dân kan sawiho vang a. Amah kan entawn theih dân leh tûn laia kan unaute kan tihsâwt theih dân pawh kan sawiho bawk ang.—1 Kor. 11:1.

3. Paula chuan eng thlîr dân inbûk tâwk nge a neih?

³ Paula chuan a unaute chu a hmangaih hle a. Dinhmun khirh tak takte a lo hmachhawn tawh ṭhin avângin, a Kristian unaute’n fiahnate an tawh hian an chungah lainatna leh khawngaihna a lantîr thei a ni. Ṭum khat chu, Paula chuan sum a nei tawh lo va, amah leh a ṭhiante mamawh phuhhrûk nân hna a thawh a ngai a ni. (Tirh. 20:34) A hnathawh chu puan in siam a ni a. Korinth khua a thlen tîr lam chuan, Akuila leh Priskilli te puan in siamnaah a thawk ṭhîn a. Mahse, “chawlhni apiangin” Juda mite leh Grik mite hnênah thu a hril ṭhîn a ni. Sila leh Timothea te an lo thlen hnu chuan, “Paula chu thu hril chauhvin a awm ta a.” (Tirh. 18:2-5) A nuna a thiltum ber chu Jehova rawngbâwl a ni tih a theihnghilh ngai lo. Ani chuan rawngbâwlnaah leh a mi mal mamawhte phuhhrûkna kawnga thawhrimnaah entawn tûr ṭha tak a siam avângin a unaute chu a fuih theih a. Nuna nêksâwrnate leh chhûngkaw châwm an ngaihnate chu “thil pawimawh zâwkte”—Jehova biakna pêng hrang hrangte—ngaihthah nâna hmang lo tûrin a hriat nawntîr a ni.—Phil. 1:10, NWT.

4. Engtin nge Paula leh Timothea chuan an Kristian unaute chu tihduhdahnate hmachhawn thei tûra an ṭanpui?

⁴ Thessalonika khuaa kohhran din a nih hnu lawkah, ringtu tharte chuan dodâlna nasa tak an hmachhawn a. Dodâltu mipui thinrimte’n Paula leh Sila an zawn hmuh tâk lovah chuan, “unau dang tute emaw khaw hotute hnênah” an hnûk lût a: ‘Hêngho hi Kaisara thu kalhin an awm ṭhîn,’ tiin an puh a ni. (Tirh. 17:6, 7) Khaw chhûnga mite’n an dodâl tih Kristian rawn ni tharte’n an hriat huna an hlauh dân tûr chu i mitthla thei em? Jehova rawngbâwlnaa an ṭhahnemngaihna chu a kiam thei a; mahse, Paula’n chutiang a thlen chu a phal lo. Sila nên Thessalonika khua chu an chhuahsan ngai mah se, chu kohhran din thar chu ṭha taka ngaihsak a ni tih an chian a ni. Paula chuan chu khuaa unaute chu: “Timothea, kan unaupa . . . hi, tinghet tûr che u leh in rinna kawnga thlamuan tûr che uin kan rawn tîr a ni, hêng hrehawm tuarnate avâng hian tu mah an nghîn lohna tûrin,” tiin a hrilh a. (1 Thes. 3:2, 3) Timothea chuan an khua Lustra-ah tihduhdahna a lo tuar tawh ṭhîn niin a lang. Paula’n chuta awm unaute a tihchak dân chu a hmu a. A hnua Jehova’n a ṭanpui dânte a hmuhna aṭangin, Thessalonika khuaa ringtu thar a unaute hnênah chuan dinhmunte chu a ṭha chho leh ang tih hrilhin a thlamuan thei a ni.—Tirh. 14:8, 19-22; Heb. 12:1, 2.

5. Engtin nge unau Bryant-a’n kohhran upa pakhat ṭanpuina chu a hlâwkpui?

⁵ Eng kawng dangin nge Paula chuan a Kristian unaute chu a tihchak? Lustra te, Ikonion te, leh Antiokei khuate an vawi hnih tlawhnaah Paula leh Barnaba chuan “kohhran pâwl tinah chuan upate an ruatsak a.” (Tirh. 14:21-23) Tûn laia upate ang bawkin, chûng upate chu kohhrante thlamuantu an ni ngei ang tih rinhlelh rual a ni lo. Unau Bryant-a thusawi hi lo chhinchhiah teh: “Kum 15 mi ka nih chuan ka pa’n in a chhuahsan a, ka nu pawh kohhran aṭanga hnawhchhuah a ni bawk. Phatsan nia inhriatna ka nei a, ka lunghnual hle a ni,” tiin a sawi. Chu hun harsa tak chu hmachhawn thei tûrin Bryant-a chu engin nge ṭanpui? Ani chuan: “Kohhran upa Tony-a chuan inkhâwmahte leh ṭum dangahte pawh min rawn be ṭhîn a. Fiahna tâwk chung pawha hlimna nei rengtute chungchâng chu min hrilh ṭhîn a. Sâm 27:10-na hi min chhiarsakin, a pain entawn tûr ṭha a siam lo chung pawha rinawm taka rawngbâwltu Hezekia chungchâng chu min sawipui fo ṭhîn,” tiin a sawi. Engtin nge chu chuan  Bryant-a chu a ṭanpui? “Tony-a ṭanpuina zârah, a tâwpah hunbi kimin rawng ka bâwl ta a ni,” tiin a sawi. Upate u, Bryant-a anga fuihna “thu ṭha” mamawhtute in ṭanpui theih nân harhvâng takin awm ang che u.—Thuf. 12:25.

6. Engtin nge Paula’n mi dangte nun kawng chanchin chu a unaute tihchak nâna a hman?

⁶ Paula chuan a Kristian unaute chu Jehova chaknain “chhûmpui nasa tak ang thlîrtuten” harsatnate chhel takin an tuar chhuak thei tih a hriat nawntîr a. (Heb. 12:1, 2) Ani chuan tûn hmaa harsatna chi hrang hrang chhel taka lo tuar chhuaktute chanchin chuan tûna a unaute chu a tichak theiin, “Pathian nung khua” ngaihven tlat tûrin a ṭanpui thei tih a hria a ni. (Heb. 12:22) Tûn laiah pawh chutiang tho chu a ni a. Jehova’n Gideona te, Baraka te, Davida te, Samuela te, leh mi dang tam takte a ṭanpui dân chhiarna aṭangin chakna kan hmu ṭheuh a ni lâwm ni? (Heb. 11:32-35) Rinna kawnga tûn laia entîrnate chungchâng hi eng nge ni ve? World Headquarters-ah chuan, tûn laia Jehova chhiahhlawh rinawmte nun kawng chanchin an chhiarna aṭanga an rinna tihchaka awm kan unaute hnên aṭangin lehkhathawnte kan dawng fo ṭhîn a ni.

7. Rom 14:19-21-naa chhinchhiah Paula fuihna aṭangin eng nge i zir?

⁷ Kohhranah remna kan siam chhunzawm zêl hian kan unaute kan tichak a. Ngaih dân inan lohnate chuan min ṭhen hran kan phal lo. Bible thu bulte a kalh loh phawt chuan kan insiamrem thei a ni. Entîrna pakhat hi han ngaihtuah teh. Rom khuaa kohhranah chuan Judate leh Gentail Kristiante an awm a. Mosia Dân hlih a nih khân, ei tûr ṭhenkhat chungchânga khuahkhirhnate chu zawm ngei ngei a ngai tawh lo. (Mk. 7:18, 19) Chumi hun aṭang chuan Juda Kristian ṭhenkhat chuan eng pawh an ei thei tawh niin an ngai a. Mahse, Juda ṭhenkhat dang chuan chutiang chuan an ngai lo. Chumi chungchâng avâng chuan kohhranah inṭhen hranna a lo awm ta a. Paula chuan remna vawn reng leh nunpui a pawimawhzia sawi uarin: “I unau tlûkna tûr a nih chuan sa ei loh te, uain in loh te, thil eng pawh tih loh a ṭha a ni,” tiin a ziak a ni. (Rom 14:19-21 chhiar rawh.) Paula chuan chutiang inhnialna chu mi mal leh kohhran pum tân chhiatna thlentu a nihzia hre thiam tûrin a Kristian unaute chu a ṭanpui a. Mi dangte a tihtlûk loh nân inthlâk danglam chu a inhuam bawk a ni. (1 Kor. 9:19-22) Kan mi mal duh thlannate avânga inhnial buaina thlentîr loh kan tum tlat a nih chuan, keini pawhin mi dangte chu kan tichak theiin, remna kan awmtîr thei a ni.

8. Thil pawimawh tak pakhatin kohhrana remna a tihderthâwn khân, engtin nge Paula’n a chhân lêt?

⁸ Paula chuan thil pawimawhte pawm lotute nêna inrem kawngah entawn tûr ṭha a siam a. Entîr nân, kum zabi khatnaa kohhrana mi ṭhenkhat chuan Gentailte chu serh tan tûrin an phût a, chu chu mi dangte sawisêl an hlauh vâng a ni mai thei. (Gal. 6:12) Paula chuan an rilru put hmang chu a duh lo hle a; mahse, a duh dânte zâwm tûra hrilh aiin, inngaitlâwm takin thil awm dânte chu Jerusalema tirhkohte leh upate hnênah a thlen a. (Tirh. 15:1, 2) Chutianga hma a lâkna chuan kohhranah hlimna leh remna awmtîr reng tûrin a Kristian unaute chu a ṭanpui a ni.—Tirh. 15:30, 31.

9. Engtin nge Paula entawn tûr siam chu kan zui theih?

⁹ Inhnial buaina nasa tak a lo thlen hian, kohhran enkawl tûra Jehova mi ruatte hnêna kaihhruaina zawngin remna kan awmtîr a. Bible ṭanchhan kaihhruainate chu kan thu leh hla chhuahah emaw, inawpna pâwl aṭanga kan  dawn kaihhruainaah emaw hmuh theih a ni fo ṭhîn. Chûng kaihhruainate chu kan mi mal ngaih dânte aia zawm kan tum tlat chuan kohhranah remna kan awmtîr ang.

10. Paula’n kohhrana remna awmtîr tûrin eng thil dang nge a tih?

¹⁰ Paula chuan a unaute ṭhat lohna lai ni lovin, an mize ṭhate chauh sawi uarin remna a awmtîr a. Entîr nân, Rom mite hnêna a lehkhathawn tâwp lamah unau tam takte hming a târ lan bâkah, an chungchâng a ṭha lam thute, a nih loh leh kimchang takin a sawi bawk a ni. Kan unaute mize ṭha laite sawiin Paula kan entawn thei a. Chutianga tihna chuan kan unaute inkârah inlaichînna ṭha tak a awmtîr a, chu chuan kohhran chu hmangaihnaah a inpumkhattîr a ni.

11. Ngaih dân inan lohna a lo awm hunah engtin nge remna kan awmtîr theih?

¹¹ Thlarau lama puitling kan unaute ngei pawhin inlungrual loh châng emaw, inhnial châng emaw an nei thei a. Chu chu Paula leh a ṭhian hnai tak Barnaba chungah a thleng a ni. An pahnih chuan missionary-a an zin ṭum hnihnaa Marka hruai chungchângah an ngaih dân a inhmu lo hle a. ‘Nasa takin an inhnial a,’ an inṭhen hrang ta a ni. (Tirh. 15:37-39) Mahse, kohhrana remna leh inpumkhatna awmtîr an duhzia lantîrin, an pathum chuan inlaichînna ṭha tak an nei leh a. A hnuah Paula chuan Barnaba leh Marka chungchâng a ṭha lam thute a sawi a ni. (1 Kor. 9:6; Kol. 4:10) Keini pawhin kohhrana unaute inan lohnate chu kan hriatthiam a, an mize ṭha laite kan ngaihven chhunzawm zêl a ngai a. Chutianga kan tih chuan, remna leh inpumkhatna kan awmtîr ang.—Eph. 4:1-3.

12. Kan unaute hmachhawn fiahna ṭhenkhat chu engte nge ni?

¹² Pathian Jehova chunga an rinna kan tihnghehsak hian, kan unaute chu kan tichak a ni. Ṭhenkhat chuan Thuhretu ni lo an chhûng te, an hnathawhpui te, a nih loh leh an school kalpuite nuihzat an hlawh a. Mi dangte chuan natna khirh tak an tuar, a nih loh leh an rilru natna hneh harsa an ti a. Mi dang lehte chu kum tam tak kaltaa baptisma chang tawhte an ni a, anni chuan Setana khawvêl tâwp hun hi hun rei tak chhûng an lo nghâk tawh a ni. Chûng dinhmunte chu tûn laia Kristiante tân rinna fiahtu a ni thei a. Kum zabi khatnaa kohhran mi leh sate pawhin chutiang fiahna chu an lo hmachhawn tawh ṭhîn a ni. Engtin nge Paula’n a unaute chu a tihchak?

13. Engtin nge Paula’n an rinna avânga mite nuihzat hlawhtute chu a ṭanpui?

¹³ Paula chuan a unaute rinna tichak tûrin Bible a hmang. Entîr nân, Juda Kristiante chuan Kristian sakhua aiin Juda sakhua a chungnung zâwk nia sawitu ring lotu an chhûngte sawisêlna chu chhân lêt dân an hre lo pawh a ni thei. Chuvângin, Hebrai mite hnêna Paula lehkhathawn chuan anni chu nasa takin a tichak ngei ang. (Heb. 1:5, 6; 2:2, 3; 9:24, 25) Paula chhût dân ṭha takte chuan a unaute chu ring lotu an chhûngte chhân lêt dân hre tûrin a ṭanpui a ni. Tûn laiah pawh, mite nuihzat hlawhtu kan Kristian unaute chu Bible ṭanchhan kan thu leh hla chhuahte hmanga kan rinna chungchâng ṭha taka hrilhfiah thei tûrin kan ṭanpui thei a. Chu bâkah, ṭhalaite’n thil siam chungchâng an rin avânga nuihzat an hlawh a nih chuan, nunna hi siam a ni tih an rin nachhan hrilhfiah thei tûra anmahni ṭanpui nân Siam A Ni Em? * tih thuziak inzawm chu kan kawhhmuh thei a ni.

14. Thu hril leh mite zirtîra a buai hle chung pawhin Paula’n eng nge a tih?

¹⁴ Paula chuan a unaute chu “thil ṭha” tihna  hmanga hmangaihna inlantîr tawn tûrin a fuih. (Heb. 10:24) Amah ngei pawhin a unaute chu thusawi chauh ni lovin, thiltihin a ṭanpui a. Entîr nân, Judai rama awm a Kristian unaute’n ei leh bâra harsatna an tawh khân, Paula chuan an mawmawh ṭhenkhat pein a ṭanpui a. (Tirh. 11:27-30) Dik tak chuan, thu hril leh mite zirtîra a buai hle chung pawhin, mi retheite ṭanpui dân kawng a zawng reng a ni. (Gal. 2:10) Chutianga tihna hmangin, a Kristian unaute chu Jehova’n a ngaihsak ang tih ring tlat tûrin a tichak a ni. Tûn laiah pawh, leilung chhiatna tâwk kan unaute ṭanpui nâna kan hun te, tha leh zung te, leh thiamnate kan hman hian, kan unaute rinna kan tichak a. Khawvêl pum huap râwngbâwlna atâna thawhlâwm thawh ziahna hmangin chutiang ṭanpuina chu kan pe thei bawk. Chûngte leh kawng dangte hmangin, kan unaute chu Jehova’n a thlahthlam ngai lo vang tih ring tlat tûrin kan ṭanpui a ni.

15-16. Engtin nge rinnaa chak lo kan unaute chu kan cheibâwl ang?

¹⁵ Paula chu rinnaa chak lote chungah a beidawng mai lo. An chungah khawngaihna a lantîrin, ngilnei tak leh ṭha takin a bia a. (Heb. 6:9; 10:39) Entîr nân, Hebrai mite hnêna a lehkhathawn tluan chhuakah “kan” tih thu mal vawi tam tak a hmangin, a fuihna pêkte chu amah ngei pawhin a zawm a ngaih thu a târ lang a ni. (Heb. 2:1, 3) Paula angin, keini pawh rinnaa chak lo kan unaute chungah kan beidawng mai lo va. Chu aiin, an chungah ngaihsakna dik tak lantîrin kan tichak zâwk a ni. Chutiang kawng chuan, kan hmangaih tih kan hriat chianttîr a. Kan thusawite ang chiahin, kan ṭawngkam ngeilnei tak leh zaidam tak chuan kan unaute chu a tichak thei a ni.

¹⁶ Paula chuan a unaute chu Jehova’n an thil ṭha tihte a hria tih a hriat chiantîr a. (Heb. 10:32-34) Rinnaa chak lo kan unaute kan ṭanpui  hunah chutiang chuan kan ti thei a ni. Thutak an rawn hmuh dân kan zâwt emaw, Jehova ṭanpuina an dawn laite ngaihtuah lêt tûrin kan fuih emaw thei a. Hun remchâng kan neihte chu, Jehova’n tûn hmaa a chunga an lantîr hmangaihna chu a theihnghilh lo tih leh nakin hunah pawh a thlahthlam lo vang tih hriat chiantîr nân kan hmang thei a. (Heb. 6:10; 13:5, 6) Chutianga inkawmna chuan kan unau duh takte chu Jehova rawngbâwl chhunzawm zêl tûrin a tichak thei a ni.

17. Eng ang thiamnate nge kan neih chhoh zêl theih?

¹⁷ In sakna lama hnathawk ṭhîntu chu hunte a liam zêl ruala a thiamna a pung chho zêl angin, keini pawh intihsâwt tawnna kawngah hma kan sâwn lehzual thei a. Mi dangte chu tûn hmaa fiahnate chhel taka lo tuar chhuaktute chanchin hrilhna hmangin, an fiahna tawhte chu chhel taka hmachhawn thei tûra chakna nei tûrin kan ṭanpui thei a ni. Mi dangte ṭhatna lai sawina hmangin remna kan awmtîr thei a, remna chu tihderthâwn a nih hunah kan humhim thei a, ngaih dân inan loh hunah remna kan awmtîr thei bawk. Chu bâkah, Bible thutak pawimawhte hrilhin, ṭanpuina ṭangkai tak pein, leh thlarau lama chak lote ṭanpuiin kan unaute rinna chu kan tichak zawm zêl thei a ni.

18. Eng nge tih i tum tlat?

¹⁸ Biakna atâna hman in sakna lama thawk kan unaute chuan hlimna leh lungawina an nei a. Keini pawhin an rinna tichak tûra kan unaute kan ṭanpui chuan, chutiang hlimna leh lungawina chu kan nei ve thei a ni. A tâwpa chhiat lam pan leh ṭhîn taksa tihchakna nêna inang lo takin, thlarau lama mi dangte tihchakna chuan chatuan a daih thei a ni. Chuvângin, ‘infuih tawna, intihsâwt tawn ṭheuh’ i tum tlat ang u!—1 Thes. 5:11.