1. Engtin nge Josefa chuan Pathianin uirêna chu “sual lian tak” angin a thlîr tih a hriat?

 JAKOBA fapa Josefa chuan fiahna khirh tak a hmachhawn a. Hmeichhe pakhatin, “Mi mutpui rawh,” tiin a thlêm ṭhîn a ni. Chu hmeichhia chu a pu Potiphara nupui a ni a. Josefa chuan a thlêmna chu a hnâwl a ni. Tûn laia mi ṭhenkhat chuan, ‘Engvângin nge chu thlêmna chu Josefa’n a hnâwl?’ tiin an ngaihtuah mai thei. Potiphara chu a awm si lo va. Chu bâkah, Josefa chu, chu ina bawih a ni a; chu thlêmna chu a hnâwl a nih chuan, a pu nupui chuan a chungah harsatna a thlen thei a. A pu nupui chuan thlêm nawn fo mah se, Josefa chuan a hnâwl tlat a ni. Engvângin nge? Ani chuan: “Engtin nge he sual lian tak hi tiin Pathian chunga thil ka tihsual theih ang?” tiin a sawi a ni.—Gen. 39:7-12.

2. Engtin nge Josefa chuan uirêna chu Pathian laka thil sual tihna a ni tih a hriat?

² Engtin nge Josefa chuan Pathianin uirena chu “thil sual lian tak” tihna angin a thlîr tih a hriat? A hnu kum za hnih vêlah chauh Israel mite chuan, “I uire tûr a ni lo,” tih thupêk chiang tak pawh telin Mosia Dân chu an dawng si a. (Ex. 20:14) Chuti chung pawhin, Josefa chuan Jehova’n nungchang bawlhhlawhna a thlîr dân hre thiam tûr khawpin ani chu a hre chiang a. Entîr nân, Josefa chuan Pathianin inneihna chu mipa leh hmeichhe inkârah chauh thleng tûrin a ruahman tih a hre chiang bawk. Chu bâkah, a pi Sari chu mi dang mutpui theihna dinhmun hlauhawm taka a awm lai khân, amah humhim tûra ṭum hnih lai Jehova a inrawlh dân pawh a hre ngei ang. Chutiang bawk chuan, Isaaka nupui Rebeki vênghim tûrin Pathian a inrawlh a ni. (Gen. 2:24; 12:14-20; 20:2-7; 26:6-11) Chûng thilthlengte a ngaihtuahna aṭangin, Josefa chuan  Pathian mithmuha thil dik leh dik lote chu a hre thiam a. Pathian a hmangaih avângin a tehna felte a ngaina a, chûngte chu zawm a tum tlat bawk a ni.

3. He thuziakah hian eng nge kan sawiho vang?

³ Felna i ngaina em? I ngaina ngei ang. Mahse, kan zavai hian ṭha famkim lo kan ni a, kan fîmkhur loh chuan felna chungchânga khawvêl thlîr dân chuan awlsam takin min thunun thei a ni. (Is. 5:20; Rom 12:2) Chuvângin, felna awmzia leh chumi ngainatna aṭanga hlâwkna kan neih dânte kan sawho vang a. Jehova tehnate ngaina lehzual tûra kan tih theih kawng thumte kan sawiho bawk ang.

4. Mi tam takin felna chungchângah eng ngaih dân dik lo nge an neih?

⁴ Mite’n mi fel chungchâng an ngaihtuah hian, mi tam tak chuan mahni induh tâwk tak, mi dangte ṭhat lohna sawi chhuah chîng, a nih loh leh mahni intifel tak tu emaw an ngaihtuah mai thei. Mahse, chûng miziate chu Pathian duh zâwng a ni lo. Isua leia a awm lai khân, sakhaw hruaitute chu felna chungchânga an tehna siamte avângin nasa takin a sawisêl a. (Thur. 7:16; Lk. 16:15) Felna dik tak chu engti kawng mahin mahni intihfelna lam a ni lo.

5. Bible sawi dân chuan felna chu eng nge ni? Entîrna pe rawh.

⁵ Felna chu mize duhawm tak a ni a. A awlsam zâwnga sawi chuan, chumi awmzia chu Pathian Jehova mithmuha thil dik tih hi a ni. Bible-a “felna” tih ṭawngkam hian tehna sâng ber—Jehova tehnate nunpuina a kâwk a. Entîr nân, Jehova chuan sumdâwngte chu “tehna dik tak” hmang tûrin thu a pe a. (Deut. 25:15) “Dik tak,” tia lehlin a tîra Hebrai thu mal hi “felna” tia lehlin theih a ni bawk. Chuvângin, Pathian mithmuha mi fel nih duhtu Kristian chuan, a sumdâwnna kawng engkimah dik takin thil a ti ang. Mi fel chuan rorêlna fel a ngaina a—dik lo taka mi dangte cheibâwl chu a duh lo. Felna ngaina tak zettu chuan ‘kawng tinrênga [Jehova] tilungawi tûrin,’ Jehova’n a thu tlûkna siamte a thlîr dân tûr chu ngun takin a ngaihtuah ṭhîn a ni.—Kol. 1:10-12.

6. Engvângin nge thil dik leh dik lo chungchânga Jehova tehnate chu kan rinngheh tlat theih? (Isaia 55:8, 9)

⁶ Bible chuan Jehova chu felna lo chhuahna Hnâr a ni tih a sawi a. Chuvângin, ani chu “dikna khurpui,” tia koh a ni. (Jer. 50:7) Min Siamtu a nih angin, Jehova chu thil dik leh dik lo chungchânga tehnate ṭha taka siam theitu awm chhun a ni a. Ani chu ṭha famkim a nih avângin, thil dik leh dik lo chungchânga a thlîr dânte chu ṭhat famkim lohna leh sualin a thunun fo ṭhin mihringte thlîr dân aiin nasa takin a chungnung zâwk a ni. (Thuf. 14:12; Isaia 55:8, 9 chhiar rawh.) Mahse, Pathian anpuia siam kan nih avângin, felna chungchânga a tehnate chu kan nunpui thei a. (Gen. 1:27) Chutianga nunpui chu kan duh a. Kan Pa kan hmangaihna chuan theih tâwp chhuaha amah entawn tûrin min chêttîr a ni.—Eph. 5:1

7. Engvângin nge tehna rin tlâk tak kan mamawh? Entîrna pe rawh.

⁷ Thil dik leh dik lo chungchânga Jehova tehnate zawm chu kan hlâwkpui a ni. Engvângin nge chutianga kan sawi theih? Bank zawng zawng hian pawisa hlutna chungchângah mahniin dânte siam ṭheuh ta se, a nih loh leh in sakna lam conpany-te chuan mahniin dân siam ṭheuh ta se, eng thil nge thleng ang han ngaihtuah teh. A buai nuai ngei ang. Chu bâkah, doctor-te chuan dam lo enkawl dân tûr chungchânga dân siamte an zawm loh chuan dam lovin a nun a chân phah thei a ni. Tehna rin tlâk takte chu min vênghimtu a ni tih a chiang hle. Chutiang bawkin, thil dik leh dik  lo chungchânga Pathian tehnate chuan min vênghim a ni.

8. Thil dik tih ngainatute chu eng malsâwmnain nge hmuak?

⁸ Jehova chuan a tehna zâwmtute chu mal a sâwm a. Ani chuan: “Mi felte chuan ram hi an luah ang a, a chhûngah hian kumkhuain an awm ang,” tiin min tiam a ni. (Sâm 37:29) Mi zawng zawngin Jehova tehnate an zui huna kan inpumkhat dân tûr te, inrem dân tûr te, leh hlim dân tûrte chu i mitthla thei em? Ani chuan chutiang nun chu chên tûrin a duh che a ni. Kan zavai hian felna ngainat chhan tûr ṭha tak kan nei ṭheuh tih a va chiang tak êm! Engtin nge chu mizia chu kan ngainat lehzual theih? Kan tih theih dân kawng thum i lo ngaihtuah ang u.

9. Engin nge felna ngaina tûra min ṭanpui ang?

⁹ Tih Dân 1: Tehnate Siamtu chu hmangaih rawh. Tehnate ngaina tûr chuan thil dik leh dik lo chungchânga tehnate Siamtu kan hmangaihna chu kan tihngheh lehzual a ngai a. Jehova kan hmangaihna a nasat poh leh, a tehna felte mila nun chu kan duh lehzual ang. Entîr nân: Adama leh Evi khân Jehova hmangaih se chuan, a thu an awih ngei ang.—Gen. 3:1-6, 16-19.

10. Jehova ngaihtuah dânte hre thiam lehzual tûrin Abrahama’n eng nge a tih?

¹⁰ Adama leh Evi thil sual tih ang tih chu kan duh lo ngei ang. Jehova chungchâng kan zir belh zêl a, a miziate kan ngaihhlut a, a ngaihtuah dânte hriatthiam tuma theih tâwp kan chhuah chuan, chutiang dinhmun chu kam pumpelh thei a ni. Chutianga kan tih chuan, Jehova kan hmangaihna chu a nghet lehzual ngei ang. Abrahama chungchâng hi han ngaihtuah teh. Ani chuan Jehova a hmangaih tak zet a. Jehova thu tlûkna siamte hriatthiam harsa a tih hunah pawh a chungah a hel ngai lo. Chu aiin, ani chu hriat chian lehzual a tum zâwk a ni. Entîr nân, Jehova’n Sodom leh Gomorra tihboral a tum tih a hriat khân, a tîrin Abrahama chuan “lei chung zawng zawng Rorêltu chuan” mi felte chu mi sualte ruala a tihboral ve a hlau hle a. Chu chu thil ni thei nia a ngaih loh avângin, inngaitlâwm takin Jehova hnênah zawhnate a zâwt ta a. Jehova chuan dawhthei takin a chhâng a. A tâwpah, Abrahama chuan Jehova’n mi zawng zawng thinlung a endik ṭhîn a, mi felte chu thil sual titute rualin a hrem ngai lo tih a hre thiam ta a ni.—Gen. 18:20-32.

11. Engtin nge Abrahama chuan Jehova a hmangaihna leh a rinna chu a lantîr?

¹¹ Abrahama chu Sodom leh Gomorra khawpui chungchânga Jehova nêna an inbiakna chuan a rilru a khawih hle a. A hma aiin a Pa a hmangaihna leh a zahna chu a nasa lehzual ngei ang. Kum tam tak hnuah Jehova a rinchhanna fiahtu dinhmun khirh tak a hmachhawn a. Pathian Jehova chuan Abrahama chu a hmangaih êm êm a fapa Isaaka hlân tûrin a ngên a ni. Hemi ṭumah hi chuan a Pathian chu a hriat chian tawh êm avângin eng mah a zâwt lo. Jehova’n ti tûra a ngente chu a ti mai a ni. Chutih rualin, a tih tûrte a inbuatsaih laia a rilru hrehawm dân tûr chu han ngaihtuah teh! Abrahama chuan Jehova chungchâng a hriatte chu ngun takin a ngaihtuah ngei ang. Jehova chuan fel lo tak leh hmangaihna nei lo takin thil eng mah a ti lo vang tih a hria a. Tirhkoh Paula sawi angin, Abrahama chuan a fapa duh tak Isaaka chu Jehova’n a kaitho thei tih a hria a ni. (Heb. 11:17-19) Dik tak chuan, Jehova’n Isaaka chu hnam puipa ber a la nih tûr thu a tiam a, chutih lai chuan Isaaka’n fa a la nei lo. Abrahama  chuan Pathian Jehova a hmangaih êm avângin a Pa chuan fel takin thil a ti ang tih a ring tlat a. Thil harsa tak ni mah se, a rinna chuan thuawih tûrin a chêttîr a ni.—Gen. 22:1-12.

12. Engtin nge Abrahama kan entawn theih? (Sâm 73:28)

¹² Engtin nge Abrahama kan entawn theih? Amah angin, Jehova chungchâng kan zir zawm zêl a ngai a. Chutianga kan tih chuan, Pathian kan hnaih lehzualin, kan hmangaih lehzual ang a. (Sâm 73:28 chhiar rawh.) Kan chhia leh ṭha hriatna chu Pathian ngaih dân nêna inmilin sawizawi a ni ang. (Heb. 5:14) Tu emawin thil dik lo ti tûra min thlêm hunah pawh kan hnâwl ang a. Kan Pa rilru natna thlen thei thilte leh amah nêna kan inlaichînna tichhe theitu tawh phawt chu kan hua ang. A nih leh, eng kawng dangin nge felna kan ngaina tih kan lantîr theih?

13. Engtin nge felna kawng kan zawh theih? (Thufingte 15:9)

¹³ Tih Dân 2: Felna i ngainat theih nân nî tin theih tâwp chhuah rawh. Tihrâwl chak tak neih kan duh chuan, nî tin kan taksa kan sawizawi a ngai a. Chutiang bawkin, Jehova’n thil dik nia a sawite ngaina tûrin theih tâwp kan chhuah a ngai a ni. Chu chu nî tina i tihtheih thil a ni a. Jehova chuan kan tlin tâwk a hria a, kan tih theih aia tam ti tûrin min beisei ngai lo. (Sâm 103:14) Ani chuan “Felna kawng zawhtu erawh chu a hmangaih ṭhîn,” tih min hrilh a ni. (Thufingte 15:9 chhiar rawh.) Jehova rawngbâwlnaa thiltum bîk kan insiam hian, hlen thei tûrin theih tâwp kan chhuah a. Felna kawng zawh tûr pawhin chutiang bawka theih tâwp kan chhuah a ngai a ni. Jehova chuan hunte a liam zêl ruala zawi zawia hmasâwn tûrin dawhthei takin min ṭanpui ang.—Sâm 84:5, 7.

14. “Felna âwmphaw” chu eng nge ni a, chu chu engvângin nge kan mamawh?

¹⁴ Jehova chuan felna chu phurrit a ni lo tih hmangaihna nei takin min hriatnawntîr a. (1 Joh. 5:3) Chu ai mahin, chu chu nî tina kan mawmawh min vênghimtu a ni. Tirhkoh Paula sawi thlarau lam râlthuam kha hre reng ang che. (Eph. 6:14-18) Sipai lung vênghimtu  râlthuam kha eng nge ni? Jehova tehna felte entîrtu “felna âwmphaw” a ni. Awmphawin lung a vênghim angin, Jehova tehna felte chuan entîr nei kan thinlung, chhûng lama kan nihna chu a vênghim thei a ni. Chuvângin, i râlthuama felna âwmphaw telh chu a va pawimawh tak êm!—Thuf. 4:23.

15. Engtin nge felna âwmphaw chu i hâk theih?

¹⁵ Engtin nge felna âwmphaw chu i hâk theih? Pathian tehnate mila nî tin duh thlanna siamna hmangin kan ha thei a ni. I thusawi tûr te, rimawi ngaihthlâk tûr te, film en tûr te, leh lehkhabu chhiar tûrte chungchânga thu tlûkna i siam hmain heti hian inzâwt ang che: ‘Eng ang ngaihtuahna nge min neihtîr ang? Jehova pawm zâwng a ni em? A nih loh leh, Jehova’n thil fel lo nia a thlîr—nungchang bawlhhlawhna te, nunrâwnna te, duhâmna te, leh mahni hmasialnate chawilârna lam a ni em?’ tiin. (Phil. 4:8) Pathian duh zâwng mila thu tlûkna i siam a nih chuan, i thinlung vênghim tûrin a tehna felte i inthununtîr tihna a ni ang.

16-17. Engtin nge Isaia 48:18-na chuan Jehova tehnate hmangin chatuanin kan nung thei tih min tiam?

¹⁶ Kum rei tak chhûng nî tina Jehova tehna felte i nunpui zawm zêl theih dâwn leh dâwn loh chungchâng i ngaihtuah tawh ngai em? Isaia 48:18-a kan hmuh Jehova hman entîrna hi han ngaihtuah teh. (Chhiar rawh.) Ani chuan kan felna chu “tuifinriat fâwn ang maiin” a awm thei tih min tiam a ni. Tuifinriat zau tak kama dinga, tui rawn fâwn rengte en angah han inmitthla teh. Chu dinhmun râlmuang takah chuan, tuifâwnte chu engtik nîah emaw a tâwp mai hlauhna i nei ang em? Nei lo ngei ang! Chûng tuifâwnte chu kum sâng tam tak chhûng tuifinriat kamah a lo fâwn tawh tih i hriat avângin a fâwn zawm zêl ang tih i chiang a ni.

¹⁷ I felna pawh tuifinriat fâwn ang mai chu a ni thei! Engtin nge? Thu tlûkna i siam a ngaih hunah, Jehova’n ti tûra a duh che chu ngaihtuah hmasa la. Tichuan, i thu tlûkna siam milin hma la ang che. I thu tlûkna siam tûr chu engtiang khawpa harsa pawh ni se, hmangaihna nei tak kan Pa chuan a tehna felte vawng tlat tûr leh chumi mila nî tina nun hmang tûrin a ṭanpui zêl ang che.—Is. 40:29-31.

18. Engvângin nge mahni tehnate hmanga mi dangte sawisêl chu kan pumpelh ang?

¹⁸ Tih dân 3: Rorêlna chu Jehova kutah dah rawh. Jehova tehna felte theih tâwp chhuaha nunpui tumin, mi dangte sawisêl leh mahni fel intihna chu kan pumpelh tûr a ni. Mahni tehna ṭanchhana rorêl tûra dikna nei ang maia mi dangte ngaihnêp aiin, Jehova chu “lei chung zawng zawng Rorêltu” a ni tih kan hre reng zâwk tûr a ni. (Gen. 18:25) Ani chuan chutianga rorêl theihna chu mihringte hnênah a pe lo. Dik tak chuan, Isua chuan: “Sawisêl suh u, sawisêla in awm loh nân,” tiin thu min pe a ni.—Mt. 7:1. *

19. Engtin nge Josefa’n Jehova rorêlna a rinchhan tih a lantîr?

¹⁹ Mi fel Josefa entawn tûr siam hi i lo ngaihtuah leh ang u. Ani chuan ṭha lo taka cheibâwltute pawh tiamin, mi dangte a sawisêl ngai lo va. A unaute ngeiin ṭha lo taka cheibâwlin, salah an hralh a, an pa ber hnênah Josefa chu thi tawh angin an hrilh a ni. Kum tam tak a liam hnuah, Josefa chu a chhûngte nên an inhmu leh a. Tûnah chuan, rorêltu thiltithei tak Josefa’n duh ni se chuan, an thiltih suaksual tak avângin a unaute chungah phuba a la thei a. A unaute chuan an thiltihte avânga  inchhîrna dik tak an lantîr chung pawhin, Josefa’n an chunga phuba a lâk chu an hlau hle a ni. Mahse, Josefa chuan an hnênah: “Hlau suh u: Pathian aiawh em ka nih?” tiin a hrilh a. (Gen. 37:18-20, 27, 28, 31-35; 50:15-21) Ani chuan inngaitlâwm takin rorêlna chu Jehova kutah a dah a ni.

20-21. Engtin nge mahni fel intihna chu kan pumpeh theih?

²⁰ Josefa angin, rorêlna chu Jehova kutah kan dah tûr a ni. Entîr nân, kan unaute chu an thiltihte ti tûra chêttîrtu chu kan hre lo va. Mi dangte thinlunga awmte chu kan hre thei lo va: ‘Jehova chauhvin rilru a bûk’ thei a ni. (Thuf. 16:2) Ani chuan ṭobul leh hnam inang lo mi chi tinte chu a hmangaih vek a. Chu bâkah, kan thinlung “inhawng ve” tûrin min fuih a ni. (2 Kor. 6:13) Chuvângin, kan unau zawng zawngte chu sawisêl lova hmangaih kan tum a ni.

²¹ Chu chu kohhran chhûnga mi ni lote pawh kan sawisêl tûr a ni lo tihna a ni bawk. (1 Tim. 2:3, 4) I rinna ṭâwmpui lotu i chhûngte chu, “Thutakah a rawn lût ngai lo vang,” tiin i sawisêl ang em? Sawisêl lo vang, chu chu chapona, mahni fel intihna a ni ngei ang. Jehova chuan “ram tina mi zawng zawng” chu inlamlêtna hun remchâng a la pe reng a ni. (Tirh. 17:30) Chuvângin, mahni fel intihna chu fel lohna târ langtu a ni tih hre reng ang che.

22. Engvângin nge felna ngainat chu i tum tlat ang?

²² Jehova tehna felte kan ngainatna chuan min tihlimin, mi dangte tân entawn tûr ṭha min nihtîr ang a, chu chuan anni chu keimahni leh Pathian Jehova a hnaih lehzualtîr ang. Chuvângin, “Felnaa rilṭâma tuihâlte” i ni chhunzawm zêl ang u. (Mt. 5:6) Jehova chuan theih tâwp i chhuahnate chu a hriain, i hmasâwnna chuan a tilâwm hle tih ring tlat ang che. He khawvêla mite hi fel lohna khurah lût thûk telh telh mah se, thlamuanna i nei thei a ni. Chuvângin, “[Jehova] chuan mi felte chu a hmangaih ṭhîn,” tih hre reng ang che!—Sâm 146:8.