1. Engtin nge ‘thutak’ kan hmuh dân sawina chu kan hlâwkpui theih?

 “ENGTIN nge thutak i hmuh?” He zawhna hi vawi tam tak i chhâng tawh ṭhîn ngei ang. Hei hi unaute hriat chian kan duh huna kan zawh ṭhin zawhna hmasa berte zînga mi a ni. Kan unaute’n Pathian Jehova an hriata an hmangaih chhoh dân an sawite ngaihthlâk leh thutakin kan tâna awmzia a neih dânte hrilh chu nuam kan ti a. (Rom 1:11) Chutianga titihona chuan kan tâna thutak a hlutzia min hriatnawntîr a. ‘Thutaka awm’ reng kan tumna—Jehova malsâwmna leh duhsakna thlentu nun kawng zawh reng kan tumna—chu a tinghet lehzual bawk a ni.—3 Joh. 4.

2. He thuziakah hian eng nge kan sawiho vang?

² He thuziakah hian, thutak kan hmangaih chhan ṭhenkhat kan ennawn ang a. He thilpêk hlu tak hi kan ngaina tih kan lantîr zawm zêl theih dân kan sawiho bawk ang. Chumi enawnna chuan thutak lama min hîp tûra Jehova thiltihte avânga kan lâwmna chu a tipung lehzual ang a. (Joh. 6:44) Mi dangte hnêna Bible thutak zirtîr duhna min neihtîr lehzual bawk ang.

3. Thutak kan ngainat chhan pawimawh ber chu eng nge ni?

³ Thutak ngainat chhan tam tak kan nei a. A pawimawh berah chuan, thutak lo chhuahna Hnâr Pathian Jehova chu kan hmangaih a ni. A Thu, Bible kal tlangin ani chu lei leh vâna thil awm zawng zawng Siamtu engkimtithei a ni tih leh min ngaihsak tak zettu, hmangaihna nei tak kan Pa vâna mi a ni tih  kan hria a. (1 Pet. 5:7) Kan Pathian chu “lainatnaa khat, mi khawngaih thei tak, thin nel tak, ngilneihna leh thu tak ngah” a ni tih kan hre bawk. (Ex. 34:6) Ani chuan rorêlna fel a ngaina a ni. (Is. 61:8) Hrehawm kan tuar a hmuh hian a rilru a nain, a hun ruata hrehawm tawrhna zawng zawng tihtâwp chu a châk tawh hle a ni. (Jer. 29:11) Chu hun chu a va nghahhlelhawm tawh tak êm! Chu chu Pathian Jehova kan hmangaih êm êm chhan a ni pawh chu thil mak a ni lo!

4-5. Engvângin nge tirhkoh Paula’n kan beiseina chu thîrchakai nêna a tehkhin?

⁴ Thutak kan ngainat chhan dang leh chu eng nge ni? Hlâwkna nasa tak min thlen vâng a ni. Entîrna pakhat lo ngaihtuah ta ila. Bible thutakah chuan nakin hun atâna kan beiseina pawh a tel a. Chu kan beiseina hlutzia târ lan nân tirhkoh Paula chuan: “Chu beiseina chu nunna thîrchakaiah kan nei a, rinawm leh nghet tak a ni,” tiin a ziak a ni. (Heb. 6:19) Thîrchakaiin nghet taka lawng a chelh ding angin, Bible ṭanchhan kan beiseina chuan fiahnate kan tawh hunah nghet taka awm tûrin min ṭanpui thei a ni.

⁵ Chu a thuziakah chuan, tirhkoh Paula chuan hriak thih Kristiante neih vân lam beiseina chungchâng a sawi a. Mahse, chûng thute chu lei paradis-a chatuan nun beiseina neite tân pawh hman theih a ni. (Joh. 3:16) Chatuan nunna chungchâng zirna chuan nun awmze nei tak min pe tih a chiang hle.

6-7. Engtin nge Unaunu Yvonne-i chuan nakin hun chungchânga thutak a zirna chu a hlâwkpui?

⁶ Unaunu Yvonne-i thiltawn hi han ngaihtuah teh. Thutaka seilian a ni lo va, a naupan lai chuan thih a hlau thei hle a ni. A rilrua châm reng: “Engtik nîah emaw chuan nak tûk a awm tawh lo vang,” tih thu a chhiar lai chu a hre reng a. Ani chuan: “Chûng thute avângin ka zân muhîl laite pawh ṭhangharhin nakin hun chungchâng ka ngaihtuah ṭhîn. ‘Nun nachhan tûr engemaw chu a awm ngei ang le,’ tiin ka ngaihtuah a. ‘Engvânga heta lo awm nge ka nih?’ Thih ka duh lo!” tiin a sawi a ni.

⁷ A hnuah, tleirâwl Yvonne-i chu Jehova Thuhretute nên an intawng a. Ani chuan: “Lei Paradis-a chatuana nun beiseina chu ka nei thei tih ka ring ta a ni,” tiin a sawi. Engtin nge thutak a zirna chu a hlâwkpui? Ani chuan: “Nakin hun leh thihna chungchâng ngaihtuah hahin zânah ka ṭhangharh tawh lo,” tiin a sawi. Unaunu Yvonne-i tân chuan thutak hi a hlu hle a, ani chuan nakin hun beiseina chungchâng mi dangte hnêna hriattîrna aṭangin lungawina nasa tak a nei tih chu i ngaihtuah thei ngei ang.—1 Tim. 4:16.

8-9. (a) Isua tehkhin thusawi pakhatah, pa pakhat chuan ro phûm rûk a hmuh chhuah chu engtiang khawpin nge a ngaihhlut? (b) Thutak chu engtiang khawpin nge i ngaihhlut?

⁸ Bible thutakah chuan Pathian Ram chungchâng chanchin ṭha pawh a tel a. Isua chuan chu Lalram chungchâng thutak chu ro phûm rûk nên a tehkhin a ni. Matthaia 13:44-ah Isua chuan: “Vân ram chu lova ro phûm rûk ang a ni; chu chu miin a hmu a, a thukru a; a lâwm avângin a neih zawng zawng chu a va hralh a, chu lo chu a lei ta a,” tiin a sawi. Chu pa chuan ro chu a zawng lo tih chhinchhiah ang che. Mahse, a hmuh tâkah chuan chu ro chu a neih theih nân thil tam tak a chân a. A nihna takah chuan, a thil neih zawng zawng a hralh vek a ni. Engvângin nge? Chu ro hlutzia chu a hriat avângin. A thil chân tak zawng zawngte ai pawhin a lêt tam takin a hlu zâwk a ni.

⁹ Chutiang chu thutak i thlîr dân a ni em? A ni ngei ang! A Lalram rorêlna hnuaia chatuan nun beiseina nei chunga Jehova rawng kan bâwlna aṭanga kan neih hlimna chu  khawvêlin min pêk theih eng thil nên mah khaikhin theih rual a ni lo tih kan hria. Jehova nêna inlaichînna ṭha tak kan neih theihna chanvo hlu chuan inpêkna kan neih eng pawh chu a phû a. Kan hlimna nasa ber chu ‘kawng tinrênga amah tihlungawi’ hi a ni.—Kol. 1:10-12.

10-11. Engin nge Michael-a chu a nun kawng thlâk tûra chêttîr?

¹⁰ Kan zînga tam tak chuan Jehova duhsakna dawng tûrin mahni inpêkna lian tham tak an nei a. Mi ṭhenkhat chuan khawvêl lama an ei zawnna hna ṭha takte an bânsan a. Mi dangte chuan hausak ûmna chu an bânsan a ni. Mi dang lehte chuan Jehova chungchâng an zir hnuah an nun dânte an thlâkthleng thawk bawk. Chutiang chu Michael-a’n a tawng a ni. Ani chu thutaka seilian a ni lo va. A naupan lai chuan karate a zir ṭhîn a. Ani chuan: “Taksa hrisêl tak leh fit taka invawn reng chu ka tân a pawimawh hle a. Hneh theih loh ang hiala inhriat chângte ka nei ṭhîn,” tiin a sawi. Mahse, Bible a zir hnu chuan, Jehova’n tharum thawhna a thlîr dân chu a hre ta a. (Sâm 11:5) Amah Bible zirpuitu nupa tuak khat chungchângah Michael-a chuan: “Karate bânsan tûrin min hrilh ngai lo; Bible thutak min zirpui zawm zêl mai a ni,” tiin a sawi.

¹¹ Michael-a chuan Jehova chungchâng a zir tam poh leh a hmangaihna a nasa lehzual a. A bîk takin, Jehova’n amah betute chunga a lantîr khawngaihna chuan a rilru a khawih hle a ni. Hunte a liam zêl chuan, a nunah thu tlûkna lian tham tak a siam a ngai tih a hre ta a. Ani chuan, “Karate bânsan chu ka thiltih tawh azawnga harsa ber a ni dâwn tih ka hria. Mahse, chu chuan Jehova a tilâwm dâwn tih ka hre bawk a, a rawngbâwlna chuan inpêkna eng pawh a phû tih ka ring tlat a ni,” tiin a sawi. Michael-a chuan thutak chu a hlu hle tih a hria a, chu chuan a nunah inthlâk danglamna lian tak siam tûrin a chêttîr a ni.—Jak. 1:25.

12-13. Engtin nge Bible thutakin Mayli-i chu a ṭanpui?

¹² Thutak hlutzia târ lan nân, Bible chuan thutak chu thim kâra khawvâr êng tak nên a tehkhin a ni. (Sâm 119:105; Eph. 5:8-10) Azerbaijan rama awm Unaunu Mayli-i chuan Bible aṭanga ṭanpuina a dawnte chu a ngaihlu tak zet a. Ani chu sakhaw thuhmun lo chhûngkuaa seilian a ni a. A pa chu Muslim a ni a, a nu erawh Juda sakhaw vuantu a ni thung. Mayli-i chuan: “Pathian a awm tih rinhlelhna nei lo mah ila, ka rilru tibuaitu thil dang a awm a. ‘Engvângin nge Pathianin mihringte hi a siam a, engvângin nge mi chu a dam chhûnga hrehawm tam tak a tawrh hnua meidîla chatuana nghaisak tûra siam a nih?’ tiin ka ngaihtuah ṭhîn a. Mi tam takin khawvêla thilthleng zawng zawngte hi Pathian rem ruat vek nia an sawi avângin, ‘Pathian chuan a duh dâna mihringte min thunun hnuah, hrehawm kan tuar lai chu hmuhnawm ti takin min thlîr reng em ni?’ tia ngaihtuahna ka nei hial a ni,” tiin a sawi.

¹³ Mayli-i chuan a zawhnate chhânna chu a zawng zawm zêl a. A hnuah, Bible zirin thutakah a awm ta a ni. Ani chuan, “Bible-a thu dik rinchhan tlâk takte chuan mi hlim thei tak ni tûrin min ṭanpui a. Bible aṭanga ka hmuh hrilhfiahna chiang takte chuan chhûng rila thlamuanna min pe a ni,” tiin a sawi. Mayli-i ang bawkin, kan zavai hian, “a êng mak taka lût tûra [min] kotu” Jehova chu kan fak thei a ni.—1 Pet. 2:9.

14. Engtin nge thutak kan ngainat lehzual theih? (“ Tehkhinna Dangte,” tih bâwm chu en bawk rawh.)

¹⁴ Kan hriat tâkte kha thutak hlutzia târ langtu entîrna ṭhenkhat mai an ni a. Thiltawn dang tam tak pawh in la hre ngei ang. Mi mala inzirna i neih hunah thutak kan ngainat  a ngaih chhan dangte hre tûrin engvângin nge hma i lâk loh vang? Thutak kan ngainat poh leh kan ngainatzia lantîr dân kawng kan hre tam lehzual ang.

15. Thutak kan ngainatzia kan lantîr theih dân kawng khat chu eng nge ni?

¹⁵ Bible leh Bible ṭanchhan thu leh hla chhuahte zir ziahna hmangin thutak kan ngainatzia kan lantîr thei a. Tihah chuan, thutaka kan awmna chu eng ang khawpa rei pawh ni tawh mah se, zir tûr tam tak kan la nei reng a ni. Vênnainsâng chhuak hmasa ber chuan heti hian a sawi a ni: “Thutak chu ramhnuaia pangpâr pakhat, a chhehvêl hnim buk takte’n an hual vêl leh an khuh bo ṭêp ang chu a ni a. Zawn hmuh i duh chuan tih tak zetin i zawng tûr a ni a. . . . Neih i duh chuan theih tâwp i chhuah tûr a ni. Thutak pâr pakhat maiin lungawi suh. . . . Lâk belh zêl la, zawn belh zêl rawh,” tiin. Inzirna neih hi thil awlsam a ni lo; mahse, chutianga theih tâwp chhuahna chu manhla tak a ni.

16. Eng zir dân nge i hlâwkpui? (Thufingte 2:4-6)

¹⁶ Lehkha chhiar leh zir chu kan nuam tih zâwng a ni vek lo. Mahse, Jehova chuan thutak hriatthiamna thûk tak kan neih theih nâna  ‘zawng’ chhunzawm zêl tûrin min sâwm a. (Thufingte 2:4-6 chhiar rawh.) Chutianga theih tâwp chhuahna chu eng lai pawhin kan hlâwkpui ṭhîn a ni. Unau Corey-a chuan mi mala a Bible chhiarna chungchângah châng khat tê têa a zir chian ṭhin thu a sawi a. Ani chuan: “Footnote zawng zawngte chu ka chhiar vek a, a hrilhfiahna dangte ka en vek bâkah, zir bingna ṭhenkhat ka neih belh a. . . . Chutianga Bible chhiarna chuan min ṭanpui nasa hle!” tiin a sawi a ni. Corey-a tih dân emaw, tih dân dang kan hmang emaw pawh ni se, inzirna atân hun pe a, theih tâwp kan chhuah hian thutak kan ngaihhlutzia kan lantîr tihna a ni.—Sâm 1:1-3.

17. Thutak nunpui tih awmzia chu eng nge ni? (Jakoba 1:25)

¹⁷ Ni e, thutak zir satliah mai chu a tâwk lo tih kan hria a. Hlâwkpui pumhlûm tûr chuan thutak chu kan nunpui a ngai a; chumi awmzia chu kan thu zirte a takin kan nunpui tûr tihna a ni. Chutianga kan tih chauhvin thutak chuan hlimna dik tak min pe ang. (Jakoba 1:25 chhiar rawh.) Thutak kan nunpui tih engtin nge kan chian theih? Chumi chungchângah unaupa pakhat chuan thutak kan nunpuina laite leh nunpui lehzual kan ngaihna laite hre tûra mahni inenfiah tûrin thurâwn a pe a. Tirhkoh Paula pawhin: “Eng pawh ni sela, kan thlen chin aṭang khân hma i sâwn zêl ang u,” tiin a sawi a ni.—Phil. 3:16.

18. Engvângin nge ‘thutaka awm reng’ tûra theih tâwp kan chhuah?

¹⁸ ‘Thutaka awm reng’ tûra theih tâwp kan chhuah avânga kan dawn hlâwknate chu han ngaihtuah teh! Mahni nun kan tihmasâwn mai ni lovin, Jehova leh kan Kristian unaute thinlung kan tilâwm bawk a ni. (Thuf. 27:11; 3 Joh. 4) Chu aia thutak ngainat leh nunpui chhan tûr ṭha zâwk a awm thei dâwn em ni?